Bike Eksiden nasan hrietchieng, ruong lak
CCPUR: January 27, 2016, zan dar 6:30 vela Tuibuong Forest Gate phak hma deu laia mi 3 chuongna Pulser RS 200 (MN01F­9231) eksiden nasan hrietchieng le eksiden­a thi ruong lak a nitah. Hi Bike eksiden­a thi chu Jangminhao (19) s/o Tonglet of Mongpijang, Sadar Hills, tuta Cananveng, Tuibuong a um mek le Young Pillar College ah Class XI inchuklai a ni a, Bike a chuong midang 2 hliem hai chu ­ Mangtungnung (19) s/o Thangmuanhang of Ngoiphai village, tuta Rayburn College ah class XI inchuklai le Paotinmang (19) s/o Holsei of Aigejang, Sadar Hills, tuta Kipgen Veng a um le Young Pillar College ah class XI inchuklai a nih.

Zani khawvar hnung khan Bike eksiden nasan hrietchieng chau a nih. A thipa hi Bike a inthawk a tla hmasa tak a, a hnungin Mangtungnung a tla nawk a, hi zo hin a Bike khaltu tak Paotinthang chun Electric post a baw nia hril a nih. Motor dang le inbaw anga hril kha ni lem lovin anni le anni changsuola eksiden an nih.

Hi eksiden tlung le inzawm hin zanikhan hliemna tuok le thi sung tiengpang han KKL inrawinain KKL Complex­ah inbiekna an nei a, an inbiekna dungzuiin Bike a chuong hliem pahni han mithi ruong puon in an tuom bakah a kuong (coffin) siemna sengso an tum. Mithiruong hi post­mortem thaw lovin zani zingkar khan KKL Ambulance hmangin an khuo, Mongpijang, Sadar Hills tieng phur a nih.

Naupang 36269 Zenghri vengna indawntir
CCPUR: January 17­19, 2016 inkar sunga Churachandpur District pumpuia 1st Round IPPI nei huna khan IPPI booth 435 hawng le OPV vials 2481 hmang a ni a, naupang kum 5 le a hnuoitieng Zenghri vengna damdawi indawntira um chu an rengin 36269 an nih. Hi laia 30812 hai chu Booth Day nia indawntir an ni a, a sunzawmna a ni hninain naupang 4975 indawntir le a nithum niin naupang 482 indawntir an nih. Tukum Zenghri vengna damdawi naupang indawntir ding zata bituk (target) chu 36776 a ni a, target chu a phak naw deu a, sienkhawm 98.62% a tling phak. Second Round IPPI/NIDs chu Feb. 21, 2016 khin nei nawk ning a tih.

Hlamawi lawrkhawm tlangzar
CCPUR: Sielmat Nunghak Pawl in an buotsai “Hlamawi Lawrkhawm Vol­II” chu Jan. 28, 2016, 6PM khan Sielmat HYA Hall­ah Pi Lawm Pudaite in a tlangzar a, Rev. Zothanghrim in Pathien kuoma inhlanna neiin Pu James Songrolal Songate in hlabu preview­na hun a hmang. Hlabu­a hin a bik takin lusun huna sak ding hla siekhawm deu a ni a, Rs. 200/­ man ding a nih


2­Day State level Seminar a um ding
CCPUR: January 30, 2016, 10:00AM khin Rayburn College Auditorium­ah “Development Experiences in the Hill Areas of Manipur: Problems and Prospects” ti thupui hmangin 2­ Days State Level Seminar tan ning a tih. Hi huna hin Prof. Dr W. Vishwanath Singh, Registrar, Manipur University Chief Guest in thaang a ta; Dr Khen P. Tombing, Principal, Rayburn College, N.K. Tombing, Secretary, Rayburn College le Prof. Dr N. Mohendro Singh, former member, Steering Committee NER Vision, 2020, DoNER, Govt. of India hai chu functional president le Guest of honour in thang an ta, Dr A.K. Sunderkumar Singh, former Principal, Modern College, Imphal, Moirang College le tuta NAAC ASSESSOR chu Special Guest in thang a tih.

Mr Lalthalur Infimate, Organising Secretary in welcome address hril a ta, Prof. N. Mohendro Singh in key note addres hril a ta, chief guest, functional president, guest of honour le functional president han thuhrilna hun hmangin Nk. Lily S Chothe in vote of thanks hril a tih.

Day 1 hin Dr Thathang Vaiphei David L. Lungtau han paper present an ta, le zantieng huna Dr Damodar Nepram; Dr N. Somorendro, Dr Seikhohao Kipgen le Dr Thienkhogin Haokip han thupui tum tum hmangin paper present an tih.

Day 2 Feb. 1, 2016 zingkar hunah Prof. Dr N. Rajmohan Singh; R.K. Dilip Singh le K. Vungzamawi han paper present an ta, zantieng huna Pumsiankim; Dr Grace Laltlinzo le Dr Immanuel Zarzosang Varte han thupui tum tum hmangin paper present an tih.

JAC in Sit ­in­ Protest an sunzawm pei
CCPUR: Joint Action Committee (JAC) Against Anti­Tribal Bills in January 26, 2016 a inthawk CCPur Police Station tuola sit­in­protest an nei chu an sunzawm pei a, zani khawm khan JAC inrawinain protest neinaw a nih.


Manipur Assembly in Aug. 31, 2015 a Bills 3 a pass hai dodalna leia thina tuok mi 9 hai ruong vui lova ni 150 chuong a um ta hnung khawma sawrkarin dawnna a la pek naw leia sit­in­protest hi an nei a ni a, Delhi a Jantar Mantar a khawm Nov. 4, 2015 a inthawk hiengang protest hi a la fe pei a nih. Mimal a nuom taphawt protest­a hin thanga inthung thei a nih.

Kum 2016-­2020 sunga HSA GHQ thuoitu ding hai
MUOLHOI: Hmar Students’ Association (HSA) General Assembly vawi 55­na chu January 27, 2016 a inthawk khan Muolhoi, Haflong, Assam­ah tan a ni a, zanikhan rorelna nei a ni a, rorelna tluong taka nei a ni zoin HSA GHQ thuoitu thar ding hai thlangna nei a nih. HSA GHQ thuoitu thar ding thlangna hi RS Puruolte, Presiding Officer nina hnuoia nei a nih.

Zani zan khan Manipur HAC Chairman le MLA Dr Amo Chief Host in a thang a, Pu Laltlansang Hmar, EM, NHAC functional president in a thang a, Pu Thanghlun Hmar, IRS, Guwahati chu Special Guest in a thang a, Cultural Nite zani zan khan hmang a ni bawk.

Kum 2016­-2020 sunga HSA GHQ thuoitu dinga thlang hai chu a hnuoia hai hi an nih.

ASSEMBLY AFFAIRS:
Speaker: Pu Lalthlamuana Hmar, Shillong
Deputy Speaker: Pu John Puruolte, Muolhoi
Secretary: Pu Lalringum Riengsete, Muolhoi
Deputy Secy.: Pu Immanuel Pulamte, CCPur

HSA GHQ OB (OFFICE BEARERS):
President: Tv. Rothanglien Khawbung, Aizawl
Vice­ President: Tv. Simon L Infimate, Shillong
Gen.Secretary: Tv, Josef V Tuolor, Muolhoi
Asst. Gen. Secy.: Richard Laltanpui, CCPur
Finance: Nk. Margareth Tryte, CCPur

First 20 Smart Cities ding hai a puong;
NE bielah  Guwahati khawpui chau a la thang phak
NEW DELHI: Union Urban Development Minister M. Venkaiah Naidu chun zanikhan India rama khawpui tum tum Smart Cities a siem ding ‘first 20 Smart Cities’ list a puong. Smart Cities a siem ding 20 puonga um hai lai hin India hmarsakbiel states haia inthawk Guwahati (Assam) chau a la thang.

First 20 smart cities a thang hai chu­ Bhubaneswar (Odisha); Pune (Maharashtra); Jaipur (Rajasthan); Surat (Gujarat); Kochi (Kerala); Ahmedabad (Gujarat); Jabalpur (Madhya Pradesh); Visakhapatnam (Andhra Pradesh); Solapur (Maharashtra); Davangere (Karnataka); Indore (Madhya pradesh); New Delhi Municipal Corporation; Coimbatore (Tamil Nadu); Kakinada (Andhra Pradesh); Belagavi (Karnataka); Udaipur (Rajasthan); Guwahati (Asasm); Chennai (Tamil Nadu); Ludhiana (Punjab) le Bhopal (Madhya Pradesh) hai an nih.

‘Smart Cities Mission’ hnuoia  India ram sunga state tum tum haia inthawk Smart cities a siem dinga rawtna lut 98 haia inthawk hieng khawpui  20 hai hi thlangsuok phawt an nih.

Smart Cities Mission thiltum tak chu khawpui felfai taka buotsai, tui le electric power supply hnienghnar taka sem, hmunhnawk le thil bal hai umzie nei taka chingfel, mirethei hai chengna ding bik  buotsai pek; Information technology hmang tangkai, khawpui sung  boruok suk thienghlim, inchuknain le hospital tha  siem a, khawpui changkang le thieng hlim, khawsakna ngirhmun siem­that le a dang dang a nih.

Smart Cities list hmasaa hin la thang hri naw sienkhawm Manipur­ah Imphal khawpui khawm list 98 lai hin a thang ve a nih. Smart Cities 20 siemna dinga hin  kum 5 sungin Rs. 50,802 crores vel seng dinga hisap a nih. Smart Cities dinga thlangsuok hmasa 20 hai hin  fund dawngin an khawpui sukchangkangna sin thaw tan zing an ta, tuta inthawk kum 2 hnungah Smart Cities ding 40 hai puong nawk ni dingin Mr Naidu chun a hril. State tinin Smart Cities pakhat bek an nei dinga riruong a nih.

Imphal­ah Torch Rally nei
IMPHAL:  Guwahati le Shillong haia 12th South Asiana GAmes nei ding le inzawmin zanikhan Imphal­aha Torch rally n ei a ni a, inkhelmi le officials 1000 vel an thang. Torch rally hi PHED Minister I. Hemochandra Singh in a vai liem. Hi rally hi Social Welfare Minister A.K. Mirabhai, Commerce & Industries minister Govindas Konthoujam le Chief Secretary O. Nabakishore hai khawma an uop ve. 12th South Asian Games hi Feb. 5, 2016 a tan ding a nih.

Him lova an ngai chun security pek ning a tih: Dy. CM
IMPHAL: July 23, 2009­a Chungkham Sanjit (22) Manipur Police Commando han an kap hlumna le inzawma intuma um Police 8 hai laia Th. Herojit Singh inpuongna chungthuah  Manipur Home Minister Gaikhangam chun, a hringna him lova inngaina a nei a ni chun Manipur sawrkarin venghimna peng a tih tiin zanita 6th Shaheed Manoranjan Singh Memorial Football Tournament, Khuman Lampak Stadium­a a hawngna huna a  hril. Herojit inpuongna thua hin sawrkar thlungpui chun Addl. Chief Secretary (home) chu report pe dingin a hung inhriettir niin Gaikhangam chun a hril.

Herojit Singh hi zani hmasaa kha Indigo fligh­a Tulihal Airport, Imphal hung vuonglut nia hril a ni a, sienkhawm a nuhmei chun a pasal hi an hmang niin report a pek a nih. Imphal Free Press chanchinbu ruok chun Herojit hi hmun pakhatah him le dam takin a um niin a zieklang.

KNF (N) Cadre pakhat  an man
IMPHAL:  PRO, Assam Rifles in zanita thusuok a siem dungzuiin, January 28, 2016 khan 2­Assam Rifles le Thoubal Police Commandos han Bongbal Khullen village­a dappui an thawnaah KNF (N) Assistant Finance Secretary, Satkithang Kipgen @ Ranjit (29) s/o Khailun Kipgen of Zoulen, Senapati District chu country made 9mm Pistol 1, magazine 1 le a mu 9 leh an man a, Yairipok Police Station­ah an peklut.

Manipur Assembly Website thar tlangzar
IMPHAL:  Zanikhan Manipur Assembly Secretariat Conference Hall­ah Manipur Assembly Website: www.manipurassembly.net tlangzar a nih. Hi huna hin Assembly Secy. K. Meghajit, Assembly Director Y. Somendro, Assembly DDO  G. Tapan Sharma le Assembly Dy. Secy. MA Gaffar hai an thang. K. Meghajit chun, Old Assembly building hli hmang huna khan www.manipurassembly.nic.in chu tha takin a function a, sienkhawm Chingmeirong­a  Building thara insawn a ni hnung khan  harsatna dang dang leiin hmang thei loa um a ni thu a hril.

Assam CM candidate dingin onowal
NEW DELHI: Zanita New Delhi hmuna BJP Parliamentary Board meeting chun Assam Assembly Election hung um dinga BJP Chief Ministerial candidate dingin Union Minister Sarbananda Sonowal ni dingin an rel. BJP Parliamentary Board meeting a hin PM Narendra Modi, BJP President Amit Sha,  Union ministers Rajnath Singh, Arun Jaitley, Venkaiah Naitu le  Nitin Gadkari khawm a thang. Senior BJP leader le Union minister JP Nadda chun, Sonowal inrawina hnuoia BJP in Assam Assembly Election a hmasawn ding thu a hril a, BJP in Assam­ah sawrkarna siem thei khawpa hratna an hung chang ngei ding thu a hril.

Kerala CM chunga FIR file dingin
THIRUVANANTHAPURAM: Kerala­a Solar scam le inzawmin Thrissur Vigilance Court chun zanikhan Kerala Chief Minister Oommen Chandy le Power minister Aryadan Muhammed hai chunga FIR file dingin Order an suo. Mr T.D. Joseph in Public Interest Litigation (PIL) a file le inzawma Court in FIR file dinga order an suo a nih. Kozhikode a um mek Kerala CM Oommen Chandy chun, hi thil hi politics thila inphierrukna a nih tiin a hril. Hieng laizing hin Opposition leader V.S. Achudanandan chun Governor chu Oommen Chandy sawrkar thiek dingin a lo mawr ve sen bawk. BJP chun Kerala CM le Power minister Aryadan Muhammed hai chu hi chungthua hin inban dingin an phut.

Tuolthattu 6 damsung lungin intang dingin
ERODE: Tamil Nadu­a chun kum 2014 a nuhmei kum 55 mi Ms Ranganayaki thattu mi 6 hai chu   Court in damsung lungin intang dingin thiemnaw an changtir. Damsung lungin intang dinga thiemnaw inchangtir hai lai hin nuhmei pahni an thang a, fine Rs. 50,000 seng chawi dingin Court chun an chungthu a rel bawk a nih. Hieng mi 6 hai hin Ms Ranganayaki an rek hlum hnungin a pawisa Rs. 1.10 lakh le rangkachak incheina iemanizat an lakpek a nih.

Jharkhand­a bomb puok­ah Police 7 an thi
PALAMAU:  Jharkhand­a Palamau district sunga Chatarpur Japla road, Kala Pahari village a chun  zani hmasa zan khan Maoist hai bomb changkam Police chuongna motor in a chilpuok leiin Police 7 an thi bakah 6 an hliem a, hliem hai laia 2 hai chu an hliem inrik. Police thi hai laia pakhat chu Havaldar niin, pakhat Chowkidar, 4 constable le pakhat dang chu an chuongna motor khaltu (driver) a nih.

Assam­a bomb puokah Police 3 an hliem
HAFLONG: Zanikhan Assam­a Dima Hasao district, Haflong Police station huopsung Ram Nagar hmuna tu ti hrietlo han Police hai Grenade in an deng a, Grenade puok leiin Police 3 an hliem. Hi bomb puoka Police hliemna tuok hai chu Dharmendra Das, Tilak Nath le R K Rajesh Singh hai an ni a, R.K. Rajesh Singh hi a hliem inrik a hril a nih. An reng hin Haflong Civil Hospital­a admit an nih.

A naupa nuhmei neinaah hmeithai 18,000 a fiel
PALANPUR:  Mehsana based business men Jitendra Patel ‘Jitubhai’ tia hrietlar chun zani hmasa khan a naupa nuhmei neina huna moneitu le mo hai malsawmpek ding le an inneina lawmpui dingin north Gujarat­a districts 5 haia inthawk hmeithai mi 18,000 a fielkhawm. Inneina hi Derol hmuna nei a ni a, hi taka hin Banasakantha, Mehsana, Sabarkantha, patan le Aravalli district haia hmeithai hai chu special guest in an thang tawl a nih. Hienganga thil thaw hi vangduoinain thenkhat chun an ngai a, sienkhawm hiengang ngaidan hi ngaidan/ringna indiklo (superstitions) a nih ti sukchieng ka nuom leia thaw ka nih tiin Jitubhai chun a hril.

Hi huna thang hmeithai hai chu blanket le thingkak pek anni bakah hmeithai harsa zuol 500 hai chu an insung enkawlna dingin Bawngpui pek an ni bawk.

Jharkhand­a bomb puok­ah Police 7 an thi
PALAMAU:  Jharkhand­a Palamau district sunga Chatarpur Japla road, Kala Pahari village a chun  zani hmasa zan khan Maoist hai bomb changkam Police chuongna motor in a chilpuok leiin Police 7 an thi bakah 6 an hliem a, hliem hai laia 2 hai chu an hliem inrik. Police thi hai laia pakhat chu Havaldar niin, pakhat Chowkidar, 4 constable le pakhat dang chu an chuongna motor khaltu (driver) a nih.

R­Day Parade award dawngtu hai puong
NEW DELHI:January 26, 2016 nia Rajpath, New Delhi hmuna 67th India Republic Day hmang hunaa parade­a thang lawmman latu ding hai Ministry of Defence in a puong tah. Hi dungzui hin service category­ah Assam Regiment le para­military forces and other auxiliary category­ah Border Security Force hai chu best marching contingents a thlang an ni a, West Bengal chu Tableau category­ah first prize dawngtu dinga thlang an nih. Tripura Tableau chu pahnina le Assam Tableau chu pathumna an nih.

Lawmman hai hi Ministry of Defence in function a huoihawt huna  sem le inhlan ning an tih.

Sin thaw tha lo thawktu hai chunga action lak pei
NEW DELHI:  PM Narendra Modi chun  Pro­Active Governance and Timely Implementation (PRAGATI)  hmanga sawrkar thlungpui hnuoia Secretary tum tum hai zani hmasa khan an pawlpui a, customs and excise sectors haia mipuiin an lungawinawna sawrkar kuoma an intlun rawp hlak  inrang taka sukfel lova a um hlak na thuah, sawrkar thawktu, hienganga mipui harsatna chingfel  zung zung lova sukchai tuhai chunga action na tak lak pei a ni ta ding thu a hril. PM chun Secretaries hai hi state tum tum haia Central hmalakna le sinthaw tum tum hai a hrilpui.

VAWISUN THUPUI
“A thilthawtheinan hnuoi chu a siem a, a varnain khawvel chu a tungding a, a hrietthiemna chun vanhai khi a keiphar bawk a;   ­ Jeremia 51:15

Editorial
Lemchangtu

Hi khawvel hih lemchangna tuolzawl lien takel a ni a. Mitin hi lemchangtu seng ei ni a. Lemchang thiem le titakzeta thaw hlaktuhai chun  a entuhai mit an tlung a, hrietzing an hlaw pha hlak. Titak lo le pawlawt taka lemchangtuhai ruok chu a entuhai ta dinga nghawkum le mit sukkhamtu el chau an ni a, mihai ngainat hlaw nekin mihai ngainep an ni hlak. Titakzeta lemchangtuhai ruok chun mihai ngaisang le ngainat an hlaw a, an lemchngna ennawn an nuom hlak.

Hi khawvel hi mihriem hai khuolzinna ram a ni a. Lemchangtu han inlang hun sung sawtnawte seng an nei a, ei hmuzui nawk ta ngai naw ang hin, hi khawvela hin cheng hun sung bituk ei nei vawng a. Lemchangna tuolzawlah lemchangtu thenkhat an hung inlang zawk a, an bo vang vang a, a then chu hun sawt deu an inlang ang hin mihriem hai dam sung hun khawm hi inchen lo tak a nih. Thenkhat naute an ni laiin an thi a, thenkhat ruok chu kum tam tak an dam a, an tar huna an thi chau hlak.

Hi khawvela hin saruokin ei hung piengsuok a, saruok vekin ei kir nawk ding a nih. Ram hla taka inzin ang ei nih. Khuol ei inzin chun kir nawk a ngai hlak. Kir nawk ngai lova inzin hi a um thei nawh. Hi khawvela hin thlarau khawvel a inthawkin ei inzin a, ei cham sunga ei khawsak dan ang peiin ei kir nawk huna khawm ei umna hmun ding a hung hril ding a nih. Mikhuolna hmuna chun, zurui, insuolpui nei, rukruk le pawlawt taka um hi thil thaw chi a ninaw ang bawkin, hi ei khuolzinnaah hin khuolzin lungril putin fimkhur taka nun hi uluk ding a nih. Mikhuolhai lai mi tha an tam chuna mikhuoltu khuo hai ta dingin a thawvengthlak hlak.

Hi khawvela hin kum iengzat am i cham ta a? I kir hun ding i hriet am? inzin ruolpui kir nawk ta an tam hle ta ngei ring a um. Tuhin kir nawk dingin inpei am? I lan peinaw chun insiem that a hun. Hi khawvela hin cham sawng thei ding hlak ei ninaw a, ei dam lai hun hi ei hmang that a tul seng a nih.

Khawvel hi ei kumhlunna ding amani tiin duamnain ei sip a. Hang ngaituo chieng ta, naupang inhnel a laklaw khawm hril lova bang nawk ta ang hi mihriem nun chu a nih. Duamna le inhnarna suol leiin indiklo takin hun ei hmang a. Chu thil chun mi tam tak chu an inpei hmain an khuolzinna suktawp pek anni hlak. Inpei hman lova kir ta hai chan ding chu a rinum hle ding a nih.

Ei khuolzinna rama hin B.A., M.A hai khawm inchuk zo inla, khuolzin ei ni ei inhriet si naw chun a pawi hle ding a nih. Ei thiemna le ei varna hai khawm duamna le ruol inhnarna sukpungtu an chang el ding a nih. Lemchangtu nghawkum, a entuhai mit sukkhamtu el chau ei ni ding a nih. Titakzeta lemchangtuhai chauin thlirtuhai mit an suktlai hlak.

Mihriem dam sawt zwng hi kum le ni haia inthawka sut lovin, thil tahw a inthawka sut a ni hlak. Chuleiin, thil tha thaw nuom lo chu a dam lai khawmin a thi a nih. Thil tha thawtu ruok chu a thi hnung khawmin a hring zing hlak. Fakrukna tirdakum le hlepna pawrche le damsung hun hmangtuhai hin an khuolzinna khawvel hi an suktawp a, retheina le inrumna hmuna a mi keilut a, ei chanvo inchupekin an mi kawk zui a, a tawpah suoka mi siemtu a hung ni hlak.

Ei pienga inthawka ei thi ni chen hi ei lemchang sung chu a nih. Thlirtuhai mittlung le lawmman hmu tlak ei ni theina dinga nasa taka thang lak hi ei thaw ding makmaw a nih. Hlim ni le lungngai ni, thlemna karah, lungsenna le buoina kar a hai khawm zam lova ei hringnun hi ei khal ngil hram hram a tul. Ei hun hmang liemta hai kha hratnawna a hmang lovin, hratna le thil tha tam tak thawna a tuta ei hun hmang mek hi hmang ding ei nih. Lemchang thiem, lawmman hmu tlakin a mi hlangkai pha ngei ding a nih.

Post a Comment

Powered by Blogger.