Special  Block Level Bankers meet nei
CCPUR: Zani zantieng 1:00PM khan UCO Bank opposite­a DDM/NABARD Office­ah Special Block Level  Bankers Committee meeting nei a ni a, S.Thienlaljoy Gangte SDO/CCPur; N.Hauzel, LDM/CCPur; Thangchinkhup Guite, AGM­DDM/NABARD; Mangta Shoute, LBO, RBI/Imphal hai bakah CCPur Dist. sung a Bank Branch Manager hai le  DIC - a Superintendent i/c PMEGP hai an thang.


Mangta Shoute, LBO, RBI/Imphal chun, ei ram hmasawnna dinga Bank hai sin thaw dingin an fui. Hi huna hin  CCPur Dist.sunga Banks han 2016­17 financial year a Annual Credit Plan/Target an phar tawl a. Bank manager hai chun Agriculture; Kisan Credit Card (KCC); Industries/MSME; Education Loan; Housing Loan le thil dang danga loan an peksuok ngam zat hai an hril tawl a, DDM/NABARD; LMD le RBI officer hai remtipuinain an target ding fixed pui a nih.  
Hi dungzui hin Agriculture­ah Rs. 2000 lakh target a ni a, hi laia Rs. 500 lakh chu KCC a ding; Industries/MSME a dingin Rs.1000 lakh;  Housing loan a dingin Rs. 1000 lakh fixed a nih.
KCC Loan semna kawngah ringtlak NGO hai inrawl tir ding chungthu; PMEGP ngirhmun hriltlangin target ding an hmatienga fixed tha an ti thu hi huna hin an hriltlang bawk.

MPC HQ General Assembly nei
CCPUR:  Zani 10:30AM khan YMA Hall, Hmuia Veng, CCPur­ah MPC HQ Manipur General Assembly a vawi 31­na hmang a nih. First session­ah Secy. Sub Hqrts, Secy. Finance HQ; Gen. Secy. HQ han report an pek a, President, GYMA Manipur; Chairman MLS Manipur; President MZP HQ Manipur; Presdient MPC Manipur han thuhrilna hun an hmang a, Upa C. Phunthanga, Consultant, MPC HQ chun “Mizo nunze tha humhalh leh vawn nun” ti thupui hmangin thu a hril.


Women Gun Survivors hotu hai an hung
CCPUR: Manipur Women Gun Survivors Network­a inthawk Reena Mutum, Coordinator le Chanthoi, Project Asst. hai chu zani 11AM khan CCPur­a hungin Bethel­a Widow Welfare Association Asia office an hung kan. Widow Welfare Association Asia hai le thangruolin Tribal martyrs hai laia mi 5 sunghai kuoma thangpuina pek dan ding an hriltlang a, Tribal martyr 5­sungkuo hai ­  C.Laldinsangi m/o Thangzalian; Haulianching m/o (L) Pausuanlian of Vengnuam, New Lamka; Hoihdimhat w/o (L) Henlalson of HQ Veng; Nemneilhing m/o (late) Khaijamang of Bijang; Chingngaihniang w/o (L) Enkhankhup of LV Lane, New Lamka. Hai chu an thiemna dungzuia an khawsak pei dan ding ngaituonain Bank Account fethlengin thangpuina pek ning an ta, chu sum hmangin hmangruo an inchawk ding ti a nih.


Feb. 13­ah Lok Adalat a um ding
CCPUR:  District Legal Services Authority, Churachandpur huoihawtnain Feb. 13, 2016 zing dar 10:30 a inthawk khin Chief Judicial Magistrate, Churachandpur Court­ah Lok Adalat um a ta, Bank le inzawma pending case hai rel ning a tih. Pending cse nei Bank­hai chu an case hi huna rel a ni theina dinga case chanchin le hnina lekha Feb. 1, 2016 chena Secretary, Legal Services Authority, Churachandpur kuoma pelut dinga inhriettir an nih. Chun, Bank le inzawma pending case neihai khawm hi Adalat a thang dinga inhrietir an nih.

HSA Assembly-ah Assam &Nagaland Governor khuollienin a thang
MUOLHOI: January 27, 2016­a inthawk Muolhoi, Haflong (Assam) Public ground hmuna Hmar Students’ Association  (HSA) GHQ 55th General Assembly fe meka a nipui ni tak zanikhan  Assam le Nagaland Governor Pu P.B. Acharya chu  khuollienin a thang, Pu Acharya hi a nuhmei khawmin a zui ve. Chief Host in Dr Amo, Chairman, HAC; Guests of Hounour in Pu Niranjan Hojai, CEM, NCHAC le  Tuliram Ronghang, CEM, KAAC hai an thang a; Functional President in Dr. John Pulamte, President, Hmar Inpui GHQ le Special Guests in Pi L.Sweety Changsan, IAS, Commissioner & Secretary, Govt.of Assam, Pu Ruolkhumlien Buhril, IAS le Pu Amarendra Baruah, ACS, DC, Dima Hasao hai an thang bawk. Anni baka hin Manipur­a Hmar MDC Pu Lalhrillien Hmar; Pu Lalhossan le Pu Lalditsang hai le Assam sunga Hmar MAC hai khawmin an uop ve.

Pu Acharya in thu a hril naah, thalai hai chu sin zawngtu ni lova, sin siemtu  ni tum seng dingin a ngen.

HSA GHQ president Lalthlamuana Hmar chun Presidential address neiin  mipui hai lawmlutna a nei zoin Assam rama Hmar nauhai harsatna dang dang hai le inzawmin Governor kuomah Memorandum a pek.

Hi huna hin Pu PB Acharya chun Assembly Souvenir ‘SINLUNG” tlangzarna a nei bakah Pu Dr  Hrilrokhum Thiek le Pu L.Keivom hai kuomah HSA Lifetime Achievement Award inhlan an nih.
Second session Valedictory­cum­Entertainment hunah Dr Amo; Pu Ngamrothang Hmar le MAC, NCHAC hai chief guest le chief host in an thang a, Special Invitee in Pu Lalhrillien Hmar, MDC, ADCC, Manipur le Special Guests in Pu S. Thiek, ACS, Guwahati le Pu Lalsiemdik Tusing, IRAS, Lumding, Assam hai an thang. (Virthli)

CM O.Ibobi Singh inban ding le IW SP Dr A.K. Jhalajit a sina inthawk suspend dingin BJP Manipur in an ngen
IMPHAL: July 23, 2009 a Khwairamband bazar a Ch. Sanjit kap hlum a nina thu le inzawmin zanikhan BJP Manipur Pradesh chun Manipur Chief Minister O.Ibobi Singh inban ding le Manipur Police a Head Constable Herojit Singh kuoma Ch. Sanjit kap hlum dinga order petu Dr A.K. Jhalajit, SP, Imphal West chu a sina inthawk suspend dingin state sawrkar an ngen. Hi thil tlung huna hin Dr A.K. Jhalajit chu Additional SP, Impha West sin a chel a nih.CM O.Ibobi Singh khawm kha thil tlung huna Home Minister a ni leia mawphurna nei ve a ngaiin BJP chun CM a ninaa inthawk inban dingin an phut a nih.

Head Constable Herojit Singh inpuong zo hnung hin fake encounter a inthatna dang thuhai chungthua khawm thudik a la hung inlang suok pei beisei a um tiin Th. Chaoba, President, BJP Manipur Pradesh chun a hril. Head Constable Th. Herojit inpongna hi suizui ding le hi thil tlung le inzawma inrawlna nei hai chu ei ram dan anga hremna pe seng dingin Th. Chaoba chun sawrkar thlungpui a ngen.
July 23, 2009 a Ch. Sanjit kap hluma a umna le inzawm khan dodalna nasa tak a tlung a, a state pumpui a sukbuoi pha a nih. Sanjit nuin hi chungthua hin Gauhati High Court ah PIL a file a, chu taka inthawka Gauhati High Court  in hi thina thu hi CBI suizui dinga a peksuok a nih tiin Th. Chaoba chun a hril.

Kum 6 zet a liem hnungin hi inthatnaa thang Herojit chu Chanchinbumihai kuoma a hung inpuong a, Dr A.K. Jhalajit Order dungzuia a 9mm service Pistol hmanga Sanjit hi silaimu 6 zet hmanga a kap hlum niin a hung puonglang ta a nih tiin Th. Chaoba chun a hril.

Kum 30 lai liemta khan Fake Encounter ah mi 1528 that nia hril a ni a, hieng case­hai hi Supreme Court­ah pending in a la um mek. Hieng case­hai laia mi 1200 hai chu kum 2002­2012 inkara that an ni a, hi hun sunga sawrkarna cheltu chu Congress an ni bakah O.Ibobi Singh CM hun sung a thangsa. July 23, 2009 a Rabina le Sanjit that an ni huna khawm O.Ibobi Singh chu CM a nih tiin Th. Chaoba chun a hril.

T. Beikul Singh thina thuah mi 2 man
IMPHAL: January 23, 2016 nia  Sangkhoi village­a Mr  Takhellambam Beikul Singh (57)  s/o T. Takhel Singh of Selungpham Kang Thokchao a thisaa hmu a nina le inzawmin January 27, 2016 zan khan pasal pahni man an nih. Mana um hai chu Ngarammei le Yaireingam of Kharasom Village, Sanapati District hai an nih. Beikul sung hai chun Beikul hi zing dar 8:30 vela motor inchaw dinga suok niin an hril a, thla 2/3 vel liemtaa inthawk khan telephone in tu ti hrietlo leh motor inchawkna ding thua an inbiek rawp hlak niin an hril.

Union Minister a hung inzin ding
IMPHAL: Manipur­a ni 3 sung cham dingin Union Minister of  State for Micro, Small and Medium Enterprises chu February 1,2016 khin Imphal a hungtlung ding niin ei thu dawngna chun a hril. Manipur­a a cham sngin  INA Complex, Moirang le sawrkar projects  thaw lai mek hai a hmuna a enkuol ding ti a nih.

Hand Grenade pakhat hmu
IMPHAL: Zani hmasa zan dar 8 vel khan North  AOC bul laia Raj Medicity Hospital toilet tung lai  hi hospital thawktu han China siem Hand Grenade pahni an hmu a, Imphal West police Station­a report a ni hnungin zan dar 8:40 vel khan Polie han an va lakhmang. Grenade umna bula hin pawisa demand­na lekhaziek  hmu a ni a, a sietu hi KCP ni dinga ringhla an nih.

Zingkar le zan huna  damdawi a thlawnin
IMPHAL: JNIMS­a Casualty a chun emergency cases haiah zingkar dar 7 hma le zan dar 8 hnunga lut hai kuoma damdawi a thlawnin an pek tan. Hi thil hi insukhliem le damnaw zan sawt hnung le zingkar inhma taka hospital pan han damdawi inchawkna kawnga harsatna an tuok hlak leia thaw tan niin JNIMS Director Deven Laishram chun a hril. Hieng hun haia Specialist doctor an lo um naw a, mamaw a ni khawmin telephone hmanga ko thei an ni ding thu le Specialist doctor duty sie tuma hma lak mek a nih tiin  Dr Laishram chun a hril.

Church Street a bomb sukpuoknaa thang man
NEW DELHI: December 28, 2014 a Church Street, Bangalore a bomb sukpuoknaa thang ve Md. Rafeeq alias Jaweed alias Alam Jeb Abridi of Ahmedabad chu NIA in an man. Rafeeq hi kum 3 lai Bangalore a Air Conditioner Mechanic sin thawa lo um ta hlak a ni a. NIA Special Court chun ni 10 sung NIA Custody­a sie dingin a ti phawt.

ZIKA virus thuah  High level Technical Group indin
NEW DELHI: Latin America rama Mise/thosi a inthawka kaisawng ZIKA virus hmusuok a ni le inzawmin zanikhan Union Healt  Minister JP Nadda inrawinain Delhi­ah high level meeting nei a nih.  Meeting­a hin Ministry officials hai bakah AIIMS le National Institute of Virology haia inthawk officials hai an thang tawl. ZIKA virus enfeltu dingin  High level technical gruop indin a ni bakah hi  virus invawi an um le umnaw enfelna sin thaw nghal dingin ministry official hai an hriettir bakah a lo inveng dan ding ngaituo dingin an hriettir. ZIKA Virus hin naute thluok a sukbuoi thei natna a nih.
WHO Director General Dr Margaret Chan chun, hi virus hi a pung hrat hle leiin emergency team  indin a ni a, hi team chun February 1, 2016 khin meeting neiin, khawvel pumpuia mihriem hai ta dinga titthawng um a ni le ninaw ngaituong an tih tiin a hril. Ring lawk dana chun ZIKA Virus hi America mi maktaduoi 3­4 velin an kai hman dinga sut a ni a, Ebola natna Africa rama an dar tum khan mi singkhat chuongin an lo thi pha ta a nih.

Venezuela rama chun ZIKA virus invawi ni dinga ringhla 4,700 an um niin Venezuela health ministry chun a hril a, hi thil hi Zika virus symtoms ang nei haia inthawka sut a nih tiin health miniter Luisana Melo chun a hril. France a khawm Zika virus kai 5 hmusuok ni tain French health ministry thusuok chun a hril.

Hyderabad Central University class tan
HYDERABAD:  Dalit hnama mi  Ph.D. inchuklai Rohith Vemula ama le ama an thatna leia  Hyderabad  Central University ni 10 chuong zet khar a ni hnungin zanikhan hawng le class tan nawk a nih. Students hai chun Vice Chancellor ban ding le Rohith Vemula thina le inzawma mawphurtu hai hrem dinga ngenin class lak ding an dodal a, sienkhawm acting Vice Chancellor  Prof. Srivatsava ngenna leiin student hai chun protest hi chawlsanin class an lak tan nawk a nih. Vice Chancellor Appa Rao Podile chu campus suoksan hri dinga ti a ni leiin Jan. 26, 2016 khan campus a suoksan tah. Hi thil tlung suizuitu dingin sawrkar chun Justice Ashok K. Poopanwal a ruot.

Greece PM hlui Goa­ah a hung inzin ding
PANAJI:  Greece Prime Minister hlui George Papandreou chu February 1­5, 2016 inkar sunga D D Kosambi Festival of Ideas’ nei dinga hung thang ve dingin  February 3, 2016 khin Goa a hung inzin ding a nih. Papandreou hin ‘Inter­cultural dialogue for humanising globalisation’,”ti thupui hmangin    lecture a pek ding niin state art and cultue department director Prasad Lolienkar chun a hril. Papandreou hin October 2009 ­November 2011 inkar sung khan Greece Prime Minister sin a lo chel a nih.

Congress an hneban ngei a ring thu a hril
NEW DELHI: BJP Parliamentary Board inthung in Assam Assembly Election hung um dinga BJP Chief Ministerial candidate dinga an ruot Union Minister of Sports and Youth Affairs (Independent Charge) Sarbananda Sonowal chun, Tarun Gogoi inrawinaa Assam­a sawrkarna siem tu Congress chu  BJP in an hneban ngei a ring thu a hril. Mr Sonowal chun, BJP thlanglal an ni chun corruption free sawrkarna le development oriented government an siem ding thu a hril.

Assam Assembly­a hin seats 126 a um a, Election hi April­May vela nei beisei a nih. Kum 2014 Lok Sabha election­a khan Lok Sabha seats 14 umah BJP in seat 7 an lak a nih. Tuta Assembly Election hung um dinga hin BJP chun seats 84 bek lak an in beisei a nih.

Beating of Retreat Ceremony hmang
NEW DELHI:  January 26, 2016 nia India Republic day hmanga um le inzawma ni 4 sung Republic Day lawm kharna Beating  Retreat Ceremony chu zanikhan New Delhi­a Vijay Chowk hmuna nei a nih. Hi taka hin Military band 15, Regimental Centre le Battalion hran hrana inthawkin Pipe le Drum Bandh 18 an thang bawk. Beating of Retreat hi kum 1950 kuma Indian Army Major Robrts in bandh party hai a ruola inlangna hun a lo siema inthawka sunzawm pei a ni a, Beating of retreat a hin India sipai tum tum haia band party han an thil thiem hai pholangna hunin an hmang hlak a nih.

Agartala­ Aizawl road siemthatna dingin $ 80 million
NEW DELHI: Sawrkar thlungpui chun Agartala­Aizawl road siemthatna dingin Asian Development Bank (ADB) pawisa dollar 80 million a puk. Hi le inzawm hin India sawrkar le ADB chun January 28, 2016 khan inremna an ziek niin Raj Kumar, Joint Secretary (Multilateral Institutions), Dept. of   Economic Affairs, Ministry of Finance chun a hril.

SA Games ding leiin security sukkhau
GUWAHATI: February 5, 2015 a inthawk Guwahati le Shillong haia 12th South Asian Games hung um ding le inzawmin Guwahati le Shillong khawpui haia chun venghimna khau taka thaw a nih. Air Force le Army Defence Unit hai chun games inkhelna ding hmun  hai venghimna sin thawng an tih.  Guwahati­a chun security personnels 11000 chuong sie an ni a, venghimna tiengpang mawphurna chu Assam le Meghalaya DGP hai pek an nih. Borjhar – Khanapara inkar Guwhati a chun Unmanned Aircraft system (UAV),  Helium balloons annawleh flying activity hrim hrim khap hmak a nih.

VAWISUN THUPUI
Tho la, veng tantirna huna chun, zana khek rawh; Lalpa hmaihmaa chun i lungril chu tui angin bunthla la, I nau le tehai hringna dingin ama tieng chun i kuthai phar rawh, Chuong kawtthlr tawp tina phingtama chauhai ta ding chun. Tap Hla 2:19

Editorial
Sin thiem le remhrie

Manipur State sunga District hran hran  pakuo a District  Employment  Office haia sawkar sin dit leia hming zieklut hi mi nuoi 6 chuong an tling phak ta a. Sawrkar sin dit ei tam hle. India ram  state lien lem  haia lem chu sin zawng hi  ei ni lai nekin an la tam zuol. Uttar Pradesh state sawrkar hnuoia Grade­IV sin lak tumnaa hnina pehai lai lem chu B.A. le M.A chau ni lovin Doctorate Degree neihai khawm an thangsa ti Chanchinbu tiemtuhai chun ei hriet seng ring a um. Sawrkar sin hmu le nei chu thil harsa takel a ni tah. Sum le pai le thangpuitu tha neinaw hai ta ding chun sawrkar sin hmu chu thil thei lo ang tluk a ni tah. Hieng a ni lei hin fak hmuna ding chun hrat le taimak el a huntawk ta naw a, sin thiem le mi remhrie ni a tul tah.

Ieng sin khawm zawng le thaw ding ni inla, sin thiem le mi remhrie (skilled) ni a pawimaw ta takzet a nih. Mi taima le hrat el khela sin thiem le mi remhrie hai chu dit bik an ni zat zat hlak. Hlo thlo ding khawm nisienla mi han sin thiem le remhrie an dit lem zat zat hlak. Sin thiem le remhrie han sin thaw seng lo an nei laiin, sin thiem lo le remhrie lo hai chun sin thaw ding annawleh inhlawna ding an invai hlak. Hi lei hin mani sinah thiemna bik nei a tul ta takzet a nih. Doctor ei pan ding khawma MBBS naran el nek chun specialist Doctor ei pan pei lem a ni ta hi!

Sin thiem le mi remhrie ni ding chun inchuk pei le training pei a tul. Ei thiem naw le thaw thei lo a lo um a ni chun a hrie le thiem tasa hai indawn rin lo le an kuoma van chuk hi rin der lo ding a nih. Sawrkar khawma training hi a pawimawzie le a tha hle a nih ti a hrietchieng em em leiin trade tum tum haiah training centre annawleh institute hran hran a hawng ur ur el a nih. Zohnathlakhai hin training pawimawna le thatna ei la hriet tawk naw leiin training fe hi ei la rin hle niin an lang. Hi lei hin trainign tulna le pawimawna hi inhrilhriet ei uor zuol a tul. Sin thiem le mi remhrie hai chu  a ruoitu han ruoi nawn nawk an nuom pei hlak. Mihai ruoi nawn nawk peina ding chun mani sinah thiemna bik rieu nei ding a nih.

Khawvela thiemna le varna an sang ang peiin, ei  dit dan  hai a hung changkang ta pei a. Thil tha le changkang siem thei ding chun mihai neka hriet tam lem le inchuk tam lem a tul ti hriet tlat ding a nih. Carpenter le mistiri tam tak an um. Amiruokchu, sin  thiem le a thiem naw hai inkar chu inhlat takel a nih. Mi neka thiem bik le kut nam hai chun sin thaw seng lo an nei a, a ruoi nuom an tam a, a mamaw hai chun an chuin an inchu el a nih. Kut mam lo le thiemna bik neinaw hai ruok chun ruoitu ding an hmu ngai naw a, dawr an hang hawng hlaka chu an hlawsam a, hun sawtnawte hnungah an dawr an khar pha hlak.

Lekha inchuk ve si, pawlsawm pasi zo lo hai khawm beidawng el ding a ni nawh. Lekha inchuk ei chem fena zawng a lo ninaw khawma ei thaw theitawk trade tum tum inchuk a, fak hmu theina khelah hausak theina lampui a um a nih. Amiruokchu, ei chem fena le inhnik zawng hrietchieng ding a nih. Ei chem fena zawng le ei inhnikna zawng tak ei thaw chun sin hung thiem ei ta, mi remhrie tak ei hung ni thei ding a nih.

Khawvel a hin thiemna le varna a la hung insang pei ding a ni a. Ei nun dan, ei nuom zawng, fak le dawn, duzawng, ditzawng, inchei dan, lekha inchuk dan hai hi a la hung inthlak danglam pei ding  a ni a. Chu hun le inmil dinga ei intat ngei a, mani sin sengah thiemna bik nei dinga inchuk annawleh training hi ei nei pei a tul a nih. Ei lekha inchuk dan le inenkawl dan khawm nasa takin an thlakthleng ta a nih. Tuta inthawka kum 10 hnunga lem chu ram changkang le hnam var hai ang bawkin lekhabu chawi lovin School/College ei la kai ding a nih. Ei subject hai po po internet a inthawk ei la tiem le inchuk ding a nih ti hi mithiem le hmathlir hla hai chun an lo hril a, Zirtirtuhai khawm training an lo peklawk ta a nih. Sin thiem le mi remhrie ni dinga mitin lo thei lova tuta inthawka ei lo inpuocha a hun ta a nih.

Post a Comment

Powered by Blogger.