-LRS Puruolte

CCPUR: March 7, 2016 ni khan kum 1985 a lo indin tah Hmar Youth Association (HYA) chun 31st Founding Day chu a motto “Thiltha thaw, Nundan Mawi, Tlawmngaina” ti thupui a hmangin hmun hran hran a hai inserna an nei. Hi ni hi Pathien kuoma lawmthu hril, hnatlang, games & sports le essay ziek thangin inruolsiekna chi tum tum le mipui ta dinga thiltha thawna ni in an hmang tlangpui tawl.


Gen. Hqrs Level a chun “Open Air Musical Night” in zan hun ah programme Saikawt Playground, CCPur hmun ah hmang a nih. Hi huna hin Hmar, Mizo, Kuki, Zomi laia hlasak thiem le rimawi rem thiem, Band inlar tak tak haiin mipui hla’n an in awi a nih. Hi hunser hi zan dar 6 pm in tan a ni a, HYA Flag khai parna chu Upa Laldawnlien Varte President, HYA Gen. Hqrs. in a nei a. Manipur-a Anti Tribal Bills/3 Bills leia Tribal Movement le inzawma hringna chan mi 9 hai inzana le sunna in totawka hun hmang a nih. Hi hun hi Churachandpur ADC a VC, EMs, MDCs, JPO CCPur le hnam tum tum le Hmar hnam sunga pawl tum tum a thuoitu haiin an uop kim hle a, mipui fekhawm an thahnem hle bawk.

HYA 31st Founding Day le inzawm hin HYA Motto chu thupui a hmangin Essay (Thusep) ziek inelna nei a ni a. Lawmman latu hai chu 1st Timothy Z. Zote, 2nd Samuel Zothanglien Zote le 3rd Gospel Songate hai niin Sumfaiin Rs. 5,000/-; Rs. 3,000/-; 2,000/- le Certificate inhlan an ni a. Consolation Rs. 500/- seng Joshua L. Amo, Edward Darthanglien Sinate, Jessy Lalnunrel Songate, Jim Greene, F. Thanga Nungate, Jakaria Shakum haiin an dawng bawk.

Hrilsietna le sawiselna um sienkhawm hienganga hun huoihawt a nina san tak President, HYA Gen. Hqrs. le hi Founding Day Celebration Chairman ni bawk in a thu hrilna huna a hrilfiena a chun Thalaihai chu tlawmngaina kawnga khawm nisien an sawl tawl ta hle a, ei sawr bawk leiin vawikhat nanana chu an nuom zawng hei thawpui inla ti leia hiengang zawnga Founding Day hi zan huna hmangpui le huoihawt a ni thu a hril a, Hmar-hai chu thaw ding ti ta chu thaw hlak mi anni thu hai mipui hma ah a puong bawk.

HYA hin tuhin Jt. Hqrs. 7 le Branch iemanizat neiin Branch 3 Moreh, Dimapur, Diphu hai chu direct in Gen. Hqrs. a inkhai an nih. March 7, 1985 a kha Rengkai, CCPur a HYA hi indin a nih. Hi zan hin HYA Gen. Secy. hmasatak Pu Lalhmuok Famhoite khawmin uop ve in Sawrkar tieng le hnam thuoitu Lawmman semna huna inhlantu dinga ko hai lai a thang ve. President hmasatak Pu Lala Khobung ruokchu hi huna hin remchang nawna leiin a hung inlang thei nawh.

HYA Anthem “Hmar Youth Association” ti hla Pu James Songrolal Songate in 1993 a HYA in phuok dinga a ngen a phuok chu HYA Muolvaiphei Branch in hlapawl (Choir) in hi hun a hin an sak a, mipui lungril a tawk hle. HYA Muolvaiphei Branch hin sun huna chun Muolvaiphei le Saikot khuo inkar Sugnu Road chu lampui inkhurna hmun hai Shaktiman Truck 7 lai zet anni sum sengin an vur ruol bawk.

Huoihawttu, Celebration Committee chun hi hun a hlawtling theina dinga hmalatu, Artiste hai, chanvo peka um sukpuitlingtu hai, suma thangpuitu- Mimal le Sawrkar Dept. tum tum hai, ADCC sunga biel tum tum a MDC hai, Saikawt Defence Party, Lal le Saikawt Village Authority, Saikawt Youth Club, CCPur Police, mimal le pawl tum tum hi programme a mani hun hlu tak pe a uoptu hai chungah lawmthu an hril a. Pathien-in an mamaw ang peia malsawm dingin an ditsakna an inhlan. CCPur-ah HYA in Ambulance a nei vat theina dingin HYA hmalakna chu lo thlawp ding le hi zana Video Coverage thaw a um chu zawr suok a ni hun ah tlawmngaia sum a lo chang pek dingin mipui hai Celebration Committee le HYA Gen. Hqrs. thuoitu hai chun ngenna an siem bawk.


The 31st HYA Founding Day Celebration Committee hai chu Chairman - Upa Laldawnlien Varte, Secy. - Alan Famhoite, Fin. Secy. - Upa Laltlanmawi, Secy. Info. - Lalramsiem Zote, Members: LRS Puruolte, Ruolchunghnung, Lallienkhum, Lalchunghnung Sungte, Lalvulsang hai an nih.

HYA Facts:
1. March 7, 1985 in Rengkai, CCPur ah HYA indin a nih.
2. Aug. 1, 1985 in Manipur Govt. ah Registered a nih. Regd. No. 24/SR/15- Co-op, CCPur.
3. Sept. 6, 1999 in NGO (Social Welfare) Manipur ah Registered a nih. Regd. No. NGO Regd. No. 7 AH (99) of 1999.

 Photo Credit: Dinthara Darngawn








Post a Comment

Powered by Blogger.