Responsive Ad Slot

SHAIDC in chanchinbumihai kuomah an thil phut an hrilfie

Friday, February 12, 2016

/ Published by VIRTHLI
Aizawl, 12 Feb, 2016 (Virthli News) : Sinlung Hills Accord Implementation Demand Committee (SHAIDC) chun February ni 10 a Mizoram Chief Minister Pu Lal Thanhawla kuomah ngenna an thelût chu vawisun khan Mizoram chanchinbumihai kuomah an hrilfie.

Aizawl Press Club a thuthar thedartuhai an pawlna-ah SHAIDC ṭhuoituhai chun SHDC a thuneia chu nuom nuoma mimal kuta inhlan ta lo a, Democracy ram a nina ang taka mipuiin council chairman le member chunchangah dittlangna an siem theina dingin an rang thei anga Council election houihawt dingin Mizoram CM chu ziekin an intlun thu le July ni 27 hma ngeia an ngenna sukpuitling dingin an phût thu an hril.


SHAIDC chairman Vanlalsiama chun Mizoram Sawrkar le HPC in July ni 27, 1994 ah inremna thuthlung an ziek anthawk kum 22 lai an vawi hnung khawma vawisun chena accord sukpuitling a la ni naw chu pawi an ti thu le accord suk puitling dingin CM an ngen thu chanchinbumihai a hrila, tuta inthawka thlakhat sungin coulcil election buotsai tumna le accord sukpuitling tumna (assurance) a um naw chun High Court ah an intlun ding thu a hril bawk.

SHDC chu a ram sunga cheng mipui hai ta a ni thu le Development council anthawka ADC-a hlangkai chu Zo hnathlakhai hamsawnna ding le inhumhimna ding a nih, tiin chanchinbumihai a hril bawk.

Chanchinbumihai zawhna dawnin, SHAIDC secretary Lalparkunga chun ramhnuoimi/helpawl hai leh inzawmna an neinaw thu a hrila, an pawl memberhai chu mi naran vawng an ni thu le an thiltum tak chu HPC peace accord sukpuitling a nih a tih.

“Mizoram sawrkarin a ditsak ta phawt kuomah chairman nina an hlan pei hi pawi kan ti a, SHDC mipuihai hmusitna ah kan ngaia chuleiin SHDC in hma a sawn theina dingin an rang thei anga election mi buotsai pek dingin CM ka ngen a nih,” tiin Parkunga chun chanchinbumihai a hril.

SHAIDC treasurer, Robert khawmin a hmasatak an ngai pawimaw chu council election a ni a, chu chu council puitlingna dinga pawimaw tak pakhat a nih a ti bawk.

Press conference a hin SHAIDC chairman le secretary hai hi á¹­huoitu dangha’n an á¹­awiawm a nih.
Thulakna dangin a hril danin SHDC huom sung a him phawt chun Mizoram sawrkar chu election buotsai dingin an pei zing thu le inbuotsaina fepui mek a ni thu a hril.
Don't Miss
© all rights reserved
made with by Simon L Infimate