Tribal seng ei ni leiin inthuruolin thaw tlang ei tiu: P.A. Sangma
CCPUR: January 16, 2016 khan Zoljam khuoah Khongsai Inpi GHQ General Assembly nei a nih. Hi huna hin Lok Sabha Speaker hlui le MP ni lai mek P.A. Sangma khuollienin a thang a, Functional President in Ch. Ajang Khongsai, President Khongsai Inpi GHQ; Special Guest in P.S. Haokip, President, KNO;Meghalaya finance minister hlui Comrade Sangma; TN Haokip, MLA, Thangminlen, Ex­minister hai an thang. Pu P.A. Sangma hin Enjakhup Khongsai Memorial Park hmun ding le Phova Diary a hawng bawk.


Hi huna Pu PA Sangma in thu a hrilnaa chun Churachandpur district­a tuilien, tulai hnaia simkhawlei inhning tlung le Manipur Assembly in August 31, 2015 nia Bills 3 a passed hai dodalna le inzawma  mi 9 thi hai ruong tu chena vui lova an la umna thuah pawi a ti thu a hril a.  Nagaland Lok Sabha MP Neiphiu Rio leh Parliament­ah Bills 3 hai chungthu hi an kheksuokpui thu a hril a, Jantar le hmun dang danga agitation a fe zing a. In dikna le chanvo humhal theina le in ditdan le ngaidan hril theina in nei. Bills 3 leia hringna lo inhlan ta hai chawimawi le inza an phu a, ropui taka an ruong vuiliem dingin a ngena, vuizo hnunga khawm movement fepui zing thei a nih tiin a hril.

Meghalaya a khawm  Shillong khawpuia chau Govt. offices le institution pawimaw hai inthut an ni a, hiengang bawk hin Manipur a khawm a ni a. Hi lei hin phairam le tlangram kar lien tak a um a, sawrkarin Office le Institution pawimaw hai hill district haia siein development khuongruol takin thaw sien hieng thil hi tlung naw nih. Development sin le institution hai popo Imphal khawpui sunga inthut an ni leia Manipur phairam biel ram thua harsatna hung um le, tlangmi le phaimi haia ram chungthu bawk leia inhrietthiemnawna hung um a nih tiin a hril. Sports University ei ti leh Imphal­a bawk, footballer tam tak hai hill district a mi an ni a, ‘iengleia hill areas haiah ei indin thei naw? Tiin indawnna a siem. Churachandpur hi ka ngaina em em, a san chu music in thiem lei a nih. Vawisuna hla ei ngaithlak hai  an thiem thei hle, CCPur ka hung nuom nasan hlak chu in lam le music hai en le ngaithlak inhawi ka ti lei a ni a, tamtak ka kawl nghe nghe a nih tiin a hril.

Vawikhat chu famtah le MP lo ni hlak Sunil Dutt kha dinner nei dingin a hung a, CCPur­a ka prog. le hla music hai kan hmutir a, Churachandpur chu India Music Capital­a siem ding a nih a ti nghe nghe tiin Pu Sangma chun a hril a. Parliament a khawm Music Capital siem ding le Music Capital of India chu Churachandpur a ni ding a nih tiin ka lo ngen ta nghe nghe a nih tiin a hril. Moreh chu international market a siem le CCPur chu Satellite City a siem ding a nih; Act East policy, Look east policy, hieng PM Modi Act East Policy sukpuitlingna dingin CCPur chu hmun pawimaw tak a nih tiin a hril. Hill district hai sukhmasawn chu Manipur a harsatna tam tak sutkiengna ding a nih tia hrilin Manipur le India sawrkar hai chu chuonganga hma la dingin a ngen.

A party National Peoples Party(NPP) chungthua chun, NPP thiltum tak chu India rama tribals le NE a tribal hai pumkhata siem a nih. Tuhin India ram hmun tina indarin National party a nita a, Rajasthan a khawm MLA 4 a nei a, Gujarat a khawm Jilla parishad member 5 a nei, Madhya Pradesh­ah 4 neiin  a dang dang Tribal umna hmun haia member a nei mek a, Andhra Pradesh­ah an la um naw a, hma lak mek a nih.

India ram pumpuiah Tribal hai ta dingin MLA 500 le MPs 60 huol a ni a. Ei thangruol chun hrat tak ei nih. Amiruokchu ei thangruol naw leiin India rama tribal hai ngirhmun a chau a nih. Sienkhawm India ram hmun dang hai le tekhiin Northeast hai chu nasa takin ei ngirhmun a tha lem. Bihar, Andhra Pradesh, Tamil Nadu, Madhya Pradesh, Gurajat, Chhattisgarh a tribal hai ngirhmun chu a chau hle, an ram hai factory le mining a dingin company in a lakpek vawng ta a nih.

Kuki state ngenna le India rama state hran hran ngenna thuah chun, ama hnam Garo thangin India rama State hran ngen hnam tam tak an um thu hrilin hnam tum tum hai thil ngen state hran hi Parliament a khawm  hrilin Independent Committee in enfel raw seh tiin ka lo ngen ta a, Independent body chu Second State Re­organisation Commission a ni ding a nih, chu hma po chu ADC hai popo Sixth Schedule hnuoia an um ding ti chu ka thil phut a nih tiin a hril a, tribal seng ei ni leiin thangruolin thaw tlang ei tiu tiin tribal hai a ngen.

Pu Sangma hin District Hospital­a Morgue a sir dinga ti a ni a, sienkhawm sir ta lovin Imphal tieng a kir nawk.

Zenghri vengna damdawi indawntirna
CCPUR:  Churachandpur District thangin vawisun hin India ram hmun tum tum haiah naupang kum 0­5  inkar hai kuoma Zenghri vengna damdawi indawntirna  IPPI/NIDs, 2016 first round (Polio Sunday) um a tih. Polio Sunday hi vawituk 7:00AM hin  Mr Langkhanpau Guite, Chairman, ADCC le Pu Lunminthang Haokip, IAS, DC, CCPur le Chairman, District Task Force (DTF)­I, CCPur han a ruolin hawng an tih. Hawng a ni zo hin Khuo le Veng tin haia IPPI booth haiah mawphurna peka um han naupang hai kuomah Polio indawntirna nei an tih. Naupang kum 5 le a hnuoitieng (0­5) nei hai chun ngaipawimawa, Polio damdawi hi indawntir seng ding a nih.

IPPI first round nei ding le inzawm hin Block tina duty ding hai khawm an duty­na hmun ding an pan tawl ta a, Town sunga duty ding hai khawmin OPV vial hai an lak tawl tah.

Hnina petu mi 300 an chuong tah
CCPUR: Churachandpur District­a Public Distribution System (PDS) le inzawma Rationing Agent, Fair Price Shop Centre le SK Oil dealer ni nuoma hnina petu  mi 300 chuong an um ta a, SDO (CAF&PF) chun form peklut thei hun hi January 25, 2016 chena  dingin a suksei.

A piengchampha le inzawmin thisen a pek
CCPUR: Mr Immanuel Lalneisang (30) s/o Lalmawizuol of Rengkai chun zanikha a piengchampha vawi 30­na  a ni le inzawmin  District Hospital­a Blood Bank­ah  thisen mamaw le tul hai hmang dingin  Thisen Unit 1 a pek.  Mr Lalneisang chun tuta tum hi thisen a pek vawi 5­na a nita thu a hril.

JAC le victim family han meeting
CCPUR: January 14, 2016 nia JAC inrawinaa Public Consultation meeting nei huna JAC in FIR le Mobilization ADC mawphurna dinga a pekdawk le inzawmin January 16, 2016 khan Langkhanpau Guite, Chairman, ADCC Office chamber­ah JAC le Victim family han meeting an nei. Hi huna hin, JAC chu Inpui hai,UPF­KNO,Philanthropic Organisation, Student Organisation;ADC, mipui hai thanga indin a ni leiin anni hnuoia ADC in hrat taka an hmalakna thlawp le thang la tlang dingin an rel.

KKL in ngaidam an inhnina an pawm pek
CCPUR: January 7, 2016 nia Thangjing ti ‘Thangting’ tia sawrkarin a thlakthleng dodalna le inzawma JAC indina um in  bandh an thaw huna damnaw phura Imphal­a inthawk CCPur pana  hung tlan KKL Ambulance Bandh volunteer han Terakhongsangbi hmuna sukchawla Driver le helper hai an sawisak bakah Ambulance an suksiet le inzawmin zani 11:00AM khan JAC Against­ Thangting chun KIC Office, Tuibuong­ah KKL thuoitu hai kuoma ngaidam an inhni. JAC hai hin ngaidam inhninain thingpui an khai bakah Rs. 20,000/­ an chawi a, an ngaidam inhnina hi KKL in an pawmpek.

ZC Cabinet expansion
CCPUR: Zomi Council interim Chairman B. Dongzalian Simte chun Zomi Council Cabinet expansion a thaw a, Vice  Chairman in Thongkholian, President Mate Tribe Council; Secretary in Dr Neng Ngaih Lian, President Tedim Chin Union le Finance­cum­Treasurer in Khaikhanhau, President  Thangkhal People Organisation a ruot. Chun, Constitution Draffting Committee Chairman dingin B.Dongzalian Simte,Interim Chairman; Secy­ Dr Neng Ngaih Lian, Interim Secy.; Constultants ah Khatkhotong Baite, President Vaiphei People Council, GHQ; Pumlianpau, President PTC, GHQ;Chinlunthang, President United Zou Organisation, GHQ; Tinsoi, President, Gangte Tribe Council hai ruot an ni bawk.

MC le NP election vote tiem zo a ni tah
IMPHAL: January 11, 2016 nia Manipur Municpal Council (MC) 18 le Nagar Panchayats 8 haia inthlangna uma vote tla hai zani hmasa a inthawka tiem tan chu zanikhan tiem zo a ni tah. Congress chu party mala seat la rawn tak niin seats 108 an lak a, Independent Candidate chun seats 102 an lak a, BJP in seats 62 an lak. Chun, Lok Jan Shakti Party (LJP) in seat 4 le CPI in seat 2 an lak bawk.

Hieng laizing hin Lamlai Municipal Council Ward No. 8 a thlangtling BJP candidate RK Memi chengna in chu zani hmasa zan dar 9:30 vel khan a tling hnebana um INC candidate Ina inthawk lunga deng a ni leiin indengtuona nasa tak a tlung a, sienkhawm Police hai inrang taka fein buoina hi an va chingfel. Hi thil tlunga hin mi 3 an hliem taka thil tam tak suksiet a nih.

Temporay market shed bawlna  a sukchawl
IMPHAL:  Thangmeiband A/C MLA Joy Kishan chu zani zingkar dar 9:30 vel khan Thangal Bazar­a termporary market Shed bawlna meka hmuna fein sinthawna a va sukchawl. January 4, 2016 nia Manipur­a simkhawlei richter scale 6.7 a hrat inhningin Khwairamband Keithel pahni hai hluo ngam um lo khawpa a suksiet leia temporary market shed bawl tum a nih. Mr Joykishan chun, tu thupek le tu hnuoia sin in thaw am a nia? tiin sinthawtu hai chu an dawn a, hi sin thawnaa contractor nia inhril  pasal pakhat chun  PWD- a  Chief Engineer le Superintending Engineer hai thupek anga sin an thaw a ni thu le Assistant engineer Uttam enkaina hnuoia an thaw niin Joykishan hi hril. Engineer hai telephone hmanga an dawn hunah, Chief Minister thupek anga Tender ko loa sin an thaw a niin an h ril. Hi chungthua hin Joykishan chun official hai chu work order um lo le tender khawm ko loa sin thawa um chu dan kal a ni leiin an sunzawm chun dan anga action lak a ni ding chu official hai a hril.

Hieng laizing hin Women Vendors hai chun temporary market shed bawlna sukchawla um chu demin MLA hi van hmupui an tum a, sienkhawm Joykishan hi a lo um naw leiin an inhmupui thei nawh.

Mother of my country lekhabu tlangzar
IMPHAL: Delhi based Journalist le writer Anubha Bhonsle in a ziek “Mother, Where’s My Country?  Looking for Light in the Darkness of Manipur” ti chu zanikhan Manipur Press Club, Imphal hmuna tlangzar a a nih. Hi lekhabu hi Manipur­a inkaptuona tehlem (fake encounter) thangsana ziek a nih. A ziektu hin kum 2006­a Manipur a hung inzin huna fake encounter tlung a tawng fuk leia hi lekhabu hi a hung zieksuok a nih.

US Polo team an hungtlung
IMPHAL:  January 17­21, 2016 inkar sunga Polo ground, Imphal hmuna First Manipur Statehood Day Women’s Polo Tournament um dinga thang ding member 5 umna United States Polo Association (USPA) team hai chu Imphal an hung tlung tah. US Polo team hungtlung hai laia 4 chu nuhmei an nih.  Zanikhan Mapal Kangjeibung polo ground­ah Manipuri Women polo players hai le inhmelhriettirna nei a nih. US polo team hi India rama chawlkar hni sung cham dinga hung an nih. Tournament a hin Manipur Women polo players 16 thang an tih.

Jiribam MC ah Pi Lalneimuong hmar a tling
JIRIBAM:January 11, 2016 nia Manipur phairam biel 4 huop sunga Municipal Council 18 le Nagar Panchayat 8 haia election neia um vote tla hai zani hmasaa tiem a khan Jiribam Municipal Council­ah Congress in 5 le Independent in 5 an lak a. INC candidate Pi Lalneimuong Hmar w/o Hmanglienthang Jiribam chun Ward No.1 ah hratna changin a tling ve. (Virthli)

Ralthuom tam tak dapdawk
IMPHAL:  Sagolmang, mphal East Police Commando le 16­ Assam Rifles thangruol hai chun Ukhau tlang bul lai plastic bag a inthun ralthuom an dapdawk. Ralthuom an dapdawk hai lai hin M­16 rifles mu 341, AK­47 mu 44, Detonator 2, Lathod shell 2 le country made magazine 2 a thang.

Congress thil ngen remti a ni hun huna GST pass ning a tih: Rahul
MUMBAI:  Congress Vice President Rahul Gandhi chun, Goods and Services Tax (GST) bill thua Congress thil ngen Central sawrkarin a pawm ni la lain Rajya Sabha­ah pass ning a tih tiin zanikhan Mumbai hmuna a hril. GST Bill hi Lok Sabha in an passed tasa, sienkhawm Rajya Sabha­ah BJP chu minority (Congress bukrikna) a ni leia pass thei lova la um a nih. GST Bill a hin Congress party chun siemthat dinga ti point  3 lai an nei a, chuonghai siemthat  remti a ni phawt chun GST Bill hi infethlengtir an hniel naw a nih. Congress thil phut remti a ni phawt chun Rajya Sabha­a GST Bill pass na dingin minutes 15 bak hun la naw nih tiin Rahul chun a hril.

GST hi khawvel rambung tum tumin an hmang mek, company dang dang han rambung danga sumdawngna an thaw nuom theina dinga thil pawimaw takel a ni a, PM Narendra Modi in a hril uor em em ‘Make in India’ puitlingna ding thil tul takel a ni leiin Centre­a NDA sawrkar chun hi Bill hi pass kar a nghakhla em em el a nih.

Central sawrkar chun GST hi April 1, 2016 a inthawk hmang tan hman a nuom a, February thla tawp tienga Parliament Budget Session hung um dinga hin pass hman ngei nisien a nuom bawk a nih.

GNLA cadre pakhat kap hlum
SHILLONG: Meghalaya­a East Garo Hills­ah zanikhan Police­a Swift Weapons and Tactics (SWAT) commandos hai le GNLA hai an inkaptuo a, GNLA Cadre Kandem kap hlum a nih. Kap hluma um pa hi October, 2015 a South Garo Hills Chokpot BDO Jude Rangku T. Sangma thuoihmangnaa thang ve, IED remkhawm thiem (expert) a nih tiin IG (Operations) GHP Raju chun a hril. Inkaptuona hmuna hin Shot Gun 1 hmu a ni a, an thlawppui Chondro an ti chu man ngei tumin dappui nasa takin an thaw zui bawk.

PDP in vawisun meeting a ko
SRINAGAR: January 7, 2016 nia Jammu & Kashmir CM Mufti Mohammad Sayeed thi leia J&K­a sawrkar  thar siemna ding thuah PDP Chief Mehbooba Mufti chun January 17, 2016 a PDP core group meeting nei dingin a ko. Hi huna hin sawrkar thar siemna ding kawnga BJP le thawtlangna chungthu an hriltlang ring a nih. J&K a hin March 1, 2015 a inthawk PDP le BJP thangruol han Sayeed thi chena khan thangruolin sawrkar an siem a nih. Sayeed thi hnunga sawrkar siem dinga hmalakna a um vaknaw leiin J&K chu Governor’s Rule hnuoia sie mek a nih.

Nuhmei pakhat SUV Car tlan lai sungah silai le chuktuoa suollui
NOIDA: Nuhmei kum 30 mi pakhat chun zani hmasa zingkar khan Noida hmuna SUV Car tlan lai sungah damdawi (sedative) thang Cold Drinks an indawntir hnungin silai le chuktuoin an suollui niin Police kuoma report a pek. A suolluitu hai laia mi 2 hai chu a hmelhriet an ni thu a hril a. Jail­a intang mek a pasal kan tuma a fe lai mek SUV car hi a hung tlan a, a fe tumnaa va thak dingin an inhril a, a hmelhriet 2 an um bawk leia SUV Car­a hi lut le chuong a ni thu hrilin jail­a intang mek a pasal insuo a ni theina dinga thangpui dingin a suolluitu hai chun an thlem bawk niin suolluia um nu hin a hril. Police chun mi 4 hai chunga hin FIR an registered bakah a hmelhriet pahni hai chunga mi thuoihmang le suolluina case an registered. Nuhmeinu hi an suollui zek hnungin Kisan Chowk, Noida hmuna an intumtir a nih.

Palestine le Israel inzin dingin Sushma
NEW DELHI: External Affairs Minister Sushma Swaraj chu ni 2 sung Palestina le Israel ram haia cham dingin zanikhan New Delhi a suoksan. Tuta tum hi Ms Sushma Swaraj Israel ram an zin vawikhatna ding a nih. Israel ram a cham sungin Israel ram thuoituhai an hmupui ding bakah India mi cheng hai inpawlpuina nei bawk a tih. Ms Sushma Swaraj chun vawisun hin Palestina ram thuoituhai inhmupui a ta, an ram pahni hai inlaichinna chungthu hriltlang an tih.

Maoist cadres 20 an inpe
BASTER: Chhattisgarh district a chun zanikhan nuhmei thangin Maoist cadres 30 hai chu Police kutah an inpe. Tulai hnaia Security forces han dappui nasa taka an thaw zing leia beidawnga hung inpe an nih tiin Baster SP RN Das chun a hril. Maoist inpe hai laia cadres 19 hai chu Darbha Division Committee a mi le 11 hai chu East Baster Division a mi an nih. December 25, 2015 a Baster district­a Chanameta hmuna Naxal Commander Chainu Police han an kap hluma inthawk khan Baster district a chun Maoist hai hi nasa takin an chau pha a, hi leia inpe an nih tiin SP RN Das chun a hril bawk. Maoist inpe hai hi pakhat peiah Rs. 10,000 pek an ni a, an thiemna le inphu tawka  sin pek an la hung ni pei ding thu District Collector Amit Kataria chun a hril.

Nagaland in Passport Office a nei tah
DIMAPR:Union Minister of state for external affairs, Gen. (retd) V.K. Singh chun zani hmasa khan New Chumukedima hmuna DC’s Office Complex­ah Passport Seva Kendra (PSK) a hawng. Nagaland mi Passport dit han Guwahati hmuna hnina an zu peklut hlak chu tul ta lovin Nagaland state sunga ngei Passport an hniin an laak thei ta ding a nih. Nagaland mi hi PSK a Passport hnitu hai chu Application an pekluta inthawk ni 15 sunga an hmu theina dingin Ministry of External Affairs (MEA) chun remruot a tum tiin Minister hin a hril a, Arunachal Pradesh­a khawm hiengang PSK hi hawng vat a ni ta ding thu a hril. Hieng hmun haia PSK hawng zo a ni pha India hmarsak state 8 hai chun PSK Centre anni puolin an nei seng ta ding a nih.

Burkina Faso hotel­ah silai kap hrut leiin mi 20 an thi
OUANGDOUGOU: Zanikhan Burkina Faso khawpuiah al Qaeda pawl han Splendit Hotel pakhat hlukhumin silai an kap hrut leiin mi 20 an thi bakah midang tam tak an hliem. Security Forces hai chun hotel hi an inhuolkhum vawng tah. Tuta tum hi Burkina Faso khawpuia Terrorist (Islamist militants) hai an chet vawikhatna a nih. Hotel beitu han an hrentang mi 126 hai chu sansuok vawng an ni ta a, Hotel runtu terrorist 3 hai khawm kap hlum vawng an nih. Al Qaeda in the Islamic Maghrep (AQIM) chun hi thil thawtu hi anni pawl a ni thu an puong. Sansuoka um hai lai hin  Public Works minister Clement Sawadogo khawm a thang niin  Burkina Faso communication minister Remis  Dandjinou chun a hril.

Constable in Rifle 4 a tlanhmangpui
SRINAGAR: Jammu and Kashmir­a Anantnag district a Bijbehara hmuna chun Police Constable pakhat Mashooq Ahmad an ti chun AK assault Rifles 4 a tlan hmangpui.Constable Mashooq Ahmad hi SDPO, Bijbehara hmuna duty le posting a ni a, ni 2 lai zet in report ta lova a um leiin Police official hai chun ringhlana an nei a, Police station an enfel hunah Rifles 4 an hmang ti hi hriet suoka hung um nih. Mashooq hi Shopian district mi niin December 24, 2015 nia DSP Irshad Ahmad le a vengtu helpawl han an kap huna hliemna tuok ve a nih.

Rajnath in Security official hai meeting a neipui
NEW DELHI:  Union Home Minister Rajnath Singh chun zanikhan States 13 haia Central Intelligences, Investigative agencies le Police top official hai New Delhi hmuna meeting a neipui. Hi huna hin India rama thalai hai lai ISIS hai an inlar zuol nia hrilna um le inzawma a lo do dan ding chungthu ngaituoin an hriltlang. A bik takin ISIS han thalai hai hipna dinga social media an hmang tangkaina chungthu nasa taka chai a nih.

VAWISUN THUPUI
Chuongchun, lal David chu a lut a, Lalpa hmaa chun a thung a, “Aw Lalpa Pathien, tu am ka na, ka sunghai tu am an na, hi chen chen hi i mi thuoi? ­ 2 Samuel 7:18


Editorial
MLA Election-ah nghawng a nei dim!

Manipur   Assembly  Constituencies 60 um hai laia Assembly Constituencies 40 huop sung phairam   biel 4­ Bishnupur, Thoubal, Imphal East le Imphal West district haia Municipal Council 18 le Nagar Panchayats 8 haia January 11, 2016 nia inthlangna neia um vote tla hai chu zani hmasa khan tiem a ni a. Inthlangna result ei hriet dan dungzui chun Manipur­ah a zawna term 3­na sawrkarna siem mek Congress chu a tling rawn tak nihai sienkhawm an tlahnuoi ti an lang. BJP chu  hma an sawn hle a, election hmasaa khan pakhat chau member an nei a, chu khawm chu Ningthoukhong­a Congress ticket­a tling, a hnunga BJP a lut nia hriet a ni a, Central­a sawrkarna siemtu an ni lei khawm ni ngei a  ta, tuta tum Manipur Municipal Council le Nagar Panchayat Election­a hin BJP chu a hma le tekhiin a pathumna ni phak chau hai sienkhawm an thawtha thawkkhat hle. Trinamool Congress chun MLA nei hai sienkhawm a tling an umnaw a, MLA nei lo LJP chu 4 an tling ve thung.

Municipal Council le Nagar Panchayat Election neina hi Assembly biel 40 zet huom a ni leiin mi tam tak chun kum 2017­a Manipur Assembly Election hung um ding thlirlawkna ni hielin an hril a, thil awm tak khawm a nih. Hi thua hin Manipur Dy. Chief Minister Gaikhanbam khawmin Muncipal le Nagar Panchayat Election 2016 hi mini­Assembly election a ni ding thu a lo hril ta nghe nghe a nih.

Hieng laizing hin tuta tum Municipal Council le Nagar Panchayat Election­a Independent candidate an tlingrawn em em hin ngaituona a suksei hle. Municipal Council le Nagar Panchayat Election­a Independent­a tling thenkhat hai chu BJP thlawp ni tawla hril an ni a. Chuonglaizing chun Independent­a tling tam tak hai chu Congress mi le sa ‘Congress B team’ an nih tia hrilna a um bawk a; hieng a ni chun kum 2017­a Manipur Assembly Election hung um ding hi iem a hung ang ding ti chu mi tam tak ngaituo a nih.

Entirna dingin Manipur Chief Minister ni lai mek Pu Okram Ibobi Singh  biel Thoubal Municipal Council seats 18 uma chun BJP tling naw hai sienkhawm INC (Congress ) in seat 2 chau an lak a, Independent candidate 10 zet an tling thung a nih. Independent hai Congress B team an  nih ti hi a lo indik a ni khawmin  party ticket peka um tak hai tling si loa  an hung um el hi ngaituona sukseitu a nih. CM O.Ibobi  Singh biel Thoubal chau ni lovin, Manipur­a Congress MLA ni lai mek le Works minister hlui Ranjit biel Kakching Khunou Nagar Panchayat seat  9  umah  BJP in 6 le Independent in seat 3 lain Congress an Nill thak  bakah  Manipur Congress sawrkara Works Minister  biel Mayang Imphal a Municipal Council seats 13 uma chun  sawrkarna siemtu Congress in seat 2 an lak phak tawk a, BJP in seat 7 le Independent in seat 4 an lak a nih.

Hi taka inthawk hin Congress chu party mala tling rawn tak khawm nihai sienla nasa takin an tlahnuoi ti hriet thei a nih. Congress le BJP an khing tak dinga ngai an ni laiin Independent hai nasa taka an hung hrat hin Manipur­a Hill districts haia Autonomous District Council (ADCs) 6 haia inthlangna nei nuhnung tak kha a min hrietdawktir naw thei nawh. A bik takin Churachandpur district­a candidate tling a tamlem hai kha Pawl thenkhatin Party ticket la lo dinga an vau leia Independent­a ngir an ni a, an thisen ruok chu Congress (Congress ‘B’ Team) an nih ti inla ei hril suol taluo ring a um nawh.

Manipur chun, August 31, 2015 nia Assembly­a Bills 3 ( ILPS Bills  an ti el) tribal han an dodalna ; Manipur­a Inner Line Permit (ILP) hmang nawk dinga nawr pawl JCILPS hai thil phut; Meitei hai Scheduled Tribe(ST) a zieklut dinga ngen pawl; Naga Issue le thil dang dang hai leiin hun khir tak a tawng mek a. Hi lei hin BJP inrawina hnuoia Central sawrkar khawmin ei thil dit le ngiet hai an kawkal tawl vawng leiin kum 2017­a Assembly Election hmasuon ei ni bawk leh  ei harsatna hai thut le thuta hung chingfel hi harsa a ti hle niin an lang. Tuta Tribal Movement chungthua khawm hin CCPur District­a MLA 6 um hai chu boycott puong khum ni hai sienkhawm thenkhat ngirhmun a sawihning hle a hriet a ni laiin thenkhat chu an lan hning naw niin an lang. Hieng issue dang dang hai lei bakah Centre­a sawrkarna siemtu BJP an ni leiin Manipur Politics ngirhmun hih Assembly Election 2017­a hung um ding hin iemanitakin an her danglam ngei chu mi tam tak ring dan a nih.

Post a Comment

Powered by Blogger.