* Speech delivered by L. Keivom at the 55th HSA General Assembly (27-29 January, 2016) at Muolhoi on the occasion of his acceptance of HSA Lifetime Achievement Award 2016.


~ By L. Keivom

Trust yourself. Create the kind of self you will
be happy to live with all your life. Make the most
of yourself by fanning the tiny, inner sparks of
possibility into flames of achievement.
- Golda Meir (1898-1978)

Hmar Students’ Association General Conference voi 55-naa Damlai Thangsuo chawimawina tonlairang in mi’n hlan hi ka lawm takzet cheu. Ieng lai khoma ka hma khala hnuoi tienga inthoka mi domtu Pathien lunginsietna zar chauha hi ditsakna hi ka dong a nih ti ka hriet chieng a, ka lawmna bul tak chu Lalpaah a nih. A kuomah ropuina le chawimawina ka’n hlan.

HSA le Kei
HSA leh hin kum inruolin kan pieng a, ka neka thla thuma naupang a nih. Tu chena lungruol taka intlon theia ka la um hi vangnei chungchuongah kan ngai. Hnam le khawtlang thilthawnaa tu chena ka thrang rawnna tak khom HSA thilthaw le inzom a nih. Ei hnam ro hlu tam tak, abikin ei tlangkhuo thu le hlahai sakhaw hminga inchimpiltir ei tumnaa inthoka sansuok tuma nasa taka thrang ei lak trăng trângnaa hmangruo poimaw le kut trangkai ni hlak chu HSA a ni rop. Hnam ban ringum a nih.

Ka hringnuna suoi ka nam detna tak laia mi khom HSA a nih. Entirna pahni chauh hang hril ka tih.

Pakhatna, HSA emblem le puonzar duong dinga an mi dande angin, thiemthainu inthuomna dongin, a ruongam ka duong suok a. Chu lim chu Nk Lalringin (a hnunga Rev. Hrilrokhum Thriek nuhmei tahin) puon hlap rong hringah mawi takin a hung thruichei a, HSA puonzarin 1962-a inthok khan ei hmang ta pei a nih. ‘Sinin, Hrilin, Sanin, Thruoiin-Serve The Nation’ ti motto-a ei nei dam; Hmar Arasi (Pole Star) ni si, kil ruk nei, Davida Arasi/Phaw, Solomon Suoi (Seal), Bethlehem Arasi, Israel hnam puonzar lailung hluotu arasi, Krista zara Israel thar ei nizie inentirna arasi lim ei hmang dam hi ka kut tlawm tak Pathienin malsawma a hmangna niin ka ngai a, vangnei ka’n ti em em. Hi chanchin hi 2008 khan artikul ka ziek tah nghe nghe. HSA Emblem tluka thra le mawi le inril hi emblem dang hmu ding a vang.

Pahnina, HSA (Delhi Joint Headquarters) chun 1983-a inthok khan kar tin suok chanchinbu DELHI THURAWN kan insuo tran a, tuhin kum 33 a fe lai mek a na, Zoram khawvela kar tin suok chanchinbu dam sawt tak a nih. DT-a ding ringot hin artikul za tam, a bu-in sut inla bu 50 chuong ni tah hiel ding, ka ziek ta a, chu ding chun kar tin zan khat khawvara artikul pakhat bek ka ziek a ngai. DT hi ei khawvela ei thu le hla hnarpui pakhat a ni leiin hlutin ka ngaipoimaw a, Pathien zara ka thaw thei sung phot chuh sawl le rimsik dawn loin, hi rongbawlna sin ropui hi sunzom pei ka tum a nih. DT sukhring le sukhrat hi ei thu le hla sukhmasawnna dinga a chabipui pakhat a nih.

Thangsuo chawimawina?
HSA ditsakna mi’n hlan ‘Lifetime Achievement Award’ ti hih eini trongin inlet ding ni tah inla, iengtin am ei inlet tawl ding aw? Ka dam sunga ka thil hlen amanih hlawtlingna ka donghai leia lawmpuina a ni tak ka ring a, sienkhom chu chu a sei det duot bok si. Pipu trongkam hmangin, ‘Dam lai thangsuo chawimawina’ ti inla, a fûk el di’m? Chu chu lo ni tah sien, ei khawvel pal laia thangsuonaa ei ngai chu ieng am ni tang a ta? Tum hlen ringot hi thangsuonaa ngai thei a ni ding? Ka tum hlenin, ngirhmun insangah invor tungin, hnienghnar takin mani ringot inhâi buk thŭr thûr lang, thangsuoa ngai ka ni ding? Thiemna tieng phak insang hlein, degree hrang hrang a zênga inkuolin intung lang, ka thiemna chu utrok tur vonin, tu khom trangkaipui thei dingin pe suok si naw lang, thangsuo ka ni thei ding?

Pipu huna ram tieng le in tienga thangsuohai kha ei en chun, mi tlawmngai thei, huoisen, taima, hlawtling le tum hlen, an sa kap amanih bu thlo suok in-ei le inchong a, ruoipui siema a khawnawta hrai hlak mi, sa huoi le râl laka khuo vengtu le humtu, mi baivaihai somdawltu le khawtlang ta dinga mi trangkai an nih. Lekha thiem insang ringot amanih, sin poimaw le ngirhmun insang hluo amanih, neinung amanih, khawtlang le ram le hnam ta dinga sor trangkai si lo chuh pipu inkhinaa chun thangsuoa tiem thei a ni nawh. Inthlangah voi tam tling lang, mipui rong bawl loin, an chan aia fa zotu ni lang, thamna tinreng hmanga inthlanga ka tling le ngirhmun poimaw ka chel khan thangsuo ngirhmunah a mi hlangkai chuong nawh. Rukru neinung chauh ning ka tih.

Ka phu am phu naw?
Chu ngirhmuna inthoka inkhi chun Lifetime Achievement Award hi dong tlak ka ni? Dong tlaka mi ngaituhaiin an mi ngaina chu ka phu zo am? Chu zawna chu, a trangkaipui ei um takduoiin, keima tienga inthoka ka nun ngeia ni tina ka lo don dan inzawt ka tum a nih.

Ngaituona pangngai put tu khomin ni nuom le ni tum ei nei seng. Chu chu hnot dingin inhnikna, tumruna le teirei peina ei nei am? Lo nei khom ni hrim inla, Pathienin theina le zie bik, chemkalna zawng seng neia a mi siem dan ni dinga ei ring le hriet dan leh an inmil am? Naupang lungmawl chun hriet ngaina a la um naw leiin a lampui hraw ding kawkhmutu ding nu le pa a poimaw. Naupang inhnikna zawng le talen neina zawng hriet tum a, chuong tienga sukphur le thruoi a ngai. Chu chu hre a, chu lampui hrawtu chu mi hamthra, mani tawka mi hlawtling an ni rop hlak. Naupang inhnik nawna zawng le theina a tlaksamna tienga thruoi ei tum ruok chun a lungril a hel a, a’n hnikna a bo nuom. Chu chu Thuvar 22:6 a “Naupang chu lampui indik inchuktir la, a upat hnung khomin petsan ngai naw nih” ti leh an inzom tlat a nih. Hi chen hi a thuhma, a khulang khangna dinga ka zuk hril a nih.

Ka tonhriet
Hi taka inthok hin tlanbahrikin ka nuna thil tlung le a bebawm tlangpui chauh, a trangkaipui ei um takduoiin, phor lang ka tum a nih. Unau 13, pasal 7 le nuhmei 6 laia a naupang tak, thla thum ka ni laia ka pa thisan, Pherzawla pieng le lekha inchuk, Pawlkuo ka thaw kuma motor hmu phak chauh, Matric voi hni tlol, rêl lu hmu loa B.A tling, MA inchuk dinga ka fe truma rêl hmu trawk, ka nih. Ka trobul hril hi Tirko Paula trobul hril leh chu a kar a hla vai vai khop el. Sienkhom, ka’n zapui nawh. Ka vangneizie thu a nih hril ka tum.

Inhnikna zawng bawzui
Naupang chite ka nia inthoka ka’n hnikna pakhat chu thu le hla a nih. Hla an mi hril hi a thluk ka thiem ruolin a thu baihat ka tum ngei ngei a, chu chu ka thaw hma chun chang dang ka kansan ngai nawh. Ka baihat zoin a thu umzie le an trongkam hmang ka hriet thiem nawhai chu a hrehai ka’n don a, a trul chun ka ziek thlak hlak. Tienami le tienlai chanchin hrie upahai bulah inthrungin thil ka’n don a, ka ziek thlak a, hla thu un tak tak, a umzie an mi hril thei naw hai khom ka baihat ngat ngat hlak. Hi thil hi Sande Sikul-a khom ka sunzom pei a, chang hau tak ka ni naw khoma a hau tak dottu niin, kum tin chang 1000-1300 inkar ka nei hlak.

Innghatna bulthrut rem
Hieng thil ka thaw lai hin, a hnung peia siema ka um san rongbawlna ka phur suok theina dinga Pathienin a mi lo buotsaina a nih ti ka hriet nawh. Dam tê tea ka hung hriet suok tran hun chu, Saptrong hmangin zuk hril inla, basic training course ka zo hnung, ka thil inchukhai a taka ka hmang trana inthok niin ka hriet. Eini tronga hril chun, hringnun zirtirbu ka suo hnung, tiem dan le ziek dan ka hung hriet le hmang trana inthok a nih ti thei ei tih. Dam sung hun hi a tawi em a, mi tam lem hi hringnun zirtirbu suo chu hril lo, A AW B khom zo hman loa muol liem ei ni el thei. Thil mak a ni nawh.

Chu chu zuk hril fie met thrain ka hriet. Mi threnkhat chun awi harsa an ti el thei, lekha ka’n chuk tran tak tak hun chu Indian Foreign Service ka zom hnung, abikin fawren-a ka um hnung, sikul thraa ka nauhai an hung kai ve hnung a nih. An lekhabuhai chu anniin an inchuk hmain ka tiem hlak a, sikul le kawlez kan kai laia kan inchuk ve lo, hrietna bulthrut remna dinga makmaw, a lo tam khop el a. Chu chun ka kawrongzie le baksamzie a mi hril a, All India Competitive Exam-a ka lo tling el dam khah mak ka ti thar a. Ka nauhai zai ka zawm phak ve tum si chun an thil inchuk chu hre ve a, ka kawrongna hruk bit a ngai. Chuleiin, fawren-a kum 21 a zawna kan thang sung khan dannaranin thla tin lekhabu puitling bu nga bek ka tiem hlak a nih.

A sei taluo ding a ni leiin, ei thu hi sawr chin pei inla. Ka’n hnikna tak chu thu le hla rama cheng le inhnel a nih. Chu chu ka thaw theina ding chun fak le dawna intodel a, kei le ka sungkuo enkol thei ngirhmuna ka um a ngai. Chu lei chun ni ka tum ngai lo, ka thil inhnikna zawng khom ni lo, sorkar sina ka’n tal lut a ngai a. Ka sin dit tak chu thu le hla tienga intat ngei le inhmang pei theina service a na, chu service um suna ka ngai chu Foreign Service a nih. High School-a zirtirtu le headmaster, college lecturer le Indian Revenue Service (IRS) sina iemani chen ka’n bur hnungin 1970 khan IAS hnawlin IFS ka zom a. Kum 2002-a ka penson chen khan Pathien lunginsietna zarin lekhabu sawmhni chuong, tienami sei le tawi 12 vel, hla 150 chuong, thusep le artikul a zaa tiem ziekin ka sut hman a nih.

Thangsuona: Baibul inlet & sut
Chu chu a aitecheuna ang chauh a la nih. Ka penson hma kum iemani vela inthok khan naupangte ka ni laia inthoka Pathienin ka hriet naw lai khoma ka hma khala hnuoi tienga inthoka a mi dom san le malsawmna tiem seng lo a mi vur san chu keimaah a chieng deu deu a. Chu chu Baibul inlet le sut dinga a mi lo ser tungzie a nih. Thil dang tam tak, ka penson phaa thaw dinga ka lo hisaphai chu ka hmaah a’n tieng khup a. Zo hnathlakhai dam khawsuokna ding le insuikhawmna inpui ding ‘Zoram khawvel’ ruongam le phurrik a mi pek chu a biel a zauin thaw ding a tam em em. Ei histawri fumfe lema suidon a, ei pi le puhai sulhnung ram fang thei dingin Kawl ramah sorkhar hmangin a mi sie a, bawzui ding an hnawk hner hnur a. Ka lekhaziek tam tak, a bua siem ding le lekhabu ka lo sut tah sa, ennona sut nawk ngaihai chu a dorzonin a’n tieng bok a.

Chuong chu a ni lai zingin, Baibul ram po po deuthawah sorkar thahrui hmanga inzin a, Baibul ram ka fangna thu lekhabu ‘Thuthlung Ram’ chen ka lo ziek khah, Baibul inlet sin thaw dinga Pathienin a mi lo buotsaina a nizie ka hung chieng tuol tuol a. Chu mawphurnaa inthok chun tlan hmang tum ni lang, Jona ngirhmun kha ka pel ka ring nawh. Sienkhom, kohrana rongbawltu, thlarau mi le rawn tlak deua ka ngaihai photin ka dam sunga ka zo hman an ring naw thu dam, a thawtu ding Baibul inchuk tah mi thiem an tamzie thu dam, lekha zieka inhmang lem ding damin an mi’n fui a; mi hril phur nek hmanin Mosien Kanan ram en thlithlai dinga mi 12 a tir laia ringduop10 hai ang vong kha an nih.

Hieng ang ngirhmun hi mihriemin ei pal pha leh sungril naa mi betu rawl hi ringduophai rawlin a hlan nuom khop el. Mi kotu le mi sertu băn, tawpintai nei loa sei le hrat tieng en loa, mi dangtu Tuipui Sen incham puou chauh hmutu ta ding chun hringnun kalchawinaa hin tum hlen loa tlansietna ding a tam. Sienkhom ringhlăna rawl an ring po leh Lalpan ka tumrŭna le hratna a sukpung a, ka phûr zuol sauh lem a. A mi kosan chu kum 2002-a ka penson charin ka bitum nghal a, ni tin darkar 12-16 inkar sin ka thaw a, minit tin hmang hlawk ka tum a, minit tin hlawtlingnain a mi hmuok el a nih. Kum 2004 khan Thuthlung Thar, Sam & Thuvar inkop, 2007 khan Baibul pumpui, 2015 khan Sut hnina (Revised Second Edition) chu a hung suok tah pei a nih. Hi hi Pathien lunginsietna zara thang ka suona ni veng a ti?

Kong khat zawnga en chun, “Ni e” ti thei a nih. Kong danga thlir ruok chun, Baibul inlet hi tawpintai nei thei lo thil a ni leiin, thangsuo zo a um thei nawh. Delhi Version-a hin thumal nuoi 8 le sing 7 vel a um a, a thar hlaka inlet a ni leiin mal tin le comma tin hi buon a ngai a, thil hautak, mihriem theina le taimakna pangngai ringota thaw ruol a ni nawh. Pathien thutak, inlet indik loa ngai tam tak siem thrat a ni bakah Hmar trong hmang dan thua baksamna, tritrona le grammar indik lo le sentence kim lohai chu indik lema hriet dana thlak vong a ni tah. Pathien thutak le Hmar trong humhalna le sukhmasawnna hmangruo ni dinga thrangtharhai hmang dinga duong a nih. Hi Version hi Hmar trong awphawi le zierang puta duong a ni leiin Hmar trong a par suok a, a hningzu tlantu ding ruoltharhai hi an vangneiin inhnar an um takzet a nih. Ka naupang lai khan lo nei hman ni inla chuh, a let tamin thu le hlaah hma ka sawn ka ring. Hi buzawla hin hnam humhalna chabipui khom a um.

Delhi Version dangdaina le chungchuongna chuh, Sam-a No. 117 ti chauh naw chuh, hla tina tlar um zat hi inang vonga sie a ni a, chuong ang chu khawvelah tu khom a nei dang an um ti hriet a ni nawh. Chu chu Pathien thilthaw a nih. Baibul inlet sin thaw dinga kum sawmruk chuong hiel mi sertuin theina a mi pek po po luong khawmna a ni leiin, chîk taka bituhai chun trong hmasawna inlethai nekin a nep bik nawzie hmung an tih; a thra lem hman hman niin kei chun ka ngai. Chu chu hre thei ding chun, Version hrang hrang leh enkhi a, buk ton a ngai. Chuonga Delhi Version bituhai chun Baibul hi mitdel ruol sai hmu an hril angin hril ta naw ni hai. A neitu khom mi dang Pathien sawn tah bok naw ni hai. Bethlehem le Kalvari khom ei taptebulah an hung trum tah ti hmu bok an nih. Chu chu ei tronga Baibulin thang a suona ni ngei a tih.

(January 28, 2016, Muolhoi)

Post a Comment

Powered by Blogger.