KTP Day le inzawmin thisen an pek
CCPUR: Sielmat ICI KTP chun Feb. 16, 2016 khan ICI KTP Day le inzawmin District Hospital, CCPur Blood Bank­ah thisen Unit 11 zet an pek. Thisen petu hai hi tlangval 10 le nunghak pakhat an nih. ICI KTP chun sun huna thisen pekna an nei bakah hnatlang an nei a. Zani zan khan KTP Day le inzawmin Pathien chawimawia inkhawmna hun an hmang an thupui chu “Mihai ta dinga malsawmna” ti a nih.

Polio Booth 9 hawng belsa ding
CCPUR: February 21­23, 2016 inkar sung IPPI 2nd Round nei ding le inzawmin inbuotsaina a fe mek a, IPPI 1st round huna CCPur district sunga naupang kum 5 le a hnuoitieng 37649 hai Zenghri vengna (Polio) indawntir dinga target chu sukdanglam ninaw sienkhawm Polio booth 9 hawng belsa tum a nih tiin S. Chinkhanzam, District Extension & Media Officer, DFWO/CCPur chun a hril.

IPPI 1st Round­a khan Polio booth 435 hawng a ni a. 2nd round hung um dinga hin Divisional Supervisor 19 le Sectoral Supervisor 87 han Polio Booth 444 haiah naupang kum 5 le a hnuoitieng hai Polio damdawi indawntir an tih. Feb. 22 le 23, 2016 in Booth day nia dawn lo naupang hai indawntirna sunzawmnain In tin sira indawntirna sin thaw ni bawk dingin S. Chinkhanzam chun a hril.

India sawrkarin naupang kum 5 le a hnuoitieng hai Polio damdawi indawntir vawng dinga program an duong a ni leiin nu le pa hai chu ngaipawimaw seng dingin a ngena, Polio damdawi hi Pharmacy le bazar­a inchawk ding um lo a ni thu a hril. 1st Round­a dawn naupang hai chu ma thei lova indawntir ngei ngei ding ti a ni bawk.

TKSU GHQ in an dem thu an puong
CCPUR: Thadou Kuki Students’ Union (TKSU) GHQ chun, February 14, 2016 zana Mr Janglal Baite @ Lalboi Baite tu ti hrietlo han Mualveng hmuna an sawisakna thuah a sawisaktu hai an dem thu an puong a, mi vawtu hai man dingin thuneitu hai an phut. Tawng le chi­le­kuong zawnga hienganga insawisakna tlung hi an dem hle thu hrilin tukhawma hiengang thil sunzam nawk ta lo dingin an ngen bawk.

KSO in Darkar 48 sunga man dingin an ngen 
CCPUR: Kuki Students’Organisation (KSO), CCPur District chun zanikhan thusuok siemin, Civil dress a inthuom 7­Assam Rifles personnel Mr Janglal Baite @ Lalboi tu ti hrietlo Paite tawng hmang mi 5/6 vel han Thadou­Kuki tawng hmang a ni lei ringawtah Hiangtam Lamka  road­a na taka an vuok hliemna thuah, inremna le muongna a um theina dingin tuta inthawk darkar 48 sunga mi vawtu hai man dingin sawrkar thuneitu hai an ngen. Hi hun sunga mi vawtu hai man an ninaw chun thil ditumlo a lo tlung khawmin sawrkarin a maw phur a tih tiin an ziek.

Diesel Auto eksiden; hliem 4 hospital­a admit
CCPUR: Zani zantieng dar 2:30 vel khan IB Road, HQ Veng­ Kaprang inkara tlan Diesel Auto chu ST Chullouphai hmuna eksidenin Culvert le thingkung a baw leiin  Auto­a chuong passenger student 3 le midang 4 an hliem a, student hai chu District Hospital Casualty­a doctor le nurse han an hliemna an tuom pek hnungin an insuoktir a, midang 4 hai ruok chu admit an nih. Hospital­a Admit hai chu­ Auto Driver Jangpao Kipgen (62) s/o (L) Lunkhokai of Shiloijang, Nemjavah (55) w/o Sehpao Kipgen of Kaprang, Letlal (35) s/o Jamtinpao of Nahjang le Kimneikhol (45) w/o Haotinlal of Monglenphai hai an nih. Jangpao Kipgen hi a awm, a lu le ke haiah a hliem a, Nemjavah hi a lu le a kut; Letlal hi a awm le Kimneikhol hi a lu le a hnungzang haiah hliemna a tuok.

Driver hin a lu nat (headache) leiin luna damdawi mum 2 a  fak a, a motor khal lai a in lusu leia eksiden hi tlung nia hril a nih.

DIC a trade tum tum training hun ding
CCPUR: DIC/CCPur hnuoia Entrepreneurship Training trade tum tuma training dinga hnina petu hai ta dinga training hun ding zanikhan General Manager, DIC, CCPur in a puong. Training hi Central Hall, DIC Office, Tuibuong­ah 11AM­2:30PM inkar sung nitin nei hlak ning a tih.  Feb. 17­20, 2016 inkarin Readymade garment/Tailoring; Aromatic & Medicinal Plantation; Embroidery le Beauty Parlour hai training an tih.

Feb. 22­25, 2016 inkar sungin Computer;  Carpentry le Food & Vegetable Processing hai training an ta; Feb. 26, 27, 29 le March 1, 2016 haiah Modern Handlom, Bakery,  Automobile, Bee  Keeping; Mushroom Processing; Rural Transport le Spice Processing hai trining an tih.

Hieng trade tum tuma training ding thlangsuok candidate hai list chu Feb. 15, 2016 a inthawk khan GM, DIC, CCPur office­ah en thei dinga sie a nih.

VTI ah trade tum tum training thei
CCPUR: Vocational Training Institute (VTI), Muolhlum, Rengkai, CCPur­ah Carpentry, Weaving, Computer, Welding, Driving le Tailoring training nuom hai ta dingin  hnina peklut thei hun a nih. Inhnikna nei hai chun February 18, 2016 chen khin VTI Office, Muolhlum Rengkai­ah thu chienglem kan thei ning a tih.

12th South Asian Games khar, 13th South Asian Games Nepal-ah kum 2018 ah nei a ni ding
GUWAHATI:  12th South Asian Games Guwhati le Shillong haia ni 12 lai zet nei a ni hnungin zanikhan Indira Gandhi Athletic Stadium, Sarusajai, Guwahati hmuna khar a lo ni tah. South Asian Games kharna huna hin Assam CM Tarun Gogoi khuollienin,Union Minister of State for (Independent Charge)  Sports & Youth Affairs, Sarbananda Sonowal; Bangladesh, Nepal, Bhutan, Meghalaya le Assam Sports Minister­hai bakah official tum t um hai an thang. 13th South Asian Games chu kum 2018 khin Nepal in mikhuol a ta, an khawpui Kathmandu hmuna hi Games hi inkhel ning a tih. Kum 1984 khawm khan South Asian Games hi Kathmandu khawpuiah a lo innghat ta a nih.

Mr Sonowal chun 12th SA Games khar a ni thu puongin South Asian Olympic Council Flag chu keitlain South Asian Games mikhuoltu ding Nepal kutah a hlan. Flag hi 13th South Asian Games Organising Committee Chairman le Nepal Olympic Committee Chief Jeevan Ram Shreshtha kutah an hlan a nih. Closing function­a hin musical bands­ Still Water (Sikkim), Purple Fusion (Nagaland), Salvator (Manipur), The Soul Rebels (Arunachal Pradesh), Boomarang (Mizoram) le Iron Sky (Tripura) hai khawmin hla an sak.

12th South Asian Games a hin rambung tum tum 8, India, Pakistan, Sri Lanka,  Afghanistan, Bangladesh, Nepal,  Maldives le Bhutan hai an thang a, India chu pakahtnain a thang a, Sri Lanka pahnina le Pakistan pathumnain an thang. India ram ta dinga medal lahai lai Manipur mi thahnemtawk tak an thang a, chuhai laia an lar zol deuhai chu M.C. Mary Kom; L. Sarita Devi le L. Devendro hai an nih. Anni h in Boxing­ah Gold Medal an lak seng.

Rambung tum tum hai medal lak zat chu a hnuoia ang hi a nih.
Rambung Gold Silver Bronze Total
INDIA 188 90 30 308
SRI LANKA 25 63 98 186
PAKISTAN 12 37 57 106
AFGHANISTAN 7 9 19 35
BANGLADESH 4 15 56 75
NEPAL 3 23 34 60
MALDIVES 0 2 1 3
BHUTAN 0 1 15 16

ADCs 6 han Co­Ordination Committee an indin
IMPHAL: Feb. 16, 2016, 10AM khan Hotel Imphal­ah Manipur­a Autonomous District Councils 6 han  meeting neiin Co­Ordination Committee of 6  Autonomous District Council Manipur an indin a,  Convenor in Genneikhup Vaiphei, EM, ADC/CCPur; N. Wungreiyo, Ukhrul Member Secy. Liangpibou, Sadar Hills; Member in Kh. Morong Chandel; L. Rangpungjohn, Senapati le Lunthang Haokip, Sadar Hills bakah Advisers in ADC 6 haia Chairman hai ning an tih.


Hi Coordination Committee hi ADC hai harsatna le Tribal Unity sukhratna dinga pressure group dinga indin a ni a, hi meetinga hin ADC tina Chairman le Vice Chairman hai khawm an thang. Meeting­a hin ADC han an harsatna hai an hriltlang tawl bakah meeting zo hin Manipur sawrkara mi pawimaw tum tum hai inhmupuiin An harsatna, district boundary thubuoi hai an intlun. Chun, Feb. 22, 2016, 11AM khin Hotel Imphal­a meeting nei nawk an tih.

Cabinet meeting nei a nih
IMPHAL:  Zanikhan State Cabinet meeting nei a ni a, Manipur Public Service Rules, 1965 siem that ding thu, Education, YAS le Zilla Parishad hnuoia Block Officers sin lak dan ding thu, Budget Estimate 2016­17, Md. Rahanuddin Choudhury a pension huna kum 2 sung Contract basis a Joint Secretary (Home) le Protocol Officer, Govt. of  Manipur sin lan cheltir dan ding thu, JNIMS a Staff Nurses lakna ding chungchang, Senapati District­a Lhungtin SDC Circle chu SDO/BDO Lhungtin a hlangkai ding thu, Manipur Municipal Act, 1994 siem that dan ding thu, Horticulture & Soil Conservation hnuoia LDC post 14 ruok hluosiptu ding lak huna LDC ti lova Office Assistant­cum­Computer Operator tia a post hming thlakthleng dan ding thu le thu dang dang an hriltlang niin ei thu dawngna chun a hril.

An sin sukknghet dingin an ngen
IMPHAL: RIMS, Imphal hnuoia Grade­IV contract worker­hai chun an sin suknghet ding le an hlaw sukpung dingin an ngen. Hi le inzawm hin zanikhan RIMS Administrative Block an khar a, Die­in­harness lakna dinga interview nei dinga ti khawm nei thei lova posponed a nih. RIMS, Imphal hnuoia hin Grade­IV contract basis a thawk mi 285 lai zet an um a, thenkhat chu kum 25 zet thawk ta khawm an um nia hril a nih. An thil ngen hi sukpuitling pek an ninaw chun OPD le Administrative Block an la khar pei ding thu an hril.

Feb. 21 ah MCPM in General Strike
IMPHAL: Maoist Communisty Party Manipur (MCPM) chun hungtlung ding Feb. 21, 2016 khin Manipur pumpui huopin General Strike thaw an tum niin an puonglang. Ch. Sanjit le Rabina hai kap hlum an ina le inzawma Head Constable Th. Herojit inpuongna le inzawmin State sawrkarin tuchena thil a la sukfel naw an dodalnaa General Strike hi thaw an tum niin  Nonglen Meitei, Secretary,  Publicity and Propaganda, MCPM chun thusuok a siem.

Assam­ah helpawl 4 kap hlum
GUWAHATI:  Assam­a Tinsukia District­a chun zani zingkar khan Police le Army thangruol han Bordumsa Police station huopsunga Bathoi village­a dappui an thawnaah ULFA­Independent cadre pakhat le NSCN(K) cadre 3 an kap hlum niin Tinsukia SP Mughdya Jyoti Mahanta chun a hril. Hieng helpawlhai kap hlumna h muna hin AK­81 Rifle 1, Pistol 2, uniform le silaimu iemanizat dapdawk a ni a, helpawl dang an lan biruk ring a ni leiin dappui thawna la sunzawm pei a nih.

All Party meeting PM rawiin
NEW DELHI:  Feb. 23, 2016 a inthawka Parliament Budget Sesion tan ding tluong taka nei a ni thei ding ditna le inzawmin zanikhan South Block, New Delhi­a PM Office­ah All Party meeting PM Narendra Modi inrawina hnuoiah nei a nih. Tulai hnaia Jawaharlal Nehru University (JNU) a buoina chungthu  Selkaltu Pawl han Parliament Session­ah hriltlang ni raw seh tia rawtna an siem chu remtipui niin ei thu dawngna chun a hril.

A nuhmei chema sattu Police in an man
AIZAWL: Lengte khuoa a nuhmei hlui Siemi sat hliemtu KP Thanga (58)  s/o (L) Lallianlala of Nelsipara, Gomati district, Tripura chu February 13, 2016 khan Mizoram Police han an man. KP Thanga hin Sep. 26, 2015 zingkara a nuhmei hi chempuia a sat a ni a, hun iemanichen a tlanhmang  a nih.

Chun, December 23­28, 2015 inkar sunga New Secretariat Complex­a DRDA office rawk a, Rs. 1,13,200 manhu ding thil inruhmangtua intum Andrew Vanlalchaka (24) s/o (L) Vanlalruata of Khatla, Aizawl chu Feb. 13, 2016 khan an man bawk.

Journalist sawisaktu hai chunga action lak ning a tih:  Rajnath
NEW DELHI: Home Minister Rajnath Singh chun, zani hmasaa Patiala House Court campus­a Journalist le JNU student hai chunga kut thlaktu le sawisaktu hai chunga action lak ning a tih tiin zanikhan a hril.  Hi thua hin FIR file a nita a, investigation thaw mek a nih tiin Mr Rajnath Singh chun a hril. JNU student leader Kanhaiya Kumar in India ram kal le sawisel zawnga tawngkam a neina le inzawma hearing nei hmain Court campus­a hin Lawyers thuoma inbel hawn khatin Reporters le JNU student hai an vuok a nih.

Hieng laizing hin JNU sedition case­a NIA suizui dinga ngenna um chu Delhi High Court in zanikhan a hnawl. Delhi Police han case an suizui tha tawk nawh tia intumna leia NIA suizui dinga case transfer dinga ngenna hi um a nih.

Custom han Air Pistol 32 an dapdawk
NEW DELHI: Zanikhan Custom officials han Foreign Post Office­ah US a inthawka hung thawn parcels pahni an enfelnaah Air Rifless 7 le Air Pistol 25 an dapdawk niin Commissioner, Air Cargo Export S.R. Baruah chun a hril. Pistols hai hi thir sakhata siem an ni a, silaimu tak kap theina dinga modified thei ni dinga ringhla a nih. Pistol hai hi Pietro Beretta Gardone and Parabellum Pistol in an siem a nih.

Nagpur Jail­ah intang hai  kuomah ATM card
MUMBAI: Maharashtra­a Nagpur Central Prison (Jail) a intang mi 140 vel hai kuomah State Bank of India (SBI) chun novel pilot project in ATM cards a apek. ATM card hi thlangsuok bik intang hai kuoma Addl. Director General of Police (Prisons) Dr Bhushan Kumar Upadhyay le Zonal Dy. GM, SGI Mr B. Shankar han AGM Mr Rakesh Sinha le Jail Supdt. Mr Yogesh Desai hai hriet le hmuin an inhlan. Hi jail­a intang hai chun thla khatah Rs. 2,500 chen h mang thei an ta, an sung han thlatin Rs. 2,500 chen an account­ah an deposit pek thei bawk ding a nih.

Rangkachak kg. 9 zet man
CHENNAI: Directorate of Revenue Intelligence (DRI) pawl chun Feb. 15, 2016 zingkar khan Chennai Central Rel station­a inthawk passenger pakhat chu rangkachak  kg. 9.12, Rs. 2.67 crore manhu ding leh an man. Mana um pa hi Maria Selvaraj niin Rangkachak hi tluon 9 niin ‘Valcambi Suisse’ ti an ziek a, bag sunga an thupruk a nih. DRI chun kar hmasa khan Tuticori port­ah  rangkachak kg. 12 zet an lo man ta bawk.

Russia University­a kangmei suokah India mi 2 an thi
NEW DELHI/ MOSCOW: Russia rama chun zani hmasa khan Smolensk Medical Academy­ah kangmei a suok a, kangmei suoka hin hi University­a inchuklai India rama Maharashtra mi nuhmei pahni a kang hlum. Kangmei suoka hin student thenkhatin h liemna an tuok bawk. Hi thil tlungna hmun hi Moscow khawpuia inthawk km. 400 zeta hla a ni a, zanikhan an ruong Moscow phurtlung le hi taka inthawk Mumbai (India) ram tieng hung phur ni dingin External Affairs Minister Sushma Swaraj chun a hril a thina tuok sungkuo hai a tuorpui thu a hril.


VAWISUN THUPUI
Tu suol khawm suolin thung naw ro, mi po po ngaia thil amwi chu ngaituo lawk ro. A thei phawt chun nangni tieng bek mi po po le inremin um ro.  ­Rom 12:17­18

Editorial
In unauna tha chel tlat

Ram le hnam changkangna ding chun a sunga chenghai in unauna that le that nawin kawngro a sut nasa hle. Mani le mani indo le inkhing ram le hnam, hnam changkang an um ngai nawh. Ram le hnam a changkang theina ding chun a ram sunga chenghai ei in unauna le ei inlaichinna siem that a tul. Mani le mani indo le inkhing ei ching chun ei ram le ei hnam hmasawnna ding lampui daltu lien tak hung ning a tih. Hi lei hin ei inunauna h i tuta hma neka nasa lema ei siem that a tul em em el a nih. Inunauna tha ei chel tlat chun ei ram le ei hnam hi mihai inhnar thei le entawn tlakin a hung um ding a nih. Mitin el hi inkamtuo, in thangpui intuo le thangruol ding ei nih. In mamaw lo ei um naw a, inmamawtuo seng ei nih.

Ei inunauna le ei inlaichinna a hung tha naw a, ei inkhingtuo a, ei ineptuo pha pha leh muongna le inremna a hung derthawng a, hmasawnna sin khawm a fe hrat ding angin a fe hrat thei naw a, a chang lem chun hmasawnna sin thawna hai a chawl thup a, sin thaw thei lovin a mi siem pha a, a tuortu ei ni rawi tho ei hung ni hlak. Sin thaw thei lova ei hung u m pha leh fak le dawn thila chau ni lovin kawng tum tumah harsatna ei tuok a, ei bei a dawng hle hlak. Inremnawna rasuokchu ieng dang a ni naw a, harsatna a hung ni rawp hlak.

Tulai hnaia ei ineptuona le ei inkhingtuona khawm hin harsatna namenlo takel a min tlun pha a nih ti chu a hretu seng ei nih. Hi lei hin inkhingtuo le ineptuo ding ei ni nawh. Unau le sungkhat, nuhmei pasala innei, a thlum le a al fakhawm hlak, ei thi ni haia khawm inraltuo hlak, unau ei ni a. A san mumal tha tak um lo le thil hote te leia ei hang inkhing le ineptuo el hlak hi chu a pawi a, an rang thei anga ei bansan nuom a um. Ei inunauna tha taka um le fe hlak kha a pangngaia infetir nawk ngei dinga mitinin thang ei lak a tul a nih. Chuong a ninaw chun hnam danghai hmusit le sirdein ei um ding a nih. Inunauna siem thatna ding hin ei hotuhai chau an pawimaw naw a, ei rengin ei pawimaw seng a nih.

Ei inunauna hi ei siem that a tul a, ei ni main ei siem tha naw chun hnam danghai hungin mi hung siem tha naw nihai. Hi lei hin nu le pahai khawmin inunauna siemthat a tulzie hi nghawk lova ei nauhai ei hril rawp a tul a nih. Inremna, muongna, inlaichinna tha le inunauna siem that hai hi ei Kristienna leh khawm inzawmna a nei a. Hi lei hin Kohran tum tum h ai khawmin piengtharna thu ei ngaipawimaw a, ei inhril ngun ang bawkin Biekin sung haia khawm hril uor inla nuom a um.  Inremna, muongna le inunau thatna a um naw pha pha chun buoina a hung suok a, Biekin tak ngiel khawm khar a hung tul hlak. Hi thil hi hrie zingin in unauna siem thatna ding kawnga hin hma ei lak nasa zuol a tul a nih.

Churachandpur District sunga chenghai hin in unauna tha ei  mamaw zuol niin an lang. Ei bul intanna le ei thlatuhai angkhat an nih ti khawm ei hriet seng. Iengleia hiengang em ema ei inunauna a hung se el hlak am a na tia a san ei zawng suok a hun tah. Hnam khat inti si, mani tawnga inbepaw thei lo hai hman an inthuruol thei a, inunauna tha an chel tlat thei chun mani tawng senga inbiepaw thei hnam hai hi iengleiin am ei inunauna hi siem tha theinaw bik ei ta? Ei tum phawt chun ei thaw thei ve ngei ring a um.

Churachandpur district a cheng Zohnathlakhai hin mamaw ei hau a, chu hai lai chun inunauna siem that hi tulai taka ei mamaw zuol bik a nih. Ei inunauna a tha naw chun thil dit le ngen ei neihai khawm hi hlawtling ngai naw nih. Ei in unauna ei siem that hmakhat chu inthuruol le pumkhatin ngir thei ngai nawng ei tih. Tuta anga ei fe pei chun, kum 10 hnunga chun ei in unauna kar hi inhlat hle tang a tih. Chu pha chun tuta  neka nasa lem hin ei kar hung um a ta, unau ni lo, hnam dang dang anga ei inentuo khawm thil hung um thei a nih. Chu huna zet chun unau ei nih tiin hril inlakhawm thang la hung thar pei ding han awi harsa an la hung ti el thei a nih. Tu hi a hun lai a ni a, chuleiin, inunauna tha chel tlat dinga takchapa tia kampet meua thang ei lak nuom a um.

Post a Comment

Powered by Blogger.