Apollo veng lai thil danglam takel a tlung
CCPUR: Apollo Veng, Central Lamka­ah zani hmasa (Jan.29, 2016,12PM vel)  sun lai khan thil danglam takel a tlung a, Mr Kamchinmang chengna ina chun mak le danglam takin hmun hran hranah a ruolin mei a hung chawk a, hmun pakhata mi an thelmit pha hmun dangah a chawk nawk pei niin mita hmutu hai chun an hril. Hmun hran hrana a kang hai an thelmit zoin an blanket a hung kang a, hi zo hin an Ekin/ latrine a hung kang nawk a, khawsung mi han inrang takin an thelmit a, hi zo hin thil dang khawm a la hung kang nawk. Mak danglam an ti leiin Central Lamka EBC Paastor le Upa hai va fein tawngtaina an va nei pek nia hril a nih.


Hieng laizing hin zani (Jan. 30, 2016) zan khan hiengang meichawk hi a hung um tum nawk leiin hi In neitu hai hmangruo le thuomhnaw hai chu mipuiin Central Lamka, YPA Hall, Beaulahlane hmuna an sawmlut pek vawng. Thenkhat chun hi thil hi thlahrang/bad spirit thilthaw niin an hril a, a san chieng tak ruok chu hrietna ei nei nawh.

State Level Seminar on Hill Areas tan
CCPUR: Rayburn College, New Lamka Auditorium­ah zani 10:00AM khan ‘2­day State Level Seminar on ‘Development Experiences in the Hill Areas of Manipur: Problems and Prospects’ tan a nih. Hi huna hin Prof. Dr W. Vishwanath Singh, Registrar, Manipur University khuollienin a thang a, Dr Khen P. Tombing, Principal Rayburn College le N.K. Tombing, Secretary, Rayburn College hai functional president le Guest of honor in an thang a, Special Guest in Prof Dr N. Mohendro Singh, former Member, Steering Committee NER Vision, 2020, DoNER, Govt of India le Dr AK Sunderkumar Singh, former Principal, Modern College, Imphal, Moirang College, Moirang le tuta NAAC ASSESSOR hai an thang.

Technical Session hunah Prof N.Mohendro Singh inrawinain Dr Thathang Vaiphei; David L.Lungtau; Dr Damodar Nepram, Dr N.Somorendro; Dr Sheikhohao Kipgen le Dr Thienkhogin Haokip hai resource persona thangin paper an present. February 1, 2016, 10AM Technical Session hunah Prof Dr N.Rajmohan Singh; RK Dilip Singh; K.Vungzamawi; Pumsiankim; Dr Grace Laltlinzo le Dr Immanuel Zarzosang Varte han paper present an tih.

Simte Zilchil Bu 
CCPUR: Simte Literature Society (SLS) in an siem “Simte Zilchil Bu” hawngna le workshop zani 8AM khan Simte Inn, Simveng­ah nei a nih. Simte Zilchill Bu hi B. Dongzalian Simte, President,STC GHQ in a hawng. Chun, zani 10:30AM khan SLS huoihawtnain NTBC Simveng Sunday School building­ah ‘Simte Haam Gelhdan” ti thupui hmangin Workshop nei a ni bawk.

Teaching Workshop zo
CCPUR: Churachandpur District Private School Association (CDPSA) huoihawtnaa  Young Learners  School, Zenhang Lamka­ah Private School teachers hai ta dinga ni 4 sung English Language Teaching Workshop neia um chu zanikhan zo a nitah. Workshop huna hin Shabina N. Omar le Fr Paul Pudussery hai resource person in an thang.

Anti ­Leprosy Fortnight CMO in a hawng
CCPUR:  Zani 11:00AM khan  District Leprosy Office­ah Mahatma Gandhi thi champha le inzawmin   February 13, 2016 chen aw ding Anti Leprosy Fortnight chu Dr Thangchinkhup Guite, CMO, CCPur in a hawng. Hi huna hin Dr Kimneihlam, Dist. Leprosy Officer in Anti­Leprosy Forthnight hmang a nina san le hmang dan ding hai hrilna a nei. Hi huna hin CMO inrawinain Mahatma Gandhi thlalakah par inhlanna an nei.

Anti Leprosy Forthnight hun sung hin Sagang PHC hnuoia Health Worker hai le ASHA Worker han Dist. Leprosy Office­ah Feb 1, 2016 in training nei an ta, Sagang PHC huop sunga khuo tum tum haiah Leprosy (phar) natna um le umnaw enfel an ta, ringhla Dist. Leprosy Officer kuoma inenkawl dinga refered ning an ta, Phar natna invawi an lo ni chun a thlawna enkawl an ni ding a nih.

ZC Consultative meeting nei
CCPUR: Zani 10:30AM khan Zomi Council (ZC) Consultative meeting nei a ni a, hi huna hin Zomi sunga tribe leaders, frontal organisation tum tuma thuoitu le inhnikna nei hai an thang. Consultative meeting huna hin Zomi Council chu Zomi Innpi ti ding; Zomi Council chu Federal System le Presidential Form a inphur ding; Frontal Organisation term bo hai election nei ding thu; ZC hmatienga hmalak dan ding; ZC Constitution; ZRO le ZC inkar chungthu; Zomi Namni Sub­Committee indin dan ding thu le thu pawimaw tum tum an hriltlang.

ZSP thuoitu thar han oath taking
CCPUR: Zani 11:00AM khan ZSP Study Centre­cum­Library, Zogal Hall, Zoveng­ah ZSP GHQ thuoitu thar ding hai oath taking  le tawngtaipekna hun hmang a nih. ZSP thuoitu thar hai hi Chief Election Commissioner T. Ginzamang in intiemkamna an neitir a, ZPCS Pastor Rev. Hangpi Manlun in tawngtaipekna a nei. Kum 2016­19 sunga ZSP thuoitu ding hai chu­ President Pu P. Nengkhosoi, Gen.Secretary Pu Chinkhenpau le Fin.­cum­Trearurer ­Ms Rose Hoineu hai an nih.

Feb. 3­5 sung training nei dingin an rel
CCPUR: Jan. 30, 2016, 11:00AM khan DC Office­a BRGF Resource Centre­ah National Deworming Day (NDD) le inzawmin DC/CCPur le Chairman Lunminthang Haokip, IAS inrawinain District Level Co­Ordination Committee  meeting nei a nih.  Hi huna hin February 3­5, 2016 inkar sungin Synod Hall le CMO Conference Hall haiah DI/AI of school; CDPOs; ICDS­a Supervisers; ASHA Facilitators, School Principal/ Headmaster/ Headmistress han training nei ding tiin an rel bakah  Feb. 10, 2016 in DC CCPur in Vimala Raina H/S ah National Deworming Day official in a hawng ding tiin an rel bawk.

Danin ka chunga ro a rel dan dan chu pawm ka tih: Herojit Singh
IMPHAL:  July 23, 2016 a Khwairamband bazar, Imphal a Ch. Sanjit kap h lumtu Manipur Police Head Constable Herojit Singh chun, ka chunga dan (Law Court) in ro a rel dan dan chu pawm ka tih. Tuuolthattu ka ni leiin mipuiin ka chunga tlung dinga an dit dan khawm pawm ka tih. That ka lo ni khawmin lawm takin pawm ka tih. Ka tlan hmang naw a, tlan hmang nawng ka tih. Kan biru bawk naw a, a mi ngainatu hai kuoma um ka nih. Venghimtu (Security guard) khawm ka dit nawh. Ka thil dit chu Manipur sawrkar, helpawlhai le mipui inrem tak le inthuruol taka an um tlang a, tukhawm titna nei der lova ralmuong taka an um tlang hi a nih tiin zanita Manipur Press Club, Imphal hmuna Chanchinbumihai an hmupui huna a hril.

Tuta hma deu khan Manipur Police Head Constable Th. Herojit Singh hin Ch. Sanjit kha an hotu, kha huna Additional SP, Imphal West le tuta SP, Imphal West ni lai mek Dr A.K. Jhalajit Order dungzuia a kap hlum niin Chanchinbumihai kuoma a lo puong ta a nih. Pawl tum tum chun hi thil tlunga mawphurtuhai chu dan anga hremna pe dingin an phut a nih. Zani khawm khan JD(U), Manipur President N. Tombi chun  hi case hi CBI  chauvin suizui lovin National Investigation Agency (NIA) khawm insuitir ni raw seh tiin ngenna a siem. BJP Manipur khawmin hi case chungthua hin Manipur CM le khang hun laia Home Minister O.Ibobi Singh inban ding le  Dr A.K. Jhalajit  Singh chu a sina inthawk suspend dingin an lo ngen ta bawk a nih. Ch. Sanjit kap hlum ni le hmun huop sunga hin naupai lai Rabina (23) khawm kap hlum sa a nih.

Mahatma Gandhi thi champha
IMPHAL: Zanikhan G.M. Hall, Imphal­a khawm Mahatma Gandhi thi champha vawi 68­na ursun taka inser a nih. Hi huna hin CM O.Ibobi Singh, Dy. CM Gaikhangam, Social welfare minister A.K. Mirabhai, Works minister Dr Kh. Ratan Kumar le sawrkar thawktuhai an thang tawl.

AR han helpawl 2 an man
IMPHAL: January 29, 2016 khan Assam Rifles han helpawl 2 an man. Hi ni hin 45­Assam Rifles han Pungdongbam, Imphal East District ah PLA cadre A. Binoy Singh (36) s/o A. Gana Singh of Lamlai Mayai Leikai an man a, Lamlai Police Station ah an peklut. Chun, hi ni ma hin Uyumpok Maning Leikai, Imphal East­ah KYKL cadre Pvt. A. Nanao @ Laibakcha (31) s/o Lungei of Uyumpok Maning Leikai an man a, Sagolmang Police Station­ah an peklut.

NECC Sports Award semna
IMPHAL: North Eastern Council Chairman’s (NECC) Sports Awards semna chu Feb. 8, 2016 khin NEDFI House, Guwahati hmuna zing dar 10 a inthawk sem ning a tih. India hmarsak biel mi, International le National Sports Meets a medal la hai chu hi huna thang dinga inhriettir an nih. Bus le Rel chuongman chu NEC in tum a ta, riekna le fakman hai ruok chu mani intum ding a nih tiin Director, Youth Affairs & Sports, Manipur chun a hril.

Motor eksiden­ah mi 1 thi, mi 17 an hliem
IMPHAL: Zani zingkar dar 9:30 vel khan Khwairamband Bazar area sunga Traffic Island bula Tata Magic innghat lai chu School Van pakhatin a baw a, Van driver a thi a, mi 17 an hliem. Hliemhai lai Traffic Police pakhat a thang a, a danghai chu student an nih. Student hliem hai laia pakhat chu a hliem inrik hle a hril a nih.

Feb. 1 a inthawk tiemchin um lo NHs bandh
IMPHAL: Kuki Students’ Organisation (KSO), General Headquarters le All Naga Studnts’ Association, Manipur (ANSAM) han Feb. 1, 2016 zanrila inthawk hun tiemchin um lovin National Highways, (NH­2 Dimapur­Moreh), NH­37(Imphal­Jiribam) le NH­150 (Jessami­Mizoram) bandh an thaw ding thu an puonglang. Hill Districts a Contract basis teachers, 2006 hai sin Jan. 21,2016 chena suknghet dingin state sawrkar an ngen a, sienkhawm an ngenna ngaisak a ninaw leia lungawilo le an thil ngen nawrnaa bandh hi thaw an tum niin KSO, General Headquarters le ANSAM thusuok chun a hril.

April­ Jan thla sungin Phar natna invawi 4
AIZAWL: Mizoram­a chun April, 2015­January, 2016 sung khan Phar natna invawi 4 hmusuok a nih tiin Mizoram Health Department official thusuok chun a hril. Phar natna invawi hmusuoka um hai laia 3 hai chu Lawngtlai district a mi le pakhat dang chu Lunglei district­a mi an nih.April, 2014­ March, 2015 inkar sung khan Lawngtlai, Lunglei le Saiha district haiah Phar natna invawi 11 hmusuok a ni tiin official hai chun an hril a, phar natna invawi hmusuoka um hai hi Chakma hnama mi an ni tawl a, Bangladesh­a phar natna invawi an sung haia inthawka an kaisawng ni dinga ring a nih tiin official thusuok chun a hril.

Zani hmasaa World Leprosy Day hmangnaah Dr Chawngthansiami chun, Mizoram­ah kum 1983 a inthawk January, 2016 chen khan phar (Leprosy) natna invawi 1,504 hmu an ni ta thu a hril a, hienghai laia 1,498 hai chu enkawl mek an nih tiin a hril.

N.Hojai chunga no­trust motion kansel
HAFLONG: NC Hills Autonomous  Council (NCHAC) Chairman  Subrata Thaosen an ban leiin zanita  Niranjan Hojai, CEM, NCHAC chunga ‘No Confidence Motion” nei dinga ti chu thul a nih.

Hieng laizing hin NCHAC a MACs 16 hai chu zani hmasaa Haflong hmuna Hmar Students’ Association (HSA) 55th General Assembly­a thangin, hi huna khuollien Assam Governor  PB Acharya inhmupuiin memorandum an pek tiin ei thu dawngna chun a hril. An memorandum a chun  NCHAC Protem Chairman ruot dingin an ngen a, Protem Chairman ding hin NCHAC Chairman hlui Ngamrothang Hmar, MAC hming an peklut bawk.

Budget session nei ding le inzawmin Feb. 4 in CCPA meeting a um ding
NEW DELHI: Parliament Budget Session hung um ding le inzawmin February 4, 2016 khin  Home Minister Rajnath Singh inrawinain Cabinet Committee on Parliamentary Affairs meeting um a tih. Hi huna hin Budget session nei tan hun ding sukfel an tih.

A tlangpuiin Parliament Budget Session hi kum tin February chawlkar thumna le chawlkar lina haia nei hlak a nih. Ni kuma Parliament session nei hun haia khan Opposition han rorelna an sukbuoi leia Bill pawimaw thenkhat pass thei lova a um leiin  tuta Budget session hung um dinga hin Goods and Services Tax (GST) le Real Estate  hai thangin bill pawimaw dang dang hai pass hman ngei a ni theina dingin sawrkar chun budget session hi tan inhmat dan a ngaituo a nih.

Parliamentary Affairs Minister M. Venkaiah Naidu chun GST le Real Estate Bill hai chungthuah January thla bul khan Congress President Sonia  Gandhi inhmupuiin hieng bill pahni haia sawrkar thlawp dingin a ngen bakah thlawp dinga an intiem chun sawrkarin Budget session tan inhmat a nuom thu a lo intlun ta a nih.

GST Bill hi PM Narendra Modi in nasa taka a hril uor ‘Make In India’ a dinga pawimaw em em, ramdang company tum tum hai India rama an hung lut nuom le hip theina dinga thil tul a ni a, Lok Sabha­ah passed ni ta sienkhawm Congress in thil pathum siemthat an ngiet leiin Congress inlalna (majority nina) Rajya Sabha­ah a lan tang zing a nih.

Mi 3 thi ding, mi 3 damsung lungin intang ding
KOLKATA: June 7, 2013 a College student, kum 21 mi le B.A. second Year inchuklai an suollui hrep hnunga thattua intum hai laia mi 3, Aminul Ali, Saiful Ali le Ansar Ali hai chu zanikhan Additional Session Judge Sanchita Sarkar in thi ding le midang 3, Imanul Islam, Aminul Islam le Bhola Naskar hai chu damsung lungin intang dingin thiemnaw an changtir.

Morter bomb sukpuok pal leiin BSF 2 an thi
JAIPUR: Rajasthan­a Jaisalmer distict a chun zanikhan 81mm morter bomb sukpuok pal leiin BSF personnel 2 an thi bakah  BSF personnel pahni 2 an hliem. Hi thil hi Kishaangarh field firing range­a dan pangngai anga silai kaapna nei huna tlung a nih.

Mahatma Gandhi thlanah par an inhlan
NEW DELHI:  Zanikhan India hnam pa Pu Mahatma Gandhi thi champha a ni a. Hi le inzawm hin President Pranab Mukherjee, Vice President Hamid Ansari le Prime Minister Narendra Modi hai chu zani zingkar khan Rajghat Samadhi a fein Pu Gandhi thlanah par inhlanna an va nei. Hi huna hin Union ministers Manohar Parrikar, Venkaiah Naidu le Mahesh Sharma hai bakah Services Chief pathum hai khawm an thang.

Anni baka hin Congress President Sonia Gandhi, Rajya Sabha­ a Opposition leader Ghulam Nabi  Azad, Delhi CM hlui Sheila Dikshit le PM hlui Dr Manmohan Singh hai khawmin par inhlanna an va nei bawk. Pu Gandhi kha January 30, 1948 a kap hlum a nih.

VAWISUN THUPUI
Lungrila ama zawngtuhai le, ama nghaktuhai kuoma chun Lalpa chu a tha a. Lalpa sandamna chu miin an nghak tawk tawk a, an beisei chu a tha a nih. ­ Tap Hla 3:25­26

Editorial
Hun inherliem le malsawmna

Chel ngir ruol lovin kum 2015 an herliem a, kum thar 2016 ah ei intawl lut a, “Hun le tuilienin tukhawm a nghak nawh”  ti angin hun chu a pangngaiin a fe zing a, chu hun sunga chun mihriemhai hin ei vanglai nihai  le upat tieng kum dam ei pan a, ei ni ni ei hung ni hlak. Kum thar 2016 hin ieng am a mi hung intlun ding ei hriet hri naw a, hunin a la hung hril pei ding a nih. Hun inher pei hin ei um dan ding hi a hung hersuokpui el chau a ni ringawt naw a, mihriem hai hin mawphurna nasa tak ei nei seng a nih. Thiemna le theina inang seng seng khawm lungril le hun an hmang dan izirin hun thuhmun zing sungah an tlung chin an sang hlei thei hle. Thenkhatin a tha tieng iengkhawm belsa um lovin kum an liempui laiin mi thenkhat chun ngirhmun tha lem le hlawtlingna lien takah dam an inhlangkai hlak.

“Hun hi tangka a nih” ti thuvar ei hriet lar hle. Tangka hi ei inhlut hle a, hun hi tangka ang ela hlu, a nina takah lem chun tangka neka hlu lem a nih. Remhrie tak le taima taka hun hmangtu ta dingin hlawtlingna le malsawmna a ni pei a, chu chu hunin malsawmna a min tlun dan a nih. Malsawmna dawng hi mi danghai ta dinga malsawmna ni theina khawm a ni nghal.

Hlawtlingna le malsawmna dawng nuom lo ei um nawh. Chu chu hun ei hmang thiem danah an nghat sei hle. Kum 2016 khawm hi malsawmna ei dawng kum le mi danghai ta dinga malsawmna intlungtirtu a ni kum a ni theina dinga thiem taka ei hmang a tul ding a nih. Pathienin mihriemhai kuomah thilpek hlu tak chu a naupa a mi pek hi a ni a, a dawttu chu hun a nih ti inla ei hril suol ring a um nawh. Chu hun chu a hlutna le a tangkaina hriea hmang thatu le a tangkaina hriea hmang thatu  taphawt  hai chu hi khawvela hin mi vangnei, mi hlawtling le mihai inhnar an ni hlak. Hun tam tak ei nei a, a hlutzie ei hriet naw leiin a thlawnin ei inliemtir el hlak hi a pawi hle. Mak takel a nih, ei hun tha a liem hnungah hun hlutzie ei hriet suok chau hlak. Chu huna chun a lo inkhel hlak ta si a, a pawi ti naw chu hril thei le thaw thei ei nei ta ngai nawh.

Hun chu a fe pangngaiin a fe a, muong chang, chawl chang le hrat taka a fe chang a um chuong ngai nawh. Chu hun vawikhat hung inhersuok chu chatuon a dingin a fe liem nghal pei hlak. Chu hun hungtlung chu ei hmang tha chun ei ta dinga hun tha a ni a, ei hmang tha naw ruok chun hun tha lo, hun hmangna bo a nih. Chuonghai chu chatuon a ding a ni nghal pei leiin ei hmang tha amani, tha naw amani a lo ni khawmin sukdanglam thei a ni ta nawh. Hun hungtlung chu iengma lova ei infe liemtir chun ei chan thlawn el a nih. Kokir nawk nuom hle hlak inlakhawm kokir thei a ni chuong ta ngai nawh.

Hun hmang that thei dan tha tak chu taimakna hi a nih. Hun hin thabo a ngai theinaw a, zawmthaw a dit naw a, um awl a ngei nawh. Mi taima chun hun awl a nei naw a, thaw dingin a sip hlak. Mi taima nuna chun suolna khawmin hmun a chang ve ngai nawh. Thabo taphawt an lungril le ngaituona an hnuoi a, hmasawnna an tlasam a, lawmna le hlimna khawm an dawng tlawm hlak. Chu chun nunphung tlaktlai lo le mizie tha lo neinaah a thuoilut hlak.

Mi thenkhat chun hun an hmang that naw leiin mi vangduoi bik ni ang damin an inngai hlak. An hun neihai zawmthaw takin an hmang a, iengkhawm thaw lova um chu mihai ngaisang le ropuina amani an sawn a, an hma tieng hun ding khawm an thlir pei nawh. Nisienlakhawm hun a hung sawt a, an hun hmang that nawna ra an sik a, ra sie, mawlna, retheina, beidawngna, harsatna, lungril sawlna le nguina hai a hung intlun hlak. Chu lei chun an taksa a hung hrisel naw a, khawvela um hi rinum an hung ti a, dam dawt chakna dam an hung neinaw a, khawvel hi thlakhla nawna in an sip hlak. Chuleiin hun hi hlu hle sienkhawm a hmangtuin a hmang tha naw vai chun ansie angin a hung inlang hiel hlak.

Post a Comment

Powered by Blogger.