Consultation meeting in Feb. 1 a inthawk ni 5 sung NH le National Projects hai   Bandh/Blocakde thaw dingin an rel
CCPUR: Manipur Assembly in August 31, 2015 nia  Bills 3 a passed hai dodalna le inzawma indin Joint Action Committee (JAC) Against Anti­Tribal Bills inrawinain zani sun dar 12:00 a inthawk khan Synod Hall, IB Road, CCPur­ah Consultative meeting nei a nih. Hi huna hin District dang haia inthawk khawmin member iemanizat an hung thang bakah Manipur Tribal Forum­Delhi (MTFD) a inthawk Thangkhanlal Ngaihte a hung thang. Ukhrul District­a inthawka hung hai lai Ramthing, Founder Member ATSUM; BD Behring, Ex­MLA; UNC Vice President Asim Pao hai an thang. Hi huna hin Bills 3 hai le inzawma Tribl Movement fe meka hmalak pei dan ding le thil thaw dan ding (future course of action) ngaidan le ditdan tum tum fekhawm han an hriltlang.
 
Consultation nei a ni hmain Rev. N. Vungzasin in tawngtainain hun a hawng a, hi zo hin H. Mangchinkhup, Chief Convenor, JAC in Tribal Movement le inzawma hmalakna; Manipur sawrkarin vawi iemanizat JAC inbiekpui dinga a fiel hun haia Charter of Demand peklut a ni thu hai bakah rawtna iemanziat a hrillang bawk.
         
Member fekhawm han Tribal movement fepei dan ding thua an ngaidan le ditdan hai an hril hnungin Resolutions 7 an siem. Resolution an siem hai chu­ Manipur sawrkar le Central sawrkarin tuchena Tribal hai harsatna a ngaitha leia lampui dang a um naw leiin January 26, 2016 nia Indian Republic Day hmang ding hi Manipur a tribal hai chu non­cooperation movement le inzawma thang lo ding, JAC in January 26, 2016 zanah Manipur­a tribal hai chengna biela in tinah martyrs hai inzana le sunaa candle sit var seng ding; JAC hnuoia Tribal organisation tum tum han February 1, 2016 a inthawk Manipur le hmun dang infepawna lampui hai po poah ni 5 sung (5 Day) Total Chakka Bandh/Blockade thaw ding le National project hai hrim hrim ban ding; ADC/CCPur a MDC hai chu tuolsunga mipui aiaw an ni angin movement hrat lema a fe theina dinga mawphurna pek ding, hi le inzawmin Tribal Martys 9 hai thua FIR file mawphurna pek, ni 3 sunga sin tan ding; JAC/JPO in movement le inzawmin an khat tawka Morgue tuolah dharna a huoihawt ding le awareness a pek ding; Bills 3 hai chungthua state sawrkarkarin JAC palai hai December 29, 2015 nia an hmupui huna Bils 3 hai CorCom agenda a ni leia sawrkarin a hnawl theinaw a ni thu a hril chun sawrkarna kawnga a hlawsam ti a sukchieng leiin JAC in Article 356 of Indian Constitution hnuoiah Manipur President Rule hnuoia puong dinga Central Government a ngen ding ti le ADC/CCPur in JAC le inrawntlangna a nei hnungah Manipur level Tribal Forum indin ding ti hai a nih.

IPPI DC le ADCC han an hawng ding
CCPur:  January 17, 2016, 7:00AM khin District Immunization Office campus­ah 1st Round IPPI/NIDs, 2016 chu Mr Lunminthang Haokip, IAS, DC/CCPur & Chairman, District Task Forc Immunization le Langkhanpau Guite, Chairman, ADCC han hawng an tih. Hi huna hin Dr Thangchinkhup Guite, CMO/CCPur chun IPPI le inzawmin thuhrilna hun hmang a ta, hi huna programme hmang zoin naupang kum 0­5 inkar hai Zenghri vengna damdawi indawntirna khuo le veng tina Polio booth haia nei ning a tih.

GHCF Music Album tlangzar ding
Guwahati:  Guwahati Hmar Christian Fellowship (GHCF), Kristien Thalai Pawl hmalakna hnuoia “Lalpa Ropui” ti thupui hmanga Music Video Album siema um chu January 30, 2016 khin Guwahati hmuna tlangzar ning a tih. Music Album hi Pu Thanghlun Hmar, IRS in a produce a ni a, hi album­a hlasaktuhai chu­ GHCF KTP Choir, Nk. Rosiemkim Riengsete, Nk. Gloria Khawlhring le Nk. Kimi Ralsun hai an nih.
 
Album­a hin hla 11 um hai chu­ 1. Lalpa Ropui; 2. Halleluiah Amen; 3. Aw Zion; 4. Glory to his name; 5. Beiseina Hring; 6. Hnuoi hi ka In an nawh; 7. Chatuon Pa; 8. Phulo Hmangaina; 9. Lalpa Kona; 10. Sawt ta naw nih ti le  11. Sandamna Ropui ti hai an nih.
         
Album tlangzar zoin Guwahati puotieng hmun hran hrana thawndar ning a tih tiin CHCF KTP thuoituhai chun an hril.

Loneituhai ngaidan lakkhawm ning a tih: Mohanbhai Kundariya
IMPHAL: Union Minister of state for Agriculture and Farmer’s Welfare Mohanbhai Kundariya chun zanikhan Colege of Agdiculture (CAU), Iroisemba Academic Block thar a hawng a, hi zo hin Soil Testing Laboratory sin thaw dan enfelna a nei.
 
Khuo inthal le tuilien leia harsatna tuorhai chu sawrkar thlungpuiin thangpuina peng a ta, bu le thlai tam lem  tharsuok a ni theina dingin loneituhai ngaidan lakkhawm ning a tih. January 17 & 18, 2016 khawm hin Gangdok, Sikkim ah Farmer’s Conference nei ning a ta, loneituhai ngaidan lakkhawm ning a tih tiin hi huna Mohanbhai Kundariya in mipui fekhawmhai hma thu a hrill huna a hrillang.
 
Manipur a tuilien leia harsatna tuorhai thangpuina dinga financial Assistance pek dina riruong ngen le pekluta um chu sukfel a la ninaw thu Minister hin a hrillang bawk.
         
Mohanbhai Kundariya hi January 13, 2016 a Imphal hungtlung a ni ta a, vawisun hin Manipur CM O.Ibobi Singh inhmupui a ta, hi zo hin Imphal suoksanin New Delhi a pan ta ding a nih. Manipur a ni 3 a cham sungin Manipur hmun hran hran hai a sir kuol a, Agriculture tienga State sawrkar hmalakna chi tum tum hai enna a nei.

Zing dar 8 a inthawk vote tiem tan ding
Imphal: Vawituk zing dar 8 a inthawk hin Manipur phairam biel sung Districts 4 haia  Municipal  Council 18 le Nagar Panchayats 8 haia election huna vote tla hai tiem tan ning a ta, result puonglang pei ning a tih. Vote tla hai hi DC Office, Thoubal; DC Office Bishnupur; DC Office Lamphelpat; DC Office Porompat le ADC Office, Jiribam hmun haiah tiem ning a tih. Vote tiemna buoina um lova nei a ni theina dingin vote tiemna hmun haiah Cr.P.C.144 pong ning a tih. Inthlangna hi January 11, 2016 a nei a ni a, inthlangnaa inking tak hai chu sawrkarna cheltu Congress le BJP hai nia hril a nih.

Journalist sukhliema um an va kan
Imphal: January 11, 2016, zan dar 9:30 vela pasal pakhat M. Dujon an tipa in Journalist 4 a sawisak hliem hai laia JNIMS, Imphal­a enkawl mek Sangai Express daily a senior reporter Athokpam Jiten Singh chu zanikhan Ms A. Sarda Devi, National Vice President, Mahila Morcha BJP chun a va kan a, thangpuinain Rs. 2000/­ a pek. Ms. Sarda Devi hi N. Ibomba Meitei, Pramukh Imphal East le Heinohollen, President, BJP Sadar Hills President hai khawmin an zui fe a, thangpuinain Rs. 2000/­ le  Rs. 500/­ an pek bawk.

Hun tiemchin um lo General Strike
Imphal: Joint Action Committee (JAC) Tiddim chun January 17, 2016 zing dar 6 a inthawk hun tiemchin um lovin Tiddim Road ah General Strike an thaw tan tum niin thusuok an siem. General Stike hin inchuknainhai, sakhuona thil hai, essential services le Media hai chu huomsa naw nih tiin JAC Tiddim thusuok chun a hril. State sawrkarin Thangjing ti hming ‘Thangting (Thangting Sub­Division) tia thlakthleng a tum dodalnaa general strike hi thaw an tum niin JAC chun an hril. JAC Tiddim chun Thangjing hming Thangting tia thlakthlengna chu hnukkir a, Thangjing ma a ko dingin state sawrkar an ngen a, sienkhawm an ngenna siem chu state sawrkarin a ngaisak naw leia a hmaa thutlukna an lo siem tasa anga General Strike hi an thaw tum niin JAC Tiddim thusuok chun a hril.

Ni 10 sung an inthlazal
IMPHAL: KSO, Jiribam le Tamenglong han January 12, 2016 zanrila inthawka Railway project sinthawna darkar 120 sung aw dinga an dang chu ni 10 sung an inthlazal ding thu an puonglang. Rel lampui siemnaa ram a tawksa neihai kuoma zangnadawmna sum pek dinga ti pek an la ninaw leia Rel lampui siemna sin hi an dang niin KSO, Jiribam le Tamenglong thusuok chun a hril.

Ukhrul­ah KNA cadre 2 ralthuom leh man
IMPHAL:16­ Assam Rifles chun January 12, 2016 khan Ukhrul district­a Urangpat village­ah KNA cadre pahni an man. Mana um hai chu ­No 1707, SS Pvt Thamboi @ Rex (22) S/o Zamat, of Numjang village, Saikul, Senapati District le No 2407, SS Pvt Zamdil @ Iron, (27) S/o Amucha of Chassad village, Ukhrul District  hai an ni a, an kuta inthawk M 20 Pistol 1 le a mu 5 mansa a ni a, Lamlai Police Station­ah an peklut niin zanita PRO Assam Rifles thusuok chun a  hril.

27th Drivers’ Day hmang
Imphal: Zanikhan Manipur hmun tum tumah 27th  Drivers’ Day hmang a ni a, Langjing Achouba Truck Parking ground a chun All Manipur Road Transport Drivers’and Motor Workers Union (AMRTD& MWU) hai huoihawtnain hi ni hi hmang a ni a, Social Welfare and Cooperation minister Ms Mirabai bakah official dang dang han an uop. Drivers lo thi ta hai sunna le an sung hai thilpek inhlan an nih.

Thil chi tum tum an sem
Imphal: 9th Sector Assam Rifles hnuoia 12­Bihar Regiment chun zanikhan Mayang Imphal, Chabung Company Chirai Junior High School­ah Sports item chi tum tum an va sem. Chun, January 9, 2016 khan 44­Assam Rifles chun Civic Action project hnuoiah Ukhrul district­a Kamjong village­ah naufahra hai kuoma thil chi tum tum an sem. (PRO­Assam Rifles)

Indo­ - Pak. Foreign Secy. level talk kansel
New Delhi: January 15, 2016 a India le Pakistan han Foreign Secretary level­a inbiekna an nei ding ti chu thul a nih tiin Ministry of External Affairs spokesperson Vikas Swarup chun a zanikhan a hril. Tulai hnaia Pathankot - a IAF hmunpui terrorist han an beina le inzawma inbiekna nei dinga ti hi la thul hri a nih.India chun Pathankot incident suichieng dinga Pakistan in Special Investigation team hung tir a tum chu a remti pek a, a tul le pawimaw anga thlawpna pek an ni ding thu Mr Swarup chun a hril a, ni dinga inbiekna nei dingin an remti ve ve a nih.
 
Pathankot IAF base beinaa mawphurtu taka intum Jaish­e­Mohammed le Maulana Masood Azhar hai chu Pakistan­a man nia hril an ni a, sienkhawm Pakistan chun sukchiengna a la neinaw thu a hril.

Jaitley in Feb. 29 ah Union Budget a phar ding
NEW DELHI: Finance Minister Arun Jaitley chun February 29, 2016 khin Parliament­ah Union Budget 2016­17 phar a tih tiin Minister of state for finance Jayant Sinha chun zanikhan a hril. Finance minister hin Union Budget phar ding le inzawmin January 4, 2016 a inthawk khan Industry, trade unions le economists hai thangin stakeholders tum tum hai a lo inrawnpui ta a nih.

Budget session­ah Road Transport & Safety Bill
NEW DELHI: Union Road and Highways minister Nitin Gadkari chun, Parliament Budget session hung um huna Road Transport and Safety Bill 2015 passed a beisei thu zanita Mumbai hmuna Road safety week hmangna huna a hril. Khawvela inlirthei changsuol leia thina tlung po po laia 12 percent chuong chu India rama tlung a ni thu hrilin inlirthei eksiden  tlung hai laia a tam tak chu inrui puma motor khal lei a nih tiin Gadkari chun a hril. Khawvel pumpuia hin kum tin inlirthei eksiden leiin mihriem 12.4 million vel an thi zie anga hisap a nih.

VAWISUN THUPUI
Hrattak le huoitakin um rawh; ti naw la, zam bawk naw rawh, Lalpa i Pathien chu i fena taphawtah i kuomah a um pei ding annawm,” tiin.~ Joshua 1:9

Editorial
Hun tha

Pathien zara dam ta nana na chun kum thar 2016 ei hmang tan mek a. A va ropuiin lawm a um takzet el. Siemtu Pathienin hi hun hi, puonkhawngtuin a puon khawng zo ta sa ang peia a ziel ang elin, ei ni hunbi tiem dan angin January thla a hung ziel tlung ta a, iengangin am hun hi a la hung inziel pei ding ti chu hrie lawk thei ei um der nawh. Hun tha mi petu Pathienin, hi hun tha a mi pek hi, ei ni mi chi hran hran hai hin iengtin takin am ei hmang tawl ding chu maw! Hi kum sangbi thar hin thil iemani tak chu hung hersuok ngei dingin beiseina lien tak chu ei nei seng ring a um. Chu beiseina chu a tha tieng le a tha naw tieng a ni thei ve ve, Iengleh khawleh hun fe ta hai ang tho khan a hung inher suok chu a ni phawt el.
 
Hun hin a mak ngawt el. Tuta kum sangbi thar khawm hi  puonkhawngtu in a puonbu a ziel ang hin a hung ziel mek a nih. Thil mak takel chu hun fe pei hin khawsawt a keitho tlat el. Hun ei hmang mek le hun hungtlung ding hin khawsawt le kokir ruoi ruoi chakna an um tir lem nawh. Hun herkir theina khawl hi um ta sienla chu thenkhat chun a renga herkir nuom an ta, thenkhat ruok chun a then a zar chau herkir nuom an tih. Ei hun hmang ta po po seng kha hang her suok nawk thei inla chu, nuizat um fe fe, innui nuom mang lo tak tak ei tam hle ring a um.
 
Hun hmang dan hi fimkhur a ngai hle. Ei hun hmang liem ta hai hi kokir thei le siem that thei an tanaw leiin kum thara ei hun hmang dana hin a hma neka ei fimkhur chu a tul em em el a nih. Bu septuin bu a sep a, faktlak lo a hum, a favai le a kem hai a pei a, a bufai tha chau a lak ang hin, nun dan tha lo le mawi lo hai chu bansan a, nun dan tha le mawi, thaw dan tha le thiltha haia thlakthleng a, ei hun tha hi hmang seng dinga ei damlai hringnun hi ei hmang nuom a um. Chuonganga ei hun ei hmang tha chun ei mimal nun, ei khawtlang nun, ei sungkuo nun hung inhawi a ta, ei hung chngkang sawt ding a nih.
 
A then chun upat tieng ei pan mek a, a bul hang tan that nawk tak nuom inlakhawm an khelna chin a lo um el thei. Amiruokchu, beidawng lova ei hun tha hai ei hmang tha chun malsawmna le hlawtlingna tam tak ei la dawng ve thei a nih. Hi lei tak hin hun tha hmang that hi a pawimaw a nih. Thenkhat chu thalai hun tha hmang mek ei ni tawl a. Ei that lai hun le ei hun tha hai hmang tha dinga ei dam lai lawng hi ei khal fimkhur takzet nuom a um. Mani hun tha hmang thiem thiem le a hmang tha tha mi hamtha an hung ni ding a nih.
 
Thalai thenkhat chun an hun tha nei hai a thanaw le a mawinaw zawngin an chen a. Taksa le thalraua piengtharna nei der lovin anni nuom danin khawvel hi an lo hmang liem tah. Hi khawvela hin an lawmman ding an hmang zo vawng ta bawk. An mimal ta ding chau khawm ni lovin an sungkuo, khawtlang, ram le hnam ta ding khawma hmangna ding bo anni leiin tu ngainat le inpam khawm an hlaw nawh. Kawk bovin an ri a re hmak hlak. Hiengang mihai hi inhnar um der lo an nih.
         

Thalai thenkhat annawleh mi thenkhat ruok chu an hun tha nei chu an hmang tha a, theitawp suoin, ruol el takelin hun an hmang a. Mihai inhnar le entawn bakah mi hmingthang le chawimawi an hlaw hlak. Mihriem seng seng inang naw takel ei nih. Chuleiin, tuta kum thara inthawk hin chu mitinin a hma neka ei hun tha nei hai hmang tha dinga hma ei lak seng nuom a um. Ei dam sung hin inchuk zo a u m nawh an lo ti hi thudik a nih. Ei nunah a thanaw le a se lai pei a,a tha lai mihai hmu thei le hriet thei dingin tarlang ei tiu. Chuong a ninaw chun ei thatna lai hi mihai hriet lovin a liem hmang el ding a nih. Ei hun tha hmang dan, ei nun dan le mizie haia hin ei lung a awi tawk am tihai khawm hi mani inennawn seng hlak ei tiu.

Post a Comment

Powered by Blogger.