Drugs Rehab. & Women Care Home hawng
CCPUR: Ms Rebeck Hmar le a sung han an pa fam tah Dr Zarzolien, Associate Professor, Lamka College hrietzingna dinga Saikawt Vengtang, Near, Saikawt PHC a Roshni Bhawan (Drugs Rehabilitation and Women Care Home) an indin chu zani 12:30 khan Mr Lalhrillien, MDC, Saikawt in khuolliena thangin a hawng.



Hi huna hin T. Dongzakai Gangte, Elder, Beth­Israel & Chief of Hill Town chun (L) Dr Zarzolien hrietzingna lungdaw (Memorial stone) hawngin building leh Pathien kuoma tawngtainain an hlan.

Pu Hrila, MDC chun, inruithei suoka intang hai enkawlna dinga a biel sunga hiengang Home indina a umna thuah an dintu hai chunga lawmthu a hril a, Home­a um hai Pathien thu leh tha taka enkawl dingin an fui. A thangpui thei ang anga a thangpui pei ding thu a hril.

Roshni Bhawan hi mi 50 um theina a ni a, nuhmei hai ta dingin special care pek ding le khawsakna harsa zuol le fahra hai khawm an chanchin tha taka suizuiin a tul angin a thlawna enkawl tum a nih tiin ei thu dawngna chun a hril.

KSDDC in tiemchin umlo bandh
CCPUR: Khousabung Sub­Division Demand Committee (KSDDC) chun March 24, 2016 nia meeting huna an rel dungzuiin March 27, 2016 (Pathienni) zanril­a intahwk Churachandpur District le Tiddim Road­ah tiemchin umlo (Indefinite) Bandh an thaw ding thu March 26, 2016 nia  thusuok an siema chun an zieklang.

Manipur Cabinet in Thangting SDO/BDO chu Kangvai SDO/BDO a thlangtleng dingin a rel a. Hi chungthua hin KSDDC chun Khousabung headquarters a hmang ding le ‘Khuosabung SDO/BDO’ a thlakthleng dingin Manipur sawrkar an ngen a. Amiruokchu, an ngenna state sawrkarin a ngaisak naw bakah March 22, 2016 nia protest an nei huna Kwakta hmuna  Protestors hai chunga Police hai chetna chu KSDDC chun nasa taka an dem thu an puong a, hi thil tlung dodalnaa tiemchin umlo bandh hi thaw an tum a ni thu an puong bawk.

Bandh hin essential services hai chu huomnaw ni a, Bandh leia buoina le thil ditumlo a lo tlung chun State sawrkar in maw phur a tih tiin KSDDC thusuok chun a hril. Mipui hai chu an hmalakna thlawp dingin an ngen bawk.

ZC Chairman dingin B. Dongzalian Simte
CCPUR: Zanikhan Zomi Complex, Khominthang, New Lamka­ah Election Commission inrawinain kum 2016­18 sunga Zomi Council Chairman ding thlangna nei a nih. Hi huna hin interim Chairman ni lai mek B. Dongzalian chu ZC Chairman dinga thlangtling a nih.



Candidate pahni VPC a inthawk K. William le STC a inthawk B. Dongzalian an ngir a, Zomi a thang tribe 9 haia inthawk palai 5 seng, frontal organisation a inthawk palai 2 seng; ZC Chairman le Secy. hlui hai bakah Zomi sunga Elected MDCs han vote an thlak a, vote 83 thlak a ni a, invalid vote 1 a um a, vote 41 ve ve an hmu leiin ZC Constitution dungzuiin Chief Election Commission T. Ginzamang Zomi in B. Dongzalian thlawp zawnga vote pein B. Dongzalian hi ZCChairmman dinga tlangtlinga puong a nih. B. Dongzalian hin Chief Election Commission hmaah Chairman dinga intiemkamna a nei nghal.

Thangpuina sum pek thei zing a nih
CCPUR: March 22, 2016 nia mi kut tuora thi ni ngei dinga ring Tamil Nadu­a Madurai hmuna lampui sira a thisaa hmu Darliensang Darngawn s/o Hmangaithang, Tuisen, Manipur ruong an khuo phurtlung a ni ngei theina dingin Chennai­a Hmar um han hma an lak mek a. A pa biekpaw a ni hnunga sum harsatna leia a ruong ur hmang el dingin ti sienkhawm hnam thuoitu le tlawmngai pawl han a ruong hi mawihnai taka vuiliem annawleh an khuo phurtlung a ni theina dingin hma an lak mek a. Sum tam tak mamaw a ni leiin thangpuina pe nuom hai ta dingin a hnuoia hmun or Account No. haia hin pawisa pek thei zing a nih.
1.Christopher Lalrothang
A/C No 30136345788
SBI Bikash Bhawan
IFSC: sbin0007816
#. +91 9836 4366 84
CCPUR­AH
2. Alan Zonunsang
SBI Churachandpur Branch
Code No: 6182
IFSC CODE: SBIN0006182
Account No: 30707139186
# +91 9862016963

Good Friday hmang; vawisun Easter Sunday
CCPUR: March 25, 2016 khan Khawvel pumpuia Kristien hai chun Good Friday an hmang. Churachandpur District­a khawm Kohran tin han khawvel mihriem suola tlu ta hai sandamna dinga Kross lera Isu Krista in tlanna sin a thaw ni champha hmangin Biekin program an hmang tawl a, Kohran thenkhat chun ruoithe meuin hun an hmang bawk.

March 27, 2016 (Pathienni) hin Kohran tum tum hai chun Kraws lera Isu Krista in thina hnea a tho nawkna champha Easter Sunday hmang nawk an tih. Vawisun khawm hin Kohran thenkhat hai chun ruoithein hi hun hi hmang nawk an tih.

Essay Writing Competition
CCPUR: All Tribal Movement Lamka (ATML) hmalaknain zani zantieng 3PM khan District Hospital Morgue­ah 1st Phase Class III­VI inchuklai hai ta dingin August 31, 2015 incident ti thupui hmangin Essay Writing Competition nei a nih. Hi huna hin School tum tuma inthawk mi 8 an thang a, 1st, 2nd le 3rd bakah 2nd phase­ah Class VII­X inchulai le 3rd Phase­ah College level le Sr Citizen level chenah ATML chun Essay writing competition buotsai a tum.

Lawmman ding sum umsa a umnaw leiin thangpuina pe nuom han SBI A/C No. 33908691957 (Holder name Chinkhen Thang) ah pek thei ning a tih.

PM, Modi in Assam-ah vote a campaign; Ni 2 sungin hmun 7 ah thu a hril ding
TINSUKIA: Assam State­a April 4 & 11, 2016 haia Assembly seats 126 haia inthlangna hung um ding le inzawmin PM Narendra Modi in March 26, 2016 khan Assam­ah Vote campaign a tan a, zanikhan Tinsukia le hmun dang dang haiah vote a campaign. Assam State­a hmun pasari haiah thu h ril a tih. BJP chun Assembly seats 126 um laia seats 91 haiah candidates an nei. Kum 2014 a 14th Lok Sabha Election huna khan BJP in seats 7 ah hlawtlingna an chang a nih.

Zanita Tinsukia hmuna Modi in mipui pungkhawm hai hmaa thu a hrilnaa chun, Assam CM Tarun Gogoi hi kan khingpui nawh. Mani neka upa hai leh an inkhing ngai nawh. Mimal le party bika inkhingpui ka nei nawh. Kan khingpui chu fakrukna le retheina a nih. Ka naupang laiin thingpui ka zawr hlak a, chu huna chun Assam thingpui fea siem ngei thingpui a nih ka lo zawr hlak. Tarun Gogoi CM nina hnuoia Congress in kum 15 zet sawrkarna an chel ta a, tuta tuma election a hin hnebana BJP in sawrkarna an hung chel ngei ka beisei. Hun la hung tlung dingah Assam CM dingin Union Minister for Sports & Youth Affairs Sarbananda Sonowal, Tinsukia bieltu MP ngei ka hugn thedawk a ni a, kei le Delhi (Centre) ta ding chun channa a nih. Ama hi ka minister pawimawhai laia pakhat a nih. Amiruokchu, Asam ram mipui hmakhuo ngaina lei le Assam ram le a mipuihai rawngbawltu dinga ka hugn tir a nih. Assam hi India rama rethei tak state 5 hai laia thang a ni a. A hma khan state hausa takhai laia tiemsa a ni hlak, an leh tu suk pasiet am a na? Thil dang ka dit nawh, Sarbananda hi kum 5 sung hun pe ro. Tuta tuma election hin Assam chu CM naupang le tuontha a hung pek ding a nih. Tuta inthawk hun sawtnawteah Assam Schools astudents han A for Assam ti an hung inchuk vat ta ding a nih. Assam suk hmasawn hi ka party thiltum a nih. Unemployment problem hi burning issue a ni a, India rama unemployment problem zuolkaina state 5 hai lai A ssam a thangsa. Hi harsatna hlipkieng a ni theina ding khawmin hma lak ning a tih tiin Modi chun a hril.

Mi 2 thi, mi 100 chuong hliem
IMPHAL: Manipur­a Yaoshang/Holi ni 5 sung  hmang a ni sung khan hmun hran hranah motor eksiden leiin mi 2 in thina an tuok a, midang 100 chuong an hliem. Hliem hai laia mi 20 hai chu an inrik hle a, Hospital hran hrana Intensive Care Unit (ICU) haiah enkawl an nih. Police han Imphal East le West District sunga inlirthei inlawn vel hai an chek huna motor Vehicle Act bawse mi 2211  an  man a, hiengang mi haia inthawk fine  Rs. 2,61,700 hmu a nih tiin Police thusuok chun a hril.

Ministry sawidanglam ni lo dingin
IMPHAL: March 20, 2016 nia Manipur Works & Transport minister Dr Kh. Ratan Kumar in public function pakhata thu a hrilnaa chun, Manipur a Congress ministry sawidanglam ninaw nih tiin a hril. State Govt. Spokesperson ni si lova ienganga hi thu hi a hril thei am ti ruok chu hriet a ni nawh.

BJP Manipur team Assam­ah
IMPHAL: Th. Chaoba Singh, President,BJP Manipur Pradesh inrawinain BJP team chu Assam­a BJP candidate hai ta dingin vote campaign in an thang mek. Zanikhan Barak Valley hmun tum tum haiah vote an campaign. Assam State a vote campaign a fe hai lai hin Th. Bishwajit, MLA, Dr R.K. Ranjan le N. Mangi hai an thang.

Contractor in bomb­a deng
IMPHAL: Helpawl ni dinga ringhla han March 24, 2016 zan dar 11 vel khan Khumankhong area, Imphal East district­a contractor Th. Monindro (55) chengna in­ah Grenade an dengpuok a, compound inhuonna bang a suksiet. Chun, March 23, 2016 zan khan government contractor Th. Gojendro chengna in tuolah IED pakhat hmu a ni bawk.

Sawrkar insiemtir dingin
SRINAGAR: Zani zantieng khan PDP le BJP thuoitu han J&K Governor N.N. Vohra an inhmupui a, sawrkar an siem thei thu le sawrkar thar insiemtir dingin an ngen a, Governor chun a lo remti pek. Sienkhawm sawrkar siem ding ni le hun ru ruot a la ni nawh. Mehbooba Mufti chu CM hung ning a ta, J&K­a Nuhmei CM hmasatak a hung ni ding a nih. BJP Legislature party leader le Dy. CM hlui Nirmal Singh chun Dy. CM bawk an hung chel ring a nih.

Kum 116 mi niin a thi
AIZAWL: Mizoram State su nga hring le dama la um hai laia a upa tak Hawchhungi Lawngtlai chu March 25, 2016 zing dar 6:20 vel khan kum 116 mi niin a chengnain, Lunglei, Mizoram­ah a thi a, Lunglei Farm Veng thlanmuolah vuiliem a nih. Nau 14, pasal 9 le nuhmei 5 a nei a, a nau haia inthawk tu le te 292 zet a nei hman.

DMK le BJP in Rs. 500 crores pek dingin  
MADURAI: MDMK leader Vaiko chun, DMK le BJP han Tamil Nadu Assembly Election hung um dinga hin People’s Welfare Front (PWF) zawm ve ding le Rs. 500 crores pek ding bakah seats 80 huol pek dingin an thlem niin zanikhan a hril. Mr Vaiko chun, DMK in seats 80 huolpek ding le BJP chun Rajya Sabha seat bakah Union Cabinet a minister pek dingin an fiel niin reporter hai kuoma a hril a, sienkhawm a hnawl niin a hril. Hieng laizing hin Mr Vaiko intumna suizui le action lak ning a tih tiin DMK treasurer MK Stalin chun a hril.

Kum 116 mi niin a thi
AIZAWL: Mizoram State sunga hring le dama la um hai laia a upa tak Hawchhungi Lawngtlai chu March 25, 2016 zing dar 6:20 vel khan kum 116 mi niin a chengnain, Lunglei, Mizoram­ah a thi a, Lunglei Farm Veng thlanmuolah vuiliem a nih. Nau 14, pasal 9 le nuhmei 5 a nei a, a nau haia inthawk tu le te 292 zet a nei hman.

Maosit han lampui siemna motor 14 an raw
MUZAFFARNAGAR: Maoist helpawl mi 50 vel hai chu zani zingkar 2:00AM vel khan Bihar­a Muzaffarpur district sunga Turki Railway station bula M/s Hari Constructtion Company office an va run a, Rel lampui siemnaa hmang company motor 14 vel an raw niin zanita Police thusuok chun a hril. Maoist helpawl hai hin company security guard 3 hai khawm an sawisak bawk niin ei thu dawngna chun a hril. Security Forces hai chun hi thil thawtuhai man tumin dappui nasa takin an thaw mek.

Kum 1 sung PS Custody­ah mi 61 an thi
AHMEDABAD: Gujarat state­a chun kum 2011­2012 (kum 1 sungin) Pollice Custody­ah mi 61 an thi niin State Human Rights Commission (GSHRC) chun Gujarat Legislative Assembly­ah report a pek. Custody­a thi hai laia 51 hai chu thi pangngai (natural death) a thi an ni a, 7 hai chu anni le anni inthat an ni a, 3 hai chu ringhlaum taka thi (unnatural death) an nih tiin GSHRC annual report chun a hril. Police custody­a thi 8 le a dang hai chu Judicial custody (Jail) a thi an nih. Thi tamna tak chu Ahmedabad niin custody­ah mi 24 an thi.

NE­ah TB a damnaw zaah 5 pei an thi
AGARTALA/AIZAWL: India hmarsakbiel (North East) a chun kum tin a tlangpuiin Tuberculosis (TB) a damnaw 100­ah 5 (5%) pei an thi tiin expert Babul Das chun a hril. India rama chun kum tin TB invawi 2.2 million vel an um zie a, India rama chun a tlangpuiin kum tin mi 220,000 vel TB leiin an thi zie a hisap a nih tiin Mr Das chun World TB report 2015 a pekna huna a hril. Hienganga TB invawi le thipui an tam nasan chu TB natna enkawlna kawnga awareness a tha tawknaw lei le enkawl that tawknaw lei a nih tiin a hril bawk.

Iraq­a thichil bomb puokah mi 30 an thi
BAGHDAD: Iraq Iskandariya hmuna football stadium­ah zani hmasa zan khan thichil bomb sukpuok a ni a. Bomb puoka hin mi 30 an thi bakah midang 65 velin hliemna an tuok. Local tournament­a lawmman latu hai kuoma trophies inhlan an ni lai taka bomb hi sukpuok niin Police thusuok chun a hril. Bomb puoka thi hai lai hin Iskandariya mayor Ahmed a thangsa. Islamic State helpawl hai chun bomb hi anni sukpuok a ni thu an puong.

VAWISUN THUPUI
Chuongchun, ama chun an  kuomah, “Lunginzing naw ro, Isu Nazareth mi, an hemde kha in zawng a ni awm a, a thonawk tah a, hi taka hin a um ta nawh; en ta u, an inzalna hi. ­Marka 16:6

Editorial: Kohran le khawtlang nun

Tlangval pakhat lekha thiem,officer sin chel, lengtul hun tawng mek chu, an veng han “Nuhmei dam hi nei ve ta la, i nauhai tlangval hmain i tar hman el ding an nawm” an ti a. Ama chun, “Nauhai seilienna tlaka ei ram le khawtlang nun hi ei siem tha phawt naw chun nuhmei nei khawm hi ngam a um ta naw ie” tiin a dawn. Hi thu hin ngaituona a suksei hle. Ei khawtlang nun hi thlir dan chi hni um thei a tih. Pakhatna a chun, duthu chu a sam lem naw a, sienkhawm chuong taluo a sie a la ni naw a,  tlawmngaina dam a la par vul a, Kristien ram ei ni leiin ei se vela hnam danghai nek chun ei la zieum hle a nih. “Suol hi a ri an ring a, a thawm a na a, a tha hi chu a thawm a zawiin a ngawichawi a, ei khawtlang nun hi a la se l>m naw ie’ tia ngaidan le thlirna a nih. Pahninaa chun, “Hnam dang hai nuna inthawk inkhi a tul a, chuonganga hang inkhi chun, ei khawtlang nun chu hril inzakum khawp a ni a, siem that vat a ninaw chun hnam boralna min tlun vat a tih” ti a nih.

Ei ramah hin mi tha, mi fel, mi ringum, mi indik le mi hmangtlak tam tak um bawk hai sienkhawm, misuol, mi um tha nuom lo, zawmthaw le suol langsar tak tak hawm an tam hle. A tlangpuiia hang thlir hin, tleirawl, kum 25 le a hnuoitieng hai hin drugs an thaw nuom a, pa valai han zu an dawn a, papui kum 45 le a chungtieng hai hin thamna le fakruk an ching niin an lang. Ei politics khawm hi a nghawr a na a, pawisa le thuneina a kawkdeu chur el a nih. Mi rethei le hausa hai inkar an hlat nuom sawt hle a, puipungnaah khawm inthlierna zungzam an lang riei riei tah. Politics indik naw leiin veng le khuo, khawtlang an thangruol thei naw a, duamna le itthikna leiin ei infaksiet tuo a, hmasawnna sirbi thar kai a harsa pha a. Rukruk, inrawk, inthat, inthuoihmang le inhlemna hai a suk tam nuom sawt hle. Sawrkar thawktuhai lai sawrkar hmangruo le thil hai mani ta anga en thei an tlawm a, sawrkar thil inruk chu  rukrua khawm inngai lo an tam. Mipui mimirhai lai khawm duamna a nasa a, an chuin ei inchu a ni deu tak  tah.

Ei ram hi zakmaw le a tawng thei thei hai ngirsuokna, pawisak nei lo taphawt nihlawna; ei fir deu deu a, inringzona a tlawm tiel tiel a, hausak thut ei tum tlangpui a, sum rawng ei bawl a, Pathien nekin ei ditin ei ngaisang lem an ta an naw mani ding ti theiin a um. Ei khawtlang nun a him nawin an chep a, ei rama lamlienpui (main road) ang el a nih. Lamlienpui bula hmun le hmang nei han lamlienpui an nek huoi leiin, a changin suklien ni ve bawk hlak sienkhawm a lien sawt thei ngai nawh. Ei neina le nina hai le inphu lovin motor nei ei tam a, ei lamlienpui hin a mi dawl zo ta meu nawh.

Kohran nunin tuihnang a nei tlawm a, sakhuo nun a tawl a, kohran nunphung pangngaiah chun an piengthar thei tanaw mani ti dingin crusade le camp thaw an lar a, Pastor le upa hai kuoma inthawk bu fak ding a um naw mani ding ti khawpin Evangelist team an inlar lem a. Pathien thu ei hril tam le thiem angin ei nunpui hlei thei nawh.

Ei khawtlang nun hi a eng zawnga thlir thei chak a um a; nisienlakhawm, fet deua en le hang thlir chun chu thil harsa tak a nih. Thil ei palzam tam thei vieu a ninaw chun an thim zawnga thlir a awl em em a nih. Hiengang hi ei khawtlang nun a lo ni si chun, Kohran, tlang tin le muol tina Biekin lien le mawi tak tak nei hi a hlawsam hulhuol a ni? ngaituo chieng a tul khawp el.

Ei khawtlang nun siemtha ding chun kohran lo chu beisei ding a vang khawp el. Politics hlak hi siem that tieng nekin harsatna intluntu a ni hri si a. Tlawmngai Pawl hi an pawimaw hle; sienkhawm, Kohran nek chun maw an phur sei naw el thei. Khawtlang nun siem thatna ding chun Chanchin Tha chau hi a tling tak a ni ring a um.

Kohran hi tulaia mihriemhai thunun theitu tak, inza le ring kai a ni leiin khawtlang nun siem thatna dinga hin Kohran, kohran thuoitu le rawngbawltuhai hi an pawimaw bek bek el a nih. Kohran an hrat a, Kohran an hlim chun khawtlang nun a hung tha hlak. Hi lei hin Kohran nun hi a thienghlim a ngai a nih. Kohran hin ei ni ding ang tak ni ngam inla. Khawtlang nuna thil indiklo le fel lo hai siem tha dingin indik ngam inla. Pathien mitmei bak chu tukhawm veng naw inla, beiseina chu a la um a nih.

Post a Comment

Powered by Blogger.