Responsive Ad Slot

Hmasawnna Thar | 03 February, 2016

Wednesday, February 3, 2016

/ Published by VIRTHLI
Damnaw hai tha taka enkawl dingin Medical Staff hai an fui
CCPUR: Ministry of  Health & Family Welfare, Govt. of India  palai Dr H. Bhushan, Adviser & Health PHA, Division, national Health Resource Centre, New Delhi le former Dy. Commissioner i/c Maternal Health Division, Govt. of India chu zanikhan Tuithaphai, CCPur­a hungin District Hospital a hung enfel.

Dr H. Bhushan hin CMO, DFWO, Med. Supdt. District Hospital, Medical officer hai, BPM, DPM  hai zanikhan Medical Supdt. Conference Hall­ah orientation program a hmangpui a, projector le slides hmangin “Model Health District” thuah District Hospital, CCPur’a thawk Doctor le staff hai sinthaw dan ding le mawphurna hai a hrilpui.



Hriselna District level­a tan a pawimaw thu hrilin vawisuna Govt. district hospital damnaw doctor pana hung hai mi hausa an ninaw a, hospital thawktu han tha taka an lo enkawl naw chun, inhmun­lohmun zawra an inenkawl a ngai ding thu; kum tin India sawrkar chun Health Sector­a dingin Rs. 1.30 crore a seng a nih tia hrilin medical staff han ‘service’ pek chu an mawphurna le thaw ding a nih tiin a hril.

Pathienin damnaw hai hnem le thlamuon thei dingin medical staff hai thil thaw theina le mawphurna a pek a, chuong thil thawtheina le mawphurna hai hmanga medical staff hai chu an sin tha taka thaw dingin an fui a, Health service thalem a um theina dingin medical staff han damnaw hai lungril an hriet a pawimaw tiin Dr H. Bhushan chun a hril bawk.

Dr H. Bhushan chun, Arunachal Pradesh hmuna a posting laiin km. 30 a hla chu thla khat sung zet ke in a thawkna hmun a pan hlak thu le vuongna hmanga ration thlakna (air drop) hmuna khawm a lo thawk  a, chuong hun harsa tak haia career lo tan a ni thu a hril. District Hospital, CCPur ‘Model Health’ a ni theina dingin medical staff han taimak le titakna neia sin an thaw a pawimaw tiin a hril. Dr Bhushan hin District Hospital –a Ward tum tum hai a en hnungin Imphal tieng a kir nawk.

District Hospital­a enkawl
CCPUR: Mr Paominlun (30) s/o (L) Henkholal of Laizon Veng, Tuibuong chu zani hmasa zan dar 4 vel khan ina inthawk a suok a, a sung han hmun dang dang an zawng hnung khawma an hmu zonaw  hnunga KKL kuoma an intlun nungin KKL thuoitu han hmun hran hrana an zawng hnungin zani zingkar khan Leisang le Kaprang inkara Leilet lai a khup­ah hliemna tuokin an va hmu a, District Hospital, CCPur­ah an phurlut.

Mr Paominlun hi January 11, 2016 a  Tuibuong area­a Activa in a baw leia Raj Policlinic a hun iemanichen zet enkawla lo um ta niin a sunghai chun an hril a, a thluokah thisen a lut leia lungril tiengpang buoina nei niin an hril.

Pre­paid electric hrui an keizam mek
CCPUR: Electricity Department/CCPur chun tulai hin Lailam leilak a inthawk Tiddim Road­ IB Road inkar, Red Cross Road - Salem Veng inkar bakah IB road tungah Electric Pre­paid  pekna ding electric hrui an keizam mek. Hi lei hin CCPur khawpui sunga chun sin an thaw sungin electric sukthim/that hlak a nih. Prepaid­electric hrui an keizam zo hma chun sun hunah electric sukthim a ni hlak ding a nih tiin ei thu dawngna chun a hril.

ZEO in Free textbook a sem
CCPUR: Mr T. Goukhomang, ZEO, CCPur chun zanikhan Siamsinpawlpi Residential School­ah  student hai kuomah Free Textbook semna a nei. Thuhrilna a nei hunah, student hai chu zinga ei ram le hnam, society thuoitu la hung ni ding an ni leiin taima le tumru taka lekha inchuk dingin an fui tawl. Pathienin mihriem hai hi a thiem bik le var bik in tukhawm a mi siem naw a, lekhathiem ei ti hai hi midang hai neka an tiem rawn leia thiem an nih tia hrilin lekha tiem rawn dingin student hai an fui.


Free Textbook semna hi School Managing Chairman Siamnunlian Valte le Lianzapau Samte, President, SSPP GHQ hai khawma uopin thuhrilna hun an hmang ve.

Class XII exam ding hai inthlana an nei
CCPUR: Rayburn College chun zani 10:00AM khan an College Chapel­ah Class XII exam ding hai inthlana “Baccalaureate, 2016” an nei. Hi huna hin Rev. Khen P. Tombing chun 14Bn. NCC  Rayburn College in kum 2003­2016 inkar sunga sawrkar sin/department tum tuma hlawtling hai list a hawng a, Maj Alex Khamminlun in NCC cadet Republic Day a thang hai le Youth Exchange program a thang hai list a hawng a, NCC Rayburn  a inthawk India aiawa Sri Lanka a fe  Siamremkimi kuomah Certificate inhlan a nih. Hi zo h in Class XII exam ding students 491 hai tawngtaipekna  Rev. Khen P. Tombing, Principal, Rayburn College in a nei. Session II zantieng college ground­ah hun hmang a ni a, hi taka hin student of the year contest, Male Miss of the year contest hai nei a nih.

A.K. Sanaton chungah Defamation Case siem ning a tih: N. Sovakiran
IMPHAL: MPP President dinga thlang thar N. Sovakiran chun zanikhan MPP Office, Imphal­ah Chanchinbumihai an pawlpui a, an party hming hmang suol leiin A.K. Sanaton chungah Defamation case an party in a siem ding thu a hril. A.K. Sanaton chun ama  MPP President thar niin an hril. A.K. Sanaton le a hnungzuitu, L.Apabi le N. Ojit hai chu sum le pai an hmang indiknaw leia MPP a inthawka hnawtdawka um, Court case nei laizing, an party a nina chel nei ta lo an ni a, A.K. Sanaton MPP President thara thlang a nih tia Chanchinbu haia insuo a um hi thudiklo a nih tiin N. Sovakiran chun a hril.

MPP chun resolutions 7 an pasi a, hienghai hi kum 2017­a Manipur Assembly Election hung um dinga an party agenda ni nghal a tih tiin N. Sovakiran chun a hril. An resolution pasihai lai Manipur­a inthawk AFSPA, 1958 hlip ding, Manipur in a a ram mihai venghimna ding Bills 3 a pasihai chu dan (Act) a hung ni ngei theina dinga bawzui ding; National Highway Protection Force indin ding le NH­37 (Imphal­Jiribam  Road) international standard a siem dign tihai a thangsa. Chun, kum 2009  a Khwairamband bazar a Ch. Sanjit le Rabina thattuhai chu dan anga hrem an ni ngei theina dinga an party in a bawzui pei ding thu N. Sovakiran chun a hril.

NCHAC Chairman dingin Pu Ngamrothang Hmar
HAFLONG: NC Hills Autonomous Council a sawrkarna cheltu BJP  kawidarna leia Congress party in No Confidence Motion move dinga Governor kuoma an ngenna angin January 29, 2016 khan Special Session ko a ni a. Sienkhawm NCHAC Chairman ni lai Pu Subrato Thaosen chun session ko nekin ama le ama an ban leiin NCHAC chu Chairman bo a hung nita a. Chairman thar ding ruot chu makmaw a nita leiin 28 Elected MAC haia inthawk NCHAC Chairman ding nomination file theina hun hawng a ni a, Ex­Chairman Pu Subrato Thaosen le Pu Ngamrothang Hmar han Nomination an file a, elected MAC haia haia inthawk proposed tu le seconded zawng a ni a. Sienkhawm Subroto Thaosen chun a hratnaw ding a hriet leiin an hnukdawk. Hi lei hin Pu Ngamrothang Hmar chu chu vawisun hin un­contest in NCHAC Chairman dinga thlangtlinga puong ning a tih. (Virthli)

Lilong­ah sungkhaw natna hri
IMPHAL: Thoubal  District sunga Lilong bielah tulai hin sungkhaw natna hri an leng nasa hle a, damnaw tam takel Hospital panpui an nih. Damnawhai hi an taksa a zawi a, an inluok bakah an sung a khaw niin ei thu dawngna chun a hril. Hi natna hri hi an tui dawn a inthawka hung intan ni dinga  ringhla a nih. Hi lai hmuna hin Medical team tir an ni a, mipuihai chu fak le dawn fimkhur ding le  tui suongthat chau dawn dinga hril an nih tiin CMO, Thoubal chun a hril.

Manipur Assembly session Feb. 19­ah
IMPHAL: Manipur Governor, V. Shanmuganathan chun 13th Manipur Assembly budget session chu Feb. 19, 2016 zing dar 11 a inthawk inthung tan dingin a ko. Session nei hun ding le thu rel ding hai Assembly Business Advisory Committee in meeting neiin la rel an tih.

Industrial Estates 3 indin belsa ding
IMPHAL: Union Minister of  Stae for Micro, Small & Medium Enterprises,  Giriraj Singh chu zanikhan Bishnupur district­ah a van zin a, Utlou a KVK, Toupokpi a Industrial Estate; Loktak Dil, INA Complex, MOirng le Senda haia sawrkarin development works a thaw mek hai a hmuna a en. Manipur­ah Industrial Estates 3 indin a ni ta a, pathum dang indin belsa ning a tih tiin Giriraj Singh hin a hril. Union Minister hi Manipur Commerce and Industries Minister K. Govindas in a zui.

Science Teachers  Congress tan
IMPHAL: Directorate of Science and Technology, Manipur hnuoihawtnain Ni 3 sung aw ding State Level Science Teachers Congress chu zanikhan Manipur Science Centre, Takyelpat ah tan a nih. Hi Congress a hin District tum tuma Science teachers hai an thang tawl.

MGNREGA kum 10 a tling tah
NEW DELHI: Congress inrawi UPA flagship rural job scheme  MGNREGA chu zanikhan kum 10 a tling tah. Hi le inzawma zanita MGNREGA Sammelan huoihawtnaa Finance minister Arun Jaitley in thu a hrilnaah, Centre­a BJP inrawinaa NDA in sawrkarna an hung siem hnung khan MGNREGA suktawp annawleh thil danga thlakthleng ringna a lo um a, sienkhawm sawrkar thar chun hi scheme (MGNREGA) hi hmatieng a fepui pei chau ni lovin fund khawm a sukpung a nih tiin a hril.

Hi huna Rural Development Minister Chaudhary Birender Singh in thu a hrilnaa chun, MGNREGA hnuoiah tuhin mihriem vaibelsie 8 a huom a, tukum hin vaibelsie 11 in tlingtir tum a nih tiin a hril. Hi baka hin MGNREGA workers lakh 18 hai skill development training pek an ni ding thu a hril bawk.

DG SSB dingin Ms Archana
NEW DELHI: Tamil Nadu Cadre nuhmei IPS Officer Archana Ramasundram (58) chu Director  General (DG), Sashastra Seema Bal (SSB) dinga ruot a nih. Ms Archana hi India rama nuhmei paramilitary force Director General hmasa tak a nih. Ms Archana hi 1980 cadre IPS Officer a ni a,  tuta Director, National Crime Records Burea sin thaw lai mek a nih.

Ama baka hin IPS Officer K. Durga chu Director General, Central  Reserve Police Force dinga ruot a ni a, KK Sharma, IPS chu Border Security Force (BSF) Director General thar dinga ruot a ni bawk.

Rangkachak tlang 35 leh man
CHAMPHAI: Zani hmasa zan khan Excise and Narcotics Department, Champhai le Customs and Central Excise thangruol han Champhai Mizoramah rangkachak tlang 35 (5.517 kg), Rs. 143 lakh manhu vel leh Darthankhama of Tahan, Myanmar an man. Hi zan ma hin Excise a Narcotics Department, Champhai chun Champhai hmuna bawk mi 3 Heroin grams 56 leh an man. Rangkachak le Heroin hai hi Myanmar a inthawk Champhai, Mizoram hung phur lut an nih.

PwDs han Unique Identity Card
JAIPUR: Union Minister for Social Justice and Empowerment Thaawarchand Gehlot chun, tuta inthawk kum khat le a chanve sungin India rama piengphunga ruolbanlo/ Persons with disabilities (PwDs) hai kuoma Unique Identity Card pek vawng ning an tih tiin zanita Jaipur hmuna Rgional Editors Conference­a thu a hrilna huna a hril. Identity Card hi India ram pumpuia hmang thei (valid)  ding, ruolbanlo han welfare scheme tum tum hai an hmu thei ding a nih.

WB Senior Director dingin Saroj Kumr Jha
NEW DELHI: Saroj Kumar Jha chu World Bank­a senior Director for Fragility, Conflict and Violence Group dinga ruot a ni a, a sin hi zani hmasaa inthawk khan a chel tan tah. Jha hi Indian Institute of Technology, Kanpur­a lekha inchuk, kum 2005­a Senior Infrastructure Specialist, Sustainable Development sin World Bank­a chel tan a nih. A hmain World Bank’s Global Manager for Disaster Risk Management Practice sin lo chel ta a ni bawk.

Police jeep eksiden­ah SI 1 a thi, 10 an hliem
MORENA: Madhya Pradesh a chun zanikhan mi thuoihmangtua intum Giriraj Jatav (30) phurtu Police Jeep a eksiden a, Chambal vadung ruom, tui um nawna hmuna a tlan liem a, Police Sub­Inspector Ashok Verma a thi bakah midang 10 na takin an hliem. Giriraj Jatav hi zani hmasaa  Banmore hmuna nuhmei naupang kum 13 mi thuoihmangtua intum leia Mathura hmuna man le a mi thuoihmangnu sansuok a ni a. Police han an Jeep­a an phur lai mekin a driver bula inthungtir a ni leiin a  driver chu steering a herkawi pek thut leia eksiden hi tlung niin Morena SP Vineet Khanna chun a hril. Hi thil tlunga hin Jatav khawmin hliemna a tuok ve.

Samak kapnaah Myanmar mi an inrawl ring
GUWAHATI: Assam sawrkar chun Kaziranga National Park­a Samak kap naah  Myanmar mi an inrawl  niin a hril. Forest Minister Atowa Munda in zanita Guwahati hmuna Chanchinbumihai an hmupuinaah Samak kap naah M­16 Rifle hmang a nih ti tulai hnai el khan hmusuok a ni a, hiengang silai tha hi helpawl han Samak kapna dingin an inhmangtir ring a nih tiin a hril a, sawrkar thlungpui chu hi chungthua hin kut hung rawl dingin a ngen. January, 2016 thla sung khan Kaziranga National park­a hin Sapeltu han Samak 3 an kap hlum ta a nih.

NE­ah hrat rak lovin simkhawlei an hning
NEW DELHI: Zani zingkar  khan India hmarsakbiel­a chun richter scale 3.7 le 3.8 haiin simkhawlei an hning niin Ministry of Earth Science hnuoia National Seismology Centre report chun a hril. India le Myanmar inrina lai zani zingkar 1:18AM vel khan richter scale 3.7 a hratin an hning bakah hi zo zingkar 5:19AM vel khan Assam­a Karbi Anglong lai richter scale 3.7 a hratin an hning bawk niin ei thu dawngna chun a hril a, sienkhawm thil suksiet a nei thu hriet a ni nawh. NE biel hi simkhawlei inhning tamna hmun a ni a, thla hmasa laia richter scale 6.7 a hratin Manipur thanga hmarsakbiel a sawi tum khan Manipur a chun thil tam tak a suksiet bakah thina tuok khawm iemanizat an um a nih.

Tuipuia tla hlum 14 an tling tah
PUNE: Zani hmasaa Murud­Janjira beach­a Abeda Inamdar College students picnic a fe, tuipuia tla hlum ruong zani zingkar khan pakhat hmu belsa nawk a ni leiin tuchena tuia tlahlum chu mi 14 an tling tah. Student picnic a fe hi students 116, teachers 8 le staff member 3 an ni a, student 20 hai hi  inhlieu tuma tui an lut huna an inringnaw tieng tuifawnin a lak a, anni laia 6 chu sanhim an ni a, a dang hai hi chu san hman loa tuia tla hlum an nih. State Housing Minister le Raigad’s guardian minister Prakash Mehta chun zani hmasa zan khan sansuoka um hai hospital­ah a va kan tawl bakah  hi thil tlunga thina tuok sunghai kuomah zangnadawmna Rs. 2 lakh seng pe dingin a puong.

Dr Ambedkar piengcham   kum tluona lawm tum
NEW DELHI: Sawrkar thlungpui chun April 14, 2016 a inthawk khin India ram pumpui huopin Dr B.R. Ambedkar piengchampha va vawi 125 -na kum tluona lawm a tum. Hi thila ding hin PM Narendra Modi chun Home Minister Rajnath Singh Chairman nina hnuoia Executive Committee an din a, zani hmasa khan review meeting nei a ni a, meeting a hin Union ministers RamVilas Paswan, Thaawar Chand Gehlot le Vijay Sampla hai bakah senior officials hai an thang.

Pak. in Anupam Kher Visa a pek phal nawh
MUMBAI:  Febuary 5, 2016 a inthawk  Pakistan­a Karachi khawpuia literary festival um dinga fe tum  bollywood actor Anupam Kher chu Pakistan in visa a pek nuom nawh. Hi Literary festival a hin India mi 18 thang dinga fiel an ni a, sienkhawm Anupam Kher in visa a hnina chu Pakistan in a hnawl pek a nih. Hieng laizing hin Pakistan High Commission chun Kher hin Visa a hninaw niin a hril.

Dalit students 60 han  inthat an tum
MOTIHARI: Bihar­a inthawk Dalit students 60, Rajdhani Engineering College (REC), Bhubaneshwar­a kai hai chu Bihar sawrkarin an stipend a peknaw leiin college hostel­a inthawk an thu le hla lovin an suok pha a, hi chungthua Bihar sawrkarin a ngaisak naw a, an stipend a hung peknaw chun anni le anni an inthat ding thu an hril. Hieng students 60 hai hi kum 2014­a Bihar sawrkar hnuoia Dalit Stipend Scheme hnuoia hi College­a admission hmu an ni a, Bihar sawrkar chun kum kum 2015 sung khan an stipend ding a thawn naw niin an hril.

Texas Senator Ted Cruz in Donald Trump a hne
WASHINGTON: US Presidential Election hung um dinga Republican le Democrats party a presidential candidate ni tum hai laia primary election nei meka chun Iowa Republican caucuses ah  presidential contender Donald Trump chu Texas Senator Tex Cruz in a hneban. A tamlem votes tiem ta povah Cruz hin 28% a hmu a, a dawttu Donald Trump in 24% a hmu a Marco Rubio in 23% a hmu a, Neurosurgeon­turned­politician Ben Carson chu 4­na niin votes 9% a hmu.

Democrats party tienga chun primary election fe mekah votes 90% deuthaw tiemzo taah Hillary Clinton chun Votes 49.8 percent hmuin hma a thuoi a, a dawttu Sanders chun votes 49.5% a hmu. Iowa zovah New Hamsphire le South Carolina haiah primaries hi nei pei a ni ding a nih.

VAWISUN THUPUI
Israel thlahai Lalpa thu chu ngai ta u; Hi rama hin thutak le lunginsietna le Pathien hrietna a um naw leiin, lalpa chun ram hluotuhai hekna ding a nei.  ­ Hosea 4:1

Editorial
Harsatna

Harsatna hang ti hin kawng hran han hril ding a tamin, ei harsatna khawm an ang naw seng awm ie. Nisienlakhawm, mi tam tak han harsatna ei ti hi chu fak le dawn, sum le pai hai le insung khawsak harsatna hai hi a ni deu tak el. Hi harsatna hi mi tinin ei ti le ditnaw a ni leiin a pumpel dan zawngin khawvel mihriem hai hi ei inphu suou suou el a ni hi. Mi thenkhat ruok chun hi harsatnain a sukmuolpho ti in, kut tling lo le mawi lo deu khawm hril lova sum laklut khawm an hniel naw niin an lang.

Harsatna hi iem a na ti hang sut chieng  tum ei tih. Harsatna hi um tanaw sienla khawvela hin hmasawnna um thei kher naw ni a, puk le ramhnuoiah dam ei lan tawm zing el thei a nih. Harsatna lei hin hmasawnna ropui tak ei lo nei a, ei ni phak lo le umna phak lova ei ngai hmuna dam ei um thei pha hlak. Hi harsatna hin tumruna, tuorselna le taimakna hai a mi pek hlak a, chu chun hlawtlingna  ropui tak an tlun hlak a nih. Chuleiin, harsatna hi a sawr tangkai thiem ta ding chun malsawmna a nih.

Harsatnaa inthawk hin an nawm ei hriet ngai lo thil tha le ei hmu ngai lo thil hmu nuomum le hmu nuom umlo dam ei hmufie hlak. Hmaikawr hmanga mi lo dawr hlaktu po po khan an hmel pangngai an hung tarlang ta hlak. Chu le inruol chun mi hmangaitu le hmusittuhai, ditsaktu le thiktu dam, elreltu le hmangaitu der hai chen an hung inlang ta hlak. Harsatna hmuna inthawk chun hmangaina  inthuk le thil dang tam tak a hung inlang hlak a; chuleiin, harsatna hi darthlalang fie tak ang a nih. harsatna hmuna inthawka hmangaitu hmel hung inlang ang tluka mawi hi khawvela hin um a tim maw? Chu le inruol chun, a khingtiengpangah hmusittu le diriemtu a hung inlang a, chimum takel a ni laiin ringtu nun fietu ropui tak a ni thung.

Harsatna hi mihriem puitlinga  mi siemtu a ni a, harsatna tuok der lo mihriem chu a puitling thei tak tak ngai nawh. Ram ang khawmin hang sut  ta inla, harsatnain a nuoi hrep ta a inthawka hung inchawr suok nawk Japan, Germany le Israel ram hai hi khawvela ram changkang le hmasawn hrat tak pawl an hung ni nawk el ta a nih. Mi ropui le hminginthang tak tak tak hai khawm hi harsatna tam tak paltlang ta an ni deu pei. Hang insut chieng inla, malsawmna hnara harsatna hi huoisen taka hmasuon hlaktu am ei ni, a pumpek tienga hel hlaktu.

Harsatna hi Pathien le mihriem hai inkara infepawna leilak pawimaw tak a nih. Harsatna hin Pathien  ei mamawzie le a thang lova ei khawsak thei nawzie a min hrietsuoktir hlak. Hi hmuna inthawk hin titakzetin ama ei ko hlak. Titakzeta hnitu le kotu hai rawl chu Pathienin a hriet naw der ngai nawh. Chuleiin, harsatna hi vanram chabi pawimaw tak a nih.

Mi thenkhatin harsatna hi vangduoinain an ngai a, sienkhawm an dik naw niin an lang. Harsatna tuok lo hai chu mi puitling le hlawtling an um meu nawh. Harsa taka thaw hram hramtuhai chu malsawm theitu le thangpui theitu Pathienin a ensan ngai naw a, an sin inrim ra an siktir hlak. Hi lei hin harsatna hi vangduoinaa ngai lova hlawtlingna lampui min hrawtirtuah ngai lem hlau ding a nih.

Don't Miss
© all rights reserved
made with by Simon L Infimate