Responsive Ad Slot

Chanchintha Palai Silver Jubilee Lawmna ropui taka nei

Monday, March 21, 2016

/ Published by VIRTHLI
CCPUR |Virthli News: March 21, 2016 khan Rengkai ICI KTP in April 7, 1991 a inthawka Type Writer le Cyclostyle hmanga Newsletter an lo insuo tan CHANCHINTHA PALAI (Weekly News) a kum 25-na (Silver Jubilee) chu ropui taka lawmna hun ICI Biekin, Rengkai, CCPur ah hmang a nih. Hi Newsletter hi tuhin chu Computer hmanga print a hung ni tah a. Kohran inhrietpawna le Chanchintha puongdarna kawngah a thaw hlawk hle a nih.



Chawhma dar 11:00 am khan Jubilee Lung hawngna Rev. L. Joshua Chairman, ICI Tuithaphai Presbytery, KTP in a nei a. Jubilee dar (darkhuong) vuokna ruotbik a um ha'n an nei bawk. Hi huna hin KTP Anthem ("Lal iengkim thaw thei Pathien" - Rev. HP Runremthang i phuok) chu sakna mipuiin an nei a. Chu zo chun Chanchintha Palai Board Member fam lo chang tah hai sunna hun Rev. Rosung Sinate Awptu Pastor inrawinain nei a nih. Kona Rawl Trio, Gilgal KTP Choir (Rengkai), Blessed Choir, ICI KTP Rengkai haia inthawk hla mawi tak tak ngaithlak a nih.

Hi huna hin Keynote Address Pu Henry Lalngaizuol, Chairman, KTP, Rengkai in a neizovin Lawmpuina thucha Rev. Zathangsing Zate Executive Secy., ICI; Rev. HP Runremthang Youth Co-ordinator & EAL, ICI le Rev. L. Joshua Chairman, ICI Tuithaphai Presbytery, KTP haiin an hril a. Report Tv. Japhet L. Hranngul Secy. Chanchintha Palai Board in a pek a, Upa Lalmanlien Founding Editor le Pu L. Hmingsang Joute Founding Member, Pu Joseph Joute Founding Member le Editor lo ni hlak le mi dang dang haiin Thuhril tawi hun an hmang bawk.

Hi huna hin Memento Chanchintha Palai tadinga lo inhmang ta hlak hai kuom ah inhlan a nih. Upa Lalmanlien Founding Editor le Pu L. Hmingsang Joute Founding Member hain Thuhril tawi hun an hmang bawk. Hunkhar le ruoi inhlanna tawngtaina Rev. SK Songate in a nei zovin mipuiin Bawng 1, Vawk, Bawngsa le sa dang dang tuihnai tak an kiltlang.

Chanchintha Palai kum 25 (Silver Jubilee) le inzawm hin ICI KTP Sielmat le Zing Arasi (Weekly News), WMCEI Thalai Pawl haiin lawmpuina thuziek an inhlan bawk. Kum 25 sung hin News Editor sin mi 16 laiin an lo chel ta a nih. Kum 2005 a inthawk kumtin deu thaw CP Nite (Chanchintha Palai Nite) ti hming putin kum tawp tieng KTP programme siemin hlasakthiem hai leh insukhlimna hun hmang a ni hlak baka hawkers (news semtuhai) lawmman pekna hun buotsai a ni hlak a nih.  Tuhin subscribers 315 vel CP hin a nei mek. Article contributor hai lai Pu Thangsawihmang, Pu Lalnghatlien Joute, Pu Lalramhlun hai an thang.

SECRETARY REPORT  a hrana tiem thei dinga hung pek ning a tih -Virthli
----------------------------------------------------------------------
Reporting: LRS Puruolte | Photographer: Muona Infimate




Don't Miss
© all rights reserved
made with by Simon L Infimate