Responsive Ad Slot

Hmasawnna Thar | 14 January, 2016

Thursday, January 14, 2016

/ Published by VIRTHLI
JNSSU Teachers Training­cum­fellowship nei
CCPUR: Joint Naupang Sunday School Union huoihawtnain Jan. 13, 2016 khan Lamka ICI Church compound­ah Sunday School Teachers’ Training­cum­Fellowship programme hmang a nih. Hi huna hin Resource person in Rev. Lalsandam; Pastor Rorelfel  hai resource person in an thang a. Hmar tawng tiem/ lam dan indik ngaipawimaw a tul zie uor taka hril a nih. Tulai inchukna tienga hmasawnna hrat taka a fe laiin ei tawng tiem thiem ta lo ei pung hrat hle a hriet a ni leiin naupang Sunday School inchuktirtu hai theitawp suo a, A, Aw, B chen naupanghai inchuktir a, Hmar Bible thiem taka an tiem thei ngeina dinga thang lak a pawimaw zie le naupang inchuktirtu quality dinga pawimaw hai hril a nih.


Chun, tulai khawvel hmasawnna hrat taka a fe mek lai hin naupang lungril advance takah an lungril le inmila Sunday School subject buotsai dan ding hriltlang a ni bawk.

Hi huna hin naupang thuoitu 160 vel an thang a, fellowship hlim taka hmangin zantieng ruoi an kiltlang.

First round IPPI, 2016 Jan. 17 ah
CCPUR: January 17, 2016 khin India ram pumpuiah National Immunization Day (NID)/Intensified Pulse Polio Immunization (IPPI), 2016 hmang ning a tih. Churachandpur district a chun IPPI, 2016 first Round hi Booth Day Jan. 17, 2016, 7AM a inthawk khin khuo le veng tin haiah Polio booths 435 hawng ning a ta, hieng haia hin naupang kum 5 le a hnuoitieng (0­5 years) hai Zenghri vengna damdawi (polio) indawntir ning an tih. Chun, January 18 le 19, 2016 hai khin Booth Day nia Polio dawn lo naupang hai damdawi indawntirna dingin  in tin sir (house­to­house visit) thaw ni bawk a tih.

Naupang kum 5 le a hnuoitieng nei Nu le pa hai chu ngaipawimaw a, mani nau hai Polio damdawi indawntir seng dingin District Task Force (DTF­I), CCPur chun ngenna a siem. Khuo tina Chief/Chairman/Secretaries/Village Authorities hai chu an khuo le vengah  Polio/IPPI team an lo lutnaw a ni chun an rang thei anga official contact No. 9862088197/ 9862613737­a inhriettir dingin an ngen. Polio indawntirnaa mawphur dinga ruot ASHA/AWW le Nurses/Med. Staff hai chu DFWO/CCPur Office­ah en thei dinga tar a nih.

In register lo hai student phur thei lo dingin
CCPUR:  Zani 11:00AM khan CCPur Dist. School Vehicle Service Association (CDSVSA) in Chiengkonpang­a an office­ah meeting an nei. Hi huna hin CDSVSA a registration thaw lo motor iemanizat student phur an um leiin hi pawl a in register lo hai chun student an phur  phal lo ding; CDSVSA a in register lo student phur leia buoina tuok an um chun an ni’n maw an phur ding; kum 2012 resolution dungzuiin kum 2016 a khawm student phur man thla khatah Rs. 600/­ la ni zing a ta, motor bahara Feb. –November, 2016 la ding le nu le pa hai CDSVSA a in register lo motor hai mani nau hai inphurtir lo dingin an ngen.

Tura Hmar Welfare in ralna an pek
CCPUR: Meghalaya­a Tura Hmar Welfare a inthawk Secretary Rorel Huolngo le Treasurer Lalhamangaisang Songate han zanikhan JPO kutah Tribal martyrs hai ralna dingin Rs. 4,000/­ an inhlan. Tura a tlangmi um hai khawmin Manipur tlangmi hai harsatna an hrietpui thu le an tuorpui thu hi huna hin an hril. Chun, Upa Tonkhansong of Bungmual in Rs. 500/­ le Sehpau of Monglenphai in Rs. 100/­ a pek bawk.

Stalls le Gate siemtu ding hai
CCPUR: Jan. 26, 2016 nia Dist. level Republic Day Public Ground­a hmang huna Dept. 11­ Forest; Dist Malaria Deptt.; ICDS; Sericulture;DIC; CAF &PD; NABARD;Fishery;DRDA;Health le RSETI han stalls siem an ta, DRDA in main gate; Dist Council in Forest Gate ah; Vetinary , Cooperative le TD han Nehru Marg le Social Welfare &Dist Immunisation Office in Lanva ah Welcome gate siem an tih. Parade contingent thang ding han Jan. 23, 2016, 7AM in Public Ground­ah rehearsal nei an tih.

SSPP Foundation day hmang
CCPUR: Zani 11:00AM khan 69th Siamsinpawlpi (SSPP) Foundation le Siamsin Awards 2016 semna Angels Place, Bungmual­ah nei a ni a, award sem hmain Tribal martyrs hai sunna minutes 1 sung to tawka hun hmang a nih.



Hi huna hin field dang danga ruol kh<m mi 34 hai kuomah SSPP Mufler le appreciation/memento inhlan an ni bawk. Zantieng huna “Tu le hmatienga a Siamsinpawlpi in a thaw dinga dit hai” ti thupui hmangin discussion nei a nih.

ABA in Diamond Jubilee
CCPUR: Loktak Project Kha Aimol Baptist Church (ABA) chun January 14­15, 2016 inkar sung khin A.B.A kum 60 tlingna Golden Jubilee hmang an ta, Rev. Dr Kh. Khaizakham in Pathien thucha hril a tih. Jan. 14, 2016, 4:30PM inkhawm huna Hall hawngna le inhlanna Rev. Ln. Songvanjir Aimol, Supdt.  Pastor A.B.A. in nei a tih

Manipur CM in  33/11 KV Power Sub­Station pahni a hawng
IMPHAL: Manipur CM O.Ibobi Singh chun zanikhan Imphal West district sunga Sekmai le Sadar Hills huop sunga Saitu Gamphajol hmun haiah 33/11 KV Power Sub­Station thar hai le  SDO Saitu Gamphajol office complex a hawng bakah Mayangkhang, Senapati district­ah Indian Institute of Information Technology (IIIT) bawlna ding le 33/11 KV Sub­station bawlna ding lungphumna a nei bawk. Hieng hun haia hin Dy. CM Gaikhangam; IFCD Minister Ngamthang Haokip; Rural Devpt. and Panchayati  Raj Francis Ngajokpa; Sekmai MLA Devendro; MSPCL Director N. Sarat le high official tam tak an thang.

Zanita IIIT bawlna ding foundation stone zanita CM in a hawng dinga siem hi zani hmasa khan mi tu ti hrietlo han an lo suksiet. Myangkhang le Ningthoupham Village hai kara inhrietthiem nawna um lei le, foundation stone­ah Ningthoupham village zieklang a ninaw leia lungawilo pawl han an suksiet ni ding an ring thu a hmuna va enfeltu Police hai chun an hril. Ei thu dawngna thenkhat ruok chun, Power sub­station le IIIT bawlna ding ram thua compensation peknaw lei ni dinga ring a ni thu a hril.

Manipur CM O.Ibobi Singh chun, tlangram biela hmasawnna sin chi tu m tum thawna sukbuoitu an um leiin Development works hran hran hai a hun taka zo thei lovin a um pha tiin thuhrilna a nei huna a hril. Tuta thal hun sung hin Senapati District sunga National Highways lampi le lampui dang hai siem zo tum a nih tiin a hril.

Power Sub­Station hawnga a um ta leiin a biel mipui han electric tha le hnienghnar taka an hmu a beisei thu hrilin service tha­lem an hmu pei theina dinga electric hmangtu hai chu thlawp dingin a ngen.

Union Agri. Minister Manipur­ah  
IMPHAL: Manipur­a ni 3 sung cham dingin Union Minister of State for Agriculture and Farmers’ Welfare Mohanbhai Kundariya chu zanikhan Imphal a hung tlung. Union Minister hi Manipur a Central sponsored scheme tum tum thawa um hai enfel dinga hung inzin a nih.

Mr Mohanbhai Kundrariya hin Manipur Raj Bhavan a pan nghal a, State Agriculture officials hai inhmupuiin Centre sponsored Agricultural schemes tum tum hai thaw dan official han report an pek.

Union Ministre hin zanikhan ICAR Complex, Lamphel a va sir a, ICAR NE Manipur Centre 41st Foundation day hmangna huna khuollienin a thang a, thuhrilna hun a hmang. Sawrkar thlungpui chun tuta inthawk kum 2 sungin Manipur le NE biel thangsain India rama loneitu vaibelsie 14 hai kuomah Soil Help Card pek a tum bakah loneituhai chu an sin thaw haiah hma an sawn lem theina dingin thangpuina peng a tih tiin a hril. Chun, Orgnic  Farming uor zul a tul thu a hrilin Sawrkar thlungpui in New Crop Insurance Policy  a puong vat ta ding thu a hril. Hi huna hin Farmers Fair khawm buotsai le Thlaichi khawm sem a nih.

Union Minister hin vawisun hin College of Agriculture (CAU), Iroisemba Academic Block thar hawng a ta, hi zoin Soil Testing laboratory sin thaw dan en a tih. Jan. 15, 2016 in CM O.Ibobi Singh inhmupui a tih.

KSO in Rel lampui siemna an ban
IMPHAL: KSO in January 12, 2015 zanrila inthawk Tamenglong le Jiribam haia Rel lampui siem sinthawna an ban leiin Rel lampui siemna sukbuoi pha. Rel lampui siemna in a tawkbuoi ram neituhai kuoma compensation pek ding ang sawrkarin a la pekzonaw dodalnaa sinthawna hi an ban a nih. Rel lampui siem ban na hi January 17, 2016 chen a saw ding niin KSO Tamenglong le Jiribam General Secretary J. Thangboi chun a hril.

JiribamSu b­Division le Tupul, Tamenglong district inkar Rel lampui siemna hi Northeast Frontier Railway (NEFR) in an thaw a ni a, Rs. 4,445 crore sengna ding le kum 2018 chena zo dinga ti a nih. Silchar hmuna meeting nuhnung taka khan NFR official hai chun compensation hi a kimin ni 15 sunga pek an ni ding thu an tiem a, sienkhawm an sukpuitling naw leia darkar 48 sung Rel lampui siem sinthawna hi ban an puok niin J. Thangboi Kuki chun a hril.

KYKL cadre 3 man an nih 
IMPHAL: January 12, 2016 khan 45­Assam Rifles chun  Imphal East Police le thangruolin   Tumukhong hmuna dappui an thaw a, KYKL cadre pahni an man. Mana um hai chu­ Batch No 20, SS Pvt, Konsam, Imoba Singh @ Kanba, (37) , S/o (L) Konsam Ibohal Singh, of Tumukhong Mayai Leikai;  SS Pvt, Leihaorambam Ibomcha Meitei @ Shaolin, (35) S/o (L) L Naba Meitei, of Tumukhong Makha Leikai  le Batch No 18, SS Pvt, Moirangthem Tiken Meitei @ Sangainingthou, (29)  S/o Late M Samungou Meitei,  of Tumukhong Mayai Leikai hai an ni a, Andro Police Station­ah an peklut. (PRO­AR)

Drivers Day hmang a ni ding
IMPHAL: Vawisun hin Manipur­ah Drivers Day hmang ning a tih. Hi Day hmang ding lei hin motor service, a bikin Bus le Truck hai an tlawm pha ding a nih. All Manipur Petroleum Tankers Drivers Union chun Drivers Day a vawi 27­na hi Maipakpi Community Hall, Chingmeirong Mang ah hmang an ta, hi Union hnuoia Driver thi ta 66, Handyman thi ta 11 le Veteran drivers 7 sunghai thilpek inhlanna le chawimawina hunin  hmang an tih.

Jiribam­ah Truck tam tak an intang
IMPHAL: Jirbam District Demand Commitee in Jiribam District puitlinga hlangkai dinga an ngenna le inzawma tiemchin umlo bandh an thaw leiin Jiribam­ah Imphal hung pan ding Manipur nitin mamaw phurtu Trucks 130 chuong an intang nin ei thu dawngna chun a hril.

CM in Relief camp a va sir
IMPHAL: Manipur CM O.Ibobi Singh chun January 4, 2016 nia Manipur­a simkhawlei inhning leia chengna ding In nei loa um hai enkawlna Kanglatongbi hmuna relief camp a va sir. Hi huna hin minister thenkhat le MLA bakah district officials han an zui. Relief camp a um hai chun sawrkara  thangpuina an hmunaw thu an lo intlun a, CM hi iemanichen a um hnungin sawmdawlna pek an ni ding thu hrilin a fesan nawk. Hi lai hmuna relief camp a hin mi 75 vel an um niin ei thu dawngna chun a hril.

Simkhawlei inhning leia chengna ding in nei lo hai ta dingin Tamenglong district­ah relief camps 2 hawng a ni bakah Senapati district­ah relief camps 5 hawng a nih. Senapati district­a hin simkhawlei inhning khan In 1,000 chuong a suksiet niin official thusuok chun a hril.

Manipur sawrkar chun Manipur­a simkhawlei inhning in thil a suksiet hai siemthat le sawmdawlna sin thawna dingin sawrkar thlungpui kuomah Rs. 500 crores a lo ngen ta a nih.

AKRSU in Jan. 18 a inthawk darkar 48 bandh
GUWAHATI: All Koch Rajbongshi Students’ Union (AKRSU) chun, PM Narendra Modi Assam ram a hung inzin ding le inruolin January 18, 2016 a inthawk khin Assam pumpui huopin Strike/bandh an thaw ding thu an puong. Tai Ahoms, Koch Rajbongshis, Moran, Motok, Sootea le adivasis han Scheduled Tribe (ST) status pe dinga an ngenna sukpuitling lova a la um zing dodalnaa bandh hi thaw an tum a nih. PM hi January 19, 2016 khin Assam a hung inzin dinga ti le Youth Conclave­ah thuhrilna hun a hmang ding a nih. January, 2016 thla sunga BJP inrawi Central sawrkarin ST status a peknaw chun nuorna hrat tak an thaw ding thu le Assembly Election hung um dinga khawm BJP do zawngin hma an lak ding thu AKRSU president Biswajit Roy chun a hril. Hieng hnam hai hi Other Backward Classes (OBC) hnuoia um mek an nih.

R­Day rehearsal­ah IAF officer   Car in a baw hlum
KOLKATA: January 26, 2016 nia India Republic Day hmangna ding le inzawma Kolkata hmuna rehearsal nei laiin zanikhan car pakhat hrat taka hung tlan chun  Indian Air Force officer Corporal Abhimanyu Gaud chu a rawt hlum. Gaud hi Air Force drill Instructor a ni a, inrang takin Command hospital panpui a ni a, sienkhawm doctor han an san thei ta chuong naw a nih. Mi bawtu driver hi a tlan hmang leiin man a la ninaw a, a motor ruok chu Police han an man. Gaud a baw zo hnung hin barricade khawm a baw nia hril a nih.

Indo­Pak. War hero Lt. Gen. Jacob a thi
NEW DELHI:  Kum 1971­a India le  Pakistan indo huna Pakistan hai an insurrender­na ding hmalatu Lt. Gen. JFR Jacob (retd) chu zanikhan kum 92 mi niin a thi. Jacob hi kum 1923 a pieng a ni a,  kum 1971­a India le Pakistan indo huna khan Major General niin  Indian Army Eastern Command­a Chief of Staff sin thaw a nih. Army­a inthawk a pension hnungin Goa le Punjab Governor hai khawm a lo chel ta a nih.

SRS han Heroin leh an man
AIZAWL: Central YMA hnuoia inruithei dotu paawl SRS chun zani hmasa khan ITI Venga World Bank Road lai inruitheia sumdawngtu Lalthansiama (42) s/o Lalliana of Zokhawthar chu Heroin grams 91.5 a rik leh an man. Heroin mana um hi tuolsung rate a chun Rs. 7,50,000 manhu vel nia hisap a nih. Ama baka hin Zokhawthar­a inthawk inruithei phurlawn naa hmang Tata Safari MZ­08 2677 le a khaltu Khawlthanga (39) s/o Zaneihluia of Zokhawthar an man bawk.

NHRC in Rs. 1 lakh seng pe dingin
NEW DELHI: Jamshedpur hmuna medical negligence leia naute pienghlim 4 thi sung hai kuomah Rs. 1 lakh seng zangnadawmna pe dingin National Human Rights Commission (NHRC) chun an hriettir.  Chawlkar 4 sungin sum hi pek an ni ngei ti sukchiengna report pe dingin Jharkhand sawrkar an hriettir. Naute pienghlim 4 hai hi December 14 le 15, 2013 inkar zana Community Health Centre, Jugsalai, Jamshedpur a thi an ni a, Commission in hi thil tlung a suizuinaah naute thi hai hi an pieng hlim chun an hriselna a tha ti a hmusuok leia zangnadawmna pe dinga sawrkar an hriettir a nih.

Congress in sawrkar insiemtir dingin
GUWAHATI: NC Hills Autonomous Council (NCHAC) a members 17 hai chun zani hmasa khan Assam Governor PC Acharya inhmupuiin sawrkar insiemtir dinga an ngenna ziekin an peklut. Governor an van hmupui huna hin Assam Pradesh Congress Committee (APCC) President Anjan Dutta le Congress MP Sushmita Dev hai khawmin an tawiawm. NCHAC a hin members 30 an um a, tulai hnai el khan BJP member 10 hai chun Congress an zawm nawk leiin Niranjan Hojai inrawi NCHAC chu a hung tluse a nih.

Ronaldinho in Kerala­ah Football Tournament a hawng ding
THIRUVANANTHAPURAM: Brazilian footballer inlar Ronaldinho Gaucho chun February 5, 2016 khin Nagjee International Club Football Tournament hawng a tih. Hi tournament hi February 21, 2016 chen aw ding a ni a, tournament a hin India bakah ramdang (foreign) teams iemanizat an hung thang bawk ding a nih. Tuchena hi tournament­a thang dinga sukchieng tah ramdang team hai chu Argentina (U­23), England­a inthawk Watford FC (U­23), Spain­a inthawk Levante UD (U­23), Brazil­a inthawk Atletico Paranaense (U­23), Germany a inthawk TSV 1860 Munchen (U­23), Romania a inthawk  Rapid Bucharest le Germany a inthawk Hertha BSC (U­23) hai an nih. Tournament hi Saudi Arabia­a sports company Mondial le Kozhikode District Football Association thangruola an huoihawt ding a nih.

VAWISUN THUPUI
Ruotui angin ka thu chu sur a ta, Daidaw angin ka thu chu car a tih; Hlobet innotak chunga ruo ang le, Hlohna chunga ruomuolkhawi angin.~ Deuteronomy 32:2

Editorial
A neitu

Mihriemin ei dit tak pakhat chu a neitu ni hi a ni awm ie. Thil tha tak dam, thil mawi tak tak dam, thil hlu le man tam tak tak hai ei hmu a, hmu ringawt nek chun a neitu ni ei nuom hlak. Ei Bible in mani veng hai ta inhnar lo dingin a min chuktir a, nisienlakhawm zawm harsa ei ti a, ei lungril tak chun ei inhnar hlak. Khawvela ei um sung hin chu midang annawleh mani  veng hai thil inhnar lova um chu thil harsa tak a nih. Thil tha, thil mawi, thil mantam le hlu hai hi mani ta a lo ni thei naw khawmin ei sung hai, ei lainat le hmangai hai ta bek nisienla ei nuom hlak. Thuneina dam, inlalna dam, hriselna dam, sum le pai dam, thil tha dang dang hai hrim hrim khawm hi mani nei ding le ei chan dingin ei dit a, a neitu ni ngei ei nuom hlak.

Chuonganga thil tha le ropui hai a neitu ni ei nuom lai chun ei ta ni ve tho si, thil chi tum tum, lamlien, tuikhur, community Hall, inkhelzawl, thing le ruo, vantlang ekin, building le vanthlang thil chi hran hran hai hi a neitu niah ei inngai thei naw niin an lang. Chuleiin duot le inrona chang ei hriet naw a, duot le enkawl that nekin suksiet dam, sukchereu dam, sukbal  le sukhmelhem ei la tum rawp hi thil pawi tak el a nih. Hiengang lungril hi put ta naw inla nuom a um.

A neitua ei inngai naw leiin Churachandpur town sunga hmunhnawkbawm dam ei inrukhmang a, vantlang ekin le zunin hai sukfai nekin ei suktawp a, hmang tlak lo hiel damin ei siem a, a pawi bek bek el a nih. Hiengang lungril le khawsak dan hi mimawl hai thaw dan a ni leiin bansan ei tiu. Vantlang thil hai hrim hrim hi mani ta le a neitu chan changa enkawl seng dinga hma ei lak nuom a um. Ram changkang le hnam var hai chun vantlang thil hai hrim hrim mani ta anga ngaiin an enkawl a, vantlang ekin le zunin hai chu a fai zing a, inzun le inhnawm vel khawm an hawi hlak. Ei rama vantlang ekin le zunin hai ruok chu a tawp hle a, inzunna le inhnawmna tlak khawm an ni tawl nawh. Hi lei hin ei chet dan thanaw hi tuta inthawkin bansan ei tiu.

A neitua ei inngai naw leiin vadunga Nga le thilhring chi tum tum hai chu tur hmangin ei vai hlum a. Nga, Chengkawl le Ai khawm man le hme ding mumal khawm an um ta nawh. Ei chet dan hia nunrawngthlak hle. Ei Ngakula Ngahai ruok chu tukhawma tur hmangin ei thatin ei man ngai nawh. Hi thil hin a neitu lungril ei put nawzie chieng takin a tarlang. Neitu lungril put han tur hmanga Nga man lo dingin inhriettirna  le ngenna siem hai sienkhawm ei zui naw a, a ruk a ralin tur hmangin ei man tho tho hlak. Ei thil thaw nuom dan hi hi a nunrawng thlak el chau ni lovin suonmawng rorel an ti ang el a nih. Thaw dan tha lo a ni leiin bansan tang ei tiu.

Ei ta dinga tangkaina nei lo, ram raw dam, thing le ruo hmang lova satthluk dam, signboard tha le nal em em suksiet le sukhmelhem dam ei la chieng rawp el hi chu ei hmathlir a la sei tawknaw lei le ei la changkang tawknaw lei a nih ti hriet a, bansan hmak ding a nih. Mihai chun an ram hai hring dum duoiin an siem a, ei ni rawi ruok chun ei ram hai ei raw kawl zo a, ramsa le vate hai khawm fak ding le umna ding nei lovin an mi tlansan zo an ta hi.

Office­a thawktuhai khawmin ei sin thawna hmun chu inhlawfakna  anga ngaiin a taima deu hai chu mi invetah ei ngai a. Thahnemngai deuhai chu ei nuizat bur el hlak. Iengkhawm ei ren naw a, lo hek deu sienkhawm ei ta dinga pawi ding um lo niin ei ngai tlat a, ei pawisa ngai nawh. Hi thil hi a neitu nia ei inngai naw lei a ni deu tak. Chuleiin, ram le hnam hmasawn ei nuom tak tak chun a neitu ei nih ti hi ei inhriet a tul takzet a nih. Tu am mani ta a siet le a tl;akran dit um ei ta? Mani tlatna muol le mani fakzawngna le ei nitin khawsakna sengah hin a neitu annawleh a chawngpu nina lungril nghet taka putin sin taima takin thaw mawl mawl seng ei tiu. Chu chu ei mawphurna seng a nih.

Don't Miss
© all rights reserved
made with by Simon L Infimate