~ H.Zaneisang.

Upahai tawng takin tuhma ka tlerâwl/tlangvâl ve lai khan chu, upa, lua kêlsam to tahhaiin an zakuo hma tieng inchen lo tuta kil a, insu tuta khawlaia an invâk dût dût ka hmu châng khan ka lo nuisaw deu hlak a. Kei ve hi, ieng  ni bar lo, nu le pa’n inrim taka kut sinthawa an sum lamin lekha an min chûktir ve hlak lai khan, inthlâ dânah ka pu ka pi dinghai le, ka chipuihai tia an ina ka lêng lût châng, ka hang inhril ngiel khawma an mi hriet chieng thei duk dak raknaw châng dâm khan, “An mi huphur a, an mi hriet nuom naw a ni hi,” ti dâmin ka suongtuo hlak. Mi hre ding âwma ka ngai le beiseihai kuomah ka hming le ka nu le pa hming le kan chêngna khuo chena vawi khat nêka tam ka hril hnung khawm a; kan in hmu nâwk chânga an mi hriet naw nâwk tlat el hlak dâm kha, an mi hriet nuom naw luiah ka lo ngai hlak a.

Tu ruok hin chu, kum 70 ka hei liem ve tan dêk dêk a; hrisêl ver vawr ni lang chu hrietna khawm tha le fîm tak la ni ding ni âwm tak hi, ka nikhuo naw bêk bêk el tâk leiin i kuoma ngaidam inhni a tûl an tah hi. Vawi khat nêka tam chu i hming le i nu le pa hming khawm i mi hril ta ngei kha tie maw. Amiruokchu, ei inhmu zâta mi chibai a, i mi biek lawm lawm châng khawm, ngaisak naw âwm tak chea inthepui vat vat che nuoma kan herhmang hlakna san khawm, ‘Tû’m in ta kha ?’ ti zozai kha kan thlahrung lei a nih uo. Mi ngaidam le, tu hnung chu, ‘Iemana i hming kha?’ tia chanhai taka kan dawn che nghâk kher lovin, ‘Chu mi pa, chu minu chu ka nih,’ ti vat vat hlak la chu, ka phur i min zâng nîng a tih.

Kum khat lai khan Mizorama unau, Chanchinbu enkawltu (Editor) pakhatin ama   chanchin hienga a ziek hi ka tiem a. A hming chu hril dâ’l ei ta, hieng hin a hril an nâwm. “Tum khat chu Newspaper Editors Conference-ah ka chanchinbu enkawl mêk Asstt Editor leh kan thang a. Report-na le thuhrilna hun ka hang nei mêk lai chun, ka Chanchinbu hming chu ka theinghil ta tlat el a. Thaw ngaina um ta lo chu. Ka Asstt Editor kuoma chun kan Newspaper hming chu kan dawn tah a. Member danghai chu an innui dar dar a. Meeting zoa tuol kan hei suok chu, conference-a thang ve unau pakhat hin, ‘Pu, i Chanchinbu hming kha i Assistant kha i hei indawn a; i theinghil tak tak am a ni, i fiemthu mei mei ?’ tia a mi hung indawn chun, kei chun, theinghil tak tak rêk ngei naw ning am aw. Tum khat lem chu, kan nu hming hi ke hei theinghil terêng a ! Ka ruolnu’n (ka nuhmeiin) kan tuol zâwl a phît a, a bulah  ngîra ka lo thlîr mêk lai ka ruolhai mi pathum hi an hung a. Kan hang inbiek mêk lai chun anni laia pakhat chun, ‘Ruola, innu hming hi iem an ta kha ?’ a hung ti thut el a.
Kei chun zuk hril el thei ta lo chun ka ruolnu kuoma chun, ‘Nu-i, iem an ta kha i hming kha ?’ ka hang ti zet chu, a lungsen nasa, a mi liek êr,” tia ama chanchin a ziek ka tiem lai chun, Lalremkim Pi hming chu la theinghil ve êm naw lang khawm, chuong ang nîrhmun chu ka hnai ve hle an tah âwm de ? ti zâwna chu ka lungrilah a lien hle.

Tuhmâ deu khan chu, ‘Sam chu a vâr hun hunah, a ni dân ding hrima Pathien siem chu, sukdum ve love,’ ti bung le chângah nghet taka ngîr tum pa kei ve bawk hi, nunghâkhaiin an mi hmutar taluot ding inlauin ka ditdân le nuomdâna khawm ka ngîr nghet ngam ta naw chu a ni hi. Kei le kei châu kan ti châng a tam. An lang dâna chu, sam khawm la dum tha hlep hlawp, hrietna tha tak la nei ding âwm khawm chun i mi hmuin i mi ngai a ni el thei. Chuong ang ngîrhmuna la ngîr niâwma i ngaipa hin ei inhmu châng, “Tû’m in ta kha ? Iem a nih a i hming kha,” ka ti châng khawm, zân tina kawmawl kan zâwnpuinu hming bâk chu hriet bel tak tak ka nei tâk nawzie hrein, hrietthiemna bâwmah mi lo thlâk tahlak dingin ka hung ngên che a nih.

Kohran ram le insawrkârna a khawm, kohran hotuhaiin ditsak taka Nilaizân Pathien thu hrilna hun an mi pêk a, ka lungril le ka ngaituonaah, Potiphar nuhmeiin ama zâlpui dinga a thlêmpa kha Joseph a nih ti hre ve bawk lang khawm, ka bauvin, ‘Potiphar nuhmei chun ama zâlpui dingin Abraham chu a thlêm a,’ ka ti a ni khawm a, mi hrethiem la, mihaiin an mi nuisan a ni khawma nang chun, “Abraham a ti kha  Joseph a tina a nih,” ti’n ngaithlatuhai lai ka thlâ hau tlat hlak rawh aw.

Ka tleirâwl suoktîr lai khan chu, Pathien lunginsietna zâra Bible-in ‘Mihriem dam chen’ kum 70 le a chungtieng dam chinhaiin, an zakuo inchen lo tuta an kil ka hmu châng ka nui an za deu hlak kha a nih a. Tu ruok hin chu, zakuo hmakil indik taka kil intak zie a takin ka hung hriet tan ve mêk tah a. Chuongchu ka ngîrhmun a lo ni ve tâk leiin, zakuo hmakil inchen lo tuta kila tuol ka suok châng khawm, i ruolhaiin nuizat siemnâ’n an mi lo hmangpal a ni khawm a; nang ruok chun, ‘Pathien zâra ama dam chen hi ka dam a ni chun, a chuonga liem ka ni bîk da el thei a nih’ ti lungrila pai rân pumin; thlatuhai inthlâdânah in unauna neinaw inla khawm, ka thla hau tlat hlak rawh a. A nuisaw zâwng le nêka upahai inzânaw zâwng lem chun tawng mawinaw mi chekhum ngai thak naw rawh; Pathien lungsenna i chungah inling pal hlau rawi a tih.

Hril le ziek ding a va tam deh aw ! Ka hril nuom le  inchâ che ka nuomhai tum khatah ka hrilin ka ziek zo sêng naw ding a ni leiin dittâwk hei tum tâng ei ta. Hi thu hi ka ziek mêk lai, ka chêngna khuo Rengkaiah mithi râl ding a um leiin ka va râl a. Chutaka chun Pa valaihaiin an ruolpa inthlânain Pu (L) Buonglienkung hla phuok, ‘Aw A Van Hawi Awm Ngei’ ti hla an sak bâk ah, mipuiin hun tâwpah chu hla vêk chu kan sak nâwk a. Pu Buonglienkûng zet hi chu hla phuok a va thiem ngei aw ! tia ka ngaituo mêk lai, châng 2-na tlar thumna, “Vân hmuna rochan dinghai ka hang suikir chun,” ti kan hang sak tlung chun ka lungrilah, ‘Hi hla a phuok lai hin chu ngaituona le suongtuona ngawt naw chun vân hmun a la hmu bîk naw leiin, suikîr  tawngbau hmangna ding chu an naw hi teh aw ! Mihriem hin a taka ei chang or hmutah thilhai hi suikîr le ngaituo kîr châng ei nei hlak a. Hi hla siemtu (L) Pu Buonglienkung khawm hin suikîr lovin, a hang ngaituo a, a hang dâwn lâwk a nih ti thu’n ka lungril a hluosip leiin, a châng danghai khawm chu ka sak hleithei ta nawh a.

Chuong ka ngaituona khawm chu, keima tâwk tâwkah tawng kalhmang indika Bible le ei hla thuhai hi ziek inla ka ti lei chau a nih. Ama phuoktu Pu Buonglienkûngin chatuon ram a min lawisan tâk leiin, mihriem tawng taka hril ding chun, ‘Tuhin chu a hnuoi hringnun kha suikîrin, dâwnkîr ta rawi nawnîm maw?’ Ama um ta naw sien khawm, hi ei hla zuk hril châng 2-na tlar 3-naa ‘suikîr’ thumal a hmang hi chu, ‘kîr’ thumal hmang lova thlâk ni thei sien chu aw’ ei ti a ni chu.

Hieng po poa khawm hin, thil tha le indik lem, hla thu tluong le indik lem ditna leia ka zuk hril a nih a. Ka ngaidân a lo indik naw pal a ni chun mi hrethiemin mi ngaidam rawh aw. Nang tiemtu, lampui châng khatah ei intuok châng, hrenaw che niâwm taka ka pêl ngau ngau che a ni khawm a; mani zakuo takngiel khawm fumfea kil dik theinaw vâl ka lo ni ve tah, ti hrein, hrietthiemna bâwmah mi thlâkin mi ngaidam hlak rawh aw.


Dated Rengkai the 13th January, 2016

Post a Comment

Powered by Blogger.