CCPUR: Hmar Artistes’ Association (HAA), Gen. Hqrs., 6th General Meet –cum- Election chu Feb. 27, 2016 khan chawhma dar 10 AM a inthawk umni khamin MYC Hall, Muolvaiphei, CCPur hmun ah hlawtling taka nei a nih. Hi huna hin hnam sunga pawl tum tuma thuoitu hieng- HI, HSA GHQ, HYA GHQ, HACS, HCMS, HCLF, HLS, HPC – (D) haiin an uop a, anni a inthawk thu tha tak tak ngaithlak a nih. Hi hun hi Pu Lalhrillien Zote MDC, Saikot; Pu Darsiemlien Ruolngul (Social Worker) le Pu Lalnghet Hmar (President, Dist. Congress Committee, CCPur) hai khawmin an uop bawk.

HAA chun hmatienga an thil tum an hrilnaa chun HAA in plot inchawk a, chu hmun a chun hla le rimawi tienga talent nei tha tak tak hai suk hmasawnnaa hmang a ni ding thu hrilin, hi hmun a hin Recording le Music iengkim suktuo a, in man tak tak a hung thaw thei a la ni ding thu hai an hril a. Hi huna thuhriltu hai chun hnam sunga pawl tum tum hai inthlawptuo a tul zie hai uor takin an hril a, thangthar hlasaktuhai chu tawng thluk le lamrik dan thu ah thang la nasa ding le lemchang (music video) chu uluk nawk zuola thaw ding le mipui tieng khawma hnam sunga album siemtuhai chu suk hmasawn dan ding ngaituona lungril put a pawimaw zie hai uor takin an hril.

HAA Ex-President Pu Suozalien chun Pu joseph Lalrothang President, HI GHQ in HAA chu a tul ang anga HI in hmatienga a thlawp pei ding thu a hrilna thu ah lawmum HAA in a ti thu a hril.

HAA chun hi huna hin Chawimawina hieng hai kuoma hin an hlan. Pu H. Samson (Kum 6 sunga Adviser, HAA),  HAA Member Lelte Chibil Award lo dawngtu; 2nd Runner Up, Mizo Idol le Zomi Idol, Sinlung Star, HSA Platinum Star a hai nina lo hautu, Hmar laia Audio Cassette siem rawn tak kuomah Chawimawina Thuziek inhlan an ni bawk. Chuonghai chu – Tv. Lalsanglien Zote, Pi Lalruotmoi,  Pi Monica Lalhlimpui, Tv. John L.  Varte, Nk. Emma L. Pachuau, Nk. Nienglawmkim, Nk. Gladys Lalparzo Sanate,  Nk. Christina Shakum, Nk. Lawmnakim Hrangate, Nk. Lalengvari Sinate hai an nih.

Hi huna hin Hmar hlasaktu inlar tak tak laia mi Nk. Gloria Khawlhring, Nk. Christina Shakum, Nk. Joslyn Infimate, Nk. Rotinkhawl, Pu Ramhluolien Khawbung, Tv. John L. Varte le Nk. Emma Pachuau haiin hla mawi tak takin mipui fekhawm hai an in awi a, hun hlimum tak le hlawtling taka hmang a nih. Election nei zo a ni hnungin zantieng hunah thlaithleng awtlang a nih.

HAA Thuoitu thar ding Hmar Inpui President le Gen. Secy., hai inrawinaa nei a ni a. Hienghai hi thlang an nih. HAA (2016 – 2018) President Pu Lalvullien (Rengkai);  Vice-President Pu Lalsuong Famhoite; Secy. Tv. Joseph M. Pakhuongte; Asst. Secy., Tv. John L. Varte; Fin. Secy., Nk. Priscilla Lalliensing; Treasurer Edith C. Rohlupui le Info. Secy., - Emmanuel Lalthalien hai an nih. Charge inhlanna chu an hmatienga nei a ni ding thu HAA thuoitu haia inthawk ei dawng. Thlang thar a um hai hi Rev. & Dr. Lalhmuoklien (HCLF) in tawngtai pekna a nei a nih.


LRS Puruolte | Photo: Alan Famhoite

Post a Comment

Powered by Blogger.