MPC in HI thuoitu thar hai lawmpuina;
HI in Executive Member ding a ruot 
CCPUR: Mizo People Convention (MPC) thuoitu hai chun February 26, 2016, 7:30AM khan MPC Office­ah Hmar Inpui (HI) Gen. HQ thuoitu thar hai lawmpuina le thingpui dawnpuina an nei. Hi huna thang MPC le Hmar Inpui GHQ thuoituhai chun hmatieng peia hmalak le thangruol pei dan ding hai an hriltlang nghal bawk.


Chun, Hmar Inpui GHQ chun Feb. 26, 2016, 11:00AM khan Hmar Inpui Office­ah Office bearers meeting an nei a. Hi huna hin Executive members, Jt. Secretaries le Finance Committee ding ruotna an nei. Executive member dinga ruot hai chu­ Lalenglien (Vangai); Malsawm (Muolbem); Sharon Parmawi (Khawpuibung); Upa Vanlalrem (Saikawt); Upa Lalbiek Songate (Bethel); David Ramnei (Muolvaiphei); Upa Dr Rosiem Pudaite (Sielmat) hai an nih.

Joint Secretaries dingin Pu Lalchawisang (Tripura); Pu Zoramlien Hrangchal (Jiri­Vangai); Pu Lalremruot (Hmarbiel) le Tv. LRS Puruolte (Info& Media).

Finance Committee Chairman dingin Upa Dr Rosiem Pudaite; Secretary­ Upa Laltlanmawi. Member in Upa Vanlalrem le Pu Laltlanlien (Rengkai) hai lungruol taka ruot an nih.

Hmar Inpui OB hai chun zanikhan DC le SP/CCPur hai an office­ah inhmupuiin inhmelhrietpuina an nei bawk.

ADC Chairman rawiin meeting an nei
CCPUR: Zani 11:30AM khan Mr Langkhanpau Guite, Chairman, ADCC inrawinain a office chamber­ah meeting nei a ni a, hi huna hin Vice Chairman, Lal Hossan; Ms Mannuamching, IAS, CEO/ADC le Executivem embers hai an thang tawl. Hi huna Finance Committee in thutlukna an siem Chairman, Vice Chairman le EM hai kuta an pek chu Finance Committee sukfel dingin an rel a; Ms Mannuamching in IAS a hmu lawmpuina March 4, 2016 nia nei ding le Hill district tina MDC han Executive level meeting neikhawm ding chungthu hai an hriltlang.


FA a inthawk mi 16 AAO in an kaisang
CCPUR: Directorate of Agriculture, Govt. of Manipur in Feb. 25, 2016 a Order an suo dungzuiin hi Department a thawk Field Assistant/Village Level Workers (FA/VEW) 16 hai chu Assistant Agriculture Officer (AAO) a inkaisangtir an nih. Hienghai laia 6 hai chu ST an ni a, ST hai lai hin Pu S.T. Paulienvung le Pu Lalhmuok Famhoite hai an thang. An ni pahni hi DAO, CCPur­ah posting pek an nih. Pu S.T. Paulienvung le Pu Lalhmuok Famhoite hai kaisangna hi ei chanchinbu chun a lawmpui hle.

Director in a kaisang
CCPUR/NEW DELHI: Pu John Ruolngul s/o Rev. Darsanglien Ruolngul of Sielmat, CCPur tuta Ministry of External Affairs hnuoia sin thaw mek chu Deputy Director­a inthawk Director­in (w.e.f 01.01.2016) a kaisang. Pu Ruolngul hi ram le hnam ta dinga mi inphal le inhmang takel; Hmar FC Organising Board Chairman ni lai mek a ni bawk. A kaisangna ei chanchinbu chun a lawmpui hle (input:  Virthli)

DC/CCPur  in Free Mega Medical Camp a hawng
CCPUR: Mr Lunminthang Haokip, IAS, DC, CCPur chun zani 8:30AM khan Mission Compound bul­a S. Molhoih khuoah “1­Day Free Mega Medical Camp” a hawng. Hi huna hin Dr Thangchinkhup Guite, CMO/CCPur le S. Thienlaljoy Gangte, MCS, SDO/CCPur hai guest of honour le functional president in an thang. District Health Society/CCPur huoihawtnaa Medical camp hi nei a nih.


DC chun, NHM chun scheme tum tum um hai lai a bikin nuhmei naunei  hai hriselna a ngaipawimaw zuol thu, tlangrama um han ASHA le Anganwadi hai kuoma ieng hamthatna am a um ti indawn hlak dingin mipui hai an fui. Anganwadi le ASHA worker hai chu um mei mei lova an sin taima taka thaw dingin a ngen. Ramdang le tekhiin India rama chun damdawi man a tlawm leiin mipui ei hamtha hle a nih tiin a hril a, nuhmei naupai hai chu doctor tha taka inentir hlak dingin an fui.

Medical camp huna hin Dr Zuii, Gynaecologist; Dr. Shyamkishor, Ortho Surgeon; Dr Seikholet, ENT Specialist; Dr Tongjakai, Paediatrician;Dr Lalboi, Dental Surgeon; Dr Belamy Kom, Medicine; Dr O.Jotin Kumar, Medicine; Dr Jire L.Pudaite, Medical Officer; Dr Chiin Guite, Eye Surgeon; Mrs Ching Opthalmic Asst. han damnaw 400 chuong an en a, Nurse 10 le Pharmacist 2 han an thangpui a, damdawi Rs.1 lakh chuong man ding a thlawnin an sem bawk.

Civil supply thuah training nei
CCPUR: CAF & PD (Civil Supply) Dept., DC Office huoihawtnain zani zingkar khan District Training Hall, Tuibuong­ah Singngat A/C sunga Fair Price Shop Centre 39 haia  Rationing Agent le SK Oil Sub­Dealers 57 han training an nei. Hi huna hin Pu M. Ginzasuan, DSO (CAF&PD) resource person in a thang.


Feb. 27, 2016 hin Henglep A/C hnuoia Fair Price Shop Centre tum tuma Rationing Agent le SK Oil Sub­Dealer 56 han training nei nawk an tih. Constituency danga mi hai training hun ding chu sukfel a la ni nawh.

Kar thar khin Self Attestation Orders insuo ning a tih: O.Ibobi Singh
IMPHAL: L. Ibomcha, MLA le I. Ibohalbi, MLA han private member resolution zanita Manipur Assembly­a an putlutna le inzawmin Manipur CM O.Ibobi Singh chun kar thar khin State sawrkarin Self  Attestation Orders insuo a tih. Hi Orders insuo a ni zo pha chun Gazetted Officers han attested an thaw kher tul ta lovin attested thaw tul lekha pawimaw hai chu mania thaw thei hung ni tang a tih tiin anikhan Manipur Assembly ah a hril. A hma chun Certificate,Marksheet annawleh lekha pawimaw dang dang hai chu sawrkara Gazetted Officers han Attested  hi an thaw hlak a nih.

Chun, Jan. 4, 2016 a Manipur­a  richter scale 6.8 ze ta hrat Simkhawlei an hning tuma Khwairamband Bazar, Imphal­a Ima Keithel building a suksiet hai chu a thara bawl that annawleh repair an ni ding le dingnaw thu chu hi thil tlung suizuitu Expert Committee report hmu a ni pha leh thutlukna siem chau ning a tih. Tuhin Expert Committee report nghak mek a nih tiin CM O.Ibobi Singh chun zanikhan Manipur Assembly Session a Th. Bishwajit MLA le K. Shyam, MLA hai indawnna dawnin a hril. Hieng building­hai hi National Building Construction Company (NBCC) le State PWD han an bawl a nih. Simkhawlei inhning lei khan mi 10 in thina an tuok bakah sawrkar buildings 416 a suksiet a, chuhai lai chun Schools 247 a thangsa.

Zanikhan Manipur Assembly chun Demands 7 an pasi a, chuonghai chu­ Home ­Rs. 12,15,58,12,300; Police Rs. 115,91,90,600; Vigilance Rs. 3,26,29,00; Fire Protection & Control Rs.10,48,00,00;Jails Rs. 17,15,15,00; Home Guards Rs. 17,11,80,000; Rehabilitation Rs. 2,56,47,000 le State Academy of Training Rs. 6,04,46,000 hai an nih.

Lungawi lo le dodalnain an duty nawh
IMPHAL:NSF ngenna anga Manipur sawrakrin Sub­Inspector pakhat thangsaa Police Commandos 5 an sina inthawk a suspended leia an lungawinawzie suklang le dodalnain zanikhan Imphal East District Police Commando han duty an chawlsan tan niin ei thu dawngna chun a hril.

NSF in Ban an hlip tah
IMPHAL: Naga Students’ Federation (NSF) in Naga area sunga Meitei/Manipuri motor­hai inlawn thei lo dinga Ban an puong chu an hlip ta thu zanikhan an puong. Manipur sawrarin NSF thuoituhai lo sukbuoi naa thang hai an sina inthawk a suspended ta leia NSF in Ban an thaw hi an hlip a nih. Hi thil le inzawma suspended­a um Police hai chu­ Police Sub­Inspector Md. Rahaman of Tamenglong; Hav. S. Gunachandra Singh of 5th Bn. MR; Rifleman W. Jiten Singh of 1st MR, Rifleman O. Bishwanath Singh of 1st MR le Constable N. Surchandrajit  Singh of Imphal hai an nih.

Manipur­ah Pistol license nei 17
IMPHAL: Th. Bishwajit, MLA indawnna siem dawnin Dy. CM le Home Minister Gaikhangam chun, Manipur­ah 9mm Pistol license nei mi 17 an um tiin zanikhan Manipur Assembly­ah a hril. State Home Department recommendation le Union Home Ministry remtinaa Pistol License hai hi pek an nih tiin Gaikhangam chun a hril a, a neitu hai hming ruok chu a hrillang nawh.

Old Age Pension hmu category 3
IMPHAL: Manipur­ah Old Age Pension hmu category 3 an um a, chuonghai chu­ Indira Gandhi National Ole Age Pension Scheme (IGNOAPS); Manipur Old Age Pension Scheme (MOAPS) le Indira Gandhi National Widow Pension Scheme (IGNWPS) hai an nih tiin zanikhan Social Welfare Minister chun Congress MLA R.K. Imo indawnna dawnin Manipur Assembly­ah a hril.

Nupui pahni thisa ruong hmu
IMPHAL: Zani zingkar khan Samaram, Thoubal District­a Leilet lai nupui pakhat Ngongmaithem (O) Memcha (45), w/o N. Shyam of Naharup Pangong, Imphal East District chu a thisaa hmu a nih. Memtha ruong bula hin Kumthuhlo bur hmu a nih.

Chun, zani hmasa zan dar 7 vel khan Laishram Sophia (23) w/o L. Thoiba of Thanga chu an in gate bula thingkung pakhatah inkhaihlum saa hmu a ni bawk. Memcha hi Feb. 22, 2016 a inthawka a umna hriet lova inhmang niin a sung han an hril.

Meghalaya Garo Hills­ah IED 16 dapdawk sa nawk a nih
SHILLONG: Meghalaya­a East Garo Hill district sunga Pathalgre village huop sunga chun zanikhan Improvised Explosive Device (IED) 16 dapdawk nawk a nih. Security Forces hai chun zani hmasa khan hi lai biela bawk hin IED 47 an lo dapdawk ta a nih. IED h ai hi Garo National Liberation Army (GNLA) han security Forces hai beina dinga an kam ni dinga ring a nih. Meghalaya Police Commandos hai chun Durama hill range­ah helpawl hai camp an hlukhum bawk.

Blood bank neilo district 81 an um
NEW DELHI: India rama districts 81 chuong hai chun Blood bank an la nei nawh tiin Minister of state Shripad Yesso Naik chun zanikhan indawnna dawnin Lok Sabha­ah hrilin India rama chun tuhin Blood banks 2,708 a um mek tiin a hril. Blood Bank nei lo la umna UTs le states hai chu Andaman and Nicobar Island, Arunachal Pradesh, Assam, Bihar, Chhattisgarh, Gujarat, Himachal Pradesh, Jammu and Kashmir, Jharkhand, Madhya Pradesh le Manipur hai an ni a, hieng hmun hai hi district thar dam an nit awl tiin Shripad Yesso Naik chun a hril.

UALA in Feb. 29­ah ralthuom an intung ding
SHILLONG: United A’chik Liberation Army (UALA) chun Meghalaya sarwkar le peace pack an ziek hnungin official takin February 29, 2016 khin Tura hmuna an ralthuom hai intung an tih. Hi huna hin Meghalaya CM Mukul Sangma le cabinet hai bakah Kohran thuoitu, NGOs le senior leaders hai khawm thang an tih. UALA hin Meghalaya state thedara Garoland hran indin ngiet an ni a, cadres 71 an um a nih. UALA cadres inpe hai hi sawrkar chun an khawsak dan ding a ngaituo pek ding bakah   Rs. 2.5 lakh seng a pek ding a nih.

AASAA in ST thuah mass agitation
DIBRUGARH: All Adivasi Students’ Association of Assam (AASAA) chun Adivasi hnam hai ST status pe dinga an ngenna le inzawmin February 29, 2016 khin Assam state sunga district heaquarters tin haiah mass agitation huoihawt an tum. Hi le inzawm hin district tina AASAA unit hai chun Deputy Commissioners hai fethlengin India Prime Minister kuomah common memorandum pek ding tiin AASAA chun an rel bawk.

Arabinda Rajkhowa inrawi ULFA Pro­talk faction chun Assam rama hnam 6 han ST status an ngenna le inzawmin ST ngentu hnam 6 hai inhmupuia joint movment nei dan ding thuah hmalak dan ding hriltlangpui an tum.

India mi 445 Pakistan lunginah an intang
NEW DELHI: Pakistan rama lungin hran hran haiah India mi 445 an intang mek a, hienghai laia 392 hai chu Civil mi an nih. Chun, kum 1971 a inthawk tuchena hin Pakistan lungin haiah Prisoners of War 54 thangsain India sipai inhmang 74 an intang ring a nih tiin Union Minister of state for External Affairs V.K. Singh chun zani hmasa khan Rajya  Sabha an hriettir. Indawnna dang a dawnnaah August, 2014 a PM Modi Kathmandu, Nepal a an zin tuma Pashupatinath temple a Sandalwood 2,500 kg thilthlawnpeka a pek kha Rs. 1.88 crore manhu a ni a, a phurnain Rs. 2.85 lakh seng a nih tiin V.K. Singh chun a hril bawk.

Mid­Day meal fak leiin student 104 hospital­a admit
MUMBAI: Maharashtra­a Palghar district sunga Zila Parishad in a enkawl Primary School a chun Mid­Day meal an fak leiin student 104 an damnaw pha a, hospital­a admit an nih. Packed Mid­Day meal hi ISKCON Centre, Wada in an supply a ni a, hienganga naupang han harsatna an hung tuok lei hin firmkhur thuin students 280 hai chu Kasa Rural Hospital­ah medical check­up thaw an ni a, anni laia 104 hai chu hospital­a admit an nih. Hi thil hi zani hmasaa kha tlung a nih.

A naunu RJD MLA le sex inhmanglui tirtu man
BIHARSHARIF: Nalanda Police chun, a naunu nuhmei student pakhat a thu le hla lo a RJD MLA le sex inhmanglui tirtu Ms Radha Devi an man. Ms Radha Devi hin a naunu hi February 6, 2016 zana kha RJD MLA Rajballabh Yadav sex an hmangpui luitir a nih. Radha Devi baka hin a naunu Chhoti Kumari, a sangnu Tulsi Devi le pasal dang pakhat Moti Ram hai khawm hi thila thangpuitua intum an ni leiin Police han an man. RJD MLA Rajballabh Yadav khawm hi man vat ni tang a tih tiin Police SP Kumar chun a hril.

President Kerala­ah an zin
NEW DELHI:  President Pranab Mukherjee chu ni 2 sung cham dingin zanikhan Kerala­ah an zin. Mr Mukherjee hin zani zantieng khan Kottayam hmuna CMS College in Bicentenary celebration an hmang ah khuolliena thangin a hawng bakah Kochi hmuna 155th Indian Penal Code anniversary hmangna a hawng bawk.Vawisun hin President Pranab Mukherjee chun Trichur hmuna Kodungallor­ah Muzhiris Memorial hawng a ta, zantieng hunah Kozhikode hmuna India rama Cyber Park hmasa tak ding hawng bawk a tih.

VAWISUN THUPUI
Pathienin titna thlarau a mi pek nawh a, thilthawtheina le hmangaina le lungril feltak neina thlarau a mi pek lem a ni sih a. ­ 2  Timothe 1:7

Editorial
Corruption le suol hi ei theida tak tak am?

Sawrkarin miretheihai dawmsangna ding, sawmdawlna ding le vantlang hmasawnna ding scheme le project a siem le an duong hai hi mithiem bik hai rawna thaw an ni tlangpui a, a thanaw tak tak a um der nawh. A ni dan ding indik taka hmang le sin thaw nisienla chu ei  thatpui vawng ding a nih. Sawrkar thlungpuia inthawka thangpuina ei hmu zozai hai le State Budget sunga ei insiem ve hai hi kum 10 sung chau khawm hmang lo ni ta sienla chu ei ram hmel hi a danglam ngei ring a um. Amiruokchu, tuchen hin ei ram hmel a la danglam thei chuong nawh. Ei ram sawrkar hlak chun Scheme thar tha lem tam takel a hung sawpdawk pei a, hieng sa sa khawm h in ei ram le ei khawsakna a la danglam thei naw bakah ei ram inthanglienna thil hmu ding bek a la um chuong der nawh.

Manipur hi India rama corruption hluorna takhai lai ei thang phak nia hril a ni hlak a, sui chiengna tak tak a la um naw a chu mita ei hmu le nakawra ei hriet haia inthawk ringawt khawm hin ei nep rak nawh ti hmu le hriet theiin a um. Sarwkar sinthaw le politician­hai hausakna ram taphawt chu corruption hluorna a ni pei. Sumdawng hausa lien tlawmte le Contractor tlawmte ti lo, ei rama in, ram, lo, huon le thil dang dang tam tak neihai hi poltician le sawrkar thawktu vawng niin an lang. Hi taka inthawk ringawt khawm hin ei ramah corruption chu a hluor ti an lang chieng hle.

Poltician le sawrkar tinthawhai hi hausa dinga riruong an ni nawh. An ngirhmun an sang le lien ang peia, an hun laia thil man insang dan ang peia suta hlaw pek an nih. An thlatin hlaw le dan anga sawrkar a inthawka hamthatna an dawng thei hai hi an insung khawsak relbawlna le an nauhai lekha inchukna ding chen ngaituo sa a siem pek an ni a, hlaw hi hausakna ding khawp a ni nawh. India rama sawrkar sinthaw le politician hai hi a chin tak Peon a inthawk a lien tak hai chen hin hausa dinga ngai an ni nawh. Amiruokchu, ei rama hin pension hmaa hausa hi hmu ding an tam hle. Hi taka inthawk hin sawrkar thawktu thenkhat le Politician thenkhat hai chu corruption thilah an fihlim naw a nih ti an lang chieng hle. Nau le te  nei lo, nupa chau hlak chu an um der si naw a, nau le te bakah tu le te  nei an ni deu seng a, hlawa hausak chu thil harsa tak, thil ni thei lo a nih.

Corruption le suol hi ei bau chun ei hril seng a, sienkhawm a tak taka theida, do le hnawl ngam hi chu ei um naw niin an lang. Hi lei hin ei ni lai Corruption le suol hi ei theida tak tak am? ti indawnna (question mark) hi siem lo thei lo a nih. Ei rama corruption le suol do hrat tak dinga ngai Kohran Pawl tum tum hai khawmin Corruption le suol do hi chu ei ngam chie naw niin an lang. Pastor, Kohran Upa le Pathien thu hriltu ropui tak tak hai khawm hin suol le Corruption do ngam ding thu hi chu pulpit tlangah an hril ngam ta naw deu an naw maw? Piengtharna thu ruok chu huoisen tak le phur takin ei hril ngam.

Election hun lai dam, sawrkar sin zawng lai dam, annawleh sawrkara inthawka a thlawna hamthatna hmu thei ding lai hin chu Corrutpion  ei hril ri ngam naw a, do chu khawlam? Do nekin a zawng le a hnawt takmeuin ei hnawt a nih ti inla ei hril suol taluo ring a um nawh. Sin ei hmuna ding a ni phawt chun ei In le lo, ei hmun le hmang hai zawrthlawnga thuneituhai cheng nuoitela tham ei ngam hlak. Hieng hun lai tak hin chu Corruption, thamna le suol ti hai chun ei lungrilah hmun an chang ngai nawh. Corruption le suol do kar chu hnuoi le van kar angin an hla hlak.

Ei politician­hai chau corruption thua hin intum le dem thei an ni nawh. Corruption le thamna thaw le la dinga va ngen le nawrtu chu mipui tieng bawk ei nih. Hi lei hin mipui tiengpang khawm corruption le suol dona kawnga hin chu ei huoisen ngam naw a, dawl zawr takin ei zawr el hlak chu a ni hi! Ei ram le ei hnamin corruption le suol a tak taka do ngam a mamaw ngawi ngawi el a nih. Hieng laizing hin khawvel fedan a nih tiin ei hrilmawi a, suolah ei ngai tanaw mani ding aw ti theiin Corruption hi ei sie ta a nih. Sawrkar khawmin corruption le  suol do le sukre hmak dinga hma a lak ding thu hril hlak sienkhawm a tak taka thaw chu harsa a ti hle a nih.

Post a Comment

Powered by Blogger.