CMO in National Deworming Day hawng
CCPUR: Zanikhan Vimala Raina H/S­ah National Deworming Day hawng a nih. Deworming Day hi DC/CCPur in a hawng dinga ti a ni a sienkhawm buoina dang thenkhat leia a hung theinaw leiin Dr Thangchinkhup Guite, CMO/CCPur in a hawng.


CMO chun, World Health Organisation (WHO) report dungzuiin khawvel pumpuiah naupang 200 lakh million chuongin Rulrukut (worm) an nei a, India rama naupang 64% vel in  rulrukut an nei tiin a hril. Naupang in Rulrukut an pai hin an taksa a chau a, an lungril a hratnaw bakah an hrisel naw hlak a nih. India sawrkar chun Feb. 2015 khan State 10 le UT 1 haiah National Deworming a lo tan ta a, a hlawtling leiin tukum hin India rama states le UT tina Deworming hi tan nawk a nih tiin a hril.

Naupang kum 19 mi chen han Rulrukut damdawi ‘Albendazole’ tablet an fak hin thil dangah effect iengkhawm a um naw a, amiruokchu mihriem hriselna an chen naw leiin luoksuok, sungkhaw le phingsip hai a lo um chun ORS indawntir in a hung tha nawk el thei a, titthawng ding iengkhawm a um nawh tiin a hril bawk.

National Deworming Day hawngnaa hin CMO, ZEO, DFWO, DPO (ICDS) DI of School, CCPur; Med Suptd, Dist. Hospital, DPM/NHM, le Headmaster Vimala Raina H/S han naupang hai kuoma damdawi an pek. National Deworming prog. hnuoia hin naupang kum 3­19 inkar hai Rulrukut damdawi an fak seng ding ti a nih.

HYA Rengkai Branch thuoitu thar hai
CCPUR:  February 9, 2016 khan Rengkai Community Hall­ah kum 2016­2018 inkar sunga Rengkai HYA  Branch thuoitu thar ding thlangna nei a ni a, hieng a hnuoia hai hi thlangtling an nih­ President­ H. Samson; Vice President­ Thangchuoilo; Secretary­ Roland Lalhmasuon; Asst. Secretary­ Lalropui Hriler;Finance Secretary­ Khuongthangluoi; Treasurer­Vanlalsawma; Inf. Secretary­ Pu Zonunmawi; Secy. Art & Culture­ Tv. Lalneisang; Secy. Games and Sports­ Tv. Lalramsang Tusing.

Phalna boa thing zawr tumtu mi 7 man
CCPUR: February 7, 2016 khan  P. Minjang khaw bul, Dampi Reserved Forest huop sunga phalna  nei lova thing laa zawr an tum leiin P. Minjang khaw mi 7 hai chu Forest Department, CCPur in report an pek dungzuiin Police han manin FIR No. 5 (2) 2016 CCP­P S U/S 447/34 IPC & 26 (e) & (f) of Indian Forest Act 1927 an registered khum bakah Chief Judicial Magistrate (CJM), CCPur hmaah an inlangtir a, baila insuo nawk vawng an nih. Mana um hai chu­ Taitom John Simte (34) s/o T.Suannou Simte; Lamkhoneh Taitom (58) s/o (L) Nengkhokhai; Paominlen Touthang (35) s/o (L) Ngampao Touthang ; Langginmang @ Mangboi Taitom (34) (L) Suanlian Taitom; Suanjalet@ Lelet Taitom (53) s/o (L) Letzamang Taitom; Philipian Briantak Inpui (25) s/o Sinthoi Briantak Inpui leh Suanneh Taitom (65) s/o (L) Nangkhokhai hai an nih.

Free Uniform sem
CCPUR: Zani 12:00 khan Bijang Loubuk Govt. Jr. H/S chun Student hai kuomah Free Uniform semna an nei a, Uniform hai hi L. Thanzam Pulamte, AI of School/CCPur in student hai kuoma a sem. Bijang Loubuk Govt. Jr. H/S a hin Class VII chen a um a, kum 2016­17 session fe meka hin student 200 chuong an um. Kum 2015 khan teachers 29 an um a, tukum ruok chu teacher 13 chau an um leiin student thenkhatin admission an thaw ngam nawa hril a nih.


Natl. Deworming Day hmangna an va tawiawm
CCPUR: Feb. 10, 2016 nia National Deworming Day 2016 hmangna le inzawmin Saikawt bieltu MDC Pu Lalhrillien chun a biel sunga School hai hi ni le inzawma naupang inchuklaihai kuoma Rulrukut damdawi (Albendazole tablet) pekna hun a hmangpui tawl bakah school staff hai inpawlpuina a nei a, an harsatna chi tum tum hai chingfel le hmalak pei dan ding hai a hriltlangpui tawl. Hi huna hin HSA CCPur Jt. Hqrts Interim President Tv. Lalthanzau khawmin a tawiawm ve a, harsatna an nei haiah a thei ang anga hma a lakpui ding thu a hril.


Thenmuol JB School le Saidan JB School haia chun naupang indai tawk thungna le Dawkan bakah mamaw dang dang um haiah an hmatienga ngaituo pek dingin bieltu MDC le HSA President hai hi an lo ngen.

Bieltu MDC hin tuta hma khan ama sum hmanga Rangva inchawin Thenmuol JB School room an lo suklien (extend) ta a, tuhin kitchen le fencing an mamaw hle a nih. Saidan JB School khawmin hiengang tho hin an mamaw ve a nih.

Hienganga bieltu MDC le HSA CCPur Jt. Hq President han an harsatna ngaivena thangpui dan lampui dap dinga an intiemna thuah school staff hai chu an lawm hle a, nu le pa bakah HSA Unit lo um hai khawmin an thlawp ve.
­ (LRS Puruolte)

Feb. 12 in darkar 24 total bandh thaw an tum
CCPUR: Churachandpur khawpui sunga Facebook, Whatsapp Group le Student Movement­a Admin inti pawl hai chun Feb. 9, 2016 nia KKL Complex­a UPF le KNO in Tribal martyrs hai Feb. 13, 2016 nia vui dinga an puong dodalnain Feb. 11, 2016 zanrila inthawk Feb. 12, 2016 zanril chenin darkar 24 sung CCPur khawpui sungah Bandh/ Total shutdown an thaw ding thu an puong. Bandh hin Medical, Water Supply, Electricity le Press Media hai a huomnaw ding thu, Press media le doctor le Nurse hai khawm I­Card an chawinaw chun an phalnaw ding thu; paper tar fawm an pawmnaw ding thu an hril bawk. Schools le College hai khawm hawng lo dingin an ngen bawk.

JAC 3 Bills CoD an bawzui pei ding thu an hril
CCPUR: Joint Action Committee (JAC) Against Anti­Tribal Bills chun zanikhan thusuok an siem nawk. An thusuok a chun, ATSUM le Student thuoitu tum tum han warning an pek hnung khawma Tribal MLA 20 hai August 31, 2015 nia Manipur Assembly­a Bills 3 pass­naa an thanglui pawi an ti thu; Bill 3 han tlangmi hai ram le hmun bakah an rights a tawkpawi thu; JAC in Manipur sawrkar kuoma Charter of Demand a pek chu tawpsan lova an bawzui pei ding thu; Nov. 9, 2015 nia Manipur sawrkar kuoma Charter of Demands phek 4 a sei an pek bakah Dec. 29, 2015 khawmin Charter of Demand an pek nawn nawk thu, Charter of demand an pek hai vawisun chena ngaisak a la ninaw thu; January 11, 2016 khan Bills 3 hai le inzawmin JAC chun phek 6 a sei ding document tum tum Manipur sawrkar kuoma an pek thu; Manipur total population 2.72 million hai palai MLA 60 an thlang ang bawkin JAC khawm Tribe le community tum tum han Anti­Tribal Bills  thuah bawzuitu dinga Sept. 2, 2015 a ruot le mawphurna pek an ni thu hai an zieklang.

Hieng a ni lei hin JAC chun mipui duthusam le lungawina tawka Bills 3 hai repeal/amended (lakkir/ siemthat) a ninaw chun hnungtawl lova an Charter of Demands pek an bawzui pei ding thu an zieklang.

Boundary thuah Lal hai meeting neipui a tum
CCPUR: Mr Langkhanpau Guite, Chairman, ADCC chun Feb. 11, 2016, 11:00AM hin a Office chamber­ah District boundary chungthuah khuo Lal hai meeting neipui a tum. Hi huna hin district boundary thubuoi in a tawk  khuo Lal hai; Chief Association a President le Secretary bakah District Boundary thubuoi le inzawma inhnikna nei hai thang dingin Chairman, ADCC chun a fiel.

Lamlien le leilak siem thatna sin ka sawrkarin hrat takin a thaw zing: O.Ibobi Singh
IMPHAL: Manipur CM O.Ibobi Singh chun zanikhan Imphal­Moreh Road a Pallel leilak bawl zo thar hlim le Kakching hmuna Indoor Stadium hai a hawng. Hi huna hin Manipur Works Minister Dr Kh. Ratan Kumar; Kakching A/C MLA D. Korungthang le PWD a officiar lien hai an thang. Pallel leilak hi kum 2008 a inthawka Union Ministry of Road Transport sum hung pek hmanga PWD, Manipur in an bawl tan, metres 70 a lien le metres 12 a insang a nih. Hi leilak bawlnaa hin Rs. 8.67 crores lai zet seng a nih.

Hi huna CM O.Ibobi Singh in thu a hrilnaa chun, hi leilak hi Leilak pawimaw takel, Jiribam­Tupul a inthawka Rel lampui hungin a la hung zawm pei ding le Asian Highway a la hung ni ding a nih.Manipur­a lamlien le leilak siem thatna sin ka sawrkarin hrat takin a thaw zing a. Lamlien le leilak hai a tha chun sum lamsuokna a hung pung pha a, mihriem khawsaknaa hung inhawi phain, hnam tum tum hai lai inunauna thalem le inremna hai a hung intlun thei pha hlak a nih tiin a hril.

Leilak pawimaw le tangkai tak a la hung ni ding a nih. Khawvel rambung tum tum infepawna lampui Asian Highway a la hung ni ding a nih tiin Works Minister Kh. Ratan Kumar chun thuhrilna a nei huna a hril.

NH­37 ah Economic Blockade
IMPHAL: Zani zana inthawk khan Jiribam District Demand Committee (JDDC) chun NH­37 (Imphal­Jiribam Road) ah Economic Blockade an thaw tan. Economic Blockade hi Feb. 15, 2016 zanril chen an thaw ding niin JDDC thusuok chun a hril. Jiribam District hran siem an ngenna state sawrkarin a ngaisak naw dodalna le District ngennaa Economic Blockade hi an thaw niin JDDC chun an hril.

Legal expert post 1 a ruok
IMPHAL: Tribal Affairs Hills & SC Department­ah Legal Expert Post 1 lak tum a ni a. Law Degree nei, hi sina inhnikna nei hai chun Directorate of TA/Hills & SC Office­ah ngaiven thei ni dingin Pu S. Minlianthang, IAS, Director Tribal Affairs & SC a inthawk ei thu dawngna chun a hril.


Simkhawlei inhning tuortuhai ta dingin Rs. 10 crore
IMPHAL: Jan. 4, 2016 a Manipur­a Simkhawlei inhning leia thina le hliemna tuorhai thangpuina ding le thil a suksiet hai siemthatnaa hmang dingin zanikhan Manipur sawrkarin Rs. 10 crore a sanctioned. Simkhawlei inhning lei khan mi 10 an thi a, midang 120 an hliem pha a nih. Thina tuok umna DC­hai chu thi sunghai kuoma pek dingin Rs. 4 lakh seng pek a ni ta a, In a suksiet vawnghai chu thangpuina Rs. 1,00,000 (hills), le Rs. 90,000 (valley) seng lo pe dingin DC­hai inhriettir an nih tiin O. Nabakishore, Chief Secretary Manipur chun a hril.

Tangjing Khunou ah Bawng natna hri
IMPHAL: Sugnu Area sunga um Tangjing Khunou ah tulai hin Bawng natna hri an leng a, Bawng iemanizat an thi ta niin a khaw mi han an hril. Bawng thenkhat chu an bu zawngna le fakna hmuna an thi niin an hril. Hi lai hmuna bawng natna hri inleng enfel ding hin Vety. Doctor tir an ni a, Vety doctor hai chun Blac­quarter natna hri niin an hril. Bawng thi hai hi an thi tawmin phungzawl natna invawi ang elin an intal rak rak hlak niin Bawng neituhai chun an hril.

May 27 a inthawk Delhi­­Miz. direct flight
AIZAWL:  May 27, 2016 a inthawk khin Mizoram­a Lengpui Airport le Delhi inkarah direct flight a um ta ding niin zanita official thusuok chun a hril. Jet Airways chun Delhi­Lengpui flight via Guwahati inkarah mi 168 chuong theina Boeing 737 nitin an vuong tir (service) ding a nih. Vuongna hi zing dar 10 in Delhi­a inthawk vuongsuok a ta, Guwahati­a chawl hnungin zantieng dar 2 in Lengpui Airport tum a ta, a kir tieng Guwahati­ah iemanichen chawl in zan dar 6:30 in Delhi a tlung hlak ding a nih. Hi le inzawm hin Delhi­Lengpui flight ticket khawm zawr dawk tan nghal a nih.

Mi 3 Heroin grams 152 leh man
AIZAWL: Zanikhan Mizoram Excise and Narcotics Department hnuoia Anti Narcotics Squads han mi 3, Ramhmingthangi (38) of  Zokhawthar, Lalchungnunga (37) of  Aizawl le Rosangliana (20) of Aizawl hai chu Heroin grams 152 leh an man a, NDPS Act, 1985 dungzuiin case an siem khum a,  Court hmaah inlangtir an ni bawk. Court in lungina sielut dinga a rel angin Lungina sielut an ni tah tiin Mizoram Excise & Narcotics Department thusuok chun a hril.

Agartala­Akhaura Rel lampui 2017 a zo ding
AGARTALA: Sawrkar thlungpui chun Bangladesh ram chen tlung ding Agartala­Akhaura Rel lampui km. 5 a sei siemna dingin Rs. 580 crore a sanction a, kum 2017 a zo  tum a nih. Agartala le Bangladesh inkar Rel lampui hi km. 15 a sei a ni a, km. 10 chu Bangladesh ram sung a nih. Km. 15­a sei Rel lampui siemna dinga sum seng ding riruong chu Rs. 1,000 crore (Bangladesh ram sunga km. 10 a sei) a nih.

Agartala­Akhaura Rel lampui hi siemzo a ni pha chun Kolkata­Agartala via Siliguri lampui km. 1700 a hla chu km. 350 chaua hla a hung ni ta ding  a nih. Hi lai Rel lampi siem ding hi Ms Shiekh Hasina PM a ni lai kum 2010­a India ram a hung inzin huna remtina neia lo um ta le kum 2011­a Dr Manmohan Singh India PM a ni laia  Bangladesh an zin huna sukfel a nih.

Destination NE­2016 Feb. 12­a inthawk
NEW DELHI: Ministry of Development of North Eastern Region (DoNER) chun February 12, 2016 a inthawk khin Pragati Maidan,New Delhi hmunah ni 3 sung aw ding “Destination North East­2016” huoihawt a tum. Ni 3 hi event hmang a ni sungin India hmarsak biela ministries tum tum han sin an thaw hai suklang ning a ta, business summit le stalls exhibition hai um bawk a tih. Chun, cultural programme khawm buotsai ni bawk a tih.

Nagaland sawrkarin Inquiry Commission an din
KOHIMA:  February 6, 2016 nia Nagaland, Tuensang district sunga Shamator hmuna nupa tuokkhat lambun le kap hlum an nina thu suizuitu dingin Nagaland sawrkar chun zani hmasa khan Inquiry Commission an din. Hi bakah hin Nagaland sawrkar chun kap hluma um nupa sunghai kuoma zangnadawmna Rs. 1 lakh ve ve pek an ni ding thu a puong. Hi thil tlung le inzawma zani hmasaa mipui lungsen han tharum an insuo leia inbeituonaah mi 8 lai zetin hliemna an tuok. Zanikhan Nagaland senior Cabinet minister P. Longon inrawinaa Eastern Naga Legistors’s Union team chun a hmuna thil umdan enfel dingin Shamator­ah an van zin. Nupa kap hluma um hai kha Govt. teacher sinthaw Alemba le a nuhmei Shamator village­a Medical sub­centre­a Nurse sin thaw hai an ni a, Kiphire pana an tlan lai meka tu ti hrietlo han an kaphlum an nih.

An thu le hla lova inzawrtir nuhmei 12 sansuok
THANE:  Police chun Thane district huop sunga Kalyan Railway station bul lai an thu le hla lova nawchi inzawrtir nuhmei 12 an sansuok bakah an zawrlui tirtu nuhmei 4 an man. Nuhmei hai hi zani hmasa zan dar 10 vela kha Police crime branch­a anti­human trafficing cell han an va sansuok an nih. Hi sumdawngna le inzawma man mi 4 hai chu ­ Lakshmi (Amma) Parmeshwar Patil (39), Radha Vijay Konpakula (46), Rajiya Abdul Karim Shaikh (48) le Lalita Balya Nayak (35) hai an nia, an kuta inthawk Rs. 10,700 man sa a ni bawk. Sansuoka um nuhmei hai hi kum 20­25 inkar an ni tawl a, remand home­a sielut an nih.

Telangana MLA han hlaw sukpung an ngen
HYDRABAD: Telangana State a MLA hai chun an hlaw 200% a sukpung dingin an ngen. Tuta an hlaw hi thla khatah Rs. 95,000 vel a ni a, Rs. 200% a sukpung a ni chun thla khatah Rs. 3,00,000 a hung tling hak ding a nih. Delhi MLA han hiengang zat an hlaw thei chun iengleiin am hlaw thei naw bik kan ta, tiin Telangana MLA hai chun an hril.

NE India Congress minority meet
NEW DELHI: Hungtlung ding February 22, 2016 khin Shillong, Meghalaya­ah minority departments of the congress for North East Chairpersons meet um a tih. Shillong hmna nei zo ni 3 hnungah Guwahati hmuna nei nawk ning a ta, AICC leaders hai khawm thang an tih tiin Sayeedulah Nongrum, National Coordinator, minority department of North east chun a hril. Hieng meeting haia hin Khurshid Ahmed Sayed, Chairman, minority department of All India Congress Committee in thuhrilna hun hmang a tih.


New Hamsphire­ah Trump le Sanders an hrat
WASHINGTON:US Presidential Election hung um ding le inzawma candidate ding thlitfimna dinga primary nei mek a ni a. New Hamsphire a Democratic primary a chun Bernie Sanders in Hillary Clinton a hneban a, Republican primary a chun Republican party candidate dinga khân taka ngai Donald Trump in hratna a chang. New Hamsphire a Vermont Senator Sanders (74) in votes 59% a hmu a, Hillary Clinton (68) in votes 38% a hmu a nih. Republican­a chun Trump (69) in Ohio Governor John Kasich chu votes 18% neka tamin a hneban bawk a nih.

New Hamsphire hi US President ni lai mek  Barack Obama le kum 8 liemtaa Democrats presidential  primary nei huna Hillary Clinton in hratna a lo changna hmun a ni leiin  tuta tum khawm hratna chang an ring lai zingin hnebanin a um ta a nih. Sanders chun ‘Political revolution’ leia hrat a ni thu a hril a, Clinton chun hneban a ni a pawm a sienkhawm a la bei pei ding thu a hril.

Tuchena hin Trump chun Democrats primary haiah hma a la thuoi a, tuhin South Carolina tieng primary nei nawk a ni ding a nih.

VAWISUN THUPUI
Rorelna tha chu suksuok unla, mi tinin mani unau chungah zangaina le lunginsietna inlangtir raw se;  ­ Zekaria 7:9

Editorial
Hmang suol hi

Thil iengkim el hin thatna le that nawna an nei seng. Hi thil hi hmang suol le h mang tha naw leia hung um hlak a nih. Mihriemhai ta dinga a boa ei um thei der lo, thil tam takel hi hmang suol le hmang thata tha le se thei tam tak a um. Khawvela ei dam sungin bu le hme boin ei um thei nawh. Amiruokchu, bu le hme khawm hi ei fak rawn taluo chun ei taksa ta dingin a tha naw a, ei hriselna a suksiet a, ei ta dingin natna chi khat a hung inchang hlak. Hi lei hin Doctor han bu le hme hi fak teu teu dingin an mi hril ngai naw a, a huntawk fak dingin an min fui hlak a, sienkhawm ei zawm theinaw leiin a chang chun ei nat pha hlak. Ei ni tlangmihai lem hin chu ei duzawng sa le Nga dam ei hme chang ei fak teu a, ei phing a na pha hlak. Ei damna tak bu le hme khawm hi hmang suol thei a nih.

Mihriem damna le hriselna dinga tha damdawi hmang suolna lem hi chu ei rama hin a zuolkai bik a, mihriem damna le hriselna ding kha thalaihai suottuin a hung inchang ta a nih. Entirna dingin hritlang damdawi tha em em el, Phensedyl, Corex le a dang dang hai chu a hmangna dinga hmang lova ei hmangsuol leiin ei rama chun zawr khap hiel an hung ni ta a, a pawi takzet el a nih. Hiengang bawk hin nat sawkna damdawi chi tum tum hai khawm ei hmang suol leiin ei rama thalai tam takin an thipui ta a, a thipui ding khawm tam tak an la um mek a, ei ta dinga damdawi tha kha ei hmang suol leiin mihriem hringna suottuin a hung inchang hlak a nih.

Heroin/No. 4 tia ei hrietlar em em el, thalai tam tak hringna latu, thalai tam takel nun suksetu le lampui indik lova keiluttu khawm hi a hmangna ding indika hmangtuhai chun an tangkaipui a, natna hre lovin an um pha a, an thi ding khawmin na taluo tuor lovin an thi pha thei hlak. Amiruokchu, ei ni lai chenin ei hmang suol pha ta leiin a hming a se em em a, mi han hmelma en takin an en a, a hming ringawt khawm hi titam umin an chang ta a nih. Thil a ni nawna dinga hmang hi chu a pawi bek bek el a nih. Zu khawm hi ama khat chun a suol ve nawh. Amiruokchu, a dawntu han inrui khawpa an dawn rawp pha suol a hung inthawtir hlak. Hi lei hin ei society ah Zu hi a hming a se em em a, eini laia ding chun suol rapthlak takel intlungtirtu a ni leiin doin ei do hiel a nih. A dawn thiem, hnam var le changkang hai chun ei ni rawi ang em em hin chu Zu hi an siet pha naw niin an lang. Ei rama ruok chun Zu hi ei   ram le hnam hmelma pakhatah ei ngai an ta hi!

Politics ei ti khawm hi ei hmang suol hlak leiin a chang chun a hming a se let der hlak. Hi lei hin Kristien piengthar tahai chun politics a hin inrawl an nuom naw a, politics lakah an inthier fihlim hlak. Thenkhatin politics hi suuol thawna, hleprukna, fakrukna, inhlemna, nunghak, Zu le sa inhnelna, insuk hausak le suol chi tum tum thawnaa an hmang hlak leiin a hming a suksiet a, mi tha le fel han thangvena chiah an ruot ngai nawh. Mahatma Gandhi in suol pasari a hrilhai lai “Tum mumal nei lo poltics chu suol a nih” a ti hi a thangsa. Chuleiin, politics hi suol thawnaa hmang chi a ni nawh. Khavela ei um sung chun politics bova khawsa thei lo ei nih ti ruok hi chu a chieng em em. Hieng a ni lei hin ei politics khel dan hi thienghlim thei sienla chu nuom a um khawp el.

Sakhuona thil khawm hi hmang suol thei a nih. Sakhuona hi thenkhat chun sumdawngna, fakzawngna le sin hmunain an hmang hlak an naw mani ding aw ti theiin a um hlak. Hi lei hin sakhuona khawm hi a chang chun dem le sawisel a kai pha bakah a  hming nasa takin a se hlak. Kristien sakhuo zuituhai lai khawm a dera ringtu, piengthar le Kristien an um hlak. Hi lei hin ei kristiennaa hming mawi le that ding angin a mawiin a tha zo ngainaw a, ei rawngbawlna hai chen a sukhrat theinaw pha hlak. Thil hmang suol hi chu tha lo takel, ei sietna bulpui pakhat a nih.

Ei ni lai le ei society sung khawm sex hmangsuolna a nasa ta hle ti chu a hmu le hrietu seng ei nih. A mi siemtu Pathien ditnaw zawnga sex ei hmang leiin naufahra lo ding naufahra le sawnnau ni lo ding sawnnau tam tak an um pha a, sungkuo kawidar lo ding a hung kawidar pha a, HIV/AIDS invawi lo ding han an invawi pha a, nawchizawr lo ding tam takin nawchi anzawr pha a, nun beidawng lo ding tam tak nun beidawngin an um pha mek bawk. Khawtlang suolna khawm nasa takin a suktam pha a, khawtlang suolna ei tia ei inthangsatir, misuol ei tihai hi a tlangpuiin sungkuo kawidar, nu le pa nei lo el khela chengna ding bik In nei lo hai an nih ti thil chinchang suituhai chun an hril. Sex hmang suol hi mimal, sungkuo, ram le hnam ta ding khawma a tha naw a, mi hnawksak suktamtu pakhat a nih.

Post a Comment

Powered by Blogger.