Responsive Ad Slot

Hmasawnna Thar | 20 March, 2016

Sunday, March 20, 2016

/ Published by VIRTHLI
Pi Kholpi hriezingna lungdaw le building hawng
CCPUR: Zani sun dar 11 khan Rengkai Lal sungkuo thlanmuolah Rengkai lalpa Pu JC Chongkholien nuhmei (L) Pi Kholpi Joute hrietzingna lungdaw hawng a ni bakah tienlai lal ropui Shah Jahan in a hmangai em em a nuhmei Mumtaz hrietzingna dinga Taj Mahal a bawl ang bawka Pu JC  Chongkhawlien in a nuhmei Pi Kholpi hminga building mawi takel a bawl chu hawng a nih.

Pi Kholpi lungdaw hi Rev. Rosung Sinate in hawngin tawngtainain an hlan a, hi huna hin Rebecca, Grace le Lalditum han Memorial song an sak a, hi zo hin JC Chongkholien le a sung han thlanlungah par inhlanna neiin ngainatu le midang dang han par an inhlan bawk.



Lungdaw hawngna huna hin Mr Lunminthang Haokip, DC/CCPur; G. Thangkhosuanmung, EM & Chief of Hiangtam Lamka; M. Gouzamang, Guite, EM; Dongzakai Gangte, Chief of Hill Town hai bakah khaw tum tuma lal le mipawimaw tam takin an uop.

Pi Kholpi hminga building bawla um chu zani zantieng 12:00 khan Rev. Darsanglien Ruolngul chun hawngin tawngtainain an hlan. Building­a hin insawng kaina Lift khawm inbuk a ni a, CCPur district­a building Lift inbukna hmasatak a nih. Lungdaw le building hawngna le inzawm hin zani zantieng khan khawpum huop in ruoi the a ni a, hi thila ding hin Bawng 7, Vawk 3, Kel 2, Beram 2 that le Nga hme hai siem a nih.

(L) Kholpi kha Hmar Women Association (HWA) founder President a nih.

Assistant Commandant an ziek tling
CCPUR: Mr Lalsiemlien Pakhuongte s/o (L) Lalhriet Pakhuongte of Nehru Marg, CCPur chu Departmental Exam fethlengin Assistant Commandant an ziek tling. Lalsiemlien Pakhuongte hi SSB hnuoia Inspector sin thaw lai le Arunachal Pradesh­a posting mek a nih. A hlawtlingna hi ei chanchinbu chun a lawmpui hle.

Solomon V. Hmar hlaphuok hai tlangzar
CCPUR: Tulai thangthar hai laia Pathien inpakna hla phuok thiem Tv. Solomon V. Hmar hla phuok hai a bua siem, Pu J.C. Chongkholien, Chief of Rengkai in a published chu tlangzar a ni ta a, Bu khata  Rs. 150/­ pein L. Hmingsang Joute, Rengkai kuoma inchawk thei ning a tih.

DSO in Family Ration Card form la dingin
CCPUR:  National Food Security Act (NFSA) le inzawmin 55­Tipaimukh A/C, 56­Thanlon A/C, 57­Henglep A/C, 59­Saikot A/C le 60­Singngat A/C hnuoi haia Rationing Agent thar hai chu Ration Card siemna an hmatienga zo fel a ni theina dingin printed Family Ration Card form District Supply Officer, CCPur Office­ah an hmatienga la dingin DSO/CCPur chun an hriettir.

Class X & XII Exam zo a nitah
CCPUR: Board of Secondary Education Manipur (BSEM) le Council of Higher Secondary Education Manipur (CoHSEM) huoihnawtna hnuoia HSLC (Class X) le HSSLC (Class XII) Examination, 2016 chu zanikhan zo a nitah. CCPur district­a chun private centre 3­ Don Bosco Hr Sec School; Rayburn College le Rengkai Hr Sec School hai Exam Centre­a h mang a nih. HSLC Exam hi March 1, 2016 a tan le HSSLC Exam hi Feb. 22, 2016 a tan a nih.

ZEO kuomah survey report an pek tah
CCPUR: Mr Kaikhanlian Guite, DI of School, CCPur Block le staff han CCPur Block hnuoia Privae Schools tum tum 16 hai survey an thaw hnungin zanikhan ZEO, CCPur komah report an pek tah. Govt. Teacher private school­a thawk an um am; kangmei suok thut huna hmang ding fire extinguisher school in a nei am ti le thil dang dang an enfel a nih. Survey report hi ZEO/CCPur chun Addl. Director of Education (S) Hills kuomah a peksawng ding a nih.

HSA CCPur JHQ President dingin  Tv Lalthanzau
CCPUR:  March 19, 2016, 10AM a inthawk khan HYA Hall, Sielmat­ah Conference le  Election Commission inrawinain Hmar Students Association (HSA) CCPur Jt. Hqrts  kum 2016­2018 inkar sunga thuoitu ding thlangna (Election) nei a ni a, interim President ni lai mek Tv. Lalthanzau chu President dinga thlang tling a nih. Chun, Vice President dingin  Gospel Hrangchal; General Secretary dingin Jeffrey Saihmang; Asst. General Secretary dingin Chawngneilien; Fin. Secretary in Nk. Varthienghlim le Treasurer in Nk. Esther Kim Thiek hai thlangtling an nih. Thlang thar hai hi Rev. Jonathan Pudaite in tawngtaipekna a nei.

HYA GHQ President chun Conference thangpuina dingin Rs. 3,000/­ a pek. March 22, 2016, 1PM khin thuoitu thar le hlui han HSA complex, Rengkai­ah  oathtaking le charge inhlanna  nei an tih.

Rorelna hunah resolution 8 an passed. Resolution an passed hai lai  Freshers meet nei, kum khatah conference vawikhat bek nei hlak ding, Unit hai kanna nei hlak ding, Class X, XII  free coaching HSA JHQ inrawina hnuoia nei dan ding ngaituo; HSA sports kum tin vawikhat bek nei nisien ti hai a thang.

ADCs han joint meeting an nei
CCPUR/IMPHAL: Zanikhan Manipur­a ADCs 6 haia Chairman hai inrawinain Hotel Imphal­ah joint meeting nei a ni a, Co­Ordination Committee hai bakah ADCs 6 haia CEOs hai an thang tawl. Hi huna hin Chairman 6 han Delhi an inzinna report an pek bakah  hmatienga hmalak dan ding, development thu, Co­Ordination Committee of six ADCs hrat lem dan ding, ADCs 6 haia MDCs hai kara inlaichinna tha lem a um thei dan ding thuhai an hriltlang.


Free Medical camp hlawtling taka nei a nih
CCPUR: ADC/CCPur hnuoia Medical team, District Malaria Dept. a Malaria Officer Dr Liankhojam inrawinaa staff 4 hai chun March 11­17, 2016 inkar sung khan Sibapurikhal PHC; Patpuihmun PHC, Parbung CHC le Thanlon PHC hnuoia khaw tum hai sirin Free Medical Camp hlawtling takin an nei. Medical camp hun haia hin ASHA le Health Workers hai bakah khawsung mihai Malaria awareness and Sensitization program hmangpui an ni a, damdawi le Malaria blood test kit thahnemtak semdawk a ni bawk. Chun, Thosilen damdawi tui inchie tum a ni leiin Awareness le sensitization prog. hmang hun haia hin Village wise census khawm lak a nih. Kum 2015 khan Senvon PHC hnuoia hin Malaria Positive a tam hle leia awareness le sensitization prog. hi hmang a nih. Kangreng Village­a medical camp chu Vangai MDC le Vice Chairman, ADCC Pu Lalhossan khawma uopin a hawng.


Uttarakhand­ah MLA 9 an hel leiin Congress sawrkar a buoi: 
Governor in CM Harish Rawat March 28-ah majority a command le command naw inentir dingin an hriettir
DEHRADUN: Arunachal Pradesh­a Congress sawrkar Congress MLA hel/nuor han an sukthluk hnungin tulai hin Uttarakhand-a chun Congress MLA 9 hai an Chief Minister Harish Rawat lakah an hel leiin Uttarakhand Congress sawrkar chun harsatna a tuok mek.


Uttarakhand Assembly­a hin members 70 an um a, Congress chun MLAs 36 a nei a nih. Amiruokchu, MLAs 9 hai an CM lakah hel a, BJP an bel lei hin Congress­­ah an kir nawk a ni ngawt naw chun Uttarakhand­­a Congress sawrkar chu minority a hung ni ta ding a nih. MLAs 28 nei BJP chun Congress MLA hel 9 han an thlawp nia hrilin Congress chu minority an nih tah tiin Uttarakhand BJP in­charge Shyam Jaju chun a hril. BJP chun sawrkar thar siem tumin hma a lak mek. MLA hel hai lai hin CM hlui Vijay Bahuguna le cabinet minister Harak Singh Rawat hai khawm an thang. Congress MLA 9 hai hin Centre­a BJP leaders hai inhmupui dingin zanikhan New Delhi an tlung niin ei thu dawngna chun a hril.

Hieng laizing hin Uttarakhand Governor KK Paul chun Chief Minister Harish Rawat chu majority a command le command naw March 28, 2016 niin Assembly­a inentir dingin an hriettir. Assembly Speaker Gobind Singh Kunjwal chun, anti­­defection law a um a, MLA hel hai hin anti­­defection law an bawsiet a ni chun an chunga action lak ning a tih tiin a hril.

BJP chun member 70 umna Assembly­a hin Congress MLA hel 9 hai thlawpnain sawrkar an siem thei thu an hril. Mr Rawat ruok chun MLA tukhawm party annawleh CLP a inthawk an inban/suok nawh tia hrilin majority a la command thu a hril a, Assembly- ah majority a command le command naw inentir an pei thu a hril. Mr Rawat chun majority a command naw leh a ninaa inthawk an ban ngei ding thu a hril.

Congress spokesperson Randeep Singh chun BJP chu Uttarakhand­a Congress sawrkar sukthlu tuma thu phierrutuin an tum.

Moreh­ah bomb hmu
IMPHAL:  Zanikhan Moreh Police Station a intahwka hla rak lova bo mb hmu a nih. Bomb hi Imphal­a inthawka incha Police bomb squad pawlin an va lak a, pawitawk nawna ding hmuna zani zantieng 2:30PM  vel khan  an sukpuok. Chun, March 18, 2016 zan dar 7:40 vel khawm khan Hill Tribal Council, Moreh office bulah bomb a puok a, LIC office darthlalang bomb hlekin a deng kawi bakah a bul hnaia dai thenkhat a suksiet nuol. Hi bomb puok dodalnain zanikhan Moreh town le a se velah darkar 24 sung bandh thaw a nih.

PHED Staff han rally an nei
IMPHAL:  National Rural Drinking Water and Sanitation Awareness Week le inzawmin zanikhan PHED Staff han PHED Office­a inthawk Kangla Gate chen rally an nei. Rally hi PHED Commissioner W.L. Hangshing in a vai liem. PHED chun hiengang rally hi Nachou le Senapati haia khawm huoihawt an tum. Chun, hi Week le inzawm hin Manipur State sunga h mun hran hran haiah Street play le Workshop hai khawm nei an tum niin L. Ibomcha Singh, Additional Chief Engineer, PHED, Manipur chun a hril.

38th World TB Day hmang
IMPHAL:  Zanikhan State TB Officer huoihawtnain JNIMS Auditorium­ah 35th World TB Day hmang a nih. H huna hin Health & Family Welfare minister Phungzathang Tonsing khuollienin a thang. TB natna invawi hriet suok theina le TB natna invawi ngei a nih ti sukchieng theina khawl (MDR­TB) CBNAAT (GenXpert) minister hin a hawng. Hiengang khawl hi Churachandpur le Senapati haia khawm inthut a ni ta a, District dang haia khawm hiengang khawl hi lan thut pei ning a tih tiin Phungzathang Tonsing in hi huna thu a hrilna huna a hril. TB natna 100 ah 85 sukdam a ni ta a, a sukre hmakna ding chun mitin ei thangruol a tul a nih tiin minister hin a hril bawk.

A student suollui tuma intum
IMPHAL:  March 18, 2016 zan dar 10:30 vel khan Thoubal District a Yairipok an ti hmuna Hostel Warden Keisham Ibohanbi Singh (61), s/o  (L) Keisham of Ningthemjao of Yairipok Bishnunaha chu an Hostel sungah nuhmei student kum 16 mi  suollui tuma intum a nih. Hi thu le inzawm hin Police han Yairipok Police Station­ah FIR No. 09(03)­2016 YPK PS U/S 4 POCSO Act dungzuiin an registered. A student suollui tuma intum Keisham Ibohanbi Singh hi Police han an man tah.

Bomb a puok, pasal 1 a hliem
IMPHAL: Zani zantieng dar 5:30 vel khan Mangang Gas Agency, Imphal bulah tu ti hrietlo han Hand Grenade (bomb) an deng puok a, pasal pakhat a hliem niin ei thu dawngna chun a hril. Hliemna tuok hi Gas Agency ­a Chowkidar sinthaw Thokchom Ranjit (58) a nih. Hliemna tuok pa hi RIMS panpui a nih.

CM rawiin CLP meeting nei
IMPHAL: Zani zantieng 4:30PM khan CM O.Ibobi Singh inrawinain Congress Legislature Party (CLP) meeting nei a nih. Hi huna hin April thlaa inthawk Manipur­a Food Security Act (FSA) hmang ding chungthu chipchier taka hriltlang a ni a. Ministry sawidanglam ding chungthu ruok chu hril rik a ni thu hriet a ni nawh.

CBSE in metal detector inchawk a tum
NEW DELHI: Tulai khawvel technology insang taka professional examination buotsai huna candidates hai dapna dingin Central Board of Secondary Education (CBSE) chun metal detector inchawk a tum. Hi thil hi CBSE huoihawtna hnuoia professional examination nei huna enruk thawtu le tumtu hai dapsuok an ni theina dinga hmang tum a nih. CBSE hin professional exam tum tum­ JEE (Main), AIPMT, UGC­NET hai a huoihawt hlak a nih. Kum 2015 khan AIPMT exam­ah thil indiklo a um nia complaint a um leiin exam kansel a lo ni ta a nih.

Ran­a sumdawngtu 2 thingkunga khai hlum
LATEHAR: Jharkhand­a Latehar district­a chun zani zingkar khan Ran­a sumdawngtu Muslim pasal 2­ Muhammad Majloom (35) le Azad Khan alias Ibrahim (15) hai chu thingkunga khaihlum saa hmu an nih. Chatra district­a Friday market­a an Bawng/Lawi hai zawr dinga fe an ni a, an ran kei 8 hai chu khawlam an um ti hriet lovin an inhmang. Majloom le Ibrahim hai hi an kut pheihnungkira khit le an baua puon hnaw a nih. A thawtu hai hi Latehar district­a cattle­protection vigilantes hai ni dinga ringhla an ni a; hi lai bieltu Jharkhand Vikash Morcha (Prajatantric) MLA Prakash Ram chun, hi thilthawtu hai hi Hindu sakhuo invetchil pawl an nih tiin an tum.

Sipai uniform­a inthuom nuhmei 1man
PATHANKOT: Army patrolling­a fe hai chun zanikhan Pathankot­a Tank Chowk hmuna nuhmei pakhat paramilitary force uniform­a inthuom Raminder Kaur chu ringhla leiin an man a, a hungin Police kutah an inhlan. Uniform hmangsuolna (misuse of uniform) case siem khum a nih. Army han a taksa an dap huna Punjab Police le BSF logos dapdawk a nih tiin Police thusuok chun a hril. Mana um nu hin kum 25 mi niin an hril a, sienkhawm Police chun kum 45 vel mi ni dingin an ring. Lungril tieng buoina nei a ni le ninaw medical examination zinga hin thaw ning a tih.

Rukru han nuhmei pakhat na takin an kap hliem
NEW DELHI: Zani zingkar inhmatak khan South Delhi­a Moti Bagh area­ah rukru han nuhmei kum 19 mi Neeru chu na takin an kap hliem. Ms Neeru hi building sawngkhatnaa Electronic thil zawrtu a ni a. Dawr sunga electronic thil inruk an tum laiin an thil sukri hai leiin Neeru hi a hung thanghar a, thil umdan enfel dinga a zu tum hunah rukru hai hin silaia an lo kap a nih. Na taka a hliem leiin Hospital­a admit a nih. Rukru hai hin Television sets cheng nuoitel manhu ding an lakhmang niin  ei thu dawngna chun a hril.

Loneitu hai sukhrat an ni huna chau India ramah danglamna um a tih: PM
NEW DELHI: Prime Minister Narendra Modi chun zanikhan ni 3 sung aw ding Krishi Unnati Mela, New Delhi hmuna a hawng. Thuhrilna a nei hunah, tulai thiemna hmanga Agriculture uor lema hmang a pawimaw thu hrilin hi leia Mela khawm hi buotsai a ni thu a hril. PM chun Tui inret dinga mipui hai a ngen a, kum 2016­17 General budget tha a ti tawk thu hrilin, sawrkarin agriculture tiengpang a ngaipaimaw thu, mirethei hai le loneitu hai a ngaipawimaw thu a hril tawk. Krishi Unnati Mela fethleng hin farm schem le technology hrang hrang­ah training pek ning a ta, tuta inthawk kum tlawmte hnunga loneitu han thlai tam lem thar suokin an sum hma nasa taka a hung pung ding a nih tiin PM chun a hril.

Tripura HC in Asst. Professors 34 lakna a kansel
AGARTALA: Tripura High Court chun Agartala Government Medical College (AGMC) a Assistant Professors lakna (appointment) a kansel. Recruitment thawnaah thil indiklo a um tia intumna leia kansel a nih. Justice SC Das chun, recruitment thawnaa hin subject­wise reservation zui a ninaw bakah dan bawsiet a nih tiin a hril. Hi Medical College pawimawna ngaipawimawin Court chun tuta inthawk thla 3 sunga recruitment a thara thaw dingin an hriettir.

ISA President dingin Indian Professor
WASHINGTON:  Indian Professor TV Paul chu US­a International Studies Association (ISA) President 56­na dinga ruot a nih. Prof. Paul hi Kerala, India rama pieng niin kum 2013­14 sung khan ISA Vice President lo chel tah a ni bakah founding Director, McGill/­University of Montreal Center for international Peace and Security Studies (CIPSS) le Georgetown University Press book series: South Asia in World Affairs founding Editor a nih.

FlyDubai vuongna Russia ramah tuoksiet a tuok, mi 62 an thi
ROSTOV­ON­DON: Zani zingkar khan Fly Dubai vuongna Boeing 737 chu Russia rama Rostov­on­Don vuongna tumhmun (airfield) a tum a tum laiin changsuolin hnuoia a tla thla a, a kang bawk leiin a sunga chuong passengers 55 le vuongnaa thawktu 7 hai chu an rengin an thi vawng niin zanita official thusuok chun a hril. Khawmuol siet leia tum el thei lova a um hnung a thawkhni naa tum a tum laiin runway a baw thel leia tuoksiet tuok nia hril a nih.

Hi vuongnaa chuong thi hai lai hin India mi 2, Russia mi 44, Ukraine mi 8, Uzbekistan mi 1 an thang a, chu lai chun naupang 4 an thangsa niin LifeNews channel report chun a hril. Hi vuongna hi Dubai­a inthawka hung vuong le Rostov airport­a tum ding a nih. Russia President Vladimir Putin chun vuongna tuoksiet­a thi sungkuo hai a tul le pawimaw anga a thangpui ding thu zanikhan a puong. Vuongna hi an dar nasa hle a hril a nih. Russia sawrkar chun thina tuok sungkuo hai kuoma 1 million rubles (dollar 15,000) seng pek dingin a puong bakah Pathienni chu Rostov region­ah mourning day in a puong.

VAWISUN THUPUI
Tukhawm mi pasie khek ria a nahai sukset chu, Ama khawm khek ngei a ta, amiruokchu, ngai ni naw nih.  ­ Thuvarhai 21:13

Editorial: A tlin le a tlak hai chau

March 18, 2016 a Manipur Cabinet meeting in Manipur Police Department hnuoia thawk ding Police Constable (Male) post 2306 le Riflemen post 519 lak thar dingin a rel a. Hi thu hi Manipur mipuihai ta ding chun chanchin tha le thu lawmum takel a nih. Department dang dang haia thawk ding khawm lak belsa dingin hma la hung la pei sienla nuom a um. Sawrkar sin dit seng ei ni leiin ei state sawrkar h in sin ruok si em tam le lak a hung ni zung zung theina dinga hma a hung lak zuol sau sau thiltha le mipui lawm zawng ning a tih. Sawrkar sin naw hlak chu innghatna tlak tak tak nia ei hriet naw leiin sawrkar sin ma hi ei lungril hiptu tak a la nizing a nih. Ei ramah industry lien a u m naw a, sum siemna industrry lien tak chu sawrkar sinthaw hi a nih.

Police Constable le Rifleman lakna kawnga hin ei state sawrkar hi fimkhurin hung dittui hle sienla nuom a um. Police constables le Rifleman ding lakna huna hin a tlin le tlak (qualify) hai chau hung la sienla nuom a um. Tuta hmaa Police lakna hun haiah state sawrakr a fimkhur tawk naw leiin ei ram, ei sawrkar le Police Department chen a hming a se pha hlak. Innghatna tlak le mipui inza thei chin hai chau Police a hin lak nihai sienla chu ei rama Police hai hin mipui ringzo le inza an hung kai ngei ring a um.

Police hai hi misuol mantu an ni ringawt naw a, mipui harsatna chi hran hran hlipkieng a, thangpui ngaihai thangpui a, kawkhmutu pawimaw tak an nih. Police thumala letter tin hai hin umzie pawimaw tak a nei nia h ril a ni hlak. Chuonghai chu, Politeness, Obedience, Loyalty, Intelligence, Courage, Efficiency tihai an nih. Hieng thumal hran hra haia inthawk hin Police hai chu mi hawihawm tak, ringum taka thuawi ding an nina dam, mi thil chik mi, huoisen tak le ringtlak a  um ding an nina lai an lang thei a nih. Tulaia ei rama Police hai hin hieng thu hai hi an ngaituo ve hlak dim chu maw?  Ngaitiuoin an lungrila hieng thu hai hi vawng zing hai sienla nuom a um hle.

Police hai chu mihai thangpuitu, ram le mipui himna dinga thawktu pawimaw, ei mangang ni le buoi nikhuo khawma ei pan tak le ei thlamuongna ni theitu an ni ding a nih. Hieng laizing hin ei rama Police hai lai mani ngirhmun le nina hre lo a, mi vau, mi sum lakpek, mi hlem le suol chi tum tum thaw pawisa lova che hlak an um a, chuonghai lei chun Police hming hi nasa takin a suksiet a, mihai ringzo lo an kai pha hlak a nih. Hieng a ni lei hin Police lakna kawnga hin ei state sawrkar a fimkhur a, indik taka a tlin le tlak dinghai chau a lak a tul a nih. Chuong a ninaw chun Police hai hming sietna hi re naw ni a, mipui le an kar a hung se zuol deu deu ding niin an lang.

Khawvela hmasawnna le changkangna tinreng ei kawtbul ela a hung tlung zut zut ta laia Barbarian hai hun laia th il tlung hlak ang a chang pova ei tuok hlak hi a pawi hle a, hiengang thil tlung hai hi sui chieng a, tu ta hnung tlung nawk ta ngai lo dinga sawrkar le Police tienga lukhaitu han hma an lak a pawimaw hle. Motor inruk, helpawlhai bomb sukpuoktu, helpawlhai ta dinga sum khawntu, nuhmei suolluina, insuomna le thil suol dang dang thawna haiah Police an thang rawpna san pakhat chu Police dinga lak an ni laia a latu hai fimkhur tawknaw lei annawleh thamna sum an lak lei a ni el thei. Hi lei hin police ding latuhai hin Police um tha nuom lo thenkhat hai chunga hin mawphurna an nei niin an lang.

Police nina kal zawnga che hai hi Police hming suksetu an ni tlat leiin an sina inthawka suspended chau dittawk lova ban ni el hai sienla a tha ring a um. Hiengang taka action lak a ninaw chun Police hai laia mi tha lo um hi bo thei naw ni a, Police Department hming an la hung suksiet pei ding a nih. A tul chun ei inhrem le action ei lak ngam a tul a nih. Ei ram hin Police tha le fel a mamaw ta takzet a nih. Police tha le fel ei dit chun a tlin le tlak dinghai chau lak ding a nih.

Don't Miss
© all rights reserved
made with by Simon L Infimate