Ringnain Abraham chu kova a um lai khan a pawm tah a...a fena ding tieng khawm hre lovin. Hebrai 11:8
September 4, 1985 khan Singapore Changi International airport ah hriet ngai der lo le la hmu ngailo Singapore nunghak pahni in ka ruolpa Arthur Charles leh an mi lo tuok tlat el a! Kan hming lekha in (placard) anlo ziek kuou bawk a! Kan thla a phang ruk deu ve ve a! Pan lo theilo ani leiin insuk huoisen pum chun kan hei pan ta hram a. India rama kan ruolpa Siddhartha Sahu, tienlaia Subodh Sahu (Revival thuoitu hmingthang hlak) a tupa in a ruka plan ami lo siemkhum kha alo ni zing el a! Kan lawm ta emem a. Nunghak pakhat nu hming chu Elizabeth a ni a, India ram kawlhrawngna hmun tak Bihar a missionary sin thawlai a lo ni nghe nghe. Nunghak dang pakhat nu chu company a thawk Eudro Lim ana, Toyota car in ami phur a, Toyota car AC a ka chuongna hmasa tak ani nghe nghe! Lampui kan huphur emem chu inhawi takin insuk mikhuol ngai lovin hun kan hmang tah a. Elizabeth chun “India ram ah Ka ha zaiga?” (Khawlam I fe ding?) ti hi in inbiek tanna tlangpui ani a, Singapore ah chu tu kuoma khawm “Khawlam I fe ding? ti ngai naw ro. Singapore mihai chu tukhawm sin thaw ding pawimaw nei lovin an invak mei mei ngai nawh” a tih a! Ei ni rawi chu patling fe fe khawm khawlai ah ei invak dul dul a, “Khaw tiem?”ei hang ti dek dek a, “Ka hriet chuong le! Kan invak mei mei”, inphalam der lovin ei ti nawk hlak! Thawding bo, lungril ruok, awl thawveng taluo hi Satan lawmzawng tak, thuoi hmang awl tak ei ni nuom vieu hlak a nih.
Abraham le Pathien inkar: Pathienin Abram a kona kha a chieng emem a, ringhlel ding iengkhawm a um nawh. A maksan ding zat le a dawng ding zat chen kim takin a hril vawng a. A fena ding le a tlungna ding hmun ruok kha chu chiengtakin a hril der nawh. In tir dawk ding si chun a chiengkuong naw deu chu a hawi! Fena ding chiengtaka hre bawk lova inphur dawk tawp el khawm chu a thu awi thlak hle el. A tirtu Pa a ringzo hle tina a nih. Eini rawi ni inla chu hril ding hau hleng ei tih! “Fena ding hmun le hmang khawm chiengtaka in hril um lova, suok chawt el chu a patling hna nawh” dam ti’ng ei ta. “Inbiekna chiengkuonglo, belchieng dawl lo a nih. A khaw tieng am pan hrim hrim ka ta?” dam ting ei ta. Pathien hnung ei zui taktak phat chu “One day at a time”, ni tin in a bat bata ami thuoi chang a um hlak a nih. Pathien hi ‘kutzie entu’ ang deua hmang ei tum rawp hi an dik naw a nih. A detail a khan ei buoi rawp hlak. Hlaw zat ding, In hluo ding, car am bike am, pension a tha am, children allowance a um am, naupang chawmna a um dim? Ti vela khan ei buoi rawp hlak! Thenkhat chu ‘maksan ding’ a ti hai maksan loa ‘hmu ding a ti po’ lo hisap nak nak pawl khawm um bawk ei tih! Pathien hlaka ama ringzo phawt le a thupekhai zawm phawt dinga ami ko ani si a. A thu ei awi naw hi Ama ei ringzo nawna lei ani tak. Ei insuk changkang taluo leiin ei lampui ding Pathien buotsai ding hai popo khawm advance a hriet lawk ei nuom vawng hlak hi ei hringna sukbuoitu a ni rawp. Hi lei hin ei Kristien hringnun hi inhawi eiti na chin le hmuphak chin chau ah khal ei tum hlak. Ei nuom tawkna chin chau le ei peina chin chau ah ei zui hlak leiin, Mara hmun ah ei cheng zing hlak a ni hi. Abram ruok chun Pathien in a ko ani ti a hriet a, thutiem a pek ani ti khawm a hriet. Abraham in, “a hmatienga thil tlung ding popo chu Lalpa kuomah an nghat vawng a nih” David McCasland chun a lo tih. Pathien thupek zawm muolsuozo hi ei ta dinga damna, malsawmna, ringna suk nghetna, huoisenna le nun hlimna le lawmna a ni a, mi tadinga malsawmna khawm ani hlak. Abraham anga Lalpa ringa hmatieng huoisen taka ringna a ei pensuok hi a tul hle. Kumthar 2016 ei hang chuongkai mek hin Abraham anga ei hmatieng thil ding popo ah Pathien ringzova, hmasuon pei dingin ei in fiel tak meu a nih. Chuchu thlarau inthanglienna le ringna a hratna bul a ni hlak
Pathien zui le Huoisenna: Chuong anga Pathien ringngam mihai chun ‘iengkim chan’ an huom hlak. Abraham angin an thil nei popo, an chengna ram le khuo inhawi le an ngai emem an sung le kuo hai, sum le pai le an hringna chenin Lalpa ring zona leiin an lo chan hlak a nih. Mosie’n ‘Aigupta ram hausakna popo le lalna’ a maksan tawp a, Isu thuoihruoi haiin an fak zawngna ‘Len’ an maksan tawp bawk a nih. Adoniram Judson (17881850), Burma ramngawpui a missionary huoisen, retheina tawpkhawk, a sunghai chen hringna chan, le rinumna hril ruollo paltlang pa kha khawvel mithiem tawpkhawk laia thang phak dinga ring hiel a nih. Kum thum ani chauin lekha a ziekin a tiem thei a, kum 12 ani chun Greek tawng an let thei vawng a, kum 16 ani chun university a kai hman tah a nih. Kum 19 ani in university a graduate hman. Pathien kona a ringzo lei le an pekna leiin Burma ram ah a nuhmei le nau pahni chanin retheina rapthlaktak le natna khirtak tuokin chanchintha a hang chavaipui a nih. Burma rama Christian 8% hai khi Judson a sulhnung an ni khi! India ram nekin Christian percentage a let thum lain an sang lem a nih. Hmingthat an lau leiin, Lawng captain kuoma ah “Bay of Bengal tuipui chungah ka thi pha leh mi dehawn ro, hnuoi ah lungdaw ka nei nawna dingin” a ti a. A hnina angin an ram a pan tieng Bay of Bengal tuipui ah a damzo tanaw leiin a ruong ‘dehawn’ a nih. A kotu ah a chieng leiin, an thawk dawk tawp el a nih. A hmun le a sina chieng hmasa ei tum a, a Kotu a chieng phawt ding ei nih. Judson chun Abraham angin “Hmu theilo chu” a hmu lei a nih. “Hmu theia innghat lovin, hmuthei lovah an nghat lem a nih”. Lalpa kona an hriet a, an hmatieng a dingin an ringzo a, an hnuoi tieng taksa awngrawp tiel tiel sienkhawm, an sin thawna ra hmuthei tamtak a um zing a nih. “Ra tamtak insuo dinga” tir an nina an sukdik leiin mihai ta dinga sandmana le mawlsawmna an nih. Eini rawi chu Pathien tadinga ‘chan’ hi ei inlau taluo hlak leiin ei ‘chan’ zing a! Thlarau ram ah chu ‘a chan ngamin an hmu a, hum tumtu haiin an chan zing a nih!’
Pathien le ei ni rawi: Mani tading chaua mawlsawmna zawngtu eini chun lawm thei ngainaw mani. Lalpa tadinga hring le a thupek zawm, le nitin nun a Ama ringzo hi ‘hnena nun, Lalpa chengpui nun ram’ a nih. Ei Pathien ram khal tum dan ngun taka ka en chang hin nasatakin ka lungngai rawp hlak. Pathien kona chieng ve lo hai dam, Pathien rama chan inlau hai dam, an inpekna taktak hmu ding um derlo hai dam, an tisa mi nina chiengkuou a inlang zing hai dam, khawvel sum du emem hai dam, hmu theilo hmu velo hai damin huoisen emem a, inphalamna nei der lova, Pathienin a ‘peihawnsa khawvel varna le hnuoi ram varna’ hmanga Pathien kohran an mi khalpui el hi a thlaphang thlak hle a nih. Pathien thupek awitu hai chu an fe suok kher naw khawmin mi danghai hringna chunga entawn ding ei hmu hlak. Pathien thupek hi dilsut taluoa zawm tum hi malsawmna hnar ani kher nawh. A kona a chieng kha a hun tawk! I fena ding hmun nekin a kotu che ah chieng hmasa rawh! Unau, nang I fena ding chin I hriet dem?
HT Sunday Sermon: Jan. 31, 2016
