Dist. level Republic Day
CCPUR: January 26, 2016, 9AM hin DC Office Complex, Tuibuong, CCPur­ah District level 67th Republic Day hmang ning a tih. Hi huna hin Mr Lunminthang Haokip, IAS, DC, CCPur chu khuollien­a thangin National Flag keipharna le parade hai salute lakna nei a tih. 9AM Assembly of contingents; 9:15AM Arrival of SP; 9:30AM Arrival of Chief Guest; 9:32 AM Inspection of Parade; 9:35AM Hoisting of National Flag; 9:40 AM Address by the Chief Guest; 9:50 Cultural item by JNV students; 10:00AM a inthawk sin thaw tha hai kuoma appreciation le Lal iemanizat kuomah Puonsen inhlan ning an ta, Tuia tla mi 3 hringna sanhimtu Master John Lalditsak of Saikawt kuomah Bravery Award (Puonsen) inhlan ni bawk a tih.


Lal puonsen dawngtu dinga thlang hai lai Rohminglien Fimate (Saidan) le C. Lalzawmliana (Kawnpui) hai an thang.

Appreciations mi 82 inhlan ding hai lai H. Lalzarlian (Head Clerk EE/PWD); Chawngparmawi, Counter Attd. Lamka College; Dr Phirthanglien Buhril, DACO; Nengneilam Saum, W/ASI; Chalmawilien, AO, DRDA/CCPur; Rochunghnung, Peon, DRDA/CCPur; Laldawnlien Varte, President, HYA (JPO); Mangcha Thangjom, President, YMA (JPO) le Mercy Siamremkimi, NCC (Rayburn College) hai an thang.

JAC in Police station tuolah Sit-in-Protest
CCPUR: JAC Against Anti­Tribal Bills chun January 26, 2016, 9AM a inthawk khin CCPur Police Station tuol, Tiddim Road zulah Dharna/Sit in potest nei an tih. Bills 3 hai chungthua Tribal Martyrs hai ruong Morgue a ni 150 deuthaw vui lova la umin, vawisun chen Manipur sawrkar tienga inthawk lungawi um tawk dawnna a la um naw b akah Bill 3 hai chungthua Manipur Assembly Special Session nei dinga an phutna sukpuitling pek a ninaw dodalnaa JAC thuoitu hai hin sit­in­protest nei an tum a nih. Chun, January 26, 2016, 6­7PM inkar sungin Tribal martyrs hai inzana le sunnain JAC chun mipui hai mani chengna in chita candil sitvar dingin an ngen.


JAC le leaders han joint meeting
CCPUR: Zanikhan JAC Information Centre, KKL Complex­ah JAC Against Anti­Tribal Bills  thuoituhai leTribe/Council leaders han joint meeting an nei. Hi huna hin Tribal martyrs hai ralna sum le pai, puon pekkhawma um hai thina tuok sungkuo hai kuoma February thla sung ngeia pekdawk dan ding thangin thu pawimaw tum tum an hriltlang.

Seminar thang dingin Delhi an pan
CCPUR: January 28, 2016 khin Centre for North East Studies and Policy Research, India Arab Cultural Centre Building, Jamia Millia Islamia, N.Delhi huoihawtnain an office­a Centre Conference Room­ah “One­Day National Seminar on Interrogating Dist. Councils in India’s North East” um a tih. Hi taka thang ding hin zanikhan Manipur­a inthawk Langkhanpau Guite, Chairman, ADC/CCPur le  Dr. Yaronsho Ngalung, Chairman, ADC/Ukhrul  han New Delhi an pan.

Morgue­a thungkhawmna hmun an siemtha
CCPUR:  Alert Zone WhatsApp Group inrawinain zanikhan All Tribal Movement Lamka inti le The Singtangmi WhatsApp Group thangruol han District Hospital Morgue­a martyrs hai ruong nghaka thungkhawmna hmun chu a chung Rangva inkhum tumin siemthatna sin an thaw. Hi thila ding hin Alert Zone WhatsApp Group chun Rs. 30,000 sengin Rangva bundle 7; Duitin 16, Duichar 16, ban 16  le thil tul dang dang an inchawk.

Survey thawa fe hai an hung kir, report an pek
CCPUR: Manipur Tribal Movement  Road Construction a Chairman, G. Nengdouthang inrawinaa January 22, 2016 a Preliminary survey thaw dinga suok hai chu zani hmasa khan Tui­thaphai an hungkir nawk tah. Zani zani 2:30PM khan MTMRC thuoitu hai chun an inzinna report an pek.



Sinal khuoa inthawk Tuivai leilak chen km. 14 survey an thawnaah lampui siemthat tul chu km. 4 vela sei a ni thu; Sinzawl le Tuivai leilak inkar ah Culver 1.5m hai 16 a siem ding; pipe culvert 3 siem belsa a tul ding niin an hril. Lampui inthuk tak taka inkhur hai hrukbitna dingin JCB/Dozer  hmang a tul ding thu, sin thawna dingin Rs. 30 lakh vel a tul ding  niin estimate an siem.

MTMRC in Tribal martyrs hai ralna sum pekkhawm hai lampui siemnain hmang an tum tia hrilrik um thuah  JAC a inthawk Re.1 khawm an dawngnaw thu hrilin survey thawna ding sum le pai le motor hai khawm mi inphal thenkhatin an tuok a ni thu an hril. Tlangmi hai ta dinga lifeline pawimaw Guite road­a Sinzawl le Tuivai leilak inkar lampui siemthatna dingin mipui lai sum dawlkhawm a, chu sum hmanga sin thaw tum a ni thu MTMRC Chairman chun a hril.

Works Secretary chun, Sinzawl –Tuivai leilak inkar lampui km. 14 vel siemthatna dinga hin Culvert hmun 16 a siem bel sa ding, sawrkar sum hmang a remchangnaw ding leiin hi thila dingin Rs. 30 lakh vel nei a ngai ding thu a hril.

Presidential Award inhlan a ni ding
CCPUR: Pu Lalthankunga Hmar, s/o Upa H.C. Zaikung, tuta Superintendent, Central Excise and Customs Zone, Shillong sin thaw lai mek chu Ministry of Finance (Dept. of Revenue) in Notification an suo dungzuiin January 26, 2016 nia India’s 67th Republic Day, New Delhi hmuna hmang huna Customs & Central Excise Presidential Award 2016 dawng dinga thlangsuok hai lai a thang ve.  Inkhina hmawl chi hran hran hmanga kum 10 sunga a sinthaw dan, ACR, Award/reward a dawng ta haia inthawka hi Award dawng dinga thlangsuok ve a nih. January 27, 2016 nia New Delhi hmuna World Customs Organisation Day hmang huna “Certificate of Merit” dawng dinga thlang a lo ni ta bawk a nih. A hlawtlingna ei chanchinbu chun a lawmpui hle.
Vawisun 67th India Republic Day hmang ding

New Delhi­a chun French President Francois Hollande khuollienin thang a tih
NEW DELHI: January 26, 2016 (vawisun) hin India ram state tin le district headquarters tin haia chun 67th India Republic Day hmang ning a tih. New Delhi­a Rajpath hmuna India ram pumpui huopin 67th Republic Day hmang ning a ta, French President Francois Hollande chu khuollienin thang a ta, President Pranab Mukherjee in parade hai salute lakna nei a tih. India ralthuom tha hai; field tum tuma sawrkar hmalakna le hlawtlingna, culture le social tradition hran hran hai pholang ni bawk a tih. Tukum India Republic Day hmangnaa hin a vawikhatna dingin French Army Contingents member 76 hai parade­ah thang an ta, India rama states 17 hai le Union Ministries 6 hai Tableaux parade­ah thang an tih. Hollande hi ramdang president India Republic Day khuolliena thang a pangana ding a nih.

French President Hollande hi January 24, 2016 a kha India rama ni 3 sung cham dinga hung tlung a ni a, zanikhan Rashtrapati Bhawan­ah ceremonial receptioon nei a nih. Hollande hi President Pranab Mukherjee le PM Narendra Modi han an lo lawmlut.

Tukum Republic Day huna hin  India in a siem aircraft carrier Vikran le submarine Kalvari hai Navy tableaux in pholang an ta, BSF Camel contingent hai parade­a thang lovin Army dog squad hai  an thang lem ding bakah Paramilitary forces hieng ITBP, CISF le SSB hai chu tukum Republic Day parade­a hin thangnaw nihaia, women­only stunt contingent han motorcycle riding skills entirna nei an tih.

Delhi­a India Republic Day hmang ding le inzawm hin venghimna nasa taka sukkhau a ni a, a bik takin  Rajpath le a se vel a parade neina ding hmun haia chun venghimna sin sukkhau zuol a ni a,  Home Minister Rajnath Singh chun zanikhan National Security Advisor, Ajit Dival le Chief Intelligence Agencies hai leh security ngirhmun an ennawn. Delhi khawpui le a se vel metros, bazar hmun, shopping malls, railway station le inter­state bus terminals hai thangin hmun pawimaw zuol haiah security personnel 40,000 sie an nih.

Republic Day hmangna ding Rajpath bula building sawng 71 hai chu January 25, 2016 hma khan khar le hieng hin hai hi police han uluk takin an enfel bakah Rajpath le a se vel km. 2 biel huop sunga insawng chung haiah sniper sie vawng an nih.

Tulai hnaia Pathankot­a Indian Air Force hmunpui terrorist han an bei bakah French President  Francois Hollande khuolliena a thang ding leiin kum dang nekin venghimna sukhau a nih. Rajpath chu no­fly zone a puong a ni a, hnuoi tieng le chungtieng­ah  Prime Minister Narendra Modi le French President Hollande hai hnaiah ieng thil khawm sie phal ninaw ni a, mi pawimaw hai thungna hmun hai chu France Commando, NSG le SPC han khau takin veng an ta, venghimna (security) thuo 7 sie ning a ta, thuokhatnaah Delhi Police hai an duty ding a nih. Delhi khawpui sung  hmun pawimaw zuol haiah CCTV 15,000  fit vawng a ni a, Rajpath hmuna hin metres 18 dan peia CCTV sie a ni a,   venghimna sin thaw ding hin paramilitary forces 15,000, Delhi Police a inthawk 34,000 le National Security Guard (NSG) 1,000 hmang an ni ding thu Police thusuok chun a hril.

Kangla Fort­ah State level republic Day
IMPHAL: Vawisun hin Manipur­a chun Kangla Fort­ah state level in 67th Republic Day hmang ning a tih. Hi huna hin Schools, Colleges, NCC, State Police, paramilitary forces le cultural troupe tum tu m hai parade­ah thang an tih.

Helpawl tum tum han Republic Day an boycott leiin Imphal khawpui sunga chun venghimna sukhau a nih.H mun pawimaw hai venghimna sukkhau zuol a ni bakah  State Level­a Republic Day parade neina ding 1st Manipur Rifles Parade ground chu sun le zan venghimna sin uluk taka thaw a nih.
 
Vawisuna 67th India Republic Day hmang ding le inzawmin Manipur Governor V. Shanmuganathan chun Manipur mipui hai Republic Day chibai a buk.

UNC bandh leiin motor an intang
IMPHAL:  United Naga Council (UNC) in January 24, 2016 zanril­a inthak darkar 48 sung aw dinga Manipur Hill district haia General Strike/Bandh an thaw leiin National Highway No. 2­a Mao Gate a chun  nitin mamaw phurtu le passenger phurtu motor tam tak an intang. Mao gate­a motor intang hai lai hin Trucks 20, passenger phurtu Winger 2 le DI Truck 5 an thang. Chun, Jiribam District Demand Commitee in District puitlinga hlangkai an ngenna le inzawma tiemchin um lo bandh an thaw leiin Yaingangpokpi bul lai Jiribam­ah Trucks 92 lai zet an intang bawk niin ei thu dawngna chun a hril.

6th National Voters Day hmang
IMPHAL:  Zanikhan GM Hall, Kangla Park, Imphal hmuna “Inclusive and Qualitative Electoral Participation” ti thupui hmangin Election Dept. Govt. of Manipur huoihawtnain 6th National Voters’ Day hmang a nih. Hi huna hin Chief Secretary (Election), IAS O. Nabakishore Singh; Y. Rameshchandra Singh, Commissioner, State Election Commission of Manipur le Naorem Prabin, Joint Chief Electoral Officer hai chu Chief Guest, functional President le Guest of honour in an thang.

O. Nabakishore chun, India mi kum 18 tling chin hai phawt chun vote an nei thei thu, election huna voters hai ta dinga vote thlak a pawimaw zie uor takin a hril. Democracy hlawtling le hlawsam hi Media hai chunga an nghat lien hle a, ei rama muongna le inremna a um theina ding khawmin media hai chunga mawphurna an nghat lien hle a nih tiin a hril. Thalai hai hi zinga ei ram le hnam ban pawimaw la hung ni ding an ni leiin lungril ngaituona hrisel an nei a pawimaw tiin a hril.

Hi hun hmangnaa hin Electoral Roll a hming zieklut thar iemanizat hai kuomah Voter Identity Card sem a ni bakah State Level essay le Quiz competition neia um prizes hai semna nei a ni bawk.

Thangal road­a Temporary market thiek
IMPHAL:  Jan. 4, 2016 nia simkhawlei richter scale 6.7 a hratin Manipur a sawihning huna Keithel market a suksiet leia hi hmuna inthung hai bazar inthung lailawk na dinga state sawrkarin Thangal road­a Temporary market a bawl chu mipui dodalna nasa tak leiin zanikhan thiek tan nawk an ni tah.  State sawrkar chun tuta temporary market a bawlna hmartiengpanga public parking hmuna hmang le BT Road le Old Assembly Road lai Temporary market ding bawlna sin a tan nawk mek.

KYKL cadre pahni man
IMPHAL:  Imphal East District Police Commando chun January 23, 2016 khan Andro area­ah KYKL cadre ni dinga ringhla pahni an man. Mana um hai chu ­Ningthoujam Jugindro Singh (40) s/o (L) N. Leibakmacha Singh of Tamukhong Awang Leikai le Ksh. Abung Singh (35) s/o Ksh. Rajen Singh of Tamukhong Makha Leilai hai an ni a, thu indawnna nei an ni huna, mipui laia sumdawlnaah an thang hlak thu Police kuomah an inpuong. Andro Police Station­ah case siemkhum an nih.

Police medal 2016   dawng dingin personnel 841
NEW DELHI: Vawisuna New Delhi hmuna 67th India Republic Day hmangna huna hin Police personnel 841 hai kuomah Police medals inhlan ning an tih. President’s Police Medal for Gallantry  (PPMG) chu personnel 3; Police medal for Gallantary (PMG) personnel 121 le President Police Medal for Distinguished Service personnel 89 le Police Medal for Metritorious Service  personnel 682 kuoma inhlan ning an tih.

Border Security Force (BSF) a inthawk eini tlangmi Gentinlal, Commandant, STC BSF, CCPur, Manipur; Central Bureau of Investigation (CBI)­ah  MT Mang, DSP, ACB Guwahati, CBI hai chu Police Medal for Meritorious Service dawng dinga thlang  hai lai an thang.

Manipur­a inthawk Police Medal for Meritoriuos Service dawng dinga thlang hai chu – Kh. Sashikumar, Inspector, CID (SB), Imphal; R.K. Sarat Singh, Havildar, 2nd Bn. MR, Imphal; Md. Rahimuddin, Havildar, 2nd Bn. MR; O. Jibonchandra Singh, Inspector, CID (Secuity) PHQ, Imphal; Palmei Shantikumar Kabui, SP/CID (Security) Legal Cell, PHQ; Kh. Babudhon Singh, Rifleman, MPTC, Pangngei le Oinam Achoubi Devi, ASI, CID(SB), Manipur hai an nih.

Chun, President’s Police Medal  for Distinguished Service dawng ding hai lai hin Manipur­a inthawk  Bisham Dev Thakur, Jemadar, MPTC, Pangngei a thang.

Chun,  Republic Day hmang  huna hin Armed Forces personnel 365 hai kuomah sipai chawimawina Gallantry Awards inhlan ni bawk an tih. Sena Medal (Gallantry) Award dawng ding hai lai eini tlangmi Major Liengousiem Gangte, 12bn. Assam Rifles khawm a thang.

J&K Police han an chawl sung silai an kawl a khap
SRINAGAR: Kar hmasa laia  Police constable Shakoor Ahmed Parey in Bijbehara SDPO Irshad Ahmad Bhat chengnaina inthawk silai 4 zet a tlanhmangpui leiin Director General of Police K Rajendra chun thusuok siemin; Jammu and Kashmir Police personnel hai chu an chawl (leave) hun sungin an silai hai chawi lova an thawkna post annawleh police station hnai taka sielut dingin an hriettir. Police personnel silai le tlanhmang pa hin helpawl a zawm ring a nih.

Maoist nupa tuok khat kap hlum
DEOGARH: Odisha­a Deogarh le Anugul district hai inrina Bhubaneswar hmuna zani hmasa zantieng khan Security Forces le Maoist hai an inkaptuo a, inkaptuonaa hin Maoist nupa tuokkhat Sushil le a nuhmei Soni hai kap hlum an nih. Sushil hi sawrkarin luman Rs. 20 lakh le a nuhmei Soni hi Rs. 5 lakh luman neia a lo puong ta a nih. Inkaptuona hmuna hin ralthuom le silaimu tam tak bakah Maoist lekhapawimaw dapdawk le man a ni bawk tiin Director General of Police K.B. Singh chun a hril.

SC/AT Amendment Act vawisuna inthawk
NEW DELHI: Scheduled Caste (SC)/ Scheduled Tribes (ST) (Prevention of  Atroccities) Amendment Act, 2015 chu January 26, 2016 a inthawk hmang tan ni tang a tih. SC/ST Amendment Act a hin President Pranab Mukherjee chun December 31, 2015 khan hming ziek hnanin a lo pawmpui ta a nih. Hi Amendment Act­a hin SC/ST hai suknawmnatu hai hremna ding dan thar bakah  hi chungthu le inzawma indik taka sin thaw lo officials hai hremna ding dan a thangsa a nih.


BJP President dingin Amit Shah bawk
NEW DELHI:  January 24, 2016 khan BJP National President ding thlangna nei a ni a, President ni laizing Amit Shah (51) bawk khingtu um loin BJP National President dingin thlangtling nawk a nih. PM Narendra Modi le Union Home Minister Rajnath Singh hai thangsain BJP thuoitu 20 zetin Amit Shah hming hi an proposed. Hi inthlangnaa hin BJP thuoitu hlun L.K. Advani, Murli Manohar Joshi le Yashwant Sinhai hai ruok chu an thang tawl nawh. Amit Shah hin BJP National President tuta inthawk kum 3 sung a chel nawk ding a nih.

Padma Awards dawngtu ding hai puong
NEW DELHI: Vawisuna India Republic Day New Delhi­a hmang huna Padma Awards 2016  dawngtu ding hai p uong a nita a; Padma Vibhuhans dawng dingin mi 10, Padma Bhushans dawngin mi 19 le Padma Shri dawng dingin 83 thlang an nih.

Padma Vibhushan dawngtu ding hai lai Actor Rajnikant khawm a thang.

Padma Bhushan dawngtu ding hai lai hin Manipur­a inthawk  Art­Theatre category­ah Heisnam  Kanhailal a thang ve. Hi Award dawngtu dinghai lai hin Bollywood actor Anupam Kher; Sports­ah Saina Nehwal le Sania Mirza hai khawm an thang. Chun, Padma Shri dawngtu ding hai lai Actor Ajay Devgan, Priyanka Chopra hai an thang bawk.

Cabinet in AP­ah PR sie dingin
NEW DELHI: Zani hmasaa PM Narendra Modi inrawinaa Union Cabinet chun Arunachal Pradesh chu President Rule hnuoia sie dingin a recommended. Arunachal Pradesh­a hin thla hmasa laia kha  politics thila buoina um a ni a, hi lei hin state Assembly inthung khawm nei thei lova um an nih. Union Cabinet chun Arunachal Pradesh Assembly chu Suspended Animation­a sie dingin a recommend bawk a nih. Congress le Opposition party hai chun President Rule hnuoia sie dinga Cabinet in a recommend­na hi an dem thu an puong tawl.

Congress in AP a President Rule sie dinga Cabinet thuhril hi Supreme  Court­ah an hek a, hi thua hearing chu January 27, 2016 khin  nei ning a tih.

NIA Custody­ah  Feb. 5 chen um dingin
NEW DELHI: ISIS terrorist hai le inzawmna nei dinga ringhla leia tulai hnaia India ram hmun tum tum haia man mi 12­ Abdul Ahad, Imran, Mohd Afzal, Mohd Sharif, Mubabiir Mushtaq Sheikh, Mohd Alim, Syed Mujahid, Suhail Ahmed, Asif Ali, Njmul Huda, Mohd Obaidullah Khan le Mohd Hussain Khan hai chu  zanikhan Special Court hmaah inlangtir an ni a, Court chun thu indawnchieng dingin Feb.5, 2016 chen NIA Custody­a la um phawt dingin an chungthu a rel.

Mana um hai laia thenkhat hi ISIS thang dinga mi thlemtua thanga intum an nih. Chun, mana um dang pahni Hyderabad mi ve ve ­Abu Anas (24) le Nafees Khan (24) hai chu zani hmasa khan Court in ni 13 sung NIA Custody­a um dingin a rel bawk.

India le French in pacts 16 an ziek
CHANDIGARH: Zani hmasaa Chandigarh hmuna India –French Business Summit nei hunah India le French sawrkar han  thawtlangna ding agreements 16 an ziek. Agreement an ziek hai lai hin ‘Make  in India’ initiative hnuoiah  Airbus Group le Mahindra han Helicopter siemna ding a thangsa.  MoUs   hi PM Narendra Modi le  French President Francois Hollande hai hrietpuinaa ziek a nih.

VAWISUN THUPUI
Chuleiin, tuhin in thilthawhai le in umdanhai chu siemtha unla, Lalpa in Pathien rawl chu awi ro; chuongchun, nangni dodala Lalpain  thil tha  naw a lo hril ta khawm chu lamlet a tih.   Jeremia 26:13

Editorial
Ringnawtuhai thaw dan

Ei pi le pu hai huna thil tlung zen zen ngailo, nuhmei suollui, tuolthat, mi suom, fakruk, nuhmei suollui hnunga that, in raw le tharum insuona chi tum tum a tlung rawn ta hle ti chu a hretu seng ei nih. Ngai makna chang khawm ei hriet ta naw a, a tlung ding ang hrima ngaina ei nei tawl ta niin an lang. Hi thil hi pawi takel, ei nun dan mawi tha takel suksetu le sukhmelhemtu a nih. A thu le a tawngkam ringawta tha ei tinaw thu ei hril le demna thu ei puonglang el chau hi a huntawk naw a, a tak taka ei dem, ei inthiemnaw le ei do ngam nuom a um.

Nuhmei suollui hnunga that zui nghal lem hi chu ei pi le pu hai huna khan a tlung ngai naw niin mi hmasa le ruolhlui upa, tuchena hring le dama la um han an hril. Hun a hung fe pei a, hnam dang leh ei chengtlang naw thei si nawh, hieng nun mak le rapthlak tak tak hai hi ei tawng rawp el ta a nih. Khawvel a hung changkang pei a, chu thil chun a mi keilut a, hnam dang hai ching dan tha lo chu la lutin ei entawn ve niin an lang. Hnam dang hai dan tha entawn ding a tam em em vei leh a that nawna lai tak la a, ei entawn el ta hi chu ei hnam sietna bulpui pakhat a nih.

Ei hlaphuok thiem le ei hnam sunga lekhathiem, thil chinchang le tawnhriet lo nei tasa han hnam dang dan tha le ziemawi hai entawn le inchuk dingin mi lo hril hai sienkhawm ei zui nuom naw a, ei lak nuom naw bakah ei inchuk nuom naw a, zui le inchuk nekin an nun dan thanaw nawhai ei entawn a, suol iengah ei ngai naw deu deu pei chu a ni hi! Camp le Crusade hai ei thaw uor pei a, a piengthar an tam po leh suolna a pung el am an ta ding aw ti theiin a um hlak. Ei Bible in ringnawtuhai le ringkawl bat hmunkhaat lo dingin a mi hrila chu, ringnawtuhai thaw dan ei zui mek niin an lang.

Suol ei theida tawk naw a, indiklo taka thil thaw ei pawisa naw a, misuol le mi indiklo ei do ngam tak tak naw a, ei hrietthiem el bakah ei ngaina thiem el ta a hawi. Misuolhai hrem le sukmuolpho an ninaw leiin ei khawtlangah suol a zalen a, khawhlona ei vai ngam a, indiknawna chi hran hranin ro a rel hlak. Suol ei do ngam a, ei hnawl le sukmuolpho ngam a, ei hnawl le sukmuolpho ngam a hun ta takzet a nih. Ei ram le ei hnamin suol do ngam thuoitu le sawrkar tha a mamaw a nih. Kohran, khawtlang le pawl tum tum hai khawmin suol theida ei inchuktir a ngai ta a nih.

Mob rule hi Manipur phairamah an larin a hluor hle. Hi thil hin tharum insuona a hung hring suok a, dan an ngainep phatir bawk. Motor eksiden hi ei nuom thua tlung a ninaw ang bawkin, tuolthatna, nuhmei suolluina le suol chi tum tum hai hi ei dit leia tlung a ni nawh. Hiengang thil a tlung chang hin dan kengkawtuhai hril nekin mob rule hmangin ro an rel el hlak leiin tharum insuona a tlung a, a tuor nawtu ding han an tuor pha hlak. Hi thil hi entawn chi a ninaw a chu ei entawn mek chu a nih hi!Ringtuhai ta ding chun entawn ding chi a ni nawh.

Churachandpur District thangsain Manipur tlangram district dang danga cheng mipuihai khawmin ringnawtuhai thaw dan hi ei entawn a, nasa takin ei sietpui ta a nih. Mob Rule hi inthuruolna tha niin an lang nawh. Tuta hma deu khan chu ei ni lai mob rule hi a um ve ngai nawh. Iengleia hiengang thaw dn tha lo hi ei entawn el am a na ti ngaituo chet chet a, an hnuk siet hma ngeia ei bansan nuom a um hle. Suol thawah ni lovin thiltha thaw tiengah inruolsiek lem ding ei nih. Zohnathlakhai annawleh Kristienhai thaw ding ni theia inlanglo, thil tha lo le suol turu tak tak ei ramah a tlung rawp el ta a, inzak a um a, ei hnam a sukmuolpho hle hlak. Hi lei hin ringnawtuhai thaw dan tha lo hi chu entawn naw hram hram ei tiu.

Post a Comment

Powered by Blogger.