Shillong, November 30, 2015: Vawizan khan Hmar Students' Association (HSA) Joint Headquarters, Shillong huoihawtna hnuoia Krismas Urlawk-cum-Farewell 2015 programme chu Centennial Hall, EFCI Centre, Demthring hmunah hlawtling le inhawi taka hmang a nih.

Hi hun hi zan dar 6:30PM ah Nk. Mercy Darthamawi le Tv.  David L Chongthu hai keihruoina hnuoia hmang niin, Rev. Lalngaizuol Pulamte in hun hawng tawngtaina a neia, Tanna hun Nk. Justy Thiek in a hmang a nih.

HSA JHQ Shillong General Secretary Tv. Ezra Lalramsan Darngawn in HSA Shillong kumkhat sunga activities report hai pekna a nei zovin student hai ta dinga thucha hrilna Rev. Lalbiektluong, President, EFCI in a neia, HSA hi Krista hmun changna student association nisien, ei nun sengah Krista Isu chu hung inthanglien pei ding le student hmun dang danga inthawka Shillong hmuna inchuk dinga um vengtienga inlawi ding le um ding hai chu Krismas hlim le inhawi taka hmang seng dingin a ditsakna an hlan a nih.

Hi huna hin HSA Shillong in a i buotsai Hmar Calendar 2016 chu Pu Rohminglien Buhril, IFS le
Adviser, HSA ni bawk chun tlangzarna a nei. Hi Calendar hi mawitaka buotsai a nia, Hmar hnam inthuom hai nunghak le tlangval piengnal le hmeltha tak tak haiin inthuomin suklang a nih.

Gift le Card exchange na student fekhawm hai hin an nei bakah hla tienga rawngbawlna Nk. Iris Infimate, Nk. Jennifer Nianglawmkim, KTP EFCI Centre KTP ICI Madanrting, KTP RPC, KTP ICI Sub-Hqrs. haiin an nei bawk a nih.

Lawmthu hrilna HSA Shillong President Tv. Brando H Keivom in a nei zovin Rev. Dr. J Huoplien Neitham, Moderator, EFCI & Senior Adviser, HSA chun hun suktawpna tawngtaina a neia, formal programme zova refreshment tuihnai tak el kiltlangna nei a nih.
















Post a Comment

Powered by Blogger.