NACO Official 3 an hung
CCPUR: New Delhi­a inthawk National AIDS Control Organisation (NACO) official pathum Dr Rosie, Dy. Director (CST); M. Shilpakumar, DA (CST) le Dr AS Rathore, Deputy Director General (CST) hai chu zani hmasa zan khan Imphal­a an hungtlung a, zanikhan CCPur-ah an hung inzin. Hieng Official pathum hai hin zanikhan District Hospital­a Blood Bank, ART Centre, MSF Clinic; SHALOM le District Immunization Office (DIO) hai sirin an enfel. Hmun tum tum an enfel zo hin zani zantieng khan Imphal tieng an kir nawk. NACO Official hai hi kum tin dan pangngai anga hun inzin hlak an nih.



JAC in Sub-Station hawng tumna an boycott
CCPUR: Joint Action Committee (JAC) Against Anti­ Tribal Bills chun December 22, 2015 nia Manipur sawrkarin Churachandpur district sunga Vangai area­a Power Sub­Station hawng a tumna chu boycott an puong bakah mi tukhawm Sub­station hawngna thlawp lo le thang lo dingin an ngen.
           
JAC thusuokin a hril dan chun, hi Power Sub­station hi kum 4 liemtaa zo le hawng dinga remruotna um tasa a ni a. Assembly in Anti­Tribal Bills 3 a passed leia buoina um veng vung karah mipui lungsen le sosang sukdei tumnaa hieng anga thet le thuta hawng a tum a nih tia intumin Sub­Station hawng hi an dodal a nih. JAC in meeting neia Sub­Station hawng tumna hi dodal le boycott dinga an rel a nih.
           
Sub­Station hi Manipur CMO.Ibobi Singh in tribal MLAs hai hriet le hmuhawia a hawng dinga remruotna siem niin ei thu dawngna chun a hril.

Christmas gift in Bufai bag 1 seng an pek
CCPUR: August 31 le September 1, 2015 inkar sunga Anti­Tribal Bills 3 hai leia buoina suok huna hliemna tuok District Hospital­a admit mi 17 hai kuomah zanikhan YPA GHQ chun Christmas Gift in  YPA GHQ Hall­ah Bufai bag 1 seng an pek.
           


YPA GHQ President chun, Bills 3 hai leia ram le hnam humhimna dinga hringna inhlan pasaltha 9 hai, hliemna tuok mi 50 chuong hai chu inpakum le inza an um thu hrilin, anni hai leiin tribal hnam tum tum hai lai inpumkhatna, ram le hnam hmangaina nasa tak a hung pieng thu hrilin, anni hai tuorna le channa leiin hmatieng tlangmi han ei ram le humhalna dinga mania roinrelna ei la hung nei ngei a beisei thu a hril.

J&J Fast Food hawng a ni tah
CCPUR: Pu Thanglienthuom haiin sun sawt taka inthawka an lo buoipui J&J Fast Food, Bridge Street, Rengkai, CCPur (near Rengkai Bridge) chu zani zan khan hawng a nih.
           


Restaurant hawngna a hin mi tak tak fekhawm a ni a, welcome address le briefing Pu Thanglienthuom (Manager, J&J Fast Food) in a nei a, Stall Inauguration Shri. M Gouzamang, Chief Guest in a nei zovin, Stall Inaugurational prayer Rev. Lalthlenglien in a nei nghal.
           
Hi huna hin hlasakthiem Benny Khongsai; Lalthangkung F. Tusing (kanghling father); RT Hrangchal; Lien Shakum; Lalhlimpui; Ramhluolien; Revisang; Pu Thanglienthuom (manager j&j fast food) ke midang dang haia inthawk hla ngaithlak a nih.
           
J&J Fast Food hi vawisun zing dar 9 anthawk hawng tan ni tang a tam, Iengtik lai khawm home delivery manager contact number 8415915436 a hin call in home delivery an thaw thei zing bawk.
           
Mitinin Mani ta anga ngaia, fak inhnik tak tak an siem hai hung fa a hung dawr hlak dingin Manager in ngenna a siem. (­Ramditum Ralsun/ Photo: Jacksy Khawbung)

Construction work an enfel
CCPUR: KSO, Churachandpur thuoituhai chun zani 10:00AM khan Peace Grond, Tuibuong­a Gallery bawlna fe mek enfelna an nei. Sinthawna thenkhat a thatawknaw leiin contractor chu tha taka sin thaw dingin an inhriettir.

Truck eksiden­ah mi 3 an hliem
CCPUR: December 17, 2015, zan dar 8:30 vel khan Thanlon Sub­Division, Pangen khuoa inthawk Thingphek cubic 320 phura Tuithaphai (Lamka) hung pan Shaktiman  MN02­5315 chu Galkapkot khuo bul lai breakfailed leiin tuoksiet a tuok a, a sunga chuong mi 4 hai laia 3 in hliemna an tuok. Hliem hai hi zani sun dar 11:30 vel khan District Hospital hung phurlung an nih. Hi eksiden­a hliem hai chu­ Driver Haoneu (38) s/o Rev Chungmang of Singngat Thahdou Veng; Lamminlun @ Lunpi (30) s/o Neilkhosiem of HQ Veng le Khaiminthang (35) s/o Sawia of Pangen hai an ni a, hi Truck a chuong ve Lulun of Phailian ruok chu a hliem nawh. Hliem 3 hai hi Doctor han Imphal tienga enkawl dingin an refer vawng leiin Imphal tieng panpui an ni a, anni lai hin Lamminlun chu a hliem inrik taka hril a nih.

Ralna Rs. 7000/­ a lut
CCPUR: Zanikhan Dist. Hospital­a JPO kutah tribal martyrs ralna Rs. 7000/­ a lut. Zanita JPO kua ralna petu hai chu G.Nangchinkhup & Family of Aizawl Rs.5000/­; Dr Jainson Haokip & Family of Paite Veng, Imphal Rs.1000/­ le  Parte & Family, Bungmual Rs.1000/­ a nih. Dec. 19, 2015 a Dist. Hospital Morgue­a thingpui inlumtu ding chu TCYA ning an ta, Morgue­a hlasak lengkhawm ding chu HQ Veng, Zalenmum, Mission Veng le Hiangjou nupui hai ning an tih.

Hlawtlingna changhai lawmpuina an nei
CCPUR: Varparkawn le Khawpuibung HYA chun zani zan khan kum 2014­15 sunga an Branch sunga inchukna tienga hlawtling Class X le XII mi 9 hai lawmpuina le tawngtaipekna hun hmang a nih. Pastor Zakapthuom in tawngtaipekna neiin Pastor Lalthlunglien in student hai infuina thucha a hril a, an reng hin chawimawina certificate inhlan an nih.

District Council in tax a sukpung
CCPUR: Chief Executive Officer, Autonomous District Council CCPur chun Churachandpur district sunga shops, commercial establishment, stores  le  trades dang dang haia  tax/registration/ renewal a sukpung inhriettirna siem. Under Section 33(a) & (e) of Manipur (Hill Areas) District Council Act, 1971 hnuoia tax hi sukpung a ni a, tax sukpungna hi January 1, 2016 a inthawk thu thar um nawk hmakhat hmang ning a tih.
           
Hi dungzui hin Group ‘A’ kum khatah Rs. 4,000/­ le renewal Rs. 2,000/­ ; Group ‘B’ hai Rs. 2,000/­ le renewal Rs. 1,000/­. ; Group ‘C’ Rs. 1,600/­ le renewal Rs. 800/­.
           
Group D­ Rs. 1200/­ le renewal Rs. 600/­; Group E ­Rs. 1,000/­ le renewl Rs. 500/­ ; Group F­ Rs. 800/­ le renewal Rs. 400/­  Group G­ Reg. fee Rs. 400/­ le renewal  Rs. 200/­.; Group H­ Vegetable/super market  thlatin (per month) seat hluo man an pek ding chu Chilly Rs. 250/­, Cosmetic  Rs. 200/­ le Vegetable Rs. 150/­ ni tang a tih.

S. Haijang Silver Jubilee hmang
CCPUR: Zani 10:30AM khan S. Haijang khaw mipui chun an khuo kum 25 tlingna Silver Jubilee an hmang. Lunminthang Haokip, IAS, DC, CCPur khuollien niin , functional president in L. Mangkhogin Haokip, IPS, SP/CCPur le Guest of honour in Khaipao Haokip, MDC, Kholmun a thang. Chief Guest in Silver Jubilee lungdaw hawngna a nei a, Jubilee dar mi 25 han vuokna an nei.



Manipur Assembly Winter session tan; Bill 3 phar a nih
IMPHAL:  December 21, 2015 chen aw ding 10th Manipur Assembly 12th Session (winter Session) chu zanikhan tan a ni a. Manipur Governor hlui lo thi tahai V.K. Nayar le Dr  Syed Ahmed hai sunna le inzana pein minutes 2 sung totawka hun hmang a nih.
           
Zanita Assembly inthung tan ni hin Bill pathum phar a ni a, Bill pathum phar hai chu­ Manipur Municipalities (Ninth Amendment Bill, 2015 (Bill No. 19 of 2015); Manipur Participatory Irrigation Water Users’ Bill, 2015 le Manipur vehicle Taxation (Second Amendment Bill, 2015) (Bill No. 21 of 2015) hai an nih. A hmasa tak hi Manipur CM  le house leader ni bawk O.Ibobi Singh in a putlut/phar a  ni a, CM chun hi hma hin  Business Advisory Committee 17th report a present bakah Health Minister chun Committee report on Medicare service Personnel and Medicare Service Institute a present bawk.
           
Zanita Manipur Assembly Winter Session tan huna hin August 31, 2015 nia Manipur Assembly in ILPS le inzawm Bills 3 a passed hai dodalna leia September 4, 2015 nia MLA an nina inthawk inbanna pe Naga Peoples Front (NPF) MLA 4­ L Dikho; Samuel Risom ; ST Victor Nunghlung le Dr V Alexander Pao hai bakah Congress MLA E. Dwijamani khawm leave lain zanikhan a thang nawh. NPF MLA hai ruok hin chu leave an lak hran chuong naw niin ei thu dawngna chun a hril. A chunga MLA 5 hai ti lo Manipur Assembly seats 60 uma MLA dang hai chu an thang vawng a, tribal MLA dang hai khawm an thang vawng.
           
NPF MLAs hai inbanna hi Manipur Assembly Speaker chun tuchen hin a la pawmpek nawzing a, an inbanna pawmpek an la ninaw lei hin MLA an nina anga an hlaw le hamthatna an dawng ding ang ang hai an la dawng zing a nih.

Rani Gaidinliu piengchampha hmang
IMPHAL: Indira Gandhi National Tribal University (IGNTU), Regional Campus Manipur  huoihawtnain zanikhan Manipur Film Development Corporation (MFDC), Auditorium­ah Rani Gaidinliu piengchampha hmang a ni a, Manipur CM O.Ibobi Singh khuollienin a thang. CM chun, Gaidinliu kha NE chau ni lovin India ram ta dinga zalenna suoltu (freedom fighter) a nih tiin a hril a. Ram le hnam ta dinga an pek zona le tumruna entawn dingin thalai hai a ngen. 

Hi hun hmangna hi IGNTU Vice Chancellor Prof.  TV Kattimani le Union Minister of State for Tribal Affairs, Govt. of India Man Sukbahai Vasava hai khawmin an uom a, Souvenir tlangzar a ni bakah Raini Gaidinliu chanchin (documentary) “Dina” ti film insuo a ni bawk.

Dec. 23 in darkar 24 Strike thaw an tum
IMPHAL: All Manipur Constable viva voce demand committee (Imphal West and Thoubal Districts) chun December 23, 2015, 5PM­ Dec. 24, 2015, 5PM inkar darkar 24 General strike thaw an tum thu zanikhan an puong. Hieng district pahni haia Constable lakna dinga candidates 4000 hai Viva Voce huoihawt dinga ngennaa General Strike/bandh hi thaw an tum a nih.

Miss Sikpui Ruoi in Nk. Gloria Zathangpui Zate
LRS Puruolte & Alan
HMARKHAWLIEN:  December 17, 2015 khan Hmarkhawlien, Assam­ah Barak Valley Hill Tribes Development Council (BVHTDC), Govt. of Assam Sponsored­na le Sikpui Ruoi Organizing Committee (SPROC), Barak Valley, Assam huoihawtnain Sikpui Ruoi Barak Valley, Assam nei a nih. T. Sangkhum Sikpui Pa in a thang.
           
Zan huna Musical Nite - cum­Sikpui Barak Valley Contest 2015 nei a ni a, khuollienin Pu Lalthomlien Hmar, Chairman, BVHTDC a thang a, Khuol chawngpu in Dr John Pulamte, President HI a thang a, Special invitee in Ngamrothang Ex­Chairman, NCHAC le Pu Lalhrillien MDC/Member, Fin. Comm., ADCC (Manipur) hai an thang. Nk. Gloria Zathangpui Zate chu Miss Sikpui Barak Valley Contest 2015 a thlang a ni a, 1st Runner Up in Miss Rebecca Lalnunmawi, 2nd Runner Up in Miss Melody, Miss Best Western Outfit in Miss Esther Khawbung le Miss Best Traditional Attire in Miss Jenny Pakhumate hai thlang an nih.

Ralthuom tam tak dapdawk
ONGOLE: Andhra Pradesh a chun zanikhan Prakasam district­a Nallamalla ramhnuoia security forces han dappui an thawnaah ralthuom tam tak an dapdawk. Ralthuom an dapdawk hai lai Rocket launchers 11, AK magazine 1, single barrel ‘tapancha’ (short weapon) 1, rocker launcher spears, gas cutter, packing machine le thil dang thenkhat a thang.

UP in Polythene khap a tum
LUCKNOW: Uttar Pradesh sawrkar chun, Allahabad High Court thupek angin a state sunga Polythene bag hmang khap dingin a rel. State sawrkar chun hi aia mipuiin an hmang ding a ngaituo mek a nih tiin UP CM Akhilesh Yadav chun a hril. Allahabad High Court chun December 31, 2015 a inthawk state pumpuia polythene bag hmang le zawr khap dinga an hriettir a nih.

Pending bill 6 pass dingin, GST ah consensus um thei lo
NEW DELHI: Zani zantieng khan RS Chairman Hamid Ansari inrawinain all party meeting nei a ni a, Parliament Winter Session fe mek sung hin Rajya Sabha chun Scheduled Caste and Scheduled Tribes (Prevention of Atrocities) Amendment Bill le Appropriation Bills hai thangin pending bills 6 hai pass dingin an remti a, sienkhawm Goods and Services Tax (GST) a ruok chun consensus a um thei nawh.

India in dollar 500,000
UNITED NATIONS: India sawrkar chun kum 2015-­16 sunga globl humanitarian relief operations thawnaa hmang dingin UN rapid response kuomah dollar 500,000 pek a tum. India chun kum 2014 khawm khan Central Emergency response fund (CERF) a dingin hieng zat bawk hi a lo pek ta a nih. India chun tuta hma meta Ebola natna hri nasa taka an leng huna khawm khan Ebola Trust Fund a dingin dollar 10 million a lo pek ta bakah Yemen ram ruoina leia India le ramdang mi hai thuoisuoknaa thangpuina sin a lo thaw ta a nih.

VAWISUN THUPUI
In thil tha thawhai chu mihriem hmaa, an ihmu dinga thaw lo dingin fimkhur ro; chuong naw chun in Pa vana mi kuomah lawmman nei naw ti niu.  ­ Mathai 6:1

Editorial
Thangpui rawh

Khawvel­a mihriem hai hi inthangpui a, insawmdawltuo dinga Pathienin a mi siem ei ni leiin a tu el khawm hi mani khata khawsa thei ei um nawh. Mi pasie han mi hausa hai ei mamaw ang bawkin mi hausa le neinung, dit dit inchawa nei thei hai khawm mani khatin an khawsa thei chuong naw a, mi pasie hai an mamaw hun a um tei hlak. Hi lei hin mihriem hai hi thangpui ei ngaina le sawmdawl ei tul huna insawmdawltuoa inthangpuituo ding ei nih. Mi thenkhat chun midang thangpuina mamaw lo ding nia an inhriet lei am a ni ding mi’n an mamaw huna thangpuina kut rawl hi an rin vieu hlak. Hiengang mi hai hin mi ngainat le inza an hlaw ngai naw a, thangpui an ngai huna mi han thangpui an phur ngai nawh.
           
Pawisa sum tam tak lamsuoka, in ropui tak sunga khawsain, khawvel thil changkang le tha, a suok thar thar hai neiin ei sie khep khup khawm a ni thei, sienkhawm mihriem hai hi na thei, eksiden thei le harsatna dang dang tuok thei ei ni leiin chuong huna ding chun ei mihriem chanpui hai bawk ei mamaw hlak. Khâwl ropui le tha tak tak ei nei khawm a ni thei, sienkhawm chuong khawl hai chu mihriem siem a ni leiin se thei, buoi thei ngai a ni leiin, eini khawmin mi thangpuina ei mamaw hun a um hlak ti hi hriet tlat ding a nih. Mihriem hai hi mani chau in ngaituoa, midang ngirhmun le chan hrietthiemna ei neinaw chun inremna le inhmangaina hi um thei ngainaw nih.
           
Mi dang thangpuina dingin sum le pai le rothil iengkhawm ei neinaw a ni thei; ei pasiet leia midang ta dinga tangkaina neilo tukhawm ei um nawh. Midang thangpui ding hin mi tin, a chin taka inthawk a lien tak; a pasie taka inthawk a hausa tak han thaw thei ei nei seng a, ei tangkai dan le ei thaw thei an ang nawh ti chau a nih. Midang thangpui ti hin ei thil nei le sum hlawsuok haia inthawk mi va thangpui el a ni nawh. Mi tam tak chun duamna leiin Below Poverty Line (BPL) le Above Poverty Line (APL) hai chan ding ei inchupui rawp hlak. A hmu lo ding tam takin an dawng laiin a dawng dinga awm hlie hlie tam takin an dawng naw thung. Hi thil hi duamna lei a ni a, mania pumbil tum nekin a hmu ding awma ei ngai hai zawngdawkin an hmu theina dingin thangpui inla midang ei thangpuina a ni el.
           
Hieng laizing hin, thangpui awm le  tlak hai ei thlier thiem ruok chu thil tul le pawimaw a nih. A san chu, inzakna le inphalamna  nei der lova  mi thawsuoksa awlsam taka dawng tum ei pung pei leiin fimkhur ruok chu thiltha  a nih. Thangpuina ti hin fak le dawn, sil le bil annawleh pawisa el a ni nawh, hieng hi chu short term thil a ni a, a tha tho khawmin a bo pha pek an ngai nawk pei leiin a zo a zaiin ei inthangpui theinaw ding leiin a ‘long term’ thilah anni le anni an inenkawl a, an intodel theina ding tiengpang ngaituo pui hi tulai khawvela ding chun thil tul le pawimaw tak a nih. Hi kawnga hin mi hausa le hnam sunga pawl le Society tum tum han mawphurna lien tak an nei. Society annawleh Pawl sum hmangin mi thenkhat khawsakna ei dawmsang thei. Sienkhawm tuchena hin ei hnam sunga society um han mi ngirhmun dawmsangna ding tiengpang ei ngaisaknaw tlangpui, ei indin san a ninaw lei a ni el thei.
           
Mi thabo le ringum lo tam tak ei um lai hin taima, fel le ringum, tlawmtea hang thangpui meta an ngirhmun dawmsang thei ding tam tak an um ve ti ruok hi chu ei hriet thiltha a nih. Hi kawnga hin hnam sunga Pawl annawleh Society le mi hausa hai hin lungril neiin hma la inla chu ei ram le hnam sunga mi tam tak khawsakna ngirhmun nasa takin ei dawmsang ngei ring a um. Anne Frank chun, “No one has ever become poor by giving’ tiin a hril a, midang thangpui leia pasie annawleh tluse der ti hi hriet ding an vang hle. Ninaw sien chu khawvela charity thila dinga cheng vaibelsie tel tel sengtu mimal le Organisation tam tak hai hi tluse tawl ta ngei an tih.Tluksiet nekin mi inza hung niin an sum nei a pung pei lem hlau a nih. Mi ei thangpuina hai hi a thlawnin a bo ngainaw a, ei thangpui haia inthawk kher ni lovin midang fethlengin a hung kir nawk ngei hlak. Thangpui rawh; thangpuiin um i tih.


Post a Comment

Powered by Blogger.