Virthli: Hi Virthli (Online News Portal) hmingin inpawlpuina nei che kan nuom a, hun I mi pek thei ding am?
U Duat: Thei e ah, ka lawm taluo.

Virthli: Anle zuk tan chawt el inla, a hmasataka dingin I hming tha I mi hril thei ding am?
U Duat: Ka hming tha chu Lalruotthieng a na, Bawite Changsan tiin an mi ko hlak.

Virthli: In khuo le in sungkuo chanchin tlawm azawng I mi hril thei ding am?
U Duat: Kan khuo chu Boromuolkoi a na, buoia inthawk khan Vengthar, Kolasib, Mizoram ah khan khawsa lem tah. Ka pa hming chu Zohauthang Changsan a na, ka nu chu Khuolzing a nih. Ka pa hi JB School Headmaster pension niin, kei hi kan unau pariet (8) hai laia a naupangtak ka nih. Ka kum zat chu hril dal ka ta, Febuary 6 a pieng ka nih hehe...

Virthli: U Duat hla I sakpuipa hi tum ani I mi hril thei ding am?
U Duat: U Duat hla ka sakpuipa hi ka U Manasie Lalramsiem a nih a, U Duat hla khawm hi ama phuok ani nghe nghe.

Virthli: Tulai tak hin ieng sin am I thaw a? I hlasak tan hun I mi hril thei ding am?
U Duat: Tulai tak chu sinthaw hranpa ka nei nawh. Kum 7 mi vel ka niin ka U hai leh Boromuolkoi Biekin ah kan sak a, chu chu ka sak phutna niin ka hriet.  Mizoram tieng kan um hnung hin Sunday School a dam ka sak zeu zeu hlak a, U Duat hla hi nikum hmasaka ka U le kan sak a nih.

Virthli: U Duat hla hi hmar tawnga “Duot” anthawka laksuok nilo, “Dward” as “Edward” ti anga hril dam a um a, hi hi thudik ani am? A hla hung pieng dan hi i mi hril thei ding am?
U Duat: Ka hril ta ang khan U Duat hla hi ka U phuok a na, a hla hung suok dan ama hril dan chun hieng ang hi a nih: “Ka D leh hlim taka kan leng lai, lengna tlang an dang leiin inthe a tul tah a. Nunghak tlangval in hmangaina kara um rawp hlak, abikin kar dana umhai ta di’n, beiseitu le D hlui hai dam an lo um ve zing bawk leh, intawng nawk hun ka nghakhla em em hlak a. A hla thu in a hril angin, zing, sun le zan inzawmin ieng dang ka ngaituo thei naw ani tak. Chuong hun laia ka tadinga hnemtu umsun chu ka ngai em em in ‘palai sms’ a mi hung thawn hlak le hlim taka kan inpawm nawk hun ding- “Te ka hmangai che”... “U Duat kei khawmin ka hmangai zing che” tih a biethu kan hril nawk ding hun ka suongtuona chu a nih.

Tawite a hril ding chun, ka khawsawt lungleng zie hla in ka ziek dawk a nih. U Duat hi ami ko dan a na, Te ti hi keiin ka ko dan a nih”

Virthli: U Duat hla hi Music Video dam siem in tum am? Album siem ding hin hmalakna dam in lo nei ta hlak am?
U Duat: U Duat hla hi chu Video khawm kan siem tah a, Album chu Pathien thu thu ani el, ka hril thei ta nawh.

Virthli: U Duat hla hin tulai chu hmar khawvel a deng suok tah in, ei fena tieng tieng mi ngainat le ngainuom a hlaw a, hi hla in siem ding lai khan hienga hit ding hin ringna in nei am?
U Duat: U Duat hla hi ka U phuok le kan pahni a kan sak a na, hienga mipui ngainat ding hin chu ringna ka nei nawh. Mipui hriet dinga sak dawk hi kan thiltum tak khawm a ni nawh a; Nuhmei le pasalin sak ei ta nal a ti maw kan ti leiin U Deborah hai Studio ah kan record mei mei a na, chuong lawma mipui ngainat dam a lo hlaw ani chun an chungah lawmthu ka hril.

Virthli: U Duat hi 55th HSA General Conference suk muktu tak a nih an tih a, hi le inzawm hin nang a tieng ieng ang am reaction a um?
U Duat: Chuonga min an milo ngaihlu chu ropui ka ti hle, ka phu bak a nih.

Virthli: Hi hla nilo hla dang hmun dangah dam sakna in lo nei ta hlak am? Tuta HSA General Conference nilo, function danga dam fielna in lo dawng ta hlak am?
U Duat: Hmun dangah chu sakna ka la nei ngai nawh. October 30, 2015 khan Auditorium, Haflong ah HSA Freshers’ Meet ah ka sak a, hi hi U Duat hla mipui laia ka sak tanna ani bawk.

Virthli: Nangni hi i U Deborah Remsangpui ni leh hlami deu niin in inlang a, i pa khawm hlaphuok thiem niin an hril bawk a, i pa chanchin hi tlawm azawng hriet nuom a um baka?
U Duat: Aw, thei e, ka pa hin 1968 a’nthawk khan love song a phuok tan a, hla phuok tamtak a nei laia 2 chu Lenruol Hlabu ah a chuong ve. Chuong hai chu ‘Singkhuol D’ le ‘Hlim lai ni parang vul nawk sien’ ti hai an nih. A piengthar hnung hin hla tamtak a phuok hai a suok ta nawh a, Gospel hla khawm tamtak a phuok veh a, chuong hai laia anlar zuol deu hai chu ‘Sandamna Campaign a um ta nawh’, ‘Isu I ram i tlung pha mi hrie zing rawh’, ‘A thiem thu hril ve lo’ le ‘Chanchintha hi’ ti hai hi an nih.

Virthli: Hlasak hi an thaw chiin i hriet ve tho am? Eini Hmar hnam sunga Album siem ei tlawm deu deu hi ieng lei am ni dingin i ring a?
U Duat: Hlasak hi chu kan hnikna ani bawk leiin thaw chi tak niin ka hriet. Hmatieng pei ah hi neka mawi le tha lemin Hmar nauhai hin hma la nawk zuol inla ka nuom. Hlasak dan le thu lam kawngah hin fimkhur inla midang a changkang lem hai hi mani sengah chona in hmang inla, chu huna chu midang hai phak le entawn tlak ei ni ngei ka beisei. Ei hnam sunga Album siem ei tlawmna san hi chu hril ding taluo ka hriet nawh, ei lan hnik tawk naw lei khawm ni tih. Chubakah, marketting that tawk naw lei khawm ani el thei.

Virthli: Hlasak hi fak zawngna tlak niin i hriet am? Chuong ang ding chun ngaituona dam i lo nei ta hlak am?
U Duat: Hlasaka fak zawng hi chu ka lo tum hranpa ngai naw a chu, tumru le taima taka thawtu tading chun fak zawngna a hmang thei ani chu ringna ka nei tho.

Virthli: I mihriem ngaisang zawng i mi hril thei ding am?
U Duat: Lekhathiem hi ka ngaisang zawng tak an nih. Lekha nuom anga inchuk theilo ka ni leiin, lekhathiem le inchukna insangtak tak phak hai hi ka ngaisang tak an nih.

Virthli: Hlasak thiem hai lai hin ngaisang bik deu dam i nei am?
U Duat: Hlasak thiem hai lai chu TBC Zaithanpuia hi ka ngaisang tak a nih. Asanchu, ama hi a mizie le nungchang a tha a, a fel bawk bakah, mani hlasaka cheng mi le mi chapo ani naw bawk. Ama hi mihai mithmua khawm a nun fel taka hmang hlak mi ani bawk.

Virthli: Ana hieng lawma hlasak thiem le hmeltha hi, i hme du zawng dam hriet nuom a um bak a?
U Duat: Ka hme du zawng chu Zawngta, Khanghmuk le Thinmgthupui a nih. Chun, dal hi ka du hle bawk.

Virthli: Love Song/Hla lenglawng sak hi ei Kristienna leh inkalna umin i hriet am?
U Duat: Taksa khawvela la cham ei ni leiin a rem naw na ka hriet hranpa nawh eeee.... Mi thenkhat chun an rem naw angin an ngai hlaka chu, mani hringnun le ngaidan chu mani a innghat ah ka ngai hlak. A siet zawng le ani naw zawnga lak nuom chun lak theina ding tamtak um a ta, amiruokchu, a hmangtu izir lem niin ka ngai.

Virthli: Zuk indawn chawt el inla, Vacancy a la um am? Hmar val ngei i ti thei ding am?
U Duat: Vacancy chu um eeee... hehehe... Khuonu remruotna ah innghat lem a tih, duthusama chu hmar val ngei nisien ka tih.

Virthli: Anle i pasal dit zawng dam hriet nuom a um baka?
U Duat: Mi ringum, mani a intodel thei, mi taima le tlawmngai thei mi nisien. Chun, taksa le thlaraua piengtharna indiktak nei ni bawk sien hmmmmm...

Virthli: Hmar thalai le hi interview tiemtu hai kuomah thucha hril nuom i nei am?
U Duat: Daikil kara khawsa in rethei em em a hun kan hmang lai zingin, buoina leiin Mizoram Kolasib belin Bawkte khaw in kan khawsa a. Chu hmuna inthawk chun mi hai phak lawm lawmin um thei naw lang khawm, hla hai sakin ka thei tawpin hma ka lak veh a. Chuong lai zing chun, ka phu bak bakin ei hnam sungah mihai hlutsakna ka dawng hi a ropui ka tih a, Virthli fethleng hin lawmthu ka hril tak meu a nih. Chun, ieng ieng khawm thaw inla, love song sak le Gospel hla sak khawm ni inla, hmar haiin ei ngai ropui ding taka ka ngai chu ami hmangaitu ei Pathien hi a nih. Ama hi theinghil lovin, iengkimah Ama ah innghat in ei nun khawm Ama dit danin inhlan inla ka nuom tak.

Virthli: I hun hlutak i mi pek leiin ka lawm hle U Duat... eh Te! Hehe
U Duat: Kei khawm ka lawm taluo, Virthli dam zing raw seh!

BONUS: U DUAT HLA

1. Ei vangkhuo sum tuol a, 
Hmangai biethu inhril lai khan;
D i zun phur i duotlai val hi,
A chau zo tah mi hung hnem di'n;
Palai SMS bek hung tir la,
Ka hmangai che, ka ngai ngawi2 che;
Tiin i zun ngai hi mi hung hnem rawh.

Kara hmelma an tam si,
Lengna thang an dang bawk si;
Hritthiem an tak ngei eh maw, khuonu remruot hi,
Khuonu'n mi thuoi pei sien,
Darang intawng nawk ei ta, 
Hmangai bithu in hrilin;
'Te ka hmangei che' 
'U Duat kei khawmin ka hmangai zing che' tiin duot takin in pawm nawk ei tih.

2. Sawrthla khawm van zawla,
Hmangai biethu hriltu ding khawm nei lovin;
Mariek te a varin khawtin a elvar,
Puitu ding khawm a nei ngai chuong nawh tiin kan hnem;
Sienkhawm, an mi hnem ngai si nawh,
Chung siar le van dumpawl le nang ngai an sukzuol D ka ngai em che

3. Sawrthla van kai ruolin,
Mitsim tumin ka laikhum rieng ka bel;
Sienkhawm, ka silpuon le laikhum chun,
Nang ngai an suk zuol,
Zan mitsim zai reng ka rel naw nang ngaiin;
Zieng bawar zaithiem, sirva lungmawl hramnhiem hai leh ni suok sen ruoi,
Hnuoia ka D tiin kan ko hlak che dawntu um lovin.





Post a Comment

Powered by Blogger.