H&FW Ministry official pahni an hung
CCPUR: Ministry of Health & Family Welfare, Govt. of India a inthawk official pahni­ Chaubey, Bio­Medical Engineer, National Health System Resource Centre (NHSRC) le Pintu Singh, Bio­Medical Engineer (NHSRCO) hai chu zanikhan CCPur­ah an hung a, zanikhan District Hospital, CCPur sirin Bio­medical equipment le inzawma District Hospital in hmangruo a nei hai an enfel.



Official pahni hai hin Medical Superintendent office chamber­ah CMO le thawktu hai meeting an neipui bawk. Central palai hai hi District Hospital,CHCs le PHCs haia bio­medical equipment umzat, a function le function­naw enfel dinga hung an nih.

Solar Street Light inbuk tan mek
CCPUR: Churachandpur khawpui sung Tuibuong­a inthawk CCPur khawpui sung lampuielvartu dingin tulai hin MANIREDA chun Solar street light an inbuk mek. Zanikhan DC, CCPur Bungalow­a inthawk solar inbukna sin tanin Tuipaimukh Road­a inthawk Public Ground chenah Fire Brigade motor hmangin Solar 15 an inbuk zo. Solar inbukna hi March 17, 2016 hin sunzawm nawk an tih.

HI Executive committee in an hmatieng
CCPUR:  March 5, 2016 nia Hmar Inpui Executive meeting in a lo rel ta anga State tin­a Co­Ordination Committee inthlang ding chungthuah, Hmarbiel le Vangai biel a intlang dinga ti kha remchang nawna thenkhat leiin hieng biel pahni haia inthlang chu Executive Committee in an hmatieng sukfel a tih tiin General Secretary, HI GHQ a inthawk ei thu dawngnain a hril.

Bank chawl ni tam tak a um el thei
CCPUR:  Holi, Good Friday le fourth Saturday chawl hai lei bakah Bank Strike March 28­31, 2016 inkar sung a um el thei a hril a nih. Hi lei hin Bank dawr nuom le Bank­a thaw ding nei hai chun Bank chawl/khar hmaa buoipui ding a nih. March 24 Holi, March 25 Good Friday; March 26 Fourth  Saturday Bank chawl le March 26, 2016 Pathienni a ni leiin Bank Strike ni 4 hril anga a um chun ni 8 sung Bank khar a ni ding a nih. Thenkhat chun ATM khawm khar ni dingin an hril.

Flying lantern a hungtlung
CCPUR: JAC inrawinaa Tribal Movement ni 200 tlingna le pasaltha hai inzanaa program YPA Hall, Hiangtam Lamka hmuna March 18, 2016 zantieng 5PM ­a Mass prayer le Public Ground­a inthawk  Flying Lantern inthlasuok ding chu a hungtlung tah. Hi huna hin Pastors le Upa 200 ruol han Flying lantern inthlasuokna nei an tih.



Hi hun hmangna ding le inzawm hin JAC chun zanikhan mipui kuoma ngenna (public appeal) an siem. Flying lantern inthlasuok ding le inzawm hin JAC chun volunteers 300 vel a mamaw a, inhnikna nei h ai chun March 17, 2016, 3PM chenin Public Ground, CCPur­ah enrolment thawna le briefing um a tih. Volunteers hai chu badge pek ning an tih. Volunteers hai chu Mass Prayer­cum­Releasing of 200 Flying Lantern prog. a ding chau an ni a, Total Shutdown a ding an ni nawh. Flying Lantern inthlasuoknaa mi tamlem an thang theina dingin a dithai ta dingin JAC’s Dharna Point, CCPur Police Station­ah March 17, 2016 hin  Dharna nei hun sungin Rs. 100/­ peka inchawk thei ning a ta, Lamka Print (Opp. Hebron EBC Chruch, N. Lamka) ah hmu thei ni bawk a tih. Lantern hi March 18, 2016 zan­ah mani in chita inthlasuok thei ni bawk a ta, Flying Lantern zawrnaa sum hmu hai chu Tribal Movement thangpuina ding a nih tiin JAC thusuok chun a hril.

Flying lantern a hin raw ding a um a, chu raw chawk huna van tieng a vuong ding a ni a, a chawk zo pha hnuoiah a hung tla suk nawk ding a nih.

Dec. Thla chena Rs. 36241.98 lakh deposit
CCPUR: Zani zingkar khan DC Office­a BRGF Resource Centre­ah DC /CCPur inrawinain Bank thuah meeting nei a ni a, CCPur district sunga Bank tum tuma Manager hai an thang tawl. Bank tum tum han report an pek dungzuiin December, 2015 thla chena Bank haia pawisa deposit (thunlut) Rs. 36241.98 lakhs a tling phak. Hieng hai laia Loan semdawk zat chu Rs. 16619.98 a ni a, CD radio 46% a tling phak. Priority Sector­ah loan semdawk chu Rs. 11385.06 lakh a tlingphak a, 69% a nih. Agriculture­a loan semdawk chu Rs. 3241.22 lakh niin 20% a tling.

AMTWU in full support an pek 
CCPUR:  JAC Against Anti­ Tribal  Bill in Tribal MLAs hai social boycott an pong nawn nawk chu All  Manipur Tribal Women Union (AMTWU); CCPur  District chun full support pek dingin March 15, 2016 nia meeting an nei huna relin resolution an passed niin zanita AMTWU thusuok chun a hril. Tribal hai humhalna dinga JAC hmalakna an thlawp pei ding thu an hril bawk.

ATCFM in an thlawp thu an puong
CCPUR: JAC Against Anti­Tribal Bills in Tribal Movement ni 200 tlingna le Tribal martyrs hai inzanaa March 17, 2016 zanril­a inthawk March 18, 2016, 3PM darkar 15 sung CCPur khawpui sunga Total Shutdown/bandh an puong bakah Tribal hai inzanaa Traditional Gun Salute nei dinga remruotna an siem chu an thlawp thu zanikhan ATCFC in thusuok siemin an puong. Tribal movement fe mek le inzawm hin Manipur tlangmi hai chu JAC hmalakna thlawp dingin an ngen bawk.

Disability Assessment Camp nei
CCPUR: Gospel Ministry for Disabilities, India hmalaknain zanikhan Dist. Hospital­ah Disability Assessment Camp nei a nih. Hi huna hin Dr Alex Touthang, Ortho. Dist Hospital le Dr Chinggouman Guite, Psyciatric, Dr Chiin Guite, Eye Surgeon han mi 42 hai an enfel a, hi laia 39 hai chu Disability Certificate an hmu theina dingin Application an ziek pek.


Nupui pakhatin hliemna a tuok
IMPHAL: Zanikhan NH­2 (Imphal­Moreh  Road) a Samaram, Thoubal District a bandh thaw pawl le Manipur Police Commando­hai an inbeituo a, Police Commando han bandh thawtuhai hnawtdarna dinga blank fire le tear gas an kap leiin nupui pakhat a luah h liemna a tuok. Feb. 26, 2016 a Memicha Devi w/o N. Shyam Singh of Samaram Mamang Laibung Leikai a thisaa hmu a nina le inzawmin N. Khomdomcha (45) of Samaram Mamang Laibung Leikai chu March 11, 2016 a man le lungina khum a ni a. Hi lai biel mipui hin tuolthattu a ninaw leiin insuo nghal ni raw seh tia an ngenna leia bandh hi an thaw a nih.

Restaurant­a kap hliem damzo lovin a thi
IMPHAL: Feb. 19, 2016 a Ningthibi Restaurant sunga kap hliema um  Romita (38), w/o L. Senapati of Khurai Angom Leikai chu a hliemna tuorzo lovin zani 3:30AM vel khan RIMS Hospital­ah a thi.Romita hi Restaurant neitupa nuhmei a nih. Hi huna hin hi restaurant a inleng pasal pakhat le nunghak kum 19 mihai khawm kap hliem an nih. Pasal kap hliema um hi Y. Suraj, nuhmei nei lai a nih. Hi thil tlunga hin KCP Poirei Lup chun inrawlna an nei thu an lo puong ta a nih.

IW district­ah Cr.P.C. 144 puong
IMPHAL: Zani hmasa zana inthawk khan District Magistrate, Imphal West chun hi district pumpuia dingin Cr.P.C. 144 a uong. Hi Order hi thuthar um nawk hmapo hmang ning a tih. Buoina siem tum an um ti report dawng a ni leia Cr.P.C. 144 hi puong a nih tiin District Magistrate, Imphal West thusuok chun a hril.

Moreh Border khar Gate khar
IMPHAL: Sumdawngtuhai inhrietthiemnawna leiin zani zing dar 7:30 a inthawk khan Moreh Border (Gate No.2) chu  khar pha a nih. Namphalong, Myanmar a inthawka hung han Moreh, Manipur, India neka inman lemin Zawngta an zawr a. Hi taka inthawk hin Myanmar le India rama Zawngtha Zawrhai inkarah buoina le inhrietthiemnawna a hung suok a, hi leia Moreh Gate No. 2 hi khara hung um nia hril a nih.

Unau 2 tuiah an tla hlum
AIZAWL: Zani zing dar 9 vel khan Serekhan Hmarveng, Mizorama Laldawngliana nauhai Miss Lalneihkimi (22) le a sangpa Lalramnghaka (20) hai chu Tuilut vadungah tla hluma hmu an nih. Unau pahnihai hi hme ding zawnga fe an nih. Zani ma khan hi khaw mi bawk Doni an tipa chu inkhaihlum saa h mu a nih. Ama hi Serkhan Khual venga cheng a nih.

Sonowal in Nomination a file
GUWAHATI: Assam Assembly Election hung um dinga BJP Chief Ministerial candidate Sarbanan Sonowal chun zanikhan Majuli A/C a ngir dingin nomination paper a file. Mr Sonowal hi Centre­a minister ni lai mek a ni a, Nomination paper a file huna hin BJP leaders le MP Rameshwar Teli le Kamakhya Prasad Tasha le midang dang han an zui. Assam Assembly Election phase khatna chu seats 65 haiah April 4, 2016 in vote thlak a ni ding a nih. Congress khawmin zani hmasa khan first candidate list an puong tah. Assam CM Tarun Gogoi chu Titabor bielah ngir a tih.

Parliament Budget Sesion thawkkhatna zo; 
Kum 3 sungin ministry tum tum han foreign inzinna-ah Rs. 1,537 crore an hmang
NEW DELHI: Parliament Budget Session a thawkkhatna chu zanikhan zo le sukchawl lailawk a nih. Parliament Budget Session hi April 25, 2016 ah sunzawm nawk ning a ta, May 13, 2016 chen Parliament Session hi nei ning a tih. Zanikhan hriltlangna um loin The Sikh Gurdwaras (Amendment) Bill, 2016 passed a nih. Rajya Sabha a chun Trinamool Congress (TMC) MPs le Ministers hai chunga Sting Operation thaw a ni chungchangah TMC le CPI(M) member­hai karah inselna nasa tak a suok. Lok Sabha Speaker Sumitra Mahajan chun hi chungchang hi Ethics Committee, Lok Sabha rel dingin a peksuok. TMC MP thenkhat chu Company tehlem pakhat ditsaknain th amna an laka intum an nih. Hi thua hin BJP chun West Bengal CM Ms Mamata Banerjee chu inban dingin an phut.

Chun, Aadhar Bill chungchanga khawm sawrkarna cheltu members le Selkaltu member hai  Rajya Sabha­ah nasa takin an insel a. Finance Minister in an rawtna siem a pawmpek naw leiin TMC, BSP le BJD member­hai lem chu lungawi lovin Rajya Sabha a intahwk an suoktau. Congress members, Jairam Ramesh chun, Aadhar Bill hi siemthat dingin rawtna a siem bakah lo thei lo thupek (mandatory) anga hmang dinga siem ninaw raw seh tiin ngenna a siem. Aadhar Bill hi amendments 5 leh Rajya Sabha chun zanikhan Lok Sabha­ah a thawnkir.

Kum 3 liemta 2012­2013 sung khan Union Ministry tum tum han foreign inzinnaah Rs. 1,537 crore an hmang tiin zanikhan Union Minister of State for Personnel, Public  Grievances and Pensions, Jitendra Singh chun Lok Sabha an hriettir. Foreign­a inzin hi ministry 62 an ni a, sum hmang rawn tak chu Ministry of Personnel a ni a, Rs. 351.65 crore an hmang niin Jitendra Singh chun a hril.

Petrol le Diesel man a kaisang
NEW DELHI: Zani zanril­a inthawk khan Petrol man litre 1­ah Rs. 3.07 le Diesel man litre 1­ah Rs. 1.90 (including VAT) in a kaisang. Hi dungzui hin Delhi­a chun Petrol litre 1­ah Rs. 59.68; Kolkata­ah Rs. 65.76; Mumbai­ah Rs. 65.79 le Chennai­ah Rs. 59.13 a hung nit a ding a nih. Delhi­a chun Diesel litre 1­ah Rs. 48.33; Kolkata­ah  Rs. 50.75; Mumbai­ah Rs. 55.06 le Chennai­ah Rs. 49.09 a hung nit a ding a nih tiin Indian Oil Corporation thusuok chun a hril.IOC, Bharat Petroleum Corp (BPCL) le Hindustan Petroleum Corp Ltd. (HPCL) chun khawvel pumpuia thautui man enin thlatin an ennawn hlak a nih.

NDFB(S) cadre pahni kap hlum an nih
GUWAHATI: Assam­a Udalguri district sunga Hatipota village a chun zani zingkar inhmatak 1.15AM vel khan Police hai le NDFB(S) hai an inkaptuo a, inkaptuonaa hin NDFB(S) cadre 2 – Daoharu le Jackpot hai kap hlum an nih. Inkaptuona hmuna hin 7.65mm Pistol 2, magazines 2 le a mu 4 bakah 7.65mm kapsa 5 le 9mm Pistol kapsa 4 bakah SIM Card pakhat hmu a nih tiin IGP Dr LR Bishnoi chun a hril. Election hung um ding lei hin Assam­a chun venghimna nasa taka sukkhau a ni a, Assam le Arunachal Pradesh inrina hmuna khawm dappui thaw zing a nih tiin Bishnoi chun a hril.

BJP in MPs 12 Panel a inthawk a ban
NEW DELHI: BJP chun Vinod Khanna, SS Ahluwalia, Dushyant Singh, Ramesh Pokhriyal le Varun  Gandhi hai thangin  MPs 12 hai chu  meeting­a an thang   tlawm leiin parliamentary panel  member an ninaa inthawk an ban. Panel a inthawk peithlaka um hai hi Estimates Committee; Public Accounts Committee (PAC) le Committee on Public Undertakings (COPU) member an ni tawl. Vawi iemanizat Committee­a thang hlak dinga inhriettir an ni hnung khawma meeting an ngaitha leia an aiaw ding midang ruot dinga rel a nih tiin Parliamentary Affairs Minister Venkaiah Naidu chun a hril. BJP chun, panel members hai chu meeting­ah 50% bek an thang ngei ding ti a ni a,  meeting­ah 50% khawm an thang tling naw chun  midang an aiawtu ding laklut ding ti a nih.

CBSE question WhatsApp­ah a leaked
NEW DELHI: Central Board of Secondary Education’s (CBSE) Patna region hnuoia Class XII  Mathematics question chu March 13, 2016 zan khan a leaked­a WhatsApp haia hmu theiin a um bakah mi thenkhatin Pathienni khan exam centres bulah hin question le answers hai an zawr nia hril a nih.CBSE officials han experts hai rawna an enfel hnungin question pahni hai chau question set­a um leh an ang lei le sample paper tam tak web a khawm hmu thei dinga a um leiin Board chun question leaked in a pawm naw niin senior official thusuok chun a hril. Hi thua hin student le nu le pa thenkhat chun lungawi lovin question leaked le inang question 14 a um niin an hril a, re­exam thaw dingin an phut.

Parrikar China ramah an zin ding
NEW DELHI: Defence Minister Manohar Parrikar chu China rama an zin vawikhatna dingin April 18, 2016 a inthawk khin ni 3 sung cham dingin China ramah inzin a tih. Line of Actual Control (LAC) pela China sipai hai an hung lut rawpna le Pakistan­occupied­Kashmir sunga People’s Liberation Army (PLA) sipai hai an hung lut sap peina chungthua China ram inzin tum a nih. China rama a cham sungin Chinese Defence minister bakah PLA hotu hai inhmupuiin defence hmunpui thenkhat sir bawk a tih.

Bus­a inthawk bomb puok leiin mi 16 an thi
PESHAWAR:  Pakistan­a Peshawar khawpuia chun zanikhan Bus pakhata inthawk bomb a puok leiin nuhmei 3 thangin mi 16 an thi bakah midang 30 chuong an hliem. Bus hi Civil mi Secretariat thawktu hai chuongna a ni a, bomb puok huna hin Bus­a hin mi 50 vel an chuong nia hril a nih. SP Cantt Kashif  Zulfiqar chun, bomb puok hi Improvised  Explosive Device (IED)  niin Bus sunga  kam a ni a, IED a hin kg. 8 a rik thilpuokthei hmang a nih tiin a hril. Kar hmasa khawm khan Shabqadar bazar, Charsadda district­a thichil bomb puok leiin mi 17 an thi bakah midang 31 in hliemna an lo tuok ta a nih.

Ecuador a vuongna tla thla­ah mi 22 an thi
QUITO: Zanikhan Ecuador sipai hai chuongna Israel siem Arava plane chu Amazon region­ah tuoksiet tuokin a tla thla a, a sunga chuong mi 22 hai chu an thi vawng. Vuongna sunga hin Ecuador sipai, parachuting exercise nei ding 19, Pilot 2 le mechanic pakhat hai an chuong a nih. Tuoksiet a tuok nasan hriet a ni nawh. Hi vuongnaa chuong hai hi an thi vawng tiin President Rafal Correa chun a hril.

Law Commission Chairman dingin Chauhan
NEW DELHI: Supreme Court judge hlui Balbir Singh Chauhan chu Law Commission Chairman dinga ruot a nih. Chauhan hi Law Commission Chairman 21­na ding a nih. Justice  Chauhan (66) hi Cauvery River Water Disputes Tribunal chief ni lai mek a ni a, May 2009­July, 2014 inkar sung Supreme Court Judge lo chel ta le July 2008­May, 2009 inkar sung Orissa High Court Chief Justice sin lo chel ta a nih. Law Commission Chairman sin hi September, 2015 a inthawka kha ruok ta a nih.

Rs. 11 lakh umna bag an tlanhmangpui
AURANGABAD: Motorcycle­a chuong pasal pathum hai chun March 14, 2016 khan Pat­a sumdawngtu Shaikh Riyaz Shaikh Wazir (40)  chawi lai Rs. 11.72 lakh umna bag chu Aurangabad bench, Bombay High court traffic signal bul lai lapekin an tlanhmangpui. Wazir hi Kaudgaon mi niin a thil zawrna man la dinga a ruolpa le Aurangabad­a hung a nih. Police chun case registered in an suizui mek.

VAWISUN THUPUI
Thlemnaa in lut nawna dingin inring zingin tawngtai ro; thlarau chun chu a pei a, tisa ruok chu a hrat naw a nih,” a ta.  ­   Mathai 26:41

Editorial: Consumer/Customer­hai Rights

Zani hmasa (March 15, 2016) khan khawvel pumpuiah World Consumer Rights Day uluk taka hmang a nih. March 15, 1983 khan World Consumer Rights Day hmang tan a ni a, hi taka inthawk hin kum tinin March 15 chu World Consumer Rights Day a hmang rawp a hung ni ta a nih. Ram changkang, hnam var le lekhathiem hai chun Consumer­hai rights thatzie hi an hrietchieng leiin an ngaipawimaw hle. Tribal­hai ruok chun ngaipawimawna chang ei la hriettawk naw leiin Consumer­hai right hi ei la hmang tangkai naw hle. Hi thil hi a umzie  indik tak ei la hriet naw lei niin an lang. Hieng a ni lei hin Consumer Rights chungchanga hin awareness Campaign ei la nei tlut tlut a tul hle. Ei mithiem le dan hrie mihai khawmin ei ram mipuihai hril var annawleh hril hrietna dingin Consumer Rights umzie le nina tak hi Chanchinbu, TV le Radio haia hung ziek uorin hung hril ngun hai sienla nuom a um.

Manipur a ei unau Meitei­hai hi a population zawngah an tam lem el bakah ei ni nekin Rights chungchanga hin an hrietna le varna an sang lem a, hi lei hin Consumer­hai rights hi an hrietchieng a, an hmang ngam bawk leiin Vai dawrkai le Vai mahajon lien hai khawmin an  inza lem, an hlem mei mei ngam nawh. Hi day pawimaw dan le a thatzie an hriet leiin Imphal  khawpui le phairam hmun tum tum haiah World Consumer Rights Day hi bat lovin kum tinin an hmang bakah Consumer Rights le inzawmin Awareness campaign le Seminar/Workshop hai an nei rawp hlak. Churachandpur district thangsain Manipur tlangram district haia chun World Consumer Rights Day hi hmang a ni ngai naw bakah Consumer Right le inzawmin awareness campaign khawm ei nei ngai meu nawh. A hming chun Consumer Club ei nei a, sienkhawm an hrat tawk naw leiin  mipui hriet le rawn an hlaw nawh.

Sawrkar khawmin Consumer Rights hi a ngaipawimaw em em leiin National level, State level le District level chenin Consumer Court an din ta a nih. Churachandpur District a ngei khawm Consumer Court building ding a bawl tan ta a, sienkhawm mipui tiengpangin ei ngaipawimaw tawk naw lei amani ding hi building bawlna sin hi a hrat naw hle. Mipui tam lem chun hiengang building bawl a ni thu le khawlai hmuna bawl am a na ti ei hriet ring a um nawh. Ei thenum state hai laia pakhat Mizoram chun Consumer Court hi nasa takin a hmang tangkai ta a nih. Hi Court hi Consumer­hai indikna le chanvo tiengpang ngaituotu le mipui indikna le chanvo venghimtu a nih. Mipuihai harsuok ei tiu a, Consumer Club, Consumer Court le Consumer Rights hai hi sukhratin hmang tangkai seng tum ei tiu. Ei District­a Consumer Club khawmin hma hrat takin hung la ngei sienla nuom a um.

Ram a hung changkang pei a, ram hmasawnna taphawtah Consumer Awareness a nasa a, dawrkari le sumdawngtu han an customer/consumer hai an inza a, tawngbau tha hmangin an indawrpui hlak. Mipuihai hin sawrkar lakah le thil zawrtuhai lakah ei chanvo (rights) indik tak ei hriet a, ei hmang ngam seng a hun ta a nih. Chu thil hriet chieng ding chun sun hmusuok a harsatzie ei hriet a ngai a, indik taka sum laklut le hmang ei ngaipawimaw ngei bawk ding a nih. Consumer/customers hai pawimawzie hi Vai han an hriet a, ‘ka pi, ka pu’ ti an rin der nawh.An thil zawr dinghai an zawr theina ding a ni phawt chun ienganga hmelsie tawp le mawl khawm nihai sienla an Customer hai chu pi le pu tia koin bau tha hmangin an chunga an ngilnei hle hlak. Churachandpur town sunga Vai dawrkai le sumdawnghai dawtheizie hi ei hriet seng ei ring a, ei ni rawi leh chu inthlau tak el ei nih.

Customer/Consumers ei tihai chu dawr le Bazar a thil van chawtuhai hi ei nih. Consumer/Customer hai hi ei fimkhur le thil ei chik pei hle a tul. Thil ei inchawk hrim hrimin maximum retail price (MRP) inziek en ngei ding a nih. Chun, thil ei inchawkna bawm annawleh a kawrah Free or Free Gift ti inziek a um le umnaw en ngei ngei bawk ding a nih. MRP inziekna neka man tama thil inchawk lo ding le Expiry date pel ta hnung inchawk lo ding a ni bawk. Hiengang thil ei lo inchawk pal a ni chun va thlengkir nawk el ding. An lo phal naw chun consumer Court a hek ngam ngei ngei ding a nih. Chun, Company hran hran han free gift an sie hai hi lak hlak ding a nih. An peksa naw a lo ni khawmin hni ngam ding a nih. An pek nuom naw chun consumer Court­a hek theina dingin Cash memo lak ngei ngei ding a nih ti hi hriet tlat ding a nih.

Dawrkai/Mahajon fel, tha, indik le ringum tam tak an um laiin dawrkai/mahajon mi hlem hmang, mi indiklo le ringum der lo thenkhat an lo um hlak leiin  fimkhur taka  ei thil inchawk hai hrim hrim en hlak ding a nih. Hi thil hi thil hote a ninaw a, ngaipawimaw thama ngai ding a nih. Dawrkai/mahajon suol thenkhat chun a FREE um hai hi an peksa ngai naw a, a hrana man neiin an zawr hlak. Dawrkaihai hlembawla um ding a ni nawh. Hieng ei hril hai po po hi Consumer/Customer­hai chanvo (rights) indik tak a nih.

Post a Comment

Powered by Blogger.