LPG:Bank le Aadhar linking 
CCPUR: Ministry of Petroleum and Natural Gas, New Delhi in thusuok a siem dungzuiin thlaisuongna LPG subsidize a hmu zawm pei theina dingin Bank Account le thlungzawm (linking) thaw ngei a tul a. Hi lei hin LPG Subsidy la hmang zawm pei nuom hai chun mani Gas Agency haiah  LPG ID le Aadhar ­Bank Account linking format laa an rang thei anga Bank­a pelut dinga inhriettir an nih.

HSA CCPur JHQ interim Prez. in Tv. Zaua
CCPUR: HSA CCPur Joint Headquarters­a President ni lai Richard Laltanpuia chu HSA GHQ a  Asst. Gen. Secretary (AGS) dinga thlangtling thar a ni leiin Vice President ni lai Tv. Lalthanzau @  Zaua chu interim President dinga ruot a nih. Hi le inzawm hin Feb. 4, 2016, 3:50PM khan Life Cafe, Rengkai Road­ah charge inhlanna nei a ni a, hi huna hin HSA CCPur JHQ a thuoituhai an thang tawl.


Pu Richard chun HSA GHQ a AGS dinga thlang tling a nina thuah lawmthu a hril a, Tv. Lalthanzau chun Pathien kuoma lawmthu hrilin, tlin le tlak lei ni lova Pathienin hnama a mi siem anga thuoitu ei lo ni a, felnawna, tlinnawna a lo um khawmin inhril rin lo dingin mipui hai a ngen a, a thil tum hmasa tak chu Office hawng, Unit le JHQ joint meeting an hmatienga nei a ni thu a hril. ­(LRS Puruolte)

Singngat line electric fe lo
CCPUR:  Singngat feeder hnuoia electric meivar latu hai chun zani hmasaa inthawk khan electric an hmu tanawh. Salbung­ah Disc insulator a puncture lei niin ei thu dawngna chun a hril. Siemthatna dingin IB feeder le Kangvai feeder shutdown a tul a, sienkhawm Imphal tienga System control han  shutdown an remtinaw leia la siem thei lo  nia hril ,e vawisun hin siemthat a ni beisei a nih tiin ei thu dawngna chun a hril bawk.

Child Death Review Committee
CCPUR:  Ministry of Health & Family Welfare, Govt. of  India thupek angin District Level Child  Death Review Committee indin a nih. Hi committee a Chairman CMO/CCPur ruot a ni a. Member Secretary in Dist. Nodal Officer; Members in Paediatrician, Dist. Hospotal; Obstetician/Gynaecologist, Dist. Hospital; Anaestician/Gynaecologist, Dist. Hospital, Sr Nurse  CMO in a nominate le Dist. Program Manager; Dist. Project Officer, ICDS hai an nih.

Model of Devpt. Thuah Seminar nei
CCPUR:  February 4, 2016, 11:00AM khan DC Office­a BRGF Resource Centre­ah “Lessons that we can learn form the Chinese Model of Development” ti thupui hmangin Seminar nei a nih. Hi huna hin Dr Ginlianlal Buhril, Senior Professor, Director Corporate Governance chun projector le slides hmangin inchuktirna a nei. DC/CCPur bakah Churachandpur district sunga Sub­Divisonal Officers (SDOs) hai le District Level Officers (DLOs) hai seminar­a hin an thang tawl.

DTO in Revenue Rs. 9,36,654/­
CCPUR: District Transport Office (DTO), CCPur chun January, 2016 thla sung khan Revenue Rs. 9,36,654 hmuin challan in Govt.­ah an peklut. Chun, January thla sungin Bike/Activa 122 , Car 13, Van 4, Truck 9, Bolero 2 le medium Bus pakhat an registered bawk.

Hmar Artistes inkhawm ko
CCPUR: Hmar Artistes Association (HAA) chun February 7, 2016, 1:00PM khin Pu Lalvullien In, Rengkai Zote Veng­ah inkhawm ko. Thu pawimaw ngaituo ding a ni leiin Committee members hai chu a kim thei ang taka thang dingin Secretary, Hmar Artistes Association chun inhriettirna a siem.

Passport thlalak peklut ding
CCPUR: NFSA hnuoia hamthatna dawng dinghai chu DSO, Churachandpur kuoma mani passport thlalak, Sub­Division hming, Mobile phone number, khuo hming, sungkhata lukhaitu tak hming, Aadhar No. Bank Account No. Bank le a Branch hming, Serial Nol le House No hai pelut seng dingin DC, CCPur in inhriettirna a siem.

Deworming workshop zo
CCPUR: National Deworming Day hmang ding le inzawma ni 2 sung aw Orientation Workshop on Implementation of National Deworming Day 2016 zani hmasaa tan chu zanikhan zo a nitah. Zanikhan resource person in Dr Baby Lalnuntluangi, Dr Robinson Lalnunpuia le  Dr Jire L. Pudaite han projector le slides hmangin inchuktirna an pek a, CDPSA hnuoia Principal/ headmaster/Headmistress hai bakah sun dar 12 hnung khan ASHA Facilitators hai inchuktirna an pek bawk.


Parliament Budget Session Feb. 23 a inthawk tan dingin CCPA in a rel
Feb. 29 in  General Budget Parliament­a phar ning a tih
NEW DELHI:  Union Home Minister Rajnath Singh inrawina hnuoia Cabinet Committee on Parliamentary Affairs meeting chun, Parliament Budget Session chu February 23, 2016 a inthawk tan dingin an rel. Rail  Budget chu Feb. 25, 2016 in phar ning a ta, Economic Survey Feb. 26, 2016 le general budget Feb. 29, 2016 in phar ning a tih tiin Union Minister Venkaiah Naidu in Chanchinbu reporters hai an hmupui huna a hril.

Budget session hmasa (first) party hi March 16, 2016 chen nei ning a ta, second part (thawk hnina) chu April 25, 2016 a inthawk  May 13, 2016 chenin nei ning a ta, sittings vawi 31 um a tih.

Dan pangngai angin President Pranab Mukherjee chun tan ni hin joint session­ah thu hril a tih.  Finance Minister Arun Jaitley chun tuta tum Budget session­a hin Goods and Services Tax a hung takchang ngei a beisei thu a hril.

Rural panchayats le urban local bodies haia nuhmei hai ta dinga seats 50% huol a ni theina dingin sawrkar chun budget session a hin Constitution ammendment thawna ding putlut a tum thu Rural Development and Panchayati Raj minister Birender Singh chun a hril.

Opposition party hai chun  Hyderabad­a Ph.D inchuklai Dalit mi Rohith Vemula inkhaihlumna le Arunachal Pradesh President Rule hnuoia sie a nina chungthu bakah J&K a political thila buoina chungthu hai Budget session huna an khekpui ring a nih.

MGNREGS fund 25% hmang indiklo
IMPHAL: India rama state dang han kum khat sungin a tlawm takah ni 100 bakah ni 50 dam Job Card sin an thawsa laiin Maniur a chun a tak taka Job card sin thawa um chu ni 20­30 a ni a, vawikhat khawm ni 50 Job Card sin thaw a ninaw a, MGNREGS fund 25% chu Ministers le higher authority han indiklo takin an hmang bakah State sawrkar tum ve dinga 10%  ti khawm vawikhat khawm a thaw ve nawh tiin Th. Chaoba, President, BJP Manipur chun zanita BJP Office, Keishampat Nityaipat Chuthek hmuna Press Conference huna Congress thuoina hnuoia Manipur sawrkar a sawisel.

Class XI&XII Admit  Card lak thei
IMPHAL: Council of Higher Secondary Eduation, Manipur hnuoia Class XI  &  XII Examinations, 2016 hung um dinga Admit Card chu vawisun (Feb. 5, 2016) a inthawk hin semsuok ning a tih. Higher Secondary School tina Principal annawleh an aiaw han Admit  Card hi vawisuna inthawk Council Office, Imphal­ah lasuok thei tang an tih tiin zanikhan Council chun inhriettirna a siem.

Rani Gaidinliu lim Imphal­ah
IMPHAL: 1st Rani Gaidinliu Women Invitation Football Tournament, 2016 chu Khuman Lampak Stadium­ah khuollien ni pumin CM O.Ibobi Singh in a hawng. Hi tournament a hin Manipur State puotienga inthawk teams 6 le Manipura inthawk team 1, an rengin team 7 thang an tih. Freedom Fighter Rani Gaidinliu lim (statue) Imphal khawpui sunga hmun remchangna hmunah inthut ning a tih tiin CM O.Ibobi Singh chun hi huna thu a hrilna huna a puong. Rani Gaidinliu hi freedom fighter ropui takel, India ram chau ni lovin khawvel pumpuia hrietlar phak a ni leiin ei ram le hnam ta ding chun uongpui tham a tling a nih tiin CM chun a hril bawk. Hi tournament hi Zeliangrong Students Union in an huoihawt a nih.

“Phum Shang” in  Golden Conch award
IMPHAL MUMBAI: 14th Mumbai International Film Festival (MIFF) for Documentary, Animation and Short Films neia um zanita zo a chun Manipuri film “Phum Shang” Golden Conch award for’ best documentary’ a dawng. Swiss drama “My Name is Salt” le Indian entry “Placebo” hai chun best feature length documentary film category­ah Golden Conch award an dawng tawm.

Minutes 52­a sei ‘Phum Shang’ documentary film hi Hao Bam Pabankumar in a direct a ni a, Mr Pabankumar hin sumfain Rs. 3 lakh lawmman a dawng bawk.

N. Mangi CPI a inthawk hnawtdawk
IMPHAL: CPI Manipur State Council Executive meeting chun Manipur­a MLA le Minister lo ni ta hlak, N. Mangi chu party kal zawnga a um leiin CPI a inthawk a hnawtdawk tiin zanita CPI, Manipur State Council thusuok chun a hril.

Workshop on Media in Mediatory tan
IMPHAL: Ni 2 sung awding Workshop on “Media in Mediatory Role” ti chu zanikhan Manipur University a Mass Communication Department Hall­ah tan a nih. Hi Workshop  hi Action Aid  Association, Regional Office, Guwahati, Mass Communication, MU; AMWJU; MHJU; Women in Media Network India; Imphal Free Press, Peoples Dialogue Initiatives le Volunteers for Village Developemnt, Ukhrul hai huoihawtna hnuoia nei a nih.

Training nei nuom hai ta dingin
IMPHAL: Schedule Tribe, Office Management & Acconts Training, Cane & Bamboo, Horticulture & Floriculture, Electrician/fitting/welding, Carpentry, Mushroom making le Bakery training a thang nuom hai ta dingin 29/2/2016 chen khin Director, Tribal  Affairs, Hills & SC, Manipur Office­ah hnina lekha peklut thei ning a tih. Seng tul po po hi Department hin a tum ding a nih.

Mizo.­ah kum 5 sung Cancer leiin mi 3,267 an thi
AIZAWL: Mizoram­a chun kum 2001­a inthawk December, 2015, kum 5 liemta sung khan Cancer natna leiin mi 3,267 in thina an tuok tiin zani hmasaa Aizawl hmuna World Cancer Day hmangna huna Health Services deputy director le National Programme for Prevention & Control of Cancer, Diabetes, Cardiovascular Diseases & Stroke (NPCDCS) state nodal officer Dr Eric Zomawia chun a hril. Kum 5 liemta sung khan Mizoram­ah Cancer invawi 6,403 hmusuok an ni a, hienghai laia 3,267 hai chu an thi ta niin Dr Eric Zomawia chun a hril.

Tuolthattu 11 thi dinga rel
KRISHNANAGAR:  Krishnanagar district Court chun zanikhan tuolthattua intum mi 11 hai chu thi dingin an chungthu a rel. Hieng  mi 11 hai hi November 13, 2014­a Nadia district­a Ghughurgachi hmuna homemaker Ms Aparna a chengna ina thattua intum an ni a, thiemnaw inchangtira um hai lai h in Trinamool Congress leader Lankeshwar Ghosh khawm a thang. Ram thua buoina leia Aparna hi an kap hlum a nih. Aparna an kap hlum bakah hin bomb an dengpuok leiin mi iemanizatin hliemna an tuok bawk a nih.

SA Games vawisun tan a ni ta ding
GUWAHATI:  Vawi iemanizat thul a ni hnungin 12th South Asian Games (SAG) chu vawisun hin tan ni tang a tih. SA  Games hi Meghalaya le Assam han an mikhuol tawm a ni a, a hawngna hi  Guwahati hmuna Indira Gandhi Athletic Stadium­ah nei ning a ta, Prime Minister Narendra Modi in hawng a tih.

12th South Asian Games hi ni 12 sung  (Feb. 5­16, 2016) aw ding, South Asian Olympics Council thangpuinaa huoihawt ding a ni a, SAARC rambung 8 haia inthawk inkhelmi 2,500 vel an hung thang beisei a nih. 12th SA Games hi kum 2012 a kha New Delhi hmuna huoihawt dinga ti a ni a, sienkhawm Delhi Assembly election um leia thul; hi zo hnunga International Olympic Committee in Indian Olympic Association (IOA) a suspended leia nei el thei ta lova sukhnuk peia um a nih. IOA suspended­na hlip a ni hnung khan Kerala­a nei dinga beisei a ni laiin Guwahati le Shillong hmun haia nei dinga nikuma kha puong a nih.

SA Games hi Kolkata­ah kum 1987, Chennai­ah kum 1995 haia huoihawt a lo ni ta a, hiengang games lientham Northeast state­a nei a vawikhatna ding a nih. 12th SA Games thupui chu ‘Play For Peace Progress and Presperity” ti a nih.

Lalu makpa motor silai leh chuktuoa lakpek
GURGAON: Bihar politician le RJD thuoitu Lalu Prasad Yadav makpa Vineet Yadav motor SUV  (Toyota Fortuner) chu zanikhan Gurgaon­ah sun changlaiin tu ti hrietlo han silai leh chuktuoin an lakpek. Vineet Yadav hi Lalu naunu Hema pasal a nih. A motor lapektu hai hi pasal mi 6 an ni a, a driver Hari Prakash in a khal lai chu sukchawlin car sunga inthawk keidawka motor hi laa an tlanhmangpui niin Asst. Commissiner, Gurgaon Police Hawa Singh chun a hril. Police chun case siemin an suizui mek.

IAF Officer nuhmei kuomah Rs. 14.5 lakh 
NEW DELHI: Indian Air Force Officer SS Chaitanya nuhmei Mvani chun a pasal thina le inzawmin zangnadawmna Rs. 14.5 lakh a dawng. Squadron Leader Chaitanya kha kum 2005­a Air  Force Mountaineering team­a Everest Expedition­a thang a ni a, an hung kir tieng vurthli nasa taka a hrang leia damzo lova thi a ni a, a nuhmei le  naute thla 3 mi a thisan a nih.

Shoot­at­sight order puong
NEW DELHI: Western Command Air bases a chun Shoot­at­sight order puong a nih tiin Defence ministry thusuok chun a hril. Hmel hriet lo le phalna bova hi hmuna va fe le lut tum hai chu hi order dungzui hin hmu le inruola kap nghal an ni ding a nih. Pathankot Airbase bei a nia inthawka invengna dinga hi Orders hi insuo a nih. Chun, venghimna sin khawm sukkhau zuol a ni a, Army le Central   Forces hnuoia Quick Reaction team hai regular takin patrolling  an fe zing a nih tiin Ministry of Defence thusuok chun a hril. Helpawl han Jan. 2, 2016 a IAF airbase  an va bei tum khan Security personnel 7 an kap hlum a nih.

Kum 1990 a inthawk Journalist 2,297 an sin thawna hmuna an thi
BRUSSELS:  Kum 1990 a inthawk tuchena hin Journalist le media workers 2,297 hai chu an sin thawna hmuna an thi niin International Federation of Journalist (IFJ) report chun a hril. Journalist hai hi Indona hmun le bomb puok hai leia thi an ni bakah corrupt officials hai an suizuinaa that an nih tiin IFJ report chun a hril. Nikum sung ringawt khan journalist le media professionals 112 that an ni a,  kum 25 sunga Journalist thi tam kum tak chu kum 2006 kha niin Journalist 155 an thi.

Journalist thi tamna tak chu Iraq niin 309 an thi, Philippines (146), Mexico (120), Pakistan (115), Russian Federation (109), Algeria (106), India (95), Somalia (75), Syria (67) le Brazil –ah (62) an thi. Kum 2015 khan Jihadist hai chetna leiin France­ah journalist 10 an thi.

VAWISUN THUPUI
Kei ruok hi chu Aigupta rama inthawk tah a, Lalpa i Pathien chu ka na, Kei ti naw chu Pathien dang i hriet ngai nawh a; Kei naw hi chu sandamtu dang an um nawh. ­Hosea 13:4

Editorial
Sem sem dam dam

‘Lal Isu ringtu ei nih’ ti laia depde hnam anga inhril ngawt el chu tukhawma nuom naw seng ei tih. Amiruokchu, ngun takin ngaituo inla, ei pi le pu hai kha lungbul le thingbul biein ramhuoi kuoma an lo inthawi hlak. Ei pi le pu han kum tam tak an culture le society nghet taka an lo chel tlat kha, Sap  Missionary han Kristiena inlet dingin an mi hung thlem a, kum tawite sungin Kristienah ei inlet zo  pup el. “Kristien sakhuo biek a tha naw a, Zawlbuk theory kha la sawm hring peiin ramhuoi kuomah lan thawi pei inla’ tina tieng ruok chu ei thu ziek le hril hin a kawk nawh. Amiruokchu, ei pi le pu han ramhuoi an biek hun lai le Kristien ei ni hnunga ei um nuom dan hi ngaituo chet chet a tul ti hi ei hril nuom tak a nih.

Ei pi le puhai nun dan phung pangngai, an taimakna, an ringumna, an indikna, an tuorselna, an tlawmngaina, huoisenna, neka upa hai an inza thiemna, hmeithai le rethei zuolhai khaisuoktu hlak hnam an nina hai, sem sem dam dam an lo thaw hlak hai kha vawisun  ni hin chu ei hnawl el ta hi a pawi em em el a nih. Hienghai sawm hring pei hi Kristienna le Zohnathlak  ei nina le khawm an hme lem dai. Hi lei hin pi le puhai sulhnung a tha hai kha chu hnawl el lovin  Zohnathlak Kristienhai hin la zui pei inla nuom a um hle.

Tuta ei hnam nu dan  ni taka inlang chu sin inrim thaw pei lo, a thlawna hmu nuom, hmatieng hun sei tak thlirlawk thiemna nei lo, depdena, duamna suola intang mek ei nih ti ila ei hril suol  taluo bek bek  ring a um nawh. A nei le a hausa hai an huomhap deu a, a retheihai  chan ding ngaituo der lova inchawk thei um taphawt inchawk zo pei hi ei thil thaw nuom dan a nih. Mi hausa han hmun le ram  an inchawk pei a, inhmuna thetin  an zawr pei a, inhmun nasa takin a to pha a, miretheihai ta ding chun inhmun inchawk chu thil harsa tak a nih. Hi lei hin hmun le ram nei han mi retheihai hmakhuo ngaia an ram le an hmun zawr dan ngaituo lem hai sienla thiltha tak hung ning a tih.

Ei pi le puhai khan mi retheihai hmangaina an lonei lien a, mi retheihai chan le ngirhmun kha an hrietthiempui hlak. Hi lei hin pi le puhai huna mi retheihai kha chu mi hamtha le vangnei an nih. Lal le khawtlangin an hmusit ngai naw a, an tulna taphawtah an sawmdawlin an thangpui a, retheinaa inthawk an dawmkang a, sungkuo pangngai an hung ni thei hlak. Hmeithai in bawl thei lo hai In an bawl pek bakah lo chen khawm an vat  kep hlak. Tulai khawvela ruok hin chu sem sem dam dam ti a um ta nawh. A retheihai chu sirde le hmusitin an um a, tu hrietfuk le ngaisak an hlaw ta nawh. Thangpui le pek nekin an nei tasa khawm lakpek ei rin ta nawh.

Tienlai khan chu thil a thlawna inpek kha ei pi le pu han an lo ching  hlak a. Tulai ruok hin chu a thlawna thil inpek a um meu ta naw a, a zawrin ei zawr ta pei hlak. Antam tel  khat inpek khawm  harsa ei ti ta tlat el. Sem sem dam dam umzie ei inneitir ta nawh. Ei Kristien sakhuona hi thain  hmasawnpui hle inlakhawm Kristien sakhuo zuitu han an diknaw zawngin ei hmang suol am an ta ding aw ti theiin a um. Hi lei hin ei Kristien nina kawnga hin inbichieng inla nuom a um.

Ram le hnam changkangna ding chun a ram sunga chenghai ei inhmangai le ei inunauna a that a tul. Mani le mani ei indo a, ei inhmusit a, ei insirde sung hin chu hmasawn  thei tak tak ngai nawng ei tih. Mi hausa bovin mi rethei an khawsa thei naw ang bawkin, mi rethei bovin mi hausa an khawsa thei bik naw a, mitin hi inmamawtawnna nei, inkamtuo le inthangpuituo ding ei nih. Chuongang chu Kristienhai thaw ding a nih. Sem sem dam dam ei thaw thei naw chun, ei sakhuo fepui dan hi an dik chie dim ti hi ei ngaituo chet chet a tul ding niin an lang. Thingbul le lungbul  bie hai hmana an lo thaw thei chu Pathien tak le hring bie han iengleiin am thaw thei naw bik ei ta?

Post a Comment

Powered by Blogger.