Silchar, March 18, 2016 (Virthli): Cachar phairuoma a vawikhatna dingin ei hnam thuoitu Pu Lalthomlien Hmar, Chairman, Barak Valley Hill Tribe Development Council nilai mek le Hmar Inpui le HYA Barak Valley Region a President ni bawk chun zani March 18, 2016 khan 13-Lakhipur Assembly Constituency a Independent candidate dingin Nomination a thelut tah.
Nomination paper a file zo huna chanchinbumihai inpawlpuina neiin, Independent Candidate a ngir dingin thutlukna a siem thu le JD (U), AIUDF le RJD in support an pekthu a hril.

Barak Valley ah tribal population thahnem tawk tak el a uma, India in zalenna a hmu a'nthawk tribal mi vawikhat khawm an la thlangtling ngainaw thu hai Pu Lalthomlien Hmar chun a hril. A hril peina a chun Cachar tribal mi hmasatak le tribal hminga election ngira an hamthatna hai suolsuok a tumna chu a uongpui hle a, Lakhipur constituency ringawta tribal voters 17,000 um haiin an support ding thu le All Assam Tribal Sangha, punji headman hai povin support an pek ding thu hai a hril.

Pu Lalthomlien Hmar chun tribal mi vawikhat khawm thlangtlinga an la um naw thu le tribal hnam mi hrim hrim political party haiin an ticket a inngir tir an la nei ngai naw chu pawi a ti thu a hril.

Suk nawmnat le ngaitha pawla thang hlak, an rawl hai khawm Assembly ah hrillang phak ni ngai lo, socio-economic development chungchanga hmalakna mumal um ngai lo, mipui mamaw hieng inchukna, insukhlimna, tui le health care services mumal lo hai hi a tling chun a ngaipawimaw hmasatak dingin a hrila, mipui hai a bikin tribal hnam hai suklawm chu a thiltum niin a hril bawk a nih. Tribal hnam hrang hrang haiin an ditsak le chona an pek leia nomination paper hi a thelut niin a hril bawk.



Pu Lalthomlien Hmar chun ruling party Congress chun kum sawm tel zet indiklo taka ro rel hlak chu tuta vel hin Lakhipur mipui a bik takin tribal haiin hnawl tang an ta, Independent candidate Sanjay Thakur chu an khingpui tak dinga a hmu thu le Congress MLA nilai zing Pu Rajdeep Goala chu inlang phak ta nawh tiin a hril bawk.

Post a Comment

Powered by Blogger.