Responsive Ad Slot

Hmasawnna Thar | 23 December, 2015

Wednesday, December 23, 2015

/ Published by VIRTHLI
Sungkuo 12 hai kuomah Rs. 20,000/­ seng inhlan
CCPUR: Mr Mangcha Thangzawm, President,YMA­M le H. Lalhmangaihzuala, Secy. YMA­M hai inrawinain zani 12:00noon khan Young Mizo Association (YMA) Manipur chun KIC Office, Tuibuong­ah KKL GHQ thlawpnain Joumuol khuoa mimkei le tuilien tlung leia harsatna tuortu sungkuo 25 hai laia sungkuo 12 hai kuomah thangpuina Rs. 20,000 seng an  inhlan. Zanita la peklo hai chu Christmas le Kum thar, 2016 inkar sunga pek an ni theina dinga Joumuol lalpa hma la dingin YMA­M le KKL GHQ in an inhrietir.



Mangcha Thangzawm chun, Central YMA, Mizoram in Joumuol khuo a tuilien le mimkei tuortu hai thangpuina dingin Rs. 5 lakh an hung pek a, chu sum hmanga thangpuina hi sem a nih tiin a hril.

Joumuol lalpa Thongminlal chun Central YMA, Mizoram le YMA Manipur chungah lawmthu a hril a, Joumuol khuoa sietna rapthlak tak a tlung hnungin relief camp a inthawk suok dar vawng an leiin vawisun hin sungkuo 12 chau an lan kokhawm thei a ni thu a hril.

Dist. Administration hmalaknain Felicitation le Advent Christmas 
CCPUR: Zani zantieng 3:00PM khan District Administration, CCPur hmalaknain DTC Hall, Tuibuong­ah 9th Tamchon Memorial Football Championship, New Delhi­a zun khel Muvanlai FC, SSPP FC le Hmar FC hai lawmlutna  le  Advent Christmas­ 2015 hmang a nih. Hi huna hin Chairman, ADCC; CEO/ADCC; DLOs, Army le Police Officers le student organisation leaders han an uop. Hi huna hin Hmar Inpui, KSO/CCPur le ZSF representative hai khawmin thuhriltawi an nei tawl. Hlasak thiem dang dang­ Nk. Emma Pachhuau, Naemi Hoakip le LL Muona  han hla an sak.



Pu Lunminthang Haokip, IAS, DC, CCPur in lawmlutna thucha a hrilna hunah, sawrkarin Christmas hmain Job Card holder hai sinthaw hlaw ding le material cost hai Lal hai fethlenga a sanction thu hrilin Tamchon Trophy­a Manipur a inthawk team pathum­ Muvanlai FC, SSPP FC le Hmar FC han 1st, 2nd le 3rd an zulak chu District Administrtion in a lawmpui hle thu a hril. Muvanlai FC, SSPP FC le Hmar FC Team Captain/Manager han thuhrilna hun tawite te hmangin District Administration in lawmlutna le lawmpuina hun a buotsaipek na thuah lawmthu an hril.

Langkhanpau Guite, Chairman, ADCC hun, Tamchon Trophy­a zu thang team hai  chu ei ram le hnam ta dinga Arrow an ni thu hrilin, hlawtling le hlawsam huna  khawm Pathien hre zinga, zu le saa inhnel lo dingin player hai an fui.

Rev. Rohminglien Pakhuongte, Vice President (Education) PMS in Krismas Thucha a hril a, Pastor Thenjang, M. Songgel ECA Church in tawngtainain hun a khar a hi zo hin Footbal Hero hai lawmpuina le Advent Christmas ruoi kiltlang a nih.

Software Application Workshop
CCPUR: December 23, 2015, 11:00AM hin Imphal­a Nirmala Hotel­ah Online PIP (Electronic Programme Implementation Program) Software Application thuah State Level Workshop on PIP Process um a tih. Hi huna hin CCPur District­a inthawk Dr Thangchinkhup Guite, CMO; Dr V.C. Pau, DFWO; Seiboi Mate, Dist. Program Manager, NHM; Vung Mary, Dist. Community Mobilizer, NHM le  Francy Lalbiekdik, Block Progam Manager, NHM hai va thang an tih.

Loneitu han Union minister inhmupui thei ding
CCPUR:  January 8, 2016, 1:00PM khin, Forest head Office, Sanjenthong, Imphal hmunah   loneitu (shifting cultivation thaw) hai ta dingin Mr Prakash Javadekar, Minister of Environment, Forestry & Climate Change, Govt. of India inhmupui thei a ni ding a ni a, hi meeting­a thang nuom inhnikna nei hai chun January 5, 2016, 1:00PM chen khin plain paper­a ziekin Dist. Forest Officer: Southern Division, CCPur­ah hnina peklut thei ning a tih. Application a hin hming, address, contact number le a dang dang zieksa ding a nih. Application hi ‘first come first’ basis a thaw ding a ni a, pasal 20 le nuhmei 5 thlang ning an ta, fe le hungna (transportation) DFO/CCPur in a buoipui ding a nih.

Rs. 1.5 Lakh sengin Biekin le a tuolzawl an cheimawi
CCPUR: Tukum Christmas ding le inzawmin Evangelical Free Church of India (EFCI) Saikot Biekin le Compound khawm uluk taka cheimawi a ni a, hi thila ding hin Rs. 1.5 lakh vel an seng ta niin EFCI KTP Unit Chairman Zosanglien chun a hril. Zantin kantu (visitor) an um hlak a, Dec. 21, 2015 zana inthawk, Dec. 23, 2015 chen hin Krismas le inzawmin Live Concert um hlak a tih. Hi huna hin naute Chibai bukna pe nuom hai ta dingin pek thei ni bawk a tih. Biekin le a tuolzawl cheimawina hai hi Kum Thar 2016 Jan. 6/7 chen sie ning a ta, zantin 7:00 ­ 9:00 PM inkar sung kan (visit) thei ni hlak a tih.

Biekin decoration hi December 15, 2015 a kha Upa Laltlanmawi in a hawng a ni a, hi thila ding hin EFCI KTP Saikot Unit chun Target a hranpa lieuin an siem bakah Nuhmei Pawl, Naupang le mimal mi thahnemngai haiin sum an tuokkhawm ni a hril a nih.

A hmunah a mawi hle a, Bethlehem ran in le ranthleng a naute Isu zal lai le a nu le pa lim khawm hmu thei dinga sie a ni a, Naute Chibai bukna siena ding a um bawk. Rawngbawlna kawt lien tak hawng a nih. Hiengang khawpa uluk taka Krismas le inzawma Biekin le a tuolzawl cheimawi hi Tuithaphai/CCPur Kristien le Kohran hai lai a ding chun a la um ngai meu naw a hriet a nih! EFCI KTP Saikot Unit Chairman chun hi decoration ropui tak a inthawk hin mihaiin Pathien ropui zie hmu pha hai sienla a nuom thu ei inpawlpuina huna chun a hril.
­ LRS Puruolte

AMVDFWA in sawrkar kuoma ngenna an siem
CCPUR: All Manipur VDF Welfare Association (AMVDFWA) chun thusuok siemin, an thil ngen tum tum hai sukpuitling pek dingin a ngen. An thil ngen hai lai –  Kum 2015 a 13 months honorarium January, 2016 chena sukpuitling ding, sukpuitling a ninaw chun General Holiday etc­ haiah VDF hai duty ta lo ding; Thina le damnaw hritlang hunah VDF personnel han  ham­thatna sawrkara inthawk an hmu ding awm hai winter session sunga ngaituo pek ding;  August thlaa State Cabinet in VDF hai honorium Rs. 1000 a October, 2015 a inthawk sukpung dinga a lo rel ta anga December hlaw/honorarium pek an ni huna Rs. 1000/­ le pekhawm dinga sawrkar an ngenna hai an zieklang.

Parliament in zanikhan Juvenile Justice and Protection of Children Bill an passed
Suolna turu deu haia chun kum 16 mi hai khawm puitling anga ro rel khum an ni ta ding
NEW DELHI: Rajya Sabha a chun zanikhan naupang kum tlingloa pawm chin bituk siemthatna ‘Juvenile Justice Care and Protection of Children Bill’ hriltlang a ni hnungin passed a nih. Hi Bill hi Lok Sabha­a chun tuta hma khan passed a ni tah. Hi Bill siemthata um pawmpui dungzui hin   naupang kum tlinglo (Juvenile age) chu kum 18 a inthawk 16 a thumhnuoi a nih.

Women and Child Development Minister Ms Maneka Gandhi in hi bill zanita Rajya Sabha hmuna a moved hunah, naupang kum 16­18 inkar mi hai laia suol thawna a pung pei le inzawmin tuta Juvenile Justice law hnuoia provision hmang mek hi a hun tawk tanaw a nih tiin a hril a, political party tin hai chu hi Bill hi thlawp dinga ngenin, December 2012 a Nirbhaya case a Juvenile convict chunga iengkhawm thaw thei a neinaw chu pawi a ti thu a hril. Hi Bill chungthua hrilfiena siemin, Juvenile hai chu direct­a jail­a thun ninaw ding thu a hril. CPI(M) le DMK hai chun hi Bill hi Select Committee kuomah la hriltlang dinga referred an nuom a, sienkhawm Deputy Chairman, P.J. Kurien chun hi thua motion iengkhawm a dawngnaw thu hrilin Bill hi passed a hung ni ta a nih. CPI(M) member hai chun hi thua lungawi lovin inpuia inthawk an suoktau.

December, 2012 a Delhi­a Bus tlan lai sunga pasal ruolin Nirbhaya an suolluinaa thang ve kum tling lo pakhat Supreme Court in an suo zalen chungthua dodalna le sawiselna nasa tak um leia hi Bill hi Rajya Sabha­a phar le passed a nih. Hi dan siem­that dungzui hin naupang kum 16­18 inkar hai chu suol turu le lien tham haiah puitling hai angin an chunga rorel a ni ta ding a nih.

Zanita hi bill Rajya Sabha­a hriltlangna hi Nirbhya @ Jyoti Singh nu le pa hai khawmin an sim ve a, member han thlawpa passed a nina chungthua lawmum a ti thu a hril.

Hi Bill hi President pawmpui dingin thawn ning a ta, President in suoi a thaw zo pha dan (Act) a hmang a hung ni ta ding a nih.

NIA in UNLF hotu hai Jan. 6­ah cross examination
IMPHAL: National Investigation Agency Special Court chun January 6, 2016 a inthawk khin United National Liberation Front (UNLF) leader le hotu pawimaw dang dang hai cross­examination thaw tan an tih. A hma chun Cross­examination hi December 17, 2015 a nei tan dinga ti a ni a, cross­examination nei huna thu indawn ding hai sukfel a la ninaw leia special court judge in cross­examination nei hun ding hi a sawn a nih.

Bandh  le Blockade leiin  sum tam tak an hmang
IMPHAL:  Survey report dungzuiin Manipur­ah bandh leia ni khata sum inhmang zat chu Rs. 36 crores vel a ni a, transporters han ni khata bandh le blockade leia sum an inhmang chu Rs. 3 crore vel a tling phak. Kum 2014 sung khan band hran hran ni  165 a a um a, tukum October thla chen han bandh umzat chu ni 80 a tling ta bawk niin State Police Department record chun a hril.  Hi dungzui hin kum 2014 sung bandh hran hran um leia sum inhmang chu Rs. 5972 crore chuong a ni a, tukum October thla chena bandh leia sum inhmang chu Rs. 2895 crore a tling phak. Kum 2014 sung khan Economic Blockade ni 19 a um a, tukum October thla chen khan economic blockade ni 24 sung a u m ta bawk.

Mithi hming hriet tah
IMPHAL: Wangkhei Keithel Asangbi, Imphal East District hmuna non­Manipuri pasal thisa ruong hmua um kha a hming hriet a ni ta a, Deepak Sahu (38) s/o Krishna of Bihar, tuta Telepati hmuna cheng mek a ni a, a ruong hi a sunghai kuta inhlan a ni tah.

BSF vuongna tuoksiet a tuok; mi 10 an thi
NEW DELHI: Zani zingkar 10AM vel khan Ranchi pan BSF twin­engine Superking Helicopter chu New Delhi­a Indira Gandhi International  (IGI)  airport bul lai tuoksiet tuokin a tla thla a, a sunga chuong  mi 10 hai chu an thi vawng. BSF vuongna tuoksiet tuokna hmun hi Home Minister Rajnath Singh le Delhi Lieutenant Governor Najeeb Jung hai khawmin a hmunah thil umdan an va enfel. Minister of state for Civil Aviation Mahesh Sharma chun investigation thaw dingin Order an suo. Helicopter repair dinga Ranchi pan nia hril a ni a, a khawl buoi leia tuoksiet tuok ni dinga ring a nih. Helicopter tuoksiet tuok lei hin India le Bangladesh han zanita Dhaka khawpuia Director General (DG) level­a inbiekna nei dinga ti chu thul a nih. Helicopter a hin pilot (SIB a second­in­command rank), Co­pilot (Dy. Commandant), technicians 6, Engineer 1 le crew member 1 an chuong a nih.PM Narendra Modi chun hi siet tlunga thina tuok sunghai a tuorpui thu a puong.

Poppy kung tam tak an suksiet
IMPHAL: Narcotics and Border Police le NCB, Assam Rifles hai chun December 9­16, 2015 inkar sung khan Ukhrul District le Chandel District sunga hmun tum tum haiah special drive an thaw a, hmun hran hran haiah dan loa ram 240 acres vel a liena ching Poppy tam tak sam tluin an raw hmang niin PRO, Manipur Police Department thusuok chun a hril.Hi le inzawm hin Police chun case dang dang 10 an zieklut niin thusuok chun a hril.

SSC Chairman dingin Ashim Khurana
NEW DELHI: Senior IAS Officer Ashim Khurana chu Chairman, Staff Selection Commission (SSC) dinga ruot a nih. Khurana hi 1983 batch IAS Officer, Gujarat cadre a ni a, Union Public Service Commission­a Secretary sin chel lai mek a nih. A batch chanpui Asha Ram Sihaq chu UPSC Secretary dinga ruot a nih. Sihaq hi Director General (Acquisition), Defence Ministry chel lai a nih.

Naidu Commission in report an pek
KADHAMAL:August 23, 2008­a Odisha­a Kandhamal district­a Laxamananda Saraswati le a hnungzuitu mi 4 hai Jaleshpata Ashram hmuna that an nina chungthu suitu Justice AS Naidu Commission chun zanikhan state sawrkar kuomah report an pek. Laxamananda Saraswati that a ni leia buoina nasa tak suok lei khan mi 38 zetin thina an tuok a nih.

Assam CM chunga Defamation case
GUWAHATI: Assam BJP leader Himanta Biswa Sarma chun, Assam CM Tarun Gogoi in Chit Fund le Louis Berger case hai thang cases dang danga inrawlna neia an tumna thuah Tarun Gogoi chungah Rs. 100 crore civil defamation case a file. Himanta Biswa Sarma hi Congress suoksana BJP a zawm a nih.

Tripura in Smart Rationing system
AGARTALA: Tripura sawrkar chun kum thar January thlaa inthawk khin Public Distribution System (PDS) fel lema sem a ni theina dingin Fair Price Shops haiah Point of Sales (PoS) machine fethlengin smart rationing system hmang a tum. A hmasa takin Agartala­a fair price shops 25 haiah PoS hi inthut phawt ni dingin state Civil Supplies minister Bhanu Lal Saha chun a hril a, customers haia inthawk tha le remchanga hriet a ni chun state sunga fair price shops 1,761 haiah hmang vawng a ni ding thu a hril.

EC in DCs le SPs hai an hmupui
GUWAHATI:  Kum 2016­ a Assam Assembly Election hung um ding le inzawma Assam rama inzin Chief Election Commissioner Dr Nasim Jaidi inrawinaa full EC team chun zanikhan Guwahati hmuna district tina Deputy Commissioners le Superintendent of Police (SPs) hai meeting a neipui. Zani zantieng khan a hranin Assam Chief Secretary le Assam DGP hai an inhmupui bawk. Election Commission chun a state sunga vote nei thei chin a tam thei ang tak election hmaa Voter list­a zieklut dingin State Election Department an hriettir.

SL Navy han Tamil Ngamantu 4 an man
COLOMBO:  Sri Lanka Navy hai chun zanikhan Tamil Ngamantu 4 hai chu Sri Lanka tuipui­ah Nga an man tia intumin an Lawng leh an man a, Mannar Camp tieng an thuoi. Sri Lanka Navy hai hai chun Pathienni liemta khan Pudukottai Jagadapattinam hmuna Ngamantu 6 manin an lo hrentang ta bawk a nih. Tamil Ngamantu hai chun Sri Lanka jail­a intang mek Ngamantu 47 hai chu insuo zalen dingin an ngen bakah Ngamantu hai insuo zalen an ni theina dinga hma la dingin sawrkar an ngen bawk. Hi thua hin Tamil Nadu CM Jayalalitha chun PM kuoma khawm lekha a thawn tah.

February, 2016 in PM Assam an zin ding
NEW DELHI: Prime Minister Narendra Modi chun February 6­8, 2016 inkar sung Sivasagar hmuna Sankar Sangha conference uop dinga fiel a ni a, fiela a umna hi a pawm ta niin Assam BJP MP RP Sharma chun a hril a, Assam a cham sung hin Lepetkata hmuna Gas Cracker Project a hawng ding bakah North Guwahati hmuna AIIMS bawlna ding lung phumna, Namrup Fertilizer Plant Phase­IV khawm a hung beisei a nih tiin ei thu dawngna chun a hril.

Kawlhnam hmangin a nu le pa bakah mi 20 a sat hliem
KARIMNAGAR:  Zanikhan Telangana­a Karimnagar hmuna  Balvinder Singh (28) chu a nu le pa hai le an inselbuoi lungsenin an common room/living room banga tar kawlhnam hmangin a nu le pa  beiin a sat hliem bakah midang 20 chuong a sat hliem a, a hnungin an in bulah kap hlum a nih.

Balvinder hi Electronic engineer niin Bangalore hmuna thawk lai meka ni a, Civil Services exam­ah a hlawsam leia inngaisie taka um a nih. A nu le pa hai le hin zani zingkar 6:30AM a kha insuol tan an ni a, a nu le pa hai thisen le insawpela khaw hre lova an um hnungin tuola tlansuokin lampuia inlawn hai a bei el nia hril a nih.

Balvinder Singh pa Avtar Singh chun, a naupa hi Civil service exam a hlawsam a inthawk nungchang danglam taka um a ni thu le Psychiatric treatment khawm an thaw niin a hril a, lekha thiemthei takel niin kum khatah Rs. 18 lakh a hlaw suok hlak niin a hril.


VAWISUN THUPUI
“A chunghnungtakah Pathien ropuitakin um raw se, Hnuoi chunga a ilawm bek bek mihriemhai kuomah inremna thu inleng raw se,” an tih a. ­ Luka 2:14

Editorial: Krismas iengtin am

Ei suol sawpfai dinga hung Naute Lal Isu piengchampha chu zing nawk ela ei hmang ta ding a ni a; khawsak mivar han naute Lal Isu hung pieng chibai an buk tum dan le Lal Heroda in naute chibai buk a tum dan an angnaw ang bawkin tukum Krismas ei hmang tum dan, Lal Isu piengchampha lawma naute Lal Isu chibai ei buk tum dan ruok chu an angnaw tawl hle awm ie. Mi tam takin lungril le titak zeta hi hun hmang tuma ei inpuocha lai mekin mi thenkhat Krismas umzie theinghil thak khawpa mani nuom dan le hlimhlawpnaa hmang tuma insingsa khawm ei um ngei ringhla a um nawh. Pathien hin suol le tha a siem ang bawkin ditthlang theina, sie le tha thlierhran theina a mi pek a, ditthlangna indik lampui hraw ngei dinga  ei insingsat nuom a um.

Pathien malsawmna dawng ngei tuma, lungril le titak zeta hmang am annawleh mani nuom danin hi hun tha hi ei hmang ding! Lal Heroda anga naute Lal Isu that tumtu am ei ni ding annawleh khawsak mivar hai anga Naute Lal Isu hringna sanhimtu ei ni ding; Lungril le titak zeta hmangtu hai ta ding chun malsawmna ning a ta, a hmang indiknaw hai ta dingin vangduoina, buoina le harsatna intluntu  hung ning a tih. Krismas huna ei hla sak inrim pawl tak ‘Isu vawisun kan lungril bawng in tlawmah, insieng thar nawk la nang kan chatuon Lal dingin’ tiin vawitam tak sak nawn sak nawn inlakhawm ei lungrila suol chi tinreng, intheidana, duamna, itsikna le suol dang dang hai ei thethlak thei sinaw chun ko ko inla khawm Isu Krista hi ei lungrila insieng thar ngai naw hrim hrim a tih. Khawsak mivar han Isu naute pieng chibai buk dinga an fe khan thilpek an pek hmain bawkkhupa chibai bukin an lungril robawm an hawng phawt a, chu hnunga thilpek an inhlan chau a nih.
 
Ei ni rawiin ei lungril robawm hawng si lova chibai ei buk rawp hlak lei hi ni ngei a tih, Krismas ei hmang rawn tak vei leh eini lai inhmangaituona a tlawm tiel tiel a, duamna, mani hmasielna, intheidana hai ei ram le kohranah a pung deu deu hi! Khawvel thil sum le pai tam tak thilpek ei lo inhlan khawm a ni thei, sienkhawm ama ta dinga ei lungril robawm ei hawng ngai sinaw leiin ei niah Naute Lal Isu hi an sieng thei ngainaw a nih. Lal Heroda anga  puotieng mawinaa chibai buk ei tum rawp hlak leiin naute Lal Isu hi chibai ei buk fuk ngainaw  a ni awm ie! Khawvel rosum le pai ni loin ei lungril rohlu a nih Pathienin a dit.

Pathien le mihriem hai po po kara inremna intluntu dinga hung pieng ‘Remna Lal’ a ni ang ngeiin, tukum Krismas hin mitin chunga inremna, inhmangaina le inlainatna thalem hung intlun sien; chu ding chun mitinin ei lungril robawm hai hawngin, naute Isu Krista piengchampha ei lawmna hin ei ram, ei insung, ei khawtlang, kohran le mitin chungah thu hung hril ngei raw seh.

Don't Miss
© all rights reserved
made with by Simon L Infimate