Responsive Ad Slot

HPC (D) President thusuok

Wednesday, December 30, 2015

/ Published by Unknown
Ref.No. : ....................................
HMAR-SIN/ADMIN-HPC(D)-05-15.
Date: 29-12-2015
LALPA KUOMAH KIR NAWK EI TIU.

Kum 2015 sunga thina le vangduoina hran hran tuok tu hai ka tuorpui a, hlawtlingna le malsawmna hran hran dawng tu hai po po ka lawmpui bawk cheu.

Kum 2016 inthawk chun chu ei rengin ei that sengna dingin mipui po po Lalpa kuomah kir dingin ka fiel in ka ngen cheu,; Hung ta u, Lalpa kuomah kir eitiu. Ami kei nawi ta a chu a mi lo suk dam nawk ding ani sih a. A mi lo vuok ta naka chu a mi tuom nawk ding ani sih a. (Hosia - 6:01) A tawi thei ang takin, kei nawi le vuoka ei hnam a um dan hang hril ei tih. Manipur Hmar khuo hai reng reng hmasawn nekin a ngaiin um tawk tawk a Sorkar a inthawk a ei hmu hai hlak chu mipuiin sawr loin, mimal in an hlawkpui lem hlak a, hmasawn theina lampui a um naw leiin mani khuo le ram hmasawn nuom lovin an in pem san a, thenkhat chu politics in fuknaw lei a sahimna zawngin an tlansuok bawk a, population a pung thei nawh; lungnat a um ngawt el. Mizoram a Cultural invade & assimilation ei tuok zinga, Hmar culture le tawng a bo zo vang vang tah, Kum 1994 khan HPC le Mizoram sorkar Accord an signed a inthawkin ei tawng khawm a hmang an tlawm deu deu a, ei tawng bek suk hring tum na nekin inza puina thlipuiin a mi nawt a, hieng ang zinga a fe chun tuta inthawk kum 30 (sawmthum) a chun a hmang nuom an um hmel ta nawh. Iengtin am thawng ei ta? Lungril a va sawl de!!! Kei le nangin thaw iemani bek ei nei a tul.

Kum 2003 Assam ah buoina ei tuok a inthawk khan ei khuo, ram le tui iemani zat hluo thei ta lovin ei um a, sorkar sin Council hnuoi a lem chun ei ni mi an luot sa thei ta naw tluk anih. Chun, Cachar tieng khawm hmasawnna (Development) a um naw leiin an in pem san a, ei ram del saw hnam dangin an mi hneng a, vai hai kut a ei ram a luot nasa ta em em ani…Lainat a um ngei!!! A chunga tlawmte ei hril lang hai khi bei dawng um zawng a ei hril ni lovin Lalpa kuomah ei kir vat a tul tak zie suk langna dinga ei hril anih. Mi sukdam ding le mi tuom dam nawk dingin Lalpa chun a mi nghak ran a, Sipai in nilovin, thilthawtheina khawm nilovin, amiruokchu, Ka thlarauin (Zachariah – 4:06) ti in ami sukdam nuom anih. Ienga inthawkin am ei tan ding?. Ei Hnam (Society) suksetu chu itthikna le mani hmasielna a ni. Mihriem nun sukse tu le suksawl tu a thang lova Pathien hratna hmanga um thei nisi, itthikna le hmasielna thang lovin Hnam sinthaw tu hai, Sorkar thawktu, lonei tu, sumdawngtu, le Students (Inchuklai) hai po po ei rengin Pathien kuoma ei kirna dingin bul tan ei tiu. “ Itthikna le mani hmasielna umna a chun buoina le thilsuksuolna tinreng a um hlak” (Jacob3:16)
“ In ta dingin Pa ning ka ta, Nangni khawm kei a ta dingin nau nu le naupa ning in tih” Lalpa iengkim thawthei chun atih. ( II Korinth - 6:18)

Kum 2016 inthawkin Lalpan Hmar hai malsawm raw se.

Sd/
( LALHMINGTHANG SANATE) President Hmar Peoples’ Convention (Democratic)
General Headquarters: Sinlung.


Don't Miss
© all rights reserved
made with by Simon L Infimate