Tiddim Road Bandh thawtu le khawsung mi hai nasa takin an inbeituo; mi 4 an hliemna an tuok pha
Magistrate in Torbung/Kangvaai area Tiddim Road­ah Cr.P.C. 144 a puong
CCPUR: JAC Against Thangting pawlin Tiddim Road­a bandh an thaw a ni 4­na zanikhanTorbung hmunah JAC bandh volunteers le tuolsung mihai nasa taka an innawrtuo leiin buoina a suok a, inbeituona le Police han tear gas an kap leiin mi 4 an hliem pha. Inbeituonaa hin pasal khawm va thang an tum a, sienkhawm nuhmei ruol hin phal lovin an lo hnawkir pei. Ei thu dawngna thenkhat chun hliemna tuok hi 10 an chuong niin a hril.

Buoina suok an hriet le inruolin Bishnupur Police Commando le CCPur Police han hi thil tlungna hmun hi an pan nghal a, mipui hnawtdarna dingin blank fire an thaw bakah teargas hai an kap a, Commando han nuhmei ruol hi hmawlin an vuok tawl a, iemanichen an bei hnungin buoina hi sukre a nih. Buoina suok lei hin Torbung le a se vela tlangmi khuo tum tum hai chun darrang an vuok leiin mipui an fekhawm rawn hman hle.

Hi buoina suok leia tlangmi hliemna tuok hai chu­ Ms Ningboi (25) w/o Seiminlal of Leinom; Nengkhochin (60) w/o Henlal of N.Jalenphai; Veinei (40) w/o Tonglal of T.Munjang; Lalboi (28) h/o Nemkhoneng of V.Kolmun hjai aan ni a, District Hospital, CCPur­ah admit an nih. Ningboi hi Commando han thirtluona an vuok hliem a ni a; Lalboi le Nengkhochin hai hi teargas leia hliem an nih.

Hliem hai hi Mr Langkhanpau Guite, Chairman, ADCC le G. Thangkhosuanmung, EM, ADCC han District Hospital­ah an hang kan a, a tul le pawmaw anga hmang dingin ADC Ambulance an in duty tir.

JAC Against Thangting­KEMAL (Moirang); Phamnaba Cheirak Loishing, Thangjing Seva Mandal (Moirang) HHDA (Moirang) EKAEL (Moirang) hanTiddim Road bandh an thaw le inzawm hin,  a bikin Torbung/Kangvai area sunga buoina lien lem suok ding vengnain District Magistrate, CCPur chun thuthar um nawk hmakhata dingin zanikhan Torbung/Kangvai area huop sung Tiddim Road zulah Cr.P.C. 144 a puong. District Magistrate in thupek (Order) an suo dungzui hin Cr.P.C. 144 puongna biel huom sungah Security force le Law enforcing agency hai ti lo, mi 5 neka atam umbum khap a ni bakah mi sukna thei silai, chem le hriemhrei mi sukna thei hrim hrim chawia invak khap a nih.

Republic Day DC Office Complex­a hmang ding
CCPUR: Tukum India Republic Day chu, Churachandpur­a chun district level in DC Office Complex, Tuibuong­ah hmang ning a tih. Hi huna thang ding Govt. Officials le special invitees hai  hmun 5 haia inthawk phurkhawm (pick­up) ning an tih. Pick­up point hai chu JNV/Tuinom; District Hospital; Nehru Marg junction; Police station le Forest Gate, Tuibuong hai a nih. Mr Lunminthang Haokip, IAS, DC, CCPur khuollienin thang ata, India hnam puon (flag) keipharna nei a tih.

Tribal movement fe mek le inzawmin JAC against Anti­Tribal Bills in Bills 3 hai chungthuah tribal hai harsatna le thil ngen state sawrkar le central sawrkar han an ngaitha ti leia tukum Republic Day an boycott bakah mipui tukhawm thang lo dinga an ngen leia Republic Day hi DC Office Complex­a hmang el dinga programme siem niin ei thu dawngna chun a hril. Kum dang haia chun Republic Day hi district level in Public Ground­a hmang hlak a nih.

Guest House­ah SDO/CCPur a kai
CCPUR: Tribal Movement le inzawma nikuma SDO/CCPur Office rawsiet a ni leia hun iemanichen DC Office, CCPur­a SDO/CCPur le staff hai an kai hnungin January 18, 2016 a inthawk khan DC Official residence saka Guest House ground floor­ah SDO/CCPur le staff hai kaiin sin an thaw tan tah. Domicile, Tribe le Certificate dang dang la ding hai chun SDO/CCPur Camp Office hmun hi pan ding a nih.

Pathien thu hril dingin Aizawl­a inthawk Bike in
CCPUR: Mr Lianhmingthanga of Dinthar­I, Aizawl chu Zoram Khawvar Bike Crusade ti thupui hmanga Zohnathlak hai laia Pathien thu hril dingin Aizawl­a inthawk Bike in a hung a, zanikhan CCPur a hungtlung. Zani hmasa zing dar 6:00 AM a Aizawl­a inthawk Silchar pan, zani 11:00AM a kha Tuithaphai hungtlung a nih. January 21, 2016 khin Tahan (Myanmar) pan nawk a ta, Myanmar­a programme a hmang zovin Shillong pan nawk a tih.

Mr Lianhmingthanga hin Mizoram­a district 7 hai a fangkuol ta a, Shillong­a program a hmang zoin Aizawl - ah hun hmang nawk a tih. A fena haia hin Zoram Khawvar booklet le LPS in interview an thawna Disc a thlawnin a sem pei bawk a nih.

YMA Conference thang  hai chuongnaBus 3 bandh thaw han an suksiet
CCPUR: Zani hmasaa inthawka Nahlon khuoa 31st Group Young Mizo Association Annual Conference tana um­a thang hai thakna Bus 3 chu an hungkir tieng zani zingkar 3:30AM khan Saiton khuo phak hma, Kaprang shortcut bul lai, JAC againgt Thangting bandh volunteers han sukchawlin Bus 3 hai hi an suksiet bakah Driver 3 hai khawm an sawisak.


Bus pathum hai hi Conference ding le inzawma JAC Tiddim in a pek PASS nei vawng an nih. Bus suksiet­a um hai chu ­Naantal Travels MN02­5372 tukver le hmatieng darthlalang suksiet le a driver Gogou Gangte (53) s/o Pumkhokhai of Chiengkongpang sawisak a nih. Veronica MN01­1602 driver Lunpi Gangte (35) s/o Kaikholian of Neihsial veng le VIP express bus MN01­1791 driver Lalal (33) s/o Th Haulam of Sahei Road, New Lamka hai an nih.

Driver hai hril dan chun, Nalon khuoa YMA Conference thang ding hai an zu thak zo, an hung kir tieng bandh volunteer hai hin sukchawla, a darthlalang hai an suksiet nghal el niin an hril a, driver le handyman hai sie hran in driver 3 hai hi an sawisak a, an hmai khawm an tuom pek bawk niin an hril. Hi thil tlung hriea Tronglaobi a inthawk Bishnupur Police Commando va fe hai khawm volunteers hai in an lo hnawkir vawng niin an hril.

Bus hai hi suksiet chau ni lovin raw khawm an tum a, sienkhawm Driver hai hi an motor neitu hai an in phone tir a, Veronica motor neitu Meitei a ni leiin Volunteer hai le hin an inbiekpui hnunga an raw naw chau niin Driver hai chun an hril.

Bus 3 haia hin Group YMA Conference banner le YMA Flag an tar vawng a, Naantal Travel bus driver chu Road pass khawm an lakpek a, pahni dang hai chu driver han an lo thupruk hman leiin an lakpek nawh.

FOL­EMI in Leimakhonga Biekin 5 hai an enfel
CCPUR :  For One Life­Engineer Ministries International (FOL­EMI) a Engineer Mr. Andy Kizzee Director, South Asia Region, Main Office New Delhi, India chun Imphal biel sunga Biekin 5 a enfel zo hnungin Jan. 20, 2016 khan Leimakhong ah Biekin 5 lai enfelna a nei nawk. Jan. 21, 2016 hin Churachandpur District a Tuithaphai (Khuga Valley) biel sung simkhawlei inhning in thil sawisiet hai a enfel nawk dinga riruong siem a nih. EMI hai hi professional engineer le architect niin tuta hma deu 2015 khan Manipur a lo hung ta hlak le Saikot, CCPur (Manipur) a For One Life, Youth Center hmun ding, a leilung, iengkim enfel a, designed pektu hai kha an nih. (LRS Puruolte)

Works minister in Leilak daw zo thar a hawng
IMPHAL: Works Minister Kh. Ratan Kumar chun zanikhan Keirao Litan Makhong Iril vadung chunga daw RCC bridge daw zo thar a hawng. Bandh/blockades bakah khuorel sietna (natural disaster) leia lampui umsa haia motor infepaw thei lova um hun tuok thei ei ni leiin chuong huna dingin Union Ministry of Road and Transport chun, Manipur­a lampui pawimaw hai sun dingin alternative road  siem dingin remtina a nei tah tiin Kh. Ratan Kumar chun hi huna hin a hril. Imphal ­Jiribam Road­a Barak le Makru leilak chu a thar a daw vat a nita ding thu hrilin thil tul hai buoipui mek a ni thu;Tulai hnaia Manipur­a tuilien nasa tak tlungin leilak a suksiet 8 hai khawm siemthat vat ni tang tang a tih. Hieng leilak hai siem­thatna ding fund khawm Rural Infrastructure Development Scheme, Govt. of India a inthawk hung release vat ni tang a tih tiin Ratan Kumar chun a hril.

PWD Chief Engineer M. Lokendro chun, hi leilak siemnaa sum seng chu Rs. 6.25 crores niin NLCPR hnuoia kum 2011 a inthawka leilak dawna sin hi tan a ni thu a hril.

Thilpuokthei leh nupui pakhat man
IMPHAL: 16­Assam Rifles chun zani zingkar dar 7:30 vel khan Ukhrul pana tlan passenger motor pakhat Gwaltabi hmuna an dapnaah nupui pakhat Puprangla Hungyo (53) w/o  (L) Ajoy Hungyo of Sorde Village, Phungyar Tehsil, Ukhrul district chu thilpuokthei leh an man. Thilpuokthei mana um hai lai Detonators 9, highly explosive grams 125 senga rik 3, inches 7 a sei fuse 3 a thang. Thilpuokthei hai hi a bag sunga inthawka dapdawk a ni a, nupui hi Lamlai Police Station­ah an peklut niin zanita PRO Assam Rifles thusuok chun a hril.

CM an inhmupui
IMPHAL: Zanikhan Tiddim Road bandh thaw pawl Joint Committee, Tiddim (Moirang, Bishnupur, Kumbi le Churachandpur) han T. Manga Vaiphei, MLA; S. Bira Singh, MLA le M. Prithviraj Singh, MLA hai leh Manipur CM an inhmupui a, JAC thil ngen an hmatienga sukpuitling dingin a lo tiem bakah Joint Committee chu an bandh thaw suktawp dingin a ngen a, January 21, 2016 a inthawk bandh lakdawk dingin Commitee chun an remti niin ei thu dawngna chun a hril. Bandh lakdawk a ni ding le dingnaw ruok chu hi thu ei sut chena hin chieng taka hrietna ei nei nawh.

Sawkkhe leh nupui pakhat man
IMPHAL: January 19, 2016 khan 12­Assam Rifles han Khudengthabi Check Post­a motor inlawn hai an dapnaah Maruti Van (Blue) Registration No. MN­01S­7217 a chuong Mrs Saleibam Thoibi Devi (44) w/o Harmani Singh of  Moreh Ward No. 4 chu Sawkkhe (Tockay Gecko) pahni, Rs. 2 crore manhu ding leh an man. Ms Thoibi Devi le a kuta inthawka an man Sawkkhe hai hi Forest & Wildlife Department, Imphal kutah an peklut tiin zanita PRO Assam Rifles thusuok chun a hril.

Eastern Command Chief Manipur a hung inzin
IMPHAL: January 20­21, 2016 sung cham dingin Lieutenant General Amrik Singh, SM, Chief of Staff, Eastern Command chu zanikhan Manipur a hungtlung. Lt. Gen. Amrik Singh hi Major Gen.VS Sreenivas, VSM**, IG AR (South) chun Manipur security ngirhmun report a pek. Lt. Gen. Singh chun, Manipur­a dan le thupek enkawlna kawnga IGAR (South) sinthaw bakah development projects tum tum thawna kawnga civil administration le tuolsung mi hai an thlawp danah a lungawi tawk thu a hril.

CM in IHE bawlna ding lungphumna a nei
IMPHAL: Manipur CM O.Ibobi Singh chun zanikhan Babupara­a Institute of Human Exellence (IHE) building bawlna ding lung phumna a nei. Hi lai hmun hi a hmaa Bengali High School campus a nih. Hi huna hin Swami Suhitanandaji Maharaj, Gen. Secy. Ramakrishna Math& Ramakrishna Mission­Belur Math, Howrah hrietpuinain monk’s quarter hawng a ni bawk. Hi hun hmangnaa hin Education Minister M. Okendro guest of honour in a thang.

Professor,Asso. Prof. le Ast. Prof. sin
IMPHAL: Manipur University, Canchipur, Imphal a Department hran hran haiah Professor, Associate Professor le Assistant Professor sin post 84 a ruok. Hlaw chu University Grants Commission pay scale ang ning a tih.Thu chieng lem hi University website: www.manipuruniv.ac.in ah hriet thei ning a tih. Hnina lekha peklut theina hun nuhnungtak 20­02­2016 a nih.

JD(U) in NBCC chungah PIL file a tum
IMPHAL: Janata Dal­United (JD­U) chun, January 4, 2016 nia simkhawlei inhning richter scale 6.7 in Manipur a sawihning huna Ima market hluo ngamlo khawpa a suksietna thuah National Building Construction Company (NBCC) chunga PIL file a tum. JD­U President M. Tombi chun, Manipur chu simkhawlei inhning tamna hmun a ni leiin siemthat ni lova bawlthat ding a nih tiin chanchinbumihai kuoma a hril.

Ima market a sungkuo sanghni chuong chawmtu nupui bazar kai hai harsatna an rang thei anga chingfel dingin Congress sawrkar an ngen bawk.

Romei Editor Robert Lalchhuana a thi
AIZAWL: Mizorama Chanchinbu pakhat Romei Editor Robert Lalchhuana chu zani zingkar khan lungphu chawlin Sihphir Nausel­a a chengnainah kum 76 mi niin a thi. Mizoram Journalist Association (MJA) President term 7 lai zet lo chel ta le MJA in kum 2008 a Prominent Journalist nina a lo inhlan ta a nih. A ruong hi zanikhan vuiliem a nih.

India le Nepal ramriah SSB tirlut belsa
PATNA: January 26, 2016 nia India Republic Day hmang ding le inzawma hi hun sukbuoi tuma terrorist hai an hung lut ding vengna dingin India le Nepal ramriah Sashastra Seema Bal (SSB) tamlem tirlut belsa an nih. Ramri­a outpost haia Commandants le DIG rank officials hai chu inralring zinga um dinga inhriettir an nih.

Heroin grams 10.5 leh mi 2 man
JAMMU: Zani hmasa zan khan Kunjwani check point, Jammu and Kashmir­ah pasal pahni hai chu Heroin grams 10.5 leh Police han an man. Hi check point­a Police duty han Car hung tlan chawl dingin an ti a, sienkhawm chawl lova a tlan thleng  leiin Gayal hmuna check post duty hai thu an thawn a, chu le inzawma Heroin le mi pahni hai hi an man niin SHO,  Gangyal Aijaz Ahmed chun a hril. Mana um hai chu Ahmed le Hussain hai an ni a, Heroin hi Damtaal, Himachal Pradesh­a inthawka an hung phur, Bhatindi, Sunjwan le Sainik colony haia zawr an tum niin an inpuong a, heroin hi gram 1 ah Rs.12,000­Rs. 15,000 inkarin an zawr hlak niin an hril.

Boruok thalo hiplut leiin mi 3 an thi
KANNUR: Kerala­a Kannur district­a Pallipoyil khuoa chun zanikhan boruok thalo hiplut leiin nufa thangin mi 3 an thi. Septic tank an sukfainaah hi thil hi tlung niin Police chun an hril. Thina tuok hai chu P.K. Sathi (53), a naupa P.K. Rejish(33) le midang pakhat V.P. Muneer (53) hai an nih. Septic tank an sukfai huna Muneer hi tanky sungah khaw hre lovin a tlu a, chu phing leh Rejish hi san tumin a zu lut ve a, sienkhawm khaw hre lova a naupa tlusawp a hmu leiin Ms Sathi khawm hi septic tank sungah a zu lut ve a, an reng hin  an thi vawng el niin Police chun an  hril.

ISIS han PM Modi that dingin an vau
PANAJI:  India rama Bawng that, a sa zawr le fak khap a nina thuah ISIS inziekna postcard hmangin PM Narendra Modi le Defence Minister Manohar Parrikar hai chu that dingin an vau a, hi chungthu hi Goa Police chun an suizui mek. Hi lekhathawn (postcard) hi Home le general administrative departments han an dawng a nih. IGP V. Renganathan chun, postcard hi ramdanga inthawk ni lo tuolsunga inthawka thawn niin a hril. Hi vauna lei hin Goa state a chun Polie han Parrikar venghimna an sukkhau.

Pawl tum tumin Bodo ST(H) an dodal
HAFLONG: Dima Hasao district sunga tribal pawl tum tum  hai chun, sawrkar thlungpuiin Dima Hasao le Karbing Anglong­ a Bodos hai Scheduled Tribe­Hills (ST­H) category a sielut a tumna chu dodalin, hi thil hi Dima Hasao le Karbi Anglong district haia hnam tum tum cheng hai inthuruolna suksetu le thedartu a hung ni ding a nih tiin an hril. Hi thu hi zani hmasaa Dimasa Students’ Union (DSU) Office, Haflong hmuna Kailen Daulagupu, president, Jadikhe Naisho Hoshom; Agnes Gorlosa, president, Dimasa Mothers’ Association; Pramith Sengyung, vice­president, Dimasa Students’ Union (DSU), Central Committee, HQ Haflong; Sanjeen Langthasa, reception committee, All Dimasa Students’ Union (ADSU); Neijaylal Khelma, president, Khelma Students’ Association (KSA) han joint press meet an buotsai huna an hril a nih.

Assam rama ST(H) hai ta dinga quota huol zat hi 5% a ni a, hi hi tribe tum tum 16 in an insem a ni a; Bodo Kacharis hai chu ST(P) category­a umin thil iengkimah 10% huol pek an ni a, Bodo hai ST(H) category a sie nawk an ni chun an ta dinga reservation 15% hung ning a ta, tribal hnam chin lem le ngirhmun inhnuoi lem hai hnawchepin an hung um ding a nih; hi lei hin Dima Hasao le Karbi Anglong mipui ngen Separate state sawrkarin a remti phawt naw chun Bodo hai ST(H) category a zieklut tumna hi pawm thei ninaw nih tiin an hril.

August 25, 2015 khawm khan DSU, ADSU, HSA, HkSA, KSU han Bodo hai ST(H) pe lo dingin Union minister of state for Home Affairs Kiren Rijiju kuoma khawm memorandum an lo pek ta niin an hril bawk.

Bank rawktu kut an tan pek
PATNA: Bihar a chun Bank of Baroda, Mahuabagh branch Bank rawka Rs. 2.5 lakh lahmangtu mi 4 hai laia Jitendra Pandit (35) chu mipuiin an man a, a kut  vawitieng  an tanbawng pek. Police chun mana um pa kuta inthawk hin Rs. 1 lakh an hmukir a, Patna Medical College and Hospital­ah dmit a nih. Bank rawktu midang 3 hai khawm man tuma zawng mek an nih.

A pasal that tumnaah a naunu tur in a vai hlum
AGARTALA: Tripura­a Govinda Sardar Para khuoa chun zani hmasa khan nupui kum 29 mi Sita Rani Debbarma chun a pasal pahnina Goutam that tumnaa thingpuia tur a pawl a nauhai pahni kum 4 mi le kum 12 mi han an dawn leiin an damnaw pha a, hospital panpui an ni a, sienkhawm Shriya Debbarma (4) chu damzo lovin a thi a, Merry Debbarama (12) khawm hospital­a enkawl mek a nih. Goutam hin a nuhmei thingpui siem hi a dawn naw leiin a nauhai pahni hin an dawn leia hi thil hi tlung niin Uttam Bhowmik, SP (Police Control) chun a hril. Police chun Sita hi manin case an siem khum.

Taliban han Paksitan­a University an run, mi 25 an thi
PESHAWAR: Zanikhan Pakistan rama Khyber­Pakhtunkhwa province sunga Charsadda district­a Bacha Khan University chu Taliban helpawl silai tha tak tak chawi han an run a, silai an kap hrut  leiin mi 25 an thi bakah midang 50 velin hliemna an tuok. Taliban helpawl hai hi University sunga va lutin students le teachers hai chu silaiin an kap hrut el nia hril a nih. Hi thil tlung le inzawma Security forces han an beilet naah terrorist 4 an kap hlum bawk.

Kap hluma um hai lai hin Chemistry department­a Chairman, Professor Hamid khawm a thangsa niin Provincial ministr Shaukaat Yousafzai chun a hril. Hliem hai hi hospital panpui an ni a, hi thil tlung lei hin hi lai biela School po po khar vawng nghal anni bakah town sunga hospital po poah emergency puong a nih. University runtu hai hi mi 4­10 inkar an nih tiin Yousafzai chun a hril.

University Chancellor Dr Fazal Rahim chun, hi thil tlung huna hin University campus­ah students 3,000 chuong; Khudai Khidmatgar Khan Abdul Ghaffar Khan alias Baacha Khan thi champha le inzawma petic symposium  neia um leiin mikhuol 600 vel an um bawk niin a hril.

Tehreek­e­Taliban chun hi thil hi anni pawl thaw niin an puong. Prime Minister Narendra Modi chun Bacha Khan University beitu hai chu a dem thu le thina tuok sungkuo hai a sunpui thu, hliemna tuok hai a tuorpui thu a puong.

VAWISUN THUPUI
Kei chun an kuomah, “Sin ropuitak ka thawh a, ka hung thla thei nawh, ieng dingin am in kuoma ka hung thlak karin sin chu chawl el a ta?” tiin mi ka tir a. ­ Nehemia 6:3

Editorial
Tum bik nei ngei ding

December, 2015 thla a liem a, January, 2016 ei hmang mek a, ieng thil am ei tuok ding ti hrielawk le hrillawk thei ei um der nawh. Kum tinin kum thar January 1 chu umni khâm le ruoithe meuin ei hmang a, Pathien thuhriltu han thu tha tak tak an mi hril hai kha ei la hrietzing ring a um. Kum thar hin thil thar le thiltha a hung her suokpui ringawt naw a, vangduoina le harsatna a hung intlun hran bik chuong nawh. Kum thar January thla a hung her suok lei ringawta lawm el ding a ni nawh. Ei lawmna ding ruok chu mani’n ei siem ding a ni a; chu hlawtlingna chu ei hmasawp a zira innghat a nih.

Kum thar hin iem a mi hung intlun ding ti ngaituo der lovin tam tak chun ei lawm ve satlie ngawt hlak a, sienkhawm inpuochana le hmatienga dinga thil induonglawk einei ngai naw leiin ei hlimna le lawmna hai chu iengkhawm lovin a thamral nawk vat hlak. Kum thar hin ngaitiona thar, lungril thar, malsawmna thar le hmasawnna thar mi pe sienla; chuong thil hai chu a hung hlawtling theina dingin tumruna le taimaknain hnawtzui inla kum thar hlawtling tak ei hmang thei ngei ring a um.

Tu kum thara hin tum bik neiin hma la seng inla nuom a um. Ei thil thawna hai hrim hrima hin tum bik neia thil ei thaw naw chun hlawtling a harsa hlak. Mi po po an hlawsam tina ni chuong loin a tlangpuiin hlawsamin a zui nuom hle hlak. Amiruokchu, mi fel chungchuong bik hai chu tiem lovin. Nisienlakhawm hienghai dawttuhai hin chu tum bik ei neinaw chun hlawsam ei hmabak ding a nih. Hi lei hin kum bula inthawk hin tum bik neia hma ei lak tan nuom a um. Tum bik neia thil thaw hai hrim hrim mi hlawsam an um ngai naw a, an thiltumah an hlawtling tlangpui hlak ti inla ei hril suol ring a um nawh. Tum bik nei lo hai ta ding chun hlawtling ngaina a umnaw hrim a nih.

Ram changkang, hnam var le hmathlir hla tak nei hai hi an thiltumah an chieng hle hlak. Hi lei hin an lekha inchukna, an sumdawngna le an sin thaw dang dang haiah malsawmna le hlawtlingna an dawng ngei ngei hlak. Ram changkang le hnam var hai chu inchuklai naupangte khawm ni hai sien, ‘i puitling huna iem i thaw ding” ti indawn la an hril thei chat chat an ti chu. An thiltumah an chieng bik em em el a nih. An thiltum bik neia khan theitawp suoin an hlen suok ngei hlak ti hriet thei a nih. Hieng hi thil fe dan a ni si chun ei ni rawi hin anni kuoma inthawk entawn le inchuk ding ei nei a nih ti a chieng hle awm ie.

Ei ni rawi hi thiem bik nei lo hnam ei ni chuong naw a, thiltum bik hi ei nei tawl naw leia ei lekha inchukna le ei sin thawna thil tum tum haiah hin a zik a hung bul hlak niin an lang. Pathien zarin ei ni rawi khawm ei changkangin hma ei sawn pei a; tum bik neia thil thaw le lekha inchuk iemanizat ei um ta a, chuongang mihai chu mi hlawtling le che thei tak tak an hung ni ve tho ta a nih. Hi lei hin tum bik neia thil thaw hlak hai hi entawn sup sup ei tiu.

Hieng laizing hin ei ni rawi hi lungril inhmaw, ei sin thaw ra hmu nghal nuom mi le thil themlawr ching mi ei nih. Hi lei hin tum bik nei ran puma thil ei thaw naw chun a tak ram tlung naw pal ei tih ti khawm hi inlau a um hle. Ran vai chun damna le hlawkpui khawpa ran vai, chuongang peiin Lo nei, huon siem, Nga vai,Ar vai, Puonthui le a dang dang fakzawngna ding a tam hle. Nisienlakhawm tum bik le thaw bik nei lova thil chi tum tum ei thawlawr chun ei hmabak chu hlawsamna a hung ni ding a nih.

Post a Comment

Powered by Blogger.