Responsive Ad Slot

HSA GHQ in inchukna le inzawmin hma nasa takin lak a tum

Tuesday, March 29, 2016

/ Published by VIRTHLI
CCpur, March 29, 2016 (Virthli): Hmar Students Association (HSA) General Headquarters chun March 26, 2016 khan HSA Office, Rengkai hmunah Central Executive Meeting neiin ro tamtak an rela, hieng a tam lem chu inchukna tieng sukhrat nawk tumna le inzawm a nih.

An rorel thenkhat hai chu; Assam a Hmar hai issue le inzawma Assam le Nagaland Governor kuoma HSA hminga 55th General Assembly huna memorandum pekluta um bawzui ding, HSA huopchin bielhaia inchukna hmun (educational institution) hai sukhrat le suk changtlungna ding beiseina-in a ngirhmun chieng nawkzuola hrietchieng dan dinga hma lak nawk zuol, tuta term sunga education campaign thawna ding hmunhai detail survey thaw a, a tul anga hma lak ding.

HSA member, taksa khawsakna tienga harsa zuol, lekha inchuk inhnik le beiseium hai (High school level chin) a mi Aid (thangpuina) pek dingin an rel bakah, a bul tanna dingin Churachandpur (Tuithaphai) sunga mi thangpuina phu hai zawngdawk le thlangdawka tukum sung ngeia naupang chawm tan ding, Dr. Rochunga Pudaite ruong vuiliem nia HSA GHQ President in a lo puong ta ang ngeiin tuta HSA Campus-a Tribal Hostel bawl meka um hi “Dr. Rochunga Pudaite Memorial Tribal Hostel” tia ko ta dingin official takin an namdet bawk.

Parbung, Patpuihmun le Saikawt (Manipur) haia Public Sector Bank a um ngei theina dingin HSA in hma la sien, Jiribam Sub-Division, Revenue District puitlinga Manipur sawrkarin a siem tum hi Hmar hai dikna le chanvohai sukbona le neksawrna ni thei dinga anlang hi HSA chun tha a ti naw thu le hilai hmun le ram sunga ei dikna le chanvo hai humhim dingin theitawpin HSA in hma la sien an ti bawk a nih.   

Manipura Anti Tribal Bill pathum hai le inzawma JAC indin a ni dan, tu chena a hma lakna le ngirhmunhai report an ngaithlaka tha huntawk an thu le hi thu le inzawma HSA Churachandpur JHQ thuoituhaiin mawphurna an lo lak angin thu nawk um hma po chu an mawphurna la chel zawm pei hai sien ti a nih.

Inchuklai Nun (HSA Magazine) sukhring nawk ngei ding le HSA Common ID Card le Kum Thupuong design hai mipui le member hai hmang thei dingin HSA GHQ Adviser, Dr. John H. Pulamte’n tlangzarna a nei a nih.



Don't Miss
© all rights reserved
made with by Simon L Infimate