CCPUR | Virthli News: March 19, 2016 khan Rengkai Lalnu (L) Pi Kholpi Joute Hrietzingna Lungdaw Rengkai Lal cemetery le Pu JC Chongkholien (Chief of Rengkai) Compound a (L) Pi Kholpi hrietzingna dinga bawl In hawngna ropui taka nei a nih.

Lungdaw hawngna hi Rev. Rosung Sinate in a nei a. Memorial Song, "Rengkhawpui Lalnu, i pamhmai ngei" ti hla (Composed by- Solomon V. Hmar) chu Rebecca, Grace le Lalditum haiin an sak a. In hawngna chu Rev. Darsanglien Ruolngul in a nei a nih. Hi In hi Lift khawm fit vawng a ni a a changkang hle.

Hi huna hin kohran tum tum a thuoitu, sawrkar le khawtlanga thuoitu, milien milal tam tak, mipui sang tel an fekhawma, chuonghai lai chun Pu Lunhmingthang Haokip DC, CCPur, Pu PL Thanga IAS le mi dang dang tam tak an thang. Rengkai VA, Val-Upa, HWA, HYA, ROM le mi dang dangin hun an hmanga Rengkai khuo Lal Pu JC Chongkholien chawimawina thilpek an inhlan tawl. Hi huna hun hmangtuhai chun Pi Kholpi le a pasal chu ngaisangum an ti thu, mi rethei-mihausa thlierhran lo, mi taima anni thuhai an hrillangsa bawk.

Blessed Choir le ICI Central Choir khawmin hla'n mipui fekhawm hai an in awi a. Solomon V. Hmar Pathien-in hla a pek hai, (L) Pi Kholpi hrietzingna dinga a'nhlan Hlabu Tlangzarna hun Rev. Mangsawiluoi in a nei a. Gospel Message hrilna Upa Lalthankhuma in a nei zovin Joufonlien Joute (Inneitu) in lawmthuhrilna a hmangzovin Upa Damkhothang-in hun tawp tawngtaina le ruoi inhlanna a nei a. Mipui sang tel in ruoi an kiltlang a nih. Hi ruoi thena a ding hin ei hriet chin ah Bawng 6, Vawk 4, Kel 20 vel baka Nga le Ar hai khawm iemanizat mipui fak dinga buotsai a nih. Mipui fekhawmhai hi Refreshment tuihnai tak el Frooti (theitui) sem a ni bawk. Hiengang khawpa ropui hrietzingna Lungdaw le In hawngna hunser hmanga um hi a la vang hle a nih.

Rengkai Lal sungkuo hai hi Gospel Chanchintha hrildarna kawnga an thaw hlawk hle a, chuchu an hung inthlasawng pei a nih.

-Reporting & Photo: Muona Infimate (Virthli News)



Post a Comment

Powered by Blogger.