Van ropui rangkachak khawpui, Angel zaimawina hmun ropui, rimawi tinrengin an chawimawi a, “A’n thieng ie, a’n thieng ie, a’n thieng ie” ti a sûn le zân chawllova an chawibiek lai Van Lalin a hung maksan ngot el hi thil namei chu a va ni naw ngei! Chubâkah, “An ruot Lal Imanuel, Adam suolna leiin Van ropui rangkachak ram khêlin; Judai ram Bethlehema hmun a um nawh Lal piengna’n, A nghak ranthleng Bethlehem khaw kawl” ti a la ni nawk ta deu deu! Ngurrêng, Van le khawvel Lal a nina fam chun rûn sânga sienglawiin pieng awm tak. Chunêkin piengna ding rûn a’n vai a, Lal chunghnungtak chun hmun tlawmtak a hung thlang ta lem. Ngurrêng tlawm chu ava ni ngei!
Hriemmi hraihai tawnah sam ang zâlna ding laikhum a um hlak veileh, Van Lal saisente’n lu nghatna bovin, tlawmna ranthlenga a hung zâl, Van Lal inrieng chu! Ava tlawm ngei aw Van Lal a ni si! A tlawm taluo I zâlna rantlêng hi! Ṭapna hre naw ding chu ṭapzâi a rêl-ranthleng chungah.
Van Lan Nau piengna thu puongna dingin Radio, Television, News Media a chang ve nawh. Chuonghai âi chun Van le hnuoi inkârah Angel haiin ‘live’ in an hung puong ta lema. Mivar varna le remhre remhrietna sirah hnawltu chun Middle East laia hnam ṭophnoka ngai Beram Vengtu kuomah Van Lal Nau pieng an hung puong a. Hi hin vankhup hnuoia hnam tlawm le retheihai popo a huop ve leiin kei misuol le tlawm khom hi ami huop ve leiin Van chu ka’n pâk a nih. “Silent night. Oh how sweet” a lo ni lem.
Khawsak mivarhai kuomah an hrietthiem zawng takin Arasi’n Lal piengthu suklang anih. Anni hin “Birthday gift” umzie neitak- rangkachak, beraw le mura hung pein bokkhupin chibai an hung bûk. Mi’n Krista an hmuchieng takzet chun an ropuina lallukhumhai hlîpin tlawmna ranthleng bula hin bokkhupin an lu an kûn nawthei nawh. El-Bethelah bokkhup tehlêm le kûn tehlêm an thaw ngâi nawh.
Lanu piengnal le thuom ṭhaa inbel singza tam laiah chûn rieng Mari ṭângnêm a bêl a. A ânka nêm ngaithlain, a sîngmit mawi enin a ṭânglaia a’n bei a. Vâl zei le Kamdingna nei tamtak laia Mistiri
lungmawl Josefa zuoin a nei a. A thing ât nawi a’n chek a. Khaw hmusitum Nazareth-ah a seilien.
Vâl hung kâi ve bok chun a’n laruolhai mit lâkna dingin Taylor hmingthang le suit mawi ngaisak lovin ṭhuilo zakuo a hâk a. Standard le style neinaw angin chappal a keiphît a. Vâl tolo anga Sailai Di
hrim ûksak lovin a vanglaini a hmang liem a. Sihalhaiin kuo an nei a, chungleng vate haiin bu an nei a. Chuonghai siemtu chun lu innghatna nei lovin Riekmaw iengin Palestina ram dunglevânga a’n vai a.
Hnuoi le Vân le a sûnga um popohai siemtu le neitu chun leiman ding takngiel khom nei zo lovin nga bau sûnga mi duli a la lâkdok fawm a. Hotel insânga lûtna ding nei lovin a pocket chu a ruok si. Phingṭam- dangchâr tuorin mi bu vui zûtin Samari nu kuomah tuisik hniin a kûn a. Thil ṭha thawin natna tinreng sukdam hlak sienkhom mi inpâk a hlaw ngâi nawh. A hmaa tawtawrawt a’n muttir ve ngâi naw a, puclic popularity a zong ve ngâi bok nawh. Facebook-ah a’n post mawi fahran ngai nawh. Mihriem nauhai hi a kekok hrui sût tlak khom an ni naw lai zingin Ama’n mi ke a sawp lem. Ngurreng vâl chu a tlawm ngei el.
“Misuol” an tihai Ina tlungin a fâk hlak leiin mifel intihai mit a suknîm a. “Misuolhai ruolpa, uoiin hemi,buhemi” a hlaw lem. Sakhawmi le Dân rongbawltuhai Ihnawl po a huikhawm a. “uire naw” titu
chun uirenu a ngaidam a. “Tuol that naw” titu chun tuolthattu Paradis a’n kaitir.
Miletling. Ngurrêng Val-Tlawm chu a va ni ngei !!
