Dist. level India Republic Day hmang
CCPUR: Jan. 26, 2016, 9:00AM khan DC Office Complex, Tuibuong­ah District Level 67th India Republic Day hmang a ni a, Lunminthang Haokip, IAS, DC, CCPur khuolliena thangin India flag keipharna a nei bakah contingents hai salute lakna a nei.



DC CCPur chun, district­a law & order tha um theina dinga sun le zana duty enforcement agency le paramilitary forces hai chunga lawmthu a hril. State sawrkarin 67th Republic Day huna financial assistance package 2 a puong thu, hi le inzawma beneficiaries 75 hai ta ding bank­ah deposit a nita thu hai a hril. Financial Package 2 hai chu National Family Benefit Scheme (NFBS) le Financial Assistance to Victims of Rape hai an ni a, National Family benefit scheme hnuoiah beneficiaries 66 han one time grants angin Rs. 20,000 seng an dawng ding thu, hi lai hin CCPur block­ah beneficiaries 16, Saikawt­a inthawk 10; Singngat ah 10, Tipaimukh ah 10, Henglep­ah 10 le Tamenglong a inthawk 10 an nih. Financial Assistance to 9 Rape victims kuomah Social Welfare Dept. fethlengin sawrkarin Rs. 1.20 lakh seng a pek ding  thu hrilin hi  lai hin CCPur district­a Thanlon& Saikawt haia inthawk victims 1 ve ve an thang tiin DC chun a hril.

Republic Day hmangnaa hin Appreciation Certificate 88 le Red Blanket 23 sem a ni a, SP/CCPur chun Master John Lalditsak of Saikawt kuomah Bravery Award an hlan. MGNREGS le inzawma Cleanliness competition­ah Tuibuong Block a Molnom in 1st lain Rs. 2000 inhlan an nih. Lamka Block­a HQ veng in pahnina Rs. 1500/­ le Tuibuong Block­a DHQ Tuibuong in Rs. 1000 le   Consolation prize chu Tuibuong block hnuoia mi vawng T. Champhai, M. Songngel; Zomi Colony le Hmar Veng hai kuomah Rs. 500/­ seng DC in an hlan.

PA system hmanga public meeting nei ta lo dingin
CCPUR: Medical Superintendent, District Hospital, CCPur chun zanikhan thusuok siemin; District hospital­ah nitin outpatients 300 vel le damnaw khum 137 haia damnaw admit le enkawl an ni leiin damnaw han risie an nghawk leiin Philanthropic Organisations, student association le Kohran hai tukhawmin tuta inthawk Hospital campus sunga tawnginringna (PA system) hmanga public meeting nei ta lo dingin a ngen.

HSA 55th General Assembly Muolhoi­ah
CCPUR: Hmar Students’ Association (HSA) 55th General Assembly chu Januaray 27­29, 2016 inkar sungin Muolhoi/NC Hills, Haflong, Assam­ah nei ning a tih. HSA Conference­a thang ding CCPur District­a inthawka mi thahnemtawk tak hai chuongna Bus chu zani hmasa zan dar 7 vel khan Mr Balram Singh, Addl. SP, CCPur le KKL hotu han an vailiem. Zanikhan thuoitu thenkhat Conference hmang dingin an suok bawk.

ZSP GHQ President in  P. Nengkhosoi
CCPUR: Jan. 30, 2016 nia Zou Sangnaupang Pawlpui GHQ election um dingah President ni lai P. Nengkhosoi le Gen. Secy. Chinkhenpau le Fin/Secy.­cum­Treasurer hai chu uncontest in kum 2016­19 sunga dinga tlinga puong an nih.

MPC Hqrts General Assembly
CCPUR: Jan. 29, 2016 zing dar 10:30 a inthawk khin MPC Hall, Hmuia Veng, Churachandpur­ah Mizo People Convention (MPC), Manipur General Conferene nei ning a ta, Chawaimawina hunser, report le rorelna um a tih.

Team CT Lian in bufai an sem
CCPUR:  Team CT Lian chun zanikhan Car 4 hmangin Tribal Rights & Land humhimna dinga hringna chan martyrs 9 sung hai an in chitah kanna an nei a, memento, Bufai bag 1 seng le Rs. 100 seng an pek. Martyrs family hai an kan zo zani zantieng 1:30PM khan Blood Bank, District Hospital­ah Mr C.T. Lian, MDC chun thisen unit 1 a pek.


Team CT Lian chun Manipur CM kuomah open letter ziekin, Martyrs hai ruong tuchena vui lova a la umna thuah martyrs hai ruong vui an ni theina dinga hma la dingin an ngen.

Sit ­in­ Protest an nei
CCPUR: January 26, 2016 khan Joint Action Committee (JAC) Against Anti­Tribal Bill chun Police Station tuol lai sit­in­protest an nei. Hi huna hin JAC Chief Convener H. Mangchinkhup JAC in protest an la nei pei ding thu, mipui an sukbuoi naw ding thu a hril a. Feb. 1­5, 2016 inkar sung National Highways haiah Chakka bandh a um ding thu hrilin khawpui sung haia ruok chun dawr le bazar hai bakah office hai khawm hawng a ni ding thu a hril. Police station tuola protest an nei pei ding thu a hril bawk.

NDD thuah Committee indin
CCPUR: National Deworming Day (NDD) le inzawmin District Level Co­Ordination Committee indin a ni a; Chairman in DC/CCPur ruot a nih. Vice Chairman in CMO/CCPur; Convenor in DPM, NHM; Member in ZEO; DPO/ICDS; CEO/ADCC; DNO /RKSK, RBSK/CCPur; DPM, SSA; CCPur Private School Assn. a member 1 le Dist. Community Mobilizer, NHM hai an nih. Committe hin Jan. 30, 2016, 11:00AM khin DC Office­a BRGF Resource Centre­ah meeting nei an tih.

NFCH hnuoia Assistance hmu han documents
CCPUR: National Foundation for Communal Harmony (NFCH) hnuoia Financial Assistance hmu hlak student hai chu an hmatiengin DC Office­ah BO/NFCH –ah document pelut dinga inhriettir an nih. Document peklut ding hai chu­ hming, guardian hming, saving bank account book, passbook, address; Bank IFCS Code No.; Mobile No./Email­Id; Aadhar Card No+photo copy; latest passport, reading certificate; income certificate; student brief history hai a ni a, thu chieng lem office­a  indawn thei ning a tih.

Eksiden­ah mi pakhat a thi, 2 hliem
CCPUR: Zani zan dar 6:30 vel khan DTO Office, Tuibuong bul lai Autorickshaw ni dinga ringhla in Tuibuong tieng pana tlan Pulser Bike a baw a, Bike a chuong Jangminhao (18) s/o (L)Thangkholun of Mawngpijang Village, Sadar Hills a thi a, midang pahni Paotinmang Kipgen s/o Holsei Kipgen of Aigejang village, Sadar Hills le Paochunghnung Touthang of Ngoiphai, CCPur hai an hliem. Hliem hai hi District hospital­a enkawl an ni a, eksidena thi Jangminhao hi tuta Young Pillars College­a Class XI inchuklai niin ei thu dawngna chun a hril.

Kum 2009 Fake Encounter case a hung inlang thar nawk
Chungkham Sanjit chu ama kap hlum ngei a ni thu a puong
IMPHAL: Kum 2009­a PLA thang hlui Chungkham Sanjit Meitei (22) Imphal­a bazar lai inkaptuona tehlem (fake encounter) ­a kap hlum a nina thu chu kum 6 hnungin a hung inlang thar nawk. Hi thil hi CNN­IBN in Police constable Thounaojam Herojit Singh (35) interview an thawnaa inthawka hung inlang nawk a nih.

Mr Th. Herojit Singh chun, kha hun laia Additional SP, Imphal West le tuta hi district bawka SP ni lai  in kap dinga thu a pek leia a kap a ni thu le a kap huna khan Sanjit Singh hin silai a chawinaw thu a hril. A hmaa iengkhawm hril si lova iengleia tuta i puong am tia an indawn naah, Herojit Singh chun, thla hmasa laia hi case thuah court­a hearing ka va thang zo ka kir hnunga ka posting­na police station ngeiah Police Commandos han mi manin darkar 5/6 sung zet an mi hrentang a, ka fena le ka thil thaw hai an min dawn a, himin kan hriet ta naw a, ringzona ka nei tanaw leia ka puong dawk ta a nih tiin a hril. Hi case a intum hi Police 9 an ni a, hi case suizuina hi kum 2010 a kha CBI kuta peklut a nih.

Sanjit kha July 23, 2009 a BT Road, Imphal­a Gambhir Singh Arcade bul laia kap hlum a nih. Hi huna hin nuhmei naupai lai Thokchom Rabina khawm silaimu in a dengfuk leiin a thi ve nghe nghe a nih.

Manipur Police in hi chungthua an hril dan ruok chun Samu Makhong hmuna Bike a hung tlan hai chawl dinga thu an pek huna chawl lova silaia an hung kap leia an hnawtzuinaa nuhmei naupai nu hi an kap fuk niin an hril a nih.

Sawrkar thlungpui khawmin hi fake encounter case thuah Herojit inpuongna a ngaimaw hle a, Home Ministry chun hi chungthua hin thudik zawngsuok a ni ngei ding thu a hril.

Tuta Kerala­a cham mek Union Home Minister Rajnath Singh chun, chanchin a lakkhawm hnunga a bawzui  ding thu a hril.
 
Union Minister of Home Kiren Rijiju khawmin, hi chungthua report chu sawrkar thlungpui khawmin a hriet thu hrilin, a tul anga bawzui a ni ding thu a hril.

Congress leader RPN Singh chun, kum khang chen iengleia hrildawk lova um am a nia tia indawnna siemin an puongna hi an dik le diknaw finfie a ni theina dinga investigation thaw ngei tul a ti thu a hril.

Police Medal mi 6 kuoma inhlan
IMPHAL: January 26, 2016 khan Kangla Fort, Imphal hmunah State Level in 67th India Republic Day hmang a nih. Hi huna hin Manipur CM O.Ibobi Singh khuolliena thangin India flag keipharna le parade hai salute lakna a nei. Hi huna hin CM O.Ibobi Singh chun sawrkar hmalakna le sin thaw hai a hrillang a, Police sin thaw tha mi 6 hai kuoma Police medal an hlan. Police medal inhlan Police officer hai chu­ Dr. Soibam Ibomcha Singh, IPS, IGP Manipur, K Pakeho Mao, MPS Addl. SP Senapati (in­charge of National Highway protection), Ksh. Rajen Singh Havildar 1st MR le Shamlal Pradhan hai an nih.

Parade a chun contingents 120 an thang a, chu lai chun Nagaland armed Police hai khawm an thang. March past hi 1MR ground­a inthawk tan a nih.

J&K le LWE areas­ah IRB  Battaion 17
NEW DELHI: Zanita Union Cabinet meeting chun Jammu and Kashmir le Left­Wing Extremist (LWE) hai hratna states haiah Indian Reserve Battaions 17 indin belsa dinga rawtna um chu a pawmpui tah. IRB battaion 17 indin ding hai laia 5 chu Jammu and Kashmir­a ding an nih. Chhattisgarh­ah 4, Jharkhand le Odisha haiah battalion 3 ve ve le Maharashtra­a battalion 2 indin ning a ta, hi thila ding hin a tuolsung mi hai ngei lak tum an ni a, a tul chun educational criteria khawm sukhnuoi ning a tih tiin ei thu dawngna chun a hril.

IRB hi kum 1971 a indin tan a ni a, tuchena hin state tum tum haiah battalions 153 sanctioned a ni ta a, hi laia 144 indin nitain Jharkhand­a battalion khat chu Specialized Indian Reserve Battalioan a inlettir a nih.

AP President Rule hnuoia sie; SC in Centre hrilfiena pe dingin an hriettir
NEW DELHI: PM Narendra Modi inrawinaa Union Cabinet meeting in a lo rel le recommend ta angin Arunachal Pradesh chu zani hmasa khan President Rule hnuoia sie a ni tah.

Hienglaizing hin Arunachal Pradesh President Rule hnuoia sie a ni chungthuah Congress in Supreme Court ngaituo ding an ngenna thuah zanikhan hearing nei a ni a. Supreme Court chun Arunachal Pradesh President Rule hnuoia sie a nina san hrilfie dingin sawrkar thlungpui an hriettir a, hrilfiena hi January 29, 2016 chena pe ding le kar thara hearing nei nawk dingin a rel.  Hearing hi February 1, 2016 a nei ring a nih. Hi bakah hin Supreme Court chun Arunachal Pradesh Governor khawm President Rule hnuoia sie a nina san report pe ding le hi chungthua hrilhrietna an neinaw nasan an dawn bawk.

BJP in President Rule puonga um hi tha an ti laiin Congress party bakah All Arunachal Pradesh Students’ Union le All Nyishi Students’ Union chun an dodal thu puongin Arunachal Pradesh­ah law & Order chungthua harsatna iengkhawm a um nawh tiin an hril.

 December 16, 2015 khan Congress MLA lungawilo 21 le BJP MLA 11 bakah Independent MLA 2 thangruol han an Chief Minsiter Nabam Tuki chu inban dinga phutin ringzo nawna motion putluta vote la dingin Speaker Nabam Rebia an ngen a. CM Nabam Tuki le ama thlawptu MLA 26 hai chun dodal hai sienkhawm Dy. Speaker T. Norbu Thongdok inrawina hnuoia MLA nuor hai le anni thlawptu han no­confidence motion an putlut chu pawmin an CM  Nabam Tuki thlaktu ding an thlang nghal a. Sienkhawm hi thutlukna hi Gauhati High Court in a hnawl hnungin Assembly Speaker chun hi buoina chingfel dingin Supreme Court a ngen a. Court in ngaituo ding a ti lai zingin Union Cabinet chun Arunachal Pradesh hi President  Rule hnuoia sie dinga a recommend dungzuia President  Rule puonga hung um ta a nih.

JAC in Mizoram Map an raw
AIZAWL: Joint Action Committee (JAC) on Inner Line Forest Reserve in Mizoram pawl chun, Mizoram Map siemtha dinga ngennain January 26, 2016 khan Mizoram Map hmang lai an raw. Map raw naa hin Mizorama pawl hrang hrang­ Mizoram Hnathawktu Pawl, MZP, MSU, FUW, ZWO leh Political party Revolutionary Democratic Party(RDP) thuoituhai an thang. JAC chun, Inner Line Reserve Forest area sq. miles 509, tuta Mizoram sawrkar hnuoia Cachar Forest Divsion­in a enkawl mek chu Mizoram sunga um a nih tiin an hril a,  Mizoram Map hmang lai mek hi an diknaw a nih tia Map hi an raw a nih.

Advisors to AP Governor dingin Dadwal le  Patnaik
NEW DELHI:  President Rule hnuoia sie mek Arunachal Pradesh Governor JP Rajkhowa advisors dingin Delhi Police Commissioner hlui YS Dadwal le IAS officer (retd)  G.S. Patnaik hai ruot an nih. Dadwal hi 1974 batch IPS Officer niin SSB­a inthawk kum 2011 a pension niin Patnaik hi 1980 batch IAS Officer niin Delhi Govt. hnuoia sin pawimaw tum tum a chel hnunga pension ta a nih.

India in Nepal kuomah Ambulance le Bus a pek
NEW DELHI: India sawrkar chun 67th India Republic Day le inzawmin Nepal ram kuomah Ambulance 40 le Bus 8 a pek. Ambulance 33 le Bus 6 hai chabi chu Nepal­a India Ambassador Ranjit Rae in  Nepal­a Indian Embassy hmuna India Republic Day lawm hunah pawl tum tum le School hai kuoma an hlan a, Ambulance dang 7 le Bus 2 hai chu Consulate General of India in Birgunj hmuna pawl tum tum hai kutah an hlan. Nepal­a India Ambassador Ranjit Rae hin Library 52, School le Nepal­a training centre tum tum haia lekhabu a pek bawk.

Assam in security forces companies 600 a ngen
GUWAHATI:  Assam sawrkar chun Assembly Election hung um ding le inzawmin venghimna sin thawtu dingin sawrkar thlungpui kuomah armed security forces companies 600 hung pe dingin a ngen tiin Assam Inspector General of Police (Law and Order) SN Singh chun a hril. Assam Assembly Election hung um ding hin polling stations 24,800 vel hawng ni dingin Mr Singh chun a hril. Assam Assembly a hin seats 126 a um a, tuta sawrkarna siem mek tu chu Congress an nih.

Samak kap hlum
GUWHATI: Assam­a Kaziranga National Park­a Burha Pahar range a chun zani hmasa zan khan  Samak pakhat kap hlum nawk a nih. Samak kap hlumna hmuna hin M4 Rifle cartridges hmu a ni leiin Samak kap naa hin helpawl hai an inawl ringhla a nih. Samak kap hluma um hi a ki lakhmang saa hmu a nih. Tuta thla (January, 2016) sunga Kaziranga National Park­a Samak kap hluma um a 3­na a ni tah.

Jail intang hai intang hun a suktawi pek
CHANDIGARH: Haryana sawrkar chun Republic Day ni khan a state sunga thiemnaw inchangtir Jail­a khum mek hai intang hun a suktawi pek tawl. Hi dungzui hin kum 10 le a neka tam intang dinga thiemnaw inchangtir hai chu ni 60 in an intang hun ding a suktawi pek bakah kum 5 le a hnuoitieng le kum 10 neka tlawm intang dinga thiemnaw inchangtir hai ni 45 in an intang hun ding a suktawi pei. Chun, kum 2 annawleh kum 5 neka tlawm intang dinga ti hai chu ni 30 sungin an intang hun a suktawi pek bakah  kum 2 neka tlawm intang ding hai chu ni 15 in a suktawi pek bawk.

Pak. Punjab Province­ah School hai khar
ISLAMABAD: Pakistan­a Punjab province pumpuia schools hai chu Taliban helpawl hai vauna leiin khar vawng an nih. Charsadda hmuna Bacha Khan University chu Jan. 25, 2016 khan tawite hawng a ni a, sienkhawm tiemchim um lo dinga khar nawk nghal a nih.  Pakistan in intelligence report a dawng danin Pakistan ram sunga school hai bei dingin Afghanistan rama inthawk Taliban fighters 13 Pakistan an hung lut niin a hril. Tulai hnai el khawm khan Taliban faction khat han university an run leiin  mi 21 zetin thina an lo tuok ta a nih.

VAWISUN THUPUI
Kei mi hung ko la, lo dawn ka ti cheh a, thil ropui le inthup i hriet naw hai chu inentir ka ti che.   ­ Jeremia 33:3

Editorial
Mi puitling zie
Mihriem puitlingna suklangtu zie hran hran tam tak um thei a ta, chu hai lai chun ringngam le ringtlak nina hi a pawimawhai laia mi ning an tih. Lekhathawn thawktu ding tak ngiel khawmin mi ringtlak ei dit hlak. Maw inphurtir tlaka ei ngai hai hi mi ringtlaka ei ngai hai an nih. Thaw sawt le kum upatna suonga mawphurna pawimaw chel le chang tum ngawt dam hi thil indik niin an lang naw a, mawphurtu ni dingin mi ringtlak le mi ringngam ni a pawimaw ti hriet a tul hlein an lang. Taksa puiting le upatna ringawta rinngam hi chu tulai huna ding chun thil thei lo a ni tah. Hi lei hin ieng thila khawm nisienla mi han mi ringtlak hi an zawng hlak.

Thil chinchang hriet hi puitling zie dang pakhat ni nawk a tih. Kawng dangin hril inla, thiemna ang tluk vel ning a tih. Sin thawna a ni am, rawngbawlna a ni am, miin a thawna dinga a tul chin  le hmasawn dan ding a a hriet makmaw chin a hriet a ngai tlat. Chun, thil iengkim hin ningkhawng a nei a, hi lem hi chu inchukna le lungril hmang pei a inthawka hriet thei chi a ni nghal a. Chinchang hrietna le ningkhawng hrietna hai hi thiemna le hrietna kawnga puitlingna zie a nih. Hi kawnga khawm hin thanglak zing a tul bawk.

Nghetna hi puitlingna zie  pawimaw tak a ni bawk. Sin le umna hmun chieng lo chu mi nghet a ni thei nawh. A thawtu tam lei dam, a phurthlak lei ela thil tha thaw hlak ni lo, a that lei dam, an dik le a tul leia thaw tlat le um tlat hi a pawimaw hle. Inkhawm le thawlawm thaw hai khawm hi a tul le a pawimaw leia thaw tlat chi a nih. Mihriem umna hmun nghet nei lova insawn insawn hlak hai chu tukhawma an ringzo ngai naw a, mi lepchie le mi zawmthawin an ngai a, mi tak biekin an biek ngai nawh.

Mihriemin puitlingna hi ei mamaw em em el a, hi lei tak hin nu le pa hai chun an nauhai hi mi puitling ni ngei dingin an inchuktir mawl mawl hlak. Nauhai lai khawm a puitling  awl bik an um a, taksa, lungril le sin thawna kawnga puitling zie nei le nunpuituhai chun nu le pa lawm an hlaw hlak. Taksa puitling ni ta si, lungril puitling thei der lo, nu le pa thaw suok sa chau ringa um hai hi nu le pa hai sukbeidawngtu le suk harsatu an nih. Tulaia mihriem khawsakna sukharsatu em em pakhat chu, mihriem ni ve si, puitling zie put thei der lova um hai hi  an nih.

Ei khawtlang nunah huou huou tam taluo hin a mi suksiet nasa hle a. Thil hi ei thawtlang tam taluo a, ei inpumkhat pha mang si naw a, thawtlangna le huou huouna hai hin nun titakna le ruol elna a mi pek naw bakah puitlingna zie a mi pek bawk naw leiin uor chi niin an lang nawh. Puitling zie ei put theina ding chun mani ngeia thawsuok nei ngei ngei hi a tul a nih.

Taimakna le titakna hai khawm hi mi puitling zie laia thang, ngirhmun pawimaw tak cheltu an nih. Mi titak le taima hai hrim hrim chu mi ringum le indik an ni nge nge hlak. Thudik le thukhel hriet hran thei lo hiel khawpa tawng puot puot, tidakna nei der lo hai hi tukhawma an ringngam naw a, mawphurna incheltir  tlakah an sie ngai nawh. Puitling zie nei ding chun titakna nei a tul. Titakna  nei naw hai chu an pumduong lienin tha hle angin inlang hai sienkhawm, mi han ringtlaka an ngai naw a, a pumduong a tha a chu mi pamhmai a nih an ti hlak.


Post a Comment

Powered by Blogger.