Responsive Ad Slot

Hmasawnna Thar | 19 March, 2016

Saturday, March 19, 2016

/ Published by VIRTHLI
Tribal movement ni 200 tlingna prog. hmang: 
Martyrs sungkuo hai kuomah Rs. 2.5 lakh seng inhlan
CCPUR: Manipur Assembly in August 31, 2016 nia  Bills 3 a passed hai dodalnaa Tribal Movement fe mek ni 200 tlingna le martyrs hai puolin zani zantieng 5PM khan Hiangtam Lamka YPA GHQ haalh­ah prog. hmang a nih. Hi huna hin JAC hnuoia Finance Sub­Committee chun In tina Rs. 100/­ dawl khawma um haia inthawk Tribal Martyrs 9 sunghai kuomah Rs. 2.5 lakh sengin (cheque) an hlan. Hi prog.­a hin Thadou Innpi, Simte Tribe Council, Tedim Chin Union, Hmar Inpui thuoitu haia inthawk khawmin thuhril ngaithlak a ni a, Rev. Lalramlawm Inbuon inrawinain ram le hnam ta dinga hringna lo inhlan ta martyr sungkuo hai ta dinga tawngtairuolna mipuiin an nei a, Hall­a hun hmang zovin   Pastors le Upa ruol mi 200 han Flying Lantern inthlasuokna an nei.





Hall program hi Rev. Stephen Chinzathang in tawng­tainain a hawng a. Hi zoa JAC­a Chief Convenor H. Mangchinkhup in thuhrilna hun a hmangin Movement fe mek le inzawma JAC hmalakna hai a hril. CM le JAC han Dec. 29, 2015­a inbiekna an nei dungzuiin an ngenna angin Bills 3 hai chungthuah an ditdan hai ziekin an pek a, January 11, 2016 khawm khan an peklut nawk thu; Sawrkarin ei thil ngen a ngaisaknaw lei le movement ni 200 tlingna le inzawma vawisun hun hmang le darkar 15 sung total shutdown puonga um a ni thu; MTDF khawmin prog. an h mang thu, UNC, ATCF, ATSUM, Naga Politics Forum han an thlawpna thuah lawmthu a hril. Zohnathlak Mizorama cheng hai le infepawna tha lem ei nei theina dinga Manipur Tribal Movement Road Construction Comm. Indin a ni angin lampui siemthatna sin thaw mek a ni thu a hril bawk.

JAC Finance Sub­Committee a S. Siannunluan Valte chun In tina  Rs. 100/­ ei dawlkhawm haia inthawk sum hmusuok 37,32,555/­ a tling phak a, JAC kuta pek Rs.5.2 lakh bakah sungkuo pakahtah Rs. 2.5 pei pek hai le belkhamin tuchena sum seng chu Rs. 29,31,955/­ a ni a, Bank­ah balance Rs. 8,02,600/­ a la um tiin a hril.

Mrs Khawlpi Joute Lungdaw hawngna
CCPUR: March 19, 2016 (vawisun) hin Rengkai khaw Lal Pu J.C. Chongkhawlien nuhmei (L) Mrs Khawlpi Joute hrietzingna lungdaw hawngna le a hming chawia In thar bawla um hawngna hunser nei ning a tih. 11AM­12:30PM inkar sung Rengkai Cemetry hmuna hun lungdaw hawngna hun hmang ning a ta, 1:00PM­4PM inkar sung Lal In compound­ah hun hmang ning a tih. (L) Khawlpi hminga In bawl thar hawng dinga hin insawnga inkhai kaina (lift) khawm a um a nih. Bawng, Vawk, Kel, Beram le sa dang dang thatin zantieng khawpum huopin ruoi the ni bawk a tih. Ngainatu hai hi huna thang seng dingin an fiel.

Mi 1 in silai a peklut
CCPUR: District Magistrate, CCPur in Home Dept. Govt. of Manipur thupek anga CCPur khawpui sunga License silai nei hai an rang thei anga an umna police station hnai taka an silai le license pelut dinga an hriettir angin zanikhan Sangaikot a inthawk mi 1 in a silai le license a peklut. JAC in martyrs hai inzanaa gun salute zanita nei a tumna leia thusuok hi siem a nih.

Total Shutdown buoina um loin a tawp
CCPUR: JAC Against Anti­Tribal Bills in Tribal Movement ni 200 tlingna le inzawma zanita CCPur khawpui sunga March 17, 2016 zanril­a inthawk March 18, 2016, 3:00PM inkar darkar 15 Total Shutdown an puong leiin CCPur khawpui sunga chun Dawr, bazaar le inchuknain hai bakah office hai khar vawng an ni bakah volunteer umnaw hai sienkhawm motor inlawn hmu ding a vang hle. Tuibuong area­a ruok chun dawr le bazar hai hawng an ni a,school thenkhat ruok chu an inkhar tawl. Imphal le kara service motor hai khawm Tuibuong­ah an indaw tawl.

District Magistrate in Gun Salute thaw lo ding le license silai nei hai Police station­a pelut dingin thusuok siem sien khawm zani zingkar 9:00AM khan hmun tum tum haiah tribal martyrs hai inzanain Gun Salute neia silai kappuok ri hriet ding a um.

MLA/MP hai theida leia protest ei ni nawh: Thuampi, Advocate
CCPUR: All Tribal Movement, Lamka Whats App inrawinain zani 11:00AM khan New Bazar bus parking­ah Justice for the 9 Martyrs ti thupui hmangin movement ni 200 tlingna inser a nih.

Hi huna Thuampi, Advocate in thu a hrilnaah, MLA le MP hai ei theida leia protest/nuorna nei ei ninaw a, Indian Constitution in tlangmi hai humhalna dinga dan (law) tha tak a siem Manipur sawrkarin a hmang naw bakah tlangmi hai ram le hmun lakpekna dinga August 31, 2015 nia Manipur Assembly in Bills an passed hai dodalna leia nuorna nei ei nih tiin a hril a, mipui hai chu ei ta dinga tha lo Dan hai hnawl le dodal pei dingin a ngen. Ei ram le leilung humhalna dinga martyrs 9 hai ruong vui lovin an la um a, ni 200 a tling chen khawma Centre le state sawrkarin ei thil ngen a la ngaitha na thuah, thang la hung thar pei (next generation) ding hai hmakhuo ngaiin mipui hai chu dodal pei dingin a fiel bawk.

Hi huna hin Tribal martys  hai sunna in minute khat sung to tawka hun hmang a ni bawk.

Assam CM le CM hlui han nomination paper an file;
March 26 & 27 haiah PM in Assam­ah Vote a hung campaign ding
GUWAHATI: April 4, 2016 nia Assam Assembly Constituencies 65 haia inthlangna (first phase election) hung um dingah zanikhan Assam CM Tarun Gogoi; Assam CM hlui le AGP thuoitu Prafulla Kumar Mahanta le BJP Lok Sabha member Kamakhya Tassa han Nomination paper an file.Tarun Gogoi chun a tlingna biel ma Titabor A/C ah nomination paper a file. Hi biela hin a zawnin term 4 zet thlangtling a ni tah. Prafulla Kumar Mahanta chun a biel pangngai Barhampur A/C a ngir dingin Nomination paper a file. Hi biela hin kum 1985 a inthawk lo tling ta le term 2 lai Assam CM lo ni ta a nih. AGP President hlui  Brindabon Goswami chun Tezpur A/C ah nomination a file a, BJP MP Kamakhya Tassa chun Titabor A/C ah nomination a file a, Assam CM ni lai mek Tarun Gogoi leh an inkhing ding a nih.

Assam Assembly First phase Election­a dinga nomination paper file theina hun nuhnung tak chu zanikha a lo ni tah. Assam Assembly a hin seats 126 a um a, second phase Assembly Election chu seats 61 haiah April 11, 2016 khin nei ning a ta, vote tla hai May 19, 2016 ah tiem tan ning a tih.

Assam Assembly election a BJP candidate hai ta dingin March 26 & 27, 2016 hai khin Prime Minister Narendra Modi chun Assam State hmun hran hran haiah vote campaign hung nei a tih. Union Ministers le state hran hrana BJP thuoituhai khawm vote campaign a hin hung thang an tih.

Assembly Seats 294 umna West Bengal a khawm phase 6 in inthlangna a um ding a ni a. First phase ngir nuom hai ta dinga nomination file theina hun tawpna tak chu zanikha a nih. Kerala,Tamil Nadu le Puducherry haia khawm May 16, 2016 khin Assembly Election nei ning a tih.

M. Prithviraj in vote a nei theinaw ding
IMPHAL: Moirang A/C a inthawka MLA­a thlangtlinga puong, tuta Parliamentary Secretary (Youth Affairs & Sport) chu MLA angin la um thei a ta, Assembly session a vote lakna huna ruok chun vote nei thei naw ni a, renumeration le allowances hai khawm la thei naw nih ti in zanikhan Supreme Court in a rel hri. Hi case le inzawma hearing nawk chu May 5, 2016 ah nei ning a tih. Assembly election huna affidavit a peklut an dik nawh tia hek a ni leia Court case hi a nei a nih.

Manipur­ah sin zawng mi 7,48,835
IMPHAL: February 29, 2016 chen khan Manipur­ah sawrkar sin dit leia Employment Exchange office tum tuma hming zieklut chu 7,48,835an tling tah tiin Director, Employment Exchange, Manipur  chun a hril. Sin dit leia hming zieklut tamna tak district chu Imphal West niin a hril. February, 2016 thla sunga sin dit leia hming zieklut chu 1,425 an nih tiin a hril bawk.

School furnitures suksiet
IMPHAL: K.M. Blooming School, Khangabok a Class VII student, Leishangthem Kishan Singh, s/o Bheirot of Wangkhei Thangjam Leirak chu March 17, 2016 zan khan damnawna thenkhat leiin JNIMS­ah a thi a, an school in a damnawna hi a ngaitha leia thi nia intumin Wangkhei mipui an lung a sen a, a thi san, zan dar 11 velin Buses 2 sipa fein K.M. Blooming School an va tawng a, a sunga furnitures tam tak an suksiet niin ei thu dawngna chun a  hril.

SC in CMs, Governors le Minister hai  lim
NEW DELHI:  Supreme Court chun May 13, 2015­a Order a lo insuo tak sukdanglamin government Advertisements haiah Governors,Chief Ministers le concern Department­a Ministers hai lim/thlalak inchuongtir a phal tah. A hma chun government Advertisements haiah President, Prime Minister le Chief Justice of India hai lim/thlalak chau inchuon a phal a nih.

Karnataka, West Bengal, Assam, Tamil Nadu,Uttar Pradesh, Odisha le Chattisgarh haia state  Assembly Election hung um ding le inzawma Centre le State sawrkar han ngenna an siem le inzawma Justice Ranjan Gogoi inrawi Supreme Court Bench in  remtina hi a hung nei a nih.

IAF Firepower show ropui tak nei
POKHAN: Zanikhan Indian Air Force (IAF) chun Rajasthan­a Pokharan ring range­ah Iron Fist exercise 2016 an nei a, President Pranab Mukherjee le Prime Minister Narendra Modi hai khawmin an uop. Hi huna hin MiG­21, MiG­27, MiG­29 le Su­30 fighter vuongna le helicopters hai thangin indo vuongna chi hrang hrang 180 zet suklang a ni a. Light Combat Aircraft ‘Tejas’ le LCH, Transport aircraft, An­32, Embraer, IL­76, IL­78, C­130J;  Mi­17, Mi­17 1V, Mi­17V5 helicopters hai le attack helicopters Mi­25, Mi­35 hai pholang niin an theina, thiemna le ralthuom hai an pholang tawl.

AIUDF, RJD le JD(U) an thangruol ding
GUWAHATI: Assam Assembly Election hung um dinga hin All India United Democratic Front (AIUDF), RJD le JD(U) chun thangruol dingin thutlukna an siem. AIUDF chu seats 76­ah ngir an ta, JD(U) le RJD hai chu seats 12 ve veah ngir an tih. AIUDF chun first phase­a dingin candidates 23 hming le second phase a dingin candidates 19 hming an puong ta a, JD(U) le RJD khawmin candidates 5 hming an puong ve ve tah.

Lakhipur Assembly Constituency­a chun tuta Barak Valley Hill Tribe Development Council (BVHTDC) a chairman nilai Pu Lalthomlien Hmar chu UDF­JDU­RJD­AITC alliance ticket in a ngir tum niin ei thu dawngna chun a hril.

Airbus in New Delhi­ah pilot training Centre
HYDERABAD: Airbus chun Rs.260 crores sengin New Delhi hmuna Pilot training and Maintenance Centre indin a tum thu zanikhan Airbus India CEO Srinivasan Dwarakanath le Head of Marketing (Asia), Joost Van der Hejiden han press conference huna an puong a, hi huna hin airbus model pholangna an nei bawk. Hi centre chun first phase in A320 aircraft simulators 4 nei a ta, command training le refresher courses hai um a tih. Airbus chun tuhin Bengaluru hmuna maintenance engineers hai training pein tuchena hin engineers 2,750 hai training a pek ta a nih. India ramah Airbus chun vuongna 210 a service mek a nih.

IMT Trilateral Highway project
NEW DELHI: India, Myanmar le Thailand sawrkar hai chun motor lampuia inepawna tha taka a hung um theina dinga hmalak tlang tha an ti a, hi dungzui hin tuta inthawk sawtnawte hnungah India, Myanmar le Thailand (IMT) Trilateral Highway project chungthuah Agreement ziek an tih tiin Union Road Transport, Highways and Shipping minister Nitin   Gadkari chun a hril. Bangladesh, India le Nepal ram hai chun hiengang agreement hi an lo ziek der ta a nih tiin Gadkari chun a hril. Hi agreement hi June, 2015 a kha ziek a nih. India hmarsak biel lamlien siem thatna ding khawm sawrkar thlungpuiin a ngaipawimaw a, NE biela road projects a hmang dingin Rs. 1 lakh crores sie (allocated) a nih tiin Gadkari hin a hril.

Thuoihmanga um student a thisaa hmu
HYDERABAD: Class X inchuklai Abhay  Madhani (15) chu tu ti hrietlo han an thuoihmang a, a thuoihmangtu hai hin an tlansuokna dingin Rs. 10 crores an ngen a, sienkhawm an sum ngen pek a ni hmain Abhay Madhani hi zani hmasa khan Secunderabad­a dawr pakhat bulah a thisaa hmu a nih. Hi thil tlung le inzawm hin Vijayawada a inthawk Police chun ringhla mi 3 an hrentang. Abhay Madini  pa Raj Kumar hi Plastic company neitu a ni a, an sum ngen zat a pek theinaw ding thu a thuoihmangtu hai a hril hnungin Rs. 5 crore inrang taka pe dingin an ngen nia hril a nih. A thuoihmang le thattu hai hi a pa company a thawk /sinthawtu hai ni dinga ringhla an ni a,CCTV thlalak –a inlang Alfa Hotel­a inthawk bike­a a chuongpui ringhla pasal pakhat chu Police han a thlalak thedarin man an ni theina dinga an umna hril annawleh man theitu hai kuomah Rs. 1 lakh lawmman pek dingin an puong.

Goa in Natl. Games hun sawn hla dingin 
PANAJI: Goa Sports Minister in Assembly Election nei inhmat el thei a nina thuah National Games nei hun ding sawn hla dingin Indian Olympic Association kuomah ngenna a siem. National Games hi November 5­19 inkar sunga nei dinga ti a ni a, sienkhawm state  Assembly a hun neka inhmaa nei el thei a ninaah a hun hi sawn hla dinga ngen a nih tiin Tawadkar chun a hril. National Games ding le inzawm hin state sawrkar chun Rs. 97.80 crores a dawng tah.

Musharraf in Pakistan a suoksan
ISLAMABAD: Pakistan military ruler hlui Pervez Musharraf chun, Pakistan Supreme Court in ramdanga an zinsuok a khapna a hlip pek ta leiin Pakistan suoksanin ramdangah an zinsuok. A lawyer chun, Mr Musharraf hin Pakistan rama thaw thei lo spinal treatment inrang taka thaw a tul leia Pakistan suoksan a ni thu a hril. Musharraf hi kum 2007­a Pakistan rama emergency puonga a umna le hi kum maa PM hlui Benazir Bhutto thina thu haia case siem khum a nih.

VAWISUN THUPUI
Tuihai chunga chun i bei chu pei la, Ni tamtak hnunga chun i hmu nawk ding a ni sih a. ~Thuhriltu 11:1

Editorial: Consumerism le ei ni rawi hi

Khawvel hmasawnnain a hung intlun, ei mamaw le tul bak thil inchawk teu teu hlak ching dan phung hi Consumerism a nih ti inla a fie tak ring a um. Ram changkang lem haia chun an lo buoipui nasa ta hle a, Consumerism hin a sukbuoi phak ve ta mang naw a, thiem taka thil inchawk le nei chu an fe dan tlangpui a ni tah. Ei ni rawi ruok chun hi thil hi a pawizie, a that nawzie, ei khawsakna a tawkpawi dan ei la ngaituo naw bakah ei la hriet meu naw nin an lang. Secondhand thuomhnaw hi a tha a, ei tangkaipui a, ei sum neiin a man zo lo sil le bil tha tak tak ei nei pha ngei a, lawm a u m. Amiruokchu, mi thenkhat, a bik takin nupuihai hin an addict pui ta niin an lang. Mamaw neka tam inchaw hi ei um ta nawk el. Hi lei hin a chang chun insel­inhalna a suksuok pha hlak. A huntawk hriet hi a tul khawp el.

Ram hausa le hmasawn tahai (developed countries) pawisa thethangna hri chun ei ni rawi, chawmhlawm rama la chenghai h i a mi man ve ta chu a ni hi! Ei ram chite hi hang en inla, Consumerism chun a mi fak nasa hle ta a nih. Mi rethei tam lem hai hi ei income le inphu lo hiel khawpin ei che a, thil ei inchawk hlak an ta naw maw? Ei Churachandpur town ngei khawm ei hang en a, hmasawnna le mihriem nun siem tha thei tiengpang nekin a bebawm incheina le style­a feralna ding chi dawr hi a tam ta em em el a nih. Hang ngha vel la i mamaw ni lo inchawk chang a tam ta hle ring a um, a bikin nuhmeihai ta dingin I lo inchawk naw a lo ni khawmin inhnar ngawi ngawi thil hi tam hleng a tih.

Inren thiem nekin ei sum nei le inmil der lova thil inchawk hi ei thiem zawng tak a nih. Bank le Post Office haia sum inkhawl chu harsa ei ti bek bek el a nih. Ei pawisa hmu neka tam hmang ngam, bata thil lak khawm ei ngam huoi hle. Mamaw ngawi ngawi, bu le hme bakah damdawi hai hi chu a tul chun bat lo thei lo a nih. Bata sa hme ngam ruok hi chu a tha naw a, bansan nghal chi a nih. Bata thil inchawk le fak ei ngam huoi hi ei intodel thei nawna, ei changkang thei nawna le harsatna mi siemtu pakhat niin an lang. Hieng a ni lei hin inren thiem le pawisa siekhawl thiem dan ei inchuk a hun ta hle. Bata thil inchawk le fak ei uor sung chun ei insung khawsakna hi changkang nekin a hung inhnuoi deu deu ding a nih ti hi ei hriet a, ei inthunun a hun tah.

Sil le bil man ei ngam insang taluo ta hi a beidawngthlak hle ta a nih. A manto to hi ei dit a, a man tlawm hi chu tha lo dinga ngaina ei nei el ta hi ei lungril ngaituona le ngaidan an dik tanaw mani ding aw ti theiin a um. Dimapur, Guwahati, Kolkata, Delhi etc hmun haia dawrkai han foreign a inthawka an  an lak nia an hang hril hin chu a man to le to naw thu chu ei ngaituo hman ngai naw a, ei lungril an hmin der el hlak. Mizoram, a bikin Aizawla chenghai an hril ang deu ei nina chin a um tah. Aizawla khawm a manto naw chu an dit nawh tia hril hlak hi ei hriet seng. An um dan le an thaw dan hi entawn chi niin an lang. nawh. Dawrkai thenkhat hi chu ei ram, India ram ngeia siem, Dimapur, Guwahati, Kolata, Delhi le hmun dng dang haia inthawka an lak dam a um hlak. Var a hun tah.

America ram anga fak ding inhnik, branded vawnga inthuom dam, inlirthei suok thar taphawt lo inchawk pei hin ei ram sukdam naw ni a, ei ram hi na deu deu a ta, pasie tul tul bawk a tih. Nei baka insukchangkang vieu hi changkangna indik a ninaw a, changkang tehlem a nih. Cosmetics, insung hmangruo, incheina thuomhnaw le a dang dang, mi hausa, milien le milal hai hmang le insunga um phak dinghai chen ei insunga ei laklut ve hi chu ei thawhla a, mani le mani ei inhrem a ni tak. Thaw dan tha le entawn ding chi niin an lang nawh. Ei ngaituona lungril hi siem danglam a tul ta a nih.

Mani ram thil ngainat le ngaisak neka foreign siem ei ngainat le ngaisang lem tlat khawm hi thil indik a ni nawh. Ei lungril put dan le ngaituona hai hi ei her dik a hun ta takzet a nih. Ei ram kutsuok thil hai hi ngaina ding a nih. Entirnain Manipur handloom product­hai dam hi ei state sawrkar le a ram mihai hin ngainain, ei chengnain le ei office haia hin hmang seng  inla chu tuta nek hin Manipur handloom product hin hma a sawn lem ngei ring a um. A bik takin ei ram sawrkar bek hin hi thua hin hma hung la sienla chu Manipur Handloom products hai hi tuta nek hin hlutna nei a ta, a sunga  chenghai khawmin sawr tangkai lem ei tih.

Don't Miss
© all rights reserved
made with by Simon L Infimate