~ Prof. Lal Dena, Virthli Columnist

Ka pu L.Keivom leh hin kum khat sunga pieng ve ve niin lang khawm, kei hi thla rukin vawkek ka sir hmasa lem. Ka pu L.Keivom pa chun Pherzawl lal farnu a nei leiin lal sutpui a nih a. Ka pi khawm lal farnu a ni leiin ka pu chu lal sutpui a ni ve a, ka pa ruok chu laltupa a ni leiin, lal khawnbawl lai member pakhat ni ve sienkhawm, lal meite hem a ni thung.

Ka pu L.Keivom leh hin ka khawmuol hriet tira inthawka inpawl kan nih a. Tuol- zakuo inphaw bumin a hak a, kei khawma tuolzakuo inphawm bamin ka hak hlak. Kekawr ka bun vak nawh a, ka thilnei chun khaw eng a hmu sawt kher el. Hnap kan hauh em em hlaka, an khat tawkin kan hnarah hin number eleven an ziek thut hlak. Kan hner a tlung pha kan lo fawp duk a, kan fawp mahla chu kan zakuo thla’n kan hruk a, an khawnin an khawn rut hlak.

Siel siela kan thaw hlaka, ka pu chu an thang duong bik leiin a sielin a thang tei hlak. Tawkpui kau sielki ang deuhin a hang chel a, keini a rawi naupanghai chun vawihnam zai, hruiduk, hruihmul, parnemzai le hnabielzaiin kan heih chaih a, a heih inhuk dum duma, a heih intal chun kan thang hman nawh, kan tlu phier hlak. Ana chu, a nu sumphuk tlangah a lo ngir pal chun, kan inhnel lai chu a mi maksan vaka, a nu nene a la va nek hlak.

Zirtirbu kan suo hnungin pawl kan hang nei tan a. Ka pu L.Keivom hi kan pawla pakhatna a ni deuh zing a, a dawta ka unaupa Lalneimawi (Mawiimawia), a pathumnaa kei. Ka pu hi kutziek a thiem em em a, keini khawvela chu kutziek thiem filawr taka kan hriet a nih. A kutziek kan entawn hut huta, a tangkai chuong si nawh. Hrisel naw le pasiet leiin lekha inchukna kawngah khawm ka hnawtphak ngai nawh. Pi Rimawi Pudaite hai leh pawlriet an thaw tum chun, kei chun pawlruk ka thaw ve chauh. Pawlsawm tum hni a lo tlawl pal leiin, pawlsawma ka hnawtphak nawk chauh. Pasiet lei bawkin kan chukzawm thei nawh a, ka pu L.Keivom ruok chu D.M.College-ah I.A. an chuk a, first division-a pasi nghe nghe. B.A. a zo ding tumin paraivetin PUC, ka nuhmei nei zo hlawlin an hostela zu um vein kan ekzam.

Hienglai hun hin ka pi Dar le an inngaizawng tan lai a nih. Ka pi Dar le ka u Thahnieng (a hnunga S.K.Hrangchal nuhmei) hai kha Jorhata nurse zo, Bollywood star-hai anga sari nal tawka zem thei, an pum duong, ruongam le an amul bur mawi tawk zet a ni bawk a. Hostela ka pu L.Keivom dawkan lem kha chu damdawi bur le tablet-in a sip el a nih. Vice Principal L.Tomcha’n tumkhat hostela ka pu rum a chek tum lem chun mak a tih a, “Masi pharmacy ra?” a tih hiel. Ka pi Dar khan a lo zawlruk nasa hmel khawp el. Ekzam tawm an ni leiin fak sukhnik a tul a, mantathur hmin le varaktui an zeu ser hlak. Keini pu Tawnluaia leh, ‘ekzam lai fak sukhnik ei tih aw’ kan tih ve a; nullah bul laia samtawk ra kan lo a, ngathu leh kan rawt sawr a, inhnik kan ti ve em em.

Ka pu L.Keivom hi B.A.a zo hnungin chawmkhat Parbung High School-ah headmaster sin a zu thaw a. Gauhati University-ah M.A. History a zu bei nawk a, Assam ram pumpuia a pahnina niin high second claas M.A. a zo a nih. Chuonglai chun India hmar sak ah GU chauh hi university um sun a la nih. PUC-a inthawkin Adimjati High Schoola thawk malamin M.A. paraivetin ka thaw ve a, vangneia siemin M.A. history Guwahati University-a a pahnina ka kai ve a, ka pu hnung ka zui char char a nih.

Jawaharlal Nehru University, New Delhi-a M.Phil le Ph.D ka thaw laiin, ka pu L.Keivom Delhi-a um remchang lai leh a lo intuok nawk a, weekend po leh ka pu umna Cuirzon Road Hostel ka pan a. Hienglai hun hin Pu Keivom hin hla a phuok rawn hle. Suna a phuo, ruo tham hman lo chu zana kan sak nghal pei a, vel khat vel hni kan sak chun a ziek en kan ngai ta ngai nawh. Kei hi hlasak nuom, mi romantic, khawsawt thei tak ni si, hla pakhat khawm la phuok lo ka nih. Ka pu ruok chun hla iengzat khieu am a phuok tah ka hriet seng nawh. Ka pu leh hin naupangtea inthawka pension hun chena inpawl kan nih a, sorkar sin a thaw sung khan sorkar lekhapuon hlek le ballpen tak ngiel khawm in tieng a hung chawilut ka hmuh nawh. A tiktlai le a thilphal hi chu hrilin a siek nawh. Sandamna ding hin Isu Krista thisen lo tul tul kher naw sienkhawm, mani thatna leia vanram kai thei a nih.

Saptawnga thusep ka ziek iemani zat chu ka pu Keivom-in a mi tuoinampek phawt naw chun kan suo ngam nawh. Lusei tawngin article pali lai ka ziek tah a, chu laia pahni chu ka pu’n a mi tuoinampek fawm an nih. Hmar tawnga thusep ka ziek pha, ka pu thusep hlui “Hmar Tawng Ziek Dan”ka en hlak. Delhi Version Bible dam hi abikin Jeremi, Song of Solomon, Psalm le hla dang dang, hla tawng bawka a hang inlet dam hai hi, khawvela mi nei lo, ama leia ei hang nei el dam hi, ei va vangnei de aw!

Ka pu L.Keivom hi hnama a chiengna, a thahnemngaina le a tlawmngaina dam hi role model a tling tak zet. Mani pawisa sengin hun tepter tak kar laka, a la’n zin hram hram a. Life time Achievement Award dam kha a phu hlie hlie, a thuhai kha rangkachak tui ema inluon ni naw sienkhawm, uluk taka buotsaih lo ni sien nuom a um vei leh! Nawchizawrhai le table awt a nuom naw tak tak khawm hi, ka ngaisang zuolna a nih. A Award a pek kir kha kan thiemnaw nawh. Keini putu hin chu “Lamsak sul le puhai ei hneban theih nawh” ti hi kan hun tawp chen khawmin kan sukdik peih ding a nih hi!.

Post a Comment

Powered by Blogger.