EFCI PNHP 48th Annual Conference
CCPUR: EFCI Saikawt Presbytery Nuhmei Pawl (PNHP) 48th Annual Conference chu Dec. 19­20, 2015 sung “Ka chunga a thilthaw that popo lei hin, Lalpa kuomah ieng am pe ve thung ka ta?” ti thupui hmangin Muolvaiphei EFCI Biekin­ah nei a nih. Dec. 2015 zing inkhawm thuhriltu ding Mrs Chawngmuonpui, Lecturer, TCS, Sielmat ning a ta, zan huna thuhriltu ding Dr Vanrammawi Pakhuongte, Outgoing Secretary ning a tih.



Kum 2016­17 sunga Presbytery NHP (PNHP) thuoitu thar dingin hieng a hnuoia hai hi thlang an nih. Chairperson:Mrs. Kimnu Pakhuongte (Sielmat); Vice­Chairman:Mrs. Lallienngai Sinate (Khawmawi); Secretary: Mrs. Lalvulmawi Pakhuongte (Lamka); Asst. Secretary: Miss May Rose (Rengkai); Finance Secretary: Mrs. Edith Sinate (Sielmat); Treasurer: Mrs. Rotuokvel Joute (Sielmat). Advisers in Rev.Rohminglien Pakhuongte & Upa Dr. Saidokhum Joute (Sielmat ve ve).

Workshop in NID/IPPI
CCPUR:  Zanikhan District Hospital Campus­a DFWO Conference Hall­ah District level Workshop on NID/IPPI 2016 nei a ni a, Workshop huna Dr Gojendra Singh, Survelliance Officer, WHO resource person in a thang a. Hi huna hin Tipaimukh, Thanlon/Sinzawl; Singngat/Behiang;Henglep;Saikot/Samulamlan le Town IPPI/NID Div, haia inthawk Divisonal Superviser 19 le Sectoral Superviser 29 an thang a nih.

Joint Orphan home Album release ding
CCPUR: Vawisun 1:00PM hin CCPur District­a naufahra enkawlna in (Home) hai thangpuina dingin Joint Orphan Home Music Video Album “Ka damna Kros” ti chu Rayburn College campus­ah Rev  Dr V. Lalnghakthang, Gen. Secy. RPCNEI in khuolliena thangin tlangzar a tih. Hi huna hin Nk. Gloria Khawlhring, Sielmat khawmin hla sak veng a tih. Mitin thang dingin an fiel.

Boxing­ah Silver Medal a lak
CCPUR: Mr Lalmuanpuia s/o Lalthupuia of Saikawt chun December 7­11, 2015 inkar sunga Haryana hmuna All India Police Boxing inkhelnaah Silver Medal a lak. Chun, Mizoram­a LPS Pro­Fight December 18, 2015 zana title fight neinaah hratna changin title belt a lak  nawk bawk a nih.

Gun licence nei han Jan. 1 chena pelut dingin
CCPUR: Churachandpur District sunga Gun Licence nei kawltu hai chu an Arms licence details MHA­NDAL Portal­a thunlun le UIN thaw ding leiin January 1, 2015 chenah Name of licence, name of father, permanent address, present address, date of birth, name of Police station, occupation; phone no.; licence no.; date of issue, date of expiry, Gun no. le Name of make (company) pelut dingin District Magistrate/CCPur in inhriettirna a siem.

MZP in Talent Search le Quiz Competition
CCPUR: Mizo Zirlai Pawl (MZP) Chiengkon branch chun zanikhan Vimala Raina Govt. H/S­ah an branch sunga student hai ta dingin talent search­cum­quiz competition an buotsai. Talent Search 2015 hi (L) Lasermon Gangte s/o SD Gangte hrietzingna dinga nei a ni a, lawmman hai SD Gangte in a tum vawng a nih. Talent search a 1st prize Rs. 3000 le Certificate, 2nd Rs. 2000/­ le Certificate, 3rd Prize Rs. 1000 le certificate pek ning an t, mi 5 rs. 100 seng consolation prize pek ning an tih. Lawmman hai hi Dec. 22, 2015 nia Chiengkon Community Hall­a YMA Advance Christmas hmang huna sem ning a tih.

Dist. Youth Conf. cum­Annual meet
CCPUR: Churachandpur Dist. Catholic Youth Organisatio (CDCYO) huoihawtnain zani hmasa zana inthawk khan Good Shepherd Parish, CCPur Don Bosco Hr. Sec. School­ah 1st Dist Youth Conference­cum­Annual Meet 2015 nei a ni a, hi hun hi Rev Fr Mathew Mundoly, P.P, St Mary’s Parish in a hawng. Dec. 20, 2015 zing inkhawm huna Rev. Fr Victor, Parish Priest, St. Peter’s  Chandel in thuhrilna nei a ta, zan huna Rev. Fr Emmanuel Kohli, P.P. Good Shepherd Parish, CCPur inrawinain seminar um a ta, Aloysius Zangkhosei Mate, President All Manipur Catholic Union le  Peter Kammang, Catechist, Good Shipherd’s Parish han thu hril an tih.


WMCEI in Revival meeting
CCPUR: Wesleyan Methodist Church of East India (WMCEI) huoihawtnain December 21­23, 2015 inkar sung khin Open Air Revival Crusade/meeting hmun tum tumah um a tih. Dec. 20, 2015, 5:30PM in WMCEI Biekin; Dec. 21, 2015, 5:30PM in Saidan kawtthler; Dec. 22 le 23, 2015, 5:30PM haiah Muolvaiphei playground­ah nei ning a tih. Hi huna thuhriltu ding chu Rev. Dr Peter Lam, Australia ning a tih.

Christmas Bonus Rs. 5000/­ seng an sem
CCPUR: Churachandpur Cattle Rearing & Meat Processing Co­Operative Society chun zani zantieng 1:00PM khan an office, L. Pauthaum chengna in, New Bazar­ah inhmukhawmna neiin member mi 35 hai lai Christmas bonus mi pakhatah Rs. 5000/­ sengin an sem. an sem.

Hmar FC 2nd trip an hungtlungkir nawk
CCPUR: 9th NE Tamchon Football Tournament, 2015­a third place latu Hmar FC Player 2nd trip mi 4 zanikhan Churachandpur an hungtlung nawk. Zanita hungtlung hai chu­, Immanuel L shakum,Clement Lalthuoisang, Cornellius Pudaite, Daniel Hmar hai an ni a, Immanuel Intoate le Lalringsan Khawbung hai chu Guwahati ah an la chambang a, Seiboi Haokip le Haoliengou hai ruok chu Delhi ah an la cham a, a remchang hmasa takah an in pan veng an tih.Player hai hi Imphal­ah HYA jt. Hqrts President Ms Thangthatling chun thlaithleng a lo buotsai pek a, Hmar Ambulance in CCPur chen an hung thak a, Tuithaphai an hungtlung hnunginn HYA GHQ le HSA GHQ hai hmalaknain HSA Campus, Rengkai­ah lawm lutna le thingpui dawn tlang puina nei a nih. ­  (Ramditum Ralsun)


National Herald case­ah Sonia le Rahul Court hmaah an inlang:  Bail­a insuo an nih
NEW DELHI:  National Herald Chanchinbu chungthua BJP leader Subramanian Swamy in Congress President Sonia Gandhi le Congress Vice President Rahul Gandhi hai chunga complaint a peklut le inzawma Delhi Court in anni taksa ngei inlang dinga an hriettir angin zani zantieng 3 PM­ 3.03 pm inkar sung khan Sonia Gandhi le Rahul Gandhi bakah hi case a intum midang pathum Motilal Vohra, Oscar Fernandes le Suman Dubey hai chu Patiala House Courts Complex, Metropolitan Magistrate Loveleen hmaah an inlang a. Court chun bail in an suo. Hi case a intum ve ve Sam Pitroda chu a hriselna thatnaw leiin Court in inlang lo a phal pek a, an lang hai hi an rengin bail­a insuo an nih.



Magistrate chun bail bond, Rs. 50,000/­ seng le Surety pakhat seng  pelut dingin an hriettir. Hearing nei huna hin Subramanian Swamy chun, hi case­a intum hai hi ramdanga tlanhmang thei an nih tiin bail­a insuo an nina hi a sawisel a, sienkhawm senior advocate Kapil Sibal chun, hi case­a inrawlna neia intum hai hi mi inlar le politics a hnuhma sei/inthuk tak nei an ni leiin ramdanga an tlansiet inlauna ding a um nawh tiin Magistrate chun Subramaniam hi hnielin, hi thubuoi chungthu ngaituo le hearing chu February 20, 2015, zantieng 2:00PM a nei nawk ding dingin a ruot nghal bawk. Sonia Gandhi ta dinga surety in Prime Minister hlui Manmohan Singh a ngir a, Rahul Gandhi ta dingin Priyanka Vadra; Oscar Fernandez ta dingin AK Antony le midang pahni hai ta dingin Ghulam Nabi Azad le Ajay Maken hai an ngir bawk.

Kum 2012­a kha BJP leader Swamy in National Herald chanchinbu property thuah complaint a lo peklut tah a nih. National Herald chanchinu hi PM hlui Jawaharlal Nehru in a lo indin, April 1, 2008 a inthawka kha suktawpa lo um ta a nih. Court hin bail in insuo sienkhawm hearing nawk huna anni aia midang an inlang chu a phal pek chuong nawh.

Sonia Gandhi chun hi case­a hin tlansietna chite khawm a neinaw thu hrilin an do pei ding thu a hril a, Rahul Gandhi chun hi case that ta hnung sukthar nawka hung um chu politics a BJP phuba lakna a nih tiin an tum. Patiala Court campus­a hin Congress member tam tak fekhawmin court rorelna hi an va uop a nih.

Manipur Congress in sit­in­protest an lo nei ve
IMPHAL: Zanita National Herald case­a Sonia Gandhi le Rahul Gandhi hai Court in an taksa ngei inlang dinga a kona le inzawmin zanikhan Manipur Pradesh Congress Committee (MPCC) chun Congress Bhavan, Imphal­ah sit­in­protest an lo nei ve. Hi huna hin Manipur CM O.Ibobi Singh,  MPCC President Gaikhangam le Congress members le workers hai an thang tawl.

PULF in hamthatna an la hmunaw niin
IMPHAL: Manipur sawrkar kuta inpe tah People’s United Liberation Front (PULF) chun sawrkara inthawk cadres pakhat khawmin hamthatna pek dinga ti hai an la dawng naw niin PULF Chairman Md. Kaji Umar chun zanita Manipur Press Club­a Chanchinbumihai an hmupui huna a hril. PULF hai hi  Sept. 26, 2012 a kha 17 Assam Riffle fethlenga IGAR South, Mantripukhri hmuna Manipur CM O.Ibobi Singh le Dy. CM Gaikhangam hai hrietpuinaa an ralthuom hai le inpe an nih. CID statement le IG scanning an zo vawng ta a, sienkhawm an inpek huna sawrkarin a tiem anga hamthatna le hlaw an cadres 40 han an la hmunaw niin a hril a, January 10, 2015 chena hamthatna a peknaw chun thil thalo tak an tlun ding thu Umar chun a hril.

Rocket shell 5 le Grenade 1 hmu
IMPHAL: Kanglapat renovation work sin thawtu hai chun zani zingkar 8AM khan Rocket shells 5 le High explosive grenade 1 an chodawk. Hieng thilpuokthei hai hi zanikhan  Lamphelpat hmunah Police­a bomb squad han puok thei lo dingin an suksiet. Sangai festival ding le inzawma tuta hmaa hi lai hmun siemthat na sin thaw huna thilpuokthei hmu a lo ni ta bawk a nih. Assam Rifles han helpawl hai tukdawlna sin hrat taka an thaw laia helpawl thenkhatin an thlak ni dinga an ring thu Police chun an hril.

Mizoram BJP election thul
AIZAWL: Zani hmasa a Mizoram Unit  BJP election nei dinga ti chu state puotienga leaders han inthlangna nei lova Prof. John V. Hluna state Unit President­a sie an tum leiin thul a nih tiin BJP Mizoram unit General Secretary Chhanhima chun a hril. Election nei nisien chu President ni nuom mi 4 hai laia Vice­president ni lai mek Chalngura Jahau chu tling ngei ring a nih tiin Chhanhima chun a hril. Election nei lova President sie tumna hi BJP members han an dodal leiin poll officials hung hai khawm zani zingkar khan Assam an pan. Returning officer le observer dinga ruot tak chu BJP National Executive member Tapir Gau a ni a, sienkhawm a fenaw a nih.

Abdur Rehman in London a inthawk pawisa
NEW DELHI: Al Qaeda terrorist hai le inzawmna nei nia ringhla leia man Abdur Rehman chun London­a inthawk a bank account­ah pawisa a dawng niin Bhubaneswar­Cuttack Police Commissioner Rajendra Prasad Sarma chun a hril. Mr Rehman hin tukum sung ngawt khawm pawisa tam tak a dawng ta a, suizui mek a nih tiin Mr Sharma chun a hril. Rehman hi tulai hnai ela kha Cuttack hmuna man, Delhi Police Custody­a um mek nih.

Sai helin Thingpuihuon sinthawtu a sir hlum
COIMBATORE: Zani zingkar inhma tak khan Valparai area­ah Thingpuihuona sinthawtu (worker) James (55) chu Sai hel pahni han an sir hlum. Lampui­a kea a fe lai mek Sai pahni hai hi an tuokpui thut a, tlansiet a tum a, sienkhawm Sai pakhat chun a ngawn in mana a sir hlum a nih.

CIC thar dingin RK Mathur
NEW DELHI: Defence Secretary hlui R.K. Mathur chu Chief Information Commissioner (CIC) thar dinga ruot a nih. CIC ni lai mek Vijai Sharma hun (term) chu December 1, 2015 khan a tawp ta a, hi leia ama thlaktu dinga R.K. Mathur hi ruot a nih. Mr Mathur hi IAS Officer (Tripura Cadre) pension tah a ni a, kum 65 a tling chen kum 3 sung CIC sin hi chel a tih.

Cell phones­ah panic button
NEW DELHI: Union Minister Maneka Gandhi chun, nuhmei harsatna le suknawmnatna tuortu hai ta dingin Cell phones (Mobile phone) haiah panic button siem vat a ni ta ding thu zani hmasa khan a hril. Cell phone tinah hiengang panic button hi sie a ni theina dinga hma lak a ni a, suknawmnat le buoina tuok nuhmei hai chun panic button hi hmetin thangpui an ni nghal thei ding  a ni a, WCD le telecom ministry chun hma an lak mek a, thla 6 hnunga an zo beisei a nih tiin a hril.

UALA in sawrkar leh agreement an ziek
TURA: United A’chik Liberation Army (UALA) chun zani hmasa khan Meghalaya Chief Minister Mukul  Sangma le Home Minister Roshan Warjri hai hrietpuiin Circuit House­ah Meghalaya sawrkar leh peace aggrement an ziek. Agreement­a UALA tieng an Chairman Novembirth Marak @ Chiindik le Gen. Secy. Nagra D. Shia le state sawrkar tieng Commissioner le Secretary, Garo Hills Division Peter Ingty le Commissioner & Secretary, Political Dept. J. Lyngdoh han hming an ziek. Meghalaya CM Mukul Sangma chun helpawl dang hai khawm sawrkar le inbiekna nei dingin a fiel.

VAWISUN THUPUI
Vâna hângthim le tuiekin a fak siet nawnaah, inruhaiin, an verpawpa an inruk nawnaa chun, in ta dingin rohai siekhawl lem ro; i ro umna taphawtah i lungril khawm a um ding a ni sih a.  Mathai 6:20­21

Editorial
Hlim le lawm ding

Eden suolna leiin Pathienin mihriem hai hi thlansaphul kaia sin thawa, inrim taka fak zawng dinga a mi siem a ni leiin mitin le sungtinah harsatna, beidawngna le lungngaina ding tam tak um ngei a tih. Chuong laizing chun Pathienin ei chunga thil tam tak a thaw hai leia lawm ding ei nizie le lawm nasan ding tam tak a um. Ei hma elah Krismas hmang dingin mitin ei insingsa mek a, a tlangpuiin Krismas hmang dingin mitin ei lungril chu an zo ta a, sienkhawm khawvel thilah ei lan zo nawh ti inla ei hril suol ring a um nawh.

Krismas hi hun lawmum tak a ni leiin hlim le lawm taka um ding ei ni laiin mi thenkhat ta ding chun nuor inphengna ding tam tak um ngei a tih. Sienkhawm ei suol hai sawpfai dinga mihriem anga insiema hung pieng Van Lal nau Isu Krista piengchampha lawm ei ni zie chieng taka ei hriet a, ama tieng ei en a ni phawt chun khawvel thil rosum le thuom le par hai leia nuor inpheng a, hlimlo le lawmlo ding ei ninawzie chieng takin hmufie ngei ei tih. Thalai le naupang hai chau ni loin, nu le pa a tu el khawm, khawvel thil (material things) in ei lungril a hluo lien rawp hlak leiin Christmas hi a nina ang takin ei hmang fuknaw rawp hlak  a, hlim le lawm ding ei nizie hi ei inhrietnaw rawp hlak a nih.

Thuomhnaw thar i nei zonaw leia i lungngai a, i beidawng a ni chun, khawvelah thuomhnaw kawp khat khawm nei zo lo tam tak an um ti ngaituo la i vangneizie, hlim le lawm taka um ding i nizie hmu fie ngei i tih. Mi angin in ropui le mawi ei neinaw leia i beidawng a ni chun, khawvel mihriem tam tak chengna ding in nei lova thlasik dei lai khawm tuol para sun le zan hun hmang tam tak hai ngaituo a, lawm ding ei nih.

Hi hun lawmum tak hmang thei lova natna khuma zal tam tak an um ti hriein; dam le hrisel taka hi hun hmang thei dinga Pathienin hriselna tha tak a mi pek lei hin lawm ding ei nih. Damnaw le bawrsawm taka um ei lo ni chun, hi hun lawmum tak hmu chak, sienkhawm hmu phak ta lova fammuol liem tam tak an um ti hrein, hi hun tha la hmu thei dinga Pathienin ei hringna a la hla leiin lawm ding ei nih. Ei lungngai a, ei nuor inpheng leiin  ei hringna second khat khawm ei suksei theinaw ang bawkin damna chu Pathien kuta um a nih ti hriein hring le dama ei la um leiin lawm ding ei nih.

Piengtira inthawk khaw hmu lova mitdel tam tak  khawvelah an um ti hriein hmu theia ei um leiin lawm ding ei nih a; inzun thei, inhnawm thei, tawng thei, chang thei; lawn thei, innui thei, inthuok theia ei um leiin lawm ding ei ni a; ei sin thawnaah ei lo sawl vieu a ni thei, sawl thei dinga Pathienin hriselna a mi pek leiin lawm ding ei nih; Khawvel­ah sakhuo thila intheidana le dodalna leia inkhawm thei lo, Krismas khawm hmang thei lo tam tak an um laiin  zalen taka hi hun tha le hun lawmum hmang thei dinga hun tha ei nei lei hin lawm ding ei nih. Thuomhnaw thar le thil thar dang dang hai kha a pawimaw tak a ni naw a, ei lungril a nih Pathienin a dit.Mihriem hringnuna hin hlim nawna ding san tam tak um a tih, sienkhawm hring le dama ei um lei hin lawm ding ei nih.


Post a Comment

Powered by Blogger.