CCPur, Delhi le Ukhrul haia Coffin rally nei a nih
MP 3 han Manipur Tribal issue Parliementah an khekpui nawk
CCPUR/NEW DELHI/UKHRUL: AntiTribal Bills 3 hai le inzawma Tribal Movement fe mek ni 100 tlingna le inzawmin zanikhan Churachandpur; Ukhrul le New Delhi haiah Coffin rally nei a nih. Churachandpura chun District Hospital a inthawk All Tribal Womens Union/CCPur inrawinain silent rally nei a nih. Rally hi zani 11:30AM a inthawk khan tan a ni a, Police Station tuola Tribal Martyrs hai inzana le sunna in silent prayer minutes khat hun hmang a ni a, DC Office, Tuibuong chen rally nei dinga ti nisienkhawm remchangnawna um leiin Rengkai Road zuiin Tiddim Road Dorcas Road Bungmual District Hospital chena lampui hraw a nih. Rallya thang hai hin ‘our land! our rights!our identity’ ti inziekna placard an chawi tawl.
Ukhrul districta chun Committee Against Anti Tribal Bills (CAATB) inrawinain Public Rally nei a ni a, rally a hin Chief Justice of Chhattisgarh hlui WA Shishak khawm thangin thuhrilna hun a hmang.
New Delhia chun Jantar Mantar a inthawk Manipur Tribal Forum Delhi (MTFD) inrawinain Parliament panin zani zantieng 4:00PM khan rally nei tan a ni a, 4:30PM khan Police han rally hi an lo dang a, iemanichen an innawrtuo a, protest a thang hai police in an man tawl a, sienkhawm a hnungin insuo nawk vawng an nih.
Hieng laizing hin zanikhan Parliamenta MP thenkhat chun Tribal issue an khekpui. Lok Sabhaah Nagland MP Neiphi Rio; Tripura MP Jitendra Choudhury bakah Rajya Sabhaah Assam/Bodo MP Biswajit Daimary in a khekpui bawk. Biswajit Daimary chun, Bills 3 hai leia martyr 9 hai ruong vui lova an la um thu, Manipur tlangmi han 6th Schedule an mamaw thu le Cenral delegation tir tha a ti thu hai a hril a. Neiphiu Rio chun Manipur tribal hai humhimna dinga 6th Schedule a tul thu, MLA representation a feltawknaw thu, Meitei han ram 10% chau an del laiin MLA 40 neiin ram 90% deltu tlangmi han MLA 20 chau an nei thu a hril a. Jitendra Chaudhary chun, Bills 3 hai le inzawma mi 9 zet thina thuah sawrkar thlungpuiin kut a rawl ngei a pawimaw thu a hril.
Tribal Martyrs ralna Rs. 1300/ a lut
CCPUR: Zanikhan District Hospitala JPO kutah Tribal Martyrs ralna dingin Rs. 1300/ a lut. Ralna petu hai chu Khamkhosiam of Bukpi Rs.100/; Upa Khamkhansuan of Central Delhi Rs.500/; B.Thangzachin of Vengnuam South, New LamkaRs.200/ le G.Chinkhanlian of AIR Colony, Lamphel Rs.500/ hai an nih.
Dec 10, 2015 nia Morguea thingpui inlumtu ding TLYA ning an ta, hlasaka lengkhawm ding chu College Veng, L.Semuol; Salem Veng le Sim Veng nupui hai ning an tih.
Cold Storage vawisun a hungtlung beisei
CCPUR: District Hospital/CCPura Tribal Martyrs hai ruong siethatna dinga JPO in an ngen dawk Cold Storage Unit 2 M/s RS Cooling Appliance Company siem chu Guwahati (Assam) a inthawk zanikhan Imphal hung pan pui niin ei thu dawngna chun a hril. Passenger motor hai anga hrat taka hung pui thei a ninaw leiin Dec. 10, 2015 (vawisun) zantieng hin District Hosital, CCPur hung phurtlung hman beisei a ni thu Deputy Director of Health Services, Govt. of Manipur chun zani zantieng 1:00PM khan telephone hmangin JPO a hung inhriettir. Cabinet pakhatah ruong 6 pei sie thei a ni ding a nih. District Hospital a hung tlung le inruolin Dy. Director inrawinain installation thaw nghal dinga hril a nih.
JAC inrawinain Mass Prayer nei a nih
CCPUR: JAC Against AntiTribal Bills inrawinain zani sun dar 12:00 a inthawk khan Public Ground, CCPurah Manipur Assembly in August 31, 2015 nia Bills 3 a passed hai dodalnaa tribal movement fe mek le Tribal martyrs 9 hai ruong vui loa ni 100 a tlingnain Mass Prayer nei a nih.
H.Mangchinkhup, Chief Convenor, JAC chun, National le International levela Mass prayer nei a ni thu, MTFUK inrawinain London khawpuia khawm zantieng huna candle sitvar a ni ding thu a hril a. Pathien thuoina zarin ei nuorna ni 100 a tling ta a, Pathien ti lo tukhawm innghatna ding a um nawh tia hrilin mipui hai Pathien hmaa intuklut seng dingin a ngen. Mithi hai leia Bill 3 hung pieng ni loin Bill 3 hai leia mi thi an ni a, ei movement a hlawtling theina dingin ‘Unity’ maintain a pawimaw thu hrilin hnam le chi le kuonga ei inthe chun hlawtlingna hmu naw manih tiin a hril.
Rukru han thing an inruk
CCPUR: Tribal Martyrs 9 hai ruong nghakna lengkhawm hai dawn ding thingpui inlumna dinga mi thahnemngai tum tum han JPO fethlenga thing an pek sie khawma um hai laia iemanizat chu zani hmasa zan khan tuti hrietlo rukru han an inrukhmang. Thing inruknaa hmang Auto Number JPO in an hrietsuok a, hi le inzawmin Auto neitu chu Dec. 13, 2015 chena JPO kuta inpe dingin an inhriettir a, hun tiem sunga an penaw chun a chunga thil iengkhawm tlung sien amain mawphur a tih tiin JPO thusuok chun a hril.
Thenmuol Local Church Silver Jubilee an hmang ding
CCPUR: Thenmuol Local Church chun December 1415, 2015 sung khin Thenmuol Local Church compound sungah ‘Inpumkhatna’ (John 17:20) thupui hmangin Silver Jubilee ropui taka lawmna nei an tum. Dec. 14, 2015, 11AM in Pastor Thangzalun in tawngtaia hun hawngna hmang a ta, Upa Saikhamlien, Chairman, Executive Committee, Thenmuol Local Church in lawmlutna thucha hril a ta, Jubilee dar vuokna um a ta, Jubilee lungdaw hawngna le inhlanna Pastor Zosangkhum in nei a ta, hi huna hin Souvenir tlangzarna Upa Lalthakhum, Secy. Executive Commitee, Thenmuol Local Church in nei bawk a tih. Zan dar 5 inkhawm ah Rev. Zoramtawn, Tripura Mission Field in Pathien thucha hril a tih.
Dec. 15, 2015, 11AM zing inkhawm huna Pathien thucha hriltu ding chu Rev. Robinson S. Zote, Cambodia ning a tih. Silver Jubilee hmang sung hin Jubilee Choir le hlasakthiem dang dang han hlaa rawngbawlna an nei ding bakah zantieng ruoithe ning a tih. Dec. 15, 2015 zan inkhawm huna Silver Jubilee Star result puongna um ata, Silver Jubilee kharna Pastor Zosangkhum in nei a tih.
Thenmuol Local Church Executive Committee chun Silver Jubilee hmangna uop dingin Chanchinbu tiemtu hai po po an fiel.
Admit Card la lalo hai la dingin
CCPUR: Delhi Police hnuoia temporary constable (Executive) Male/Female lakna ding le inzawma SP/CCPur Officea Admit Card la lalo hai chun an hma tienga la dingin SP/CCPur chun an hriettir. Delhi Police hnuoia temporary constable lakna dinga hin CCPur districta inthawk candidates pasal 91 le nuhmei 38 an um a, Dec. 11, 2015 a inthawk khin Manipur Police Training College, Pangei hmuna Physical Examination le Measurement test (PE&MT) nei tan ning a tih.
ZSF GHQ in an dem
CCPUR: North East Helpline Centrea Media inCharge le Zomi Students Federation Delhi President Bruce K. Thangkhanlal zani hmasa 8:30PM vela Gurgoan hmuna sawisak a nina thuah Zomi Students’ Federation (ZSF) GHQ chun a sawisaktu hai an dem thu an puong a, a thawtu hai dan anga hremna pe dingin an ngen a; inremna le muongna a um theina dingin mitin inzatuo dingin an ngen bawk.
Manipur CM in ImphalMandalay Bus Service a vailiem
IMPHAL: Manipur Chief Minister O.Ibobi Singh chun zanikhan North A.O.Ca Hotel Imphal complexah Manipur le Central government officials mi 27 hai chuongna ImphalMandalay trial run Bus Service a vailiem (flagged off). Hi huna hin Dy. CM Gaikhangam, IFCD Minister Ngamthang Haokip, Works and Transport Minister Dr. Kh.Ratankumar Singh le Secretary (Transport) M Lakshmikumar Singh hai khawm an thang.
Official team hi Director Transport Roshita le Manipur IGP (Police) Clay Khongsai han an inrawi a, Transport, PWD, Police, Commerce & Industries; Planning and Medical le India Government hnuoia Officer on Special Duty Ksh Shanta inrawinain Ministries of MoRTH, MHA, MEA le Dept. of Revenue haia officials 6 hai bakah Seven Sisters Holidays private Tour Operator palaihai khawm an thangsa.
Indian official hai hin Moreh a inthawk Tamu pan an ta, Tamu a inthawk Kalewa lutin Kalayah zankhat riek an ta, December 10, 2015 in Kalaey a inthawk Kalewa kir nawk in Mandalay pan an ta, Dec. 11, 2015 in Naypyidaw tlung an ta, hi hmuna hin ImphalMandalay Bus service thuah joint meeting um a ta, Naypyidaw hmuna zankhat riekin December 12, 2015 in Mandalayah hung kir nawk an ta, December 14, 2015 khin India team hai chu Imphal hung kir nawk an tih. Imphal le Mandalay inkar hi km. 579 a hla a nih.
Transport Secretary M. Lakhsmikumar Singh chun, tuta mi hi final trial run a ni a, chuongman le thil tul dang dang hai sukfel a ni ding thu trial run flagged off huna a hril a, IndiaMyanmarThailand (IMT) road agreement ziek vat a ni ta ding thu, agreement ziek a ni pha hieng ram pathum hai inkara Bus service nasa taka suk hmasawnin Manipur mi Myanmar a cheng hai ta dingin inlaichinna tha lem an tlun ding thu a hril.
Imphal Mandalay Bus service infetir ding a rawtna hi Agust 1, 2003 a kha Manipur Assembly in a lo passed ta a ni a.Thil tul hai sukfel zo vawng a ni pha India le Mandalay inkara hin passenger phurtu Bus a service ta ding a nih.
Orange Festival CM in a hawng
TAMENGLONG: Manipur Chief Minister O.Ibobi Singh chun zanikhan Tamenglongah 12th Orange Festival khuolliena thangin a hawng. Hi huna hin Dy. CM Gaikhangam chu Chief Host in a thang.
CM O.Ibobi Singh in thu a hrilnaah, Manipur state sunga Serthlum tharsuoka um po po laia 70% chu Tamenglonga inthawk a ni thu hrilin Serthlum chingna hi Horticulture Department le DRDA Officials han an thangpui thu a hril. Serthlum tamlem tharsuok a ni theina dinga Central Agriculture University le ICAR experts hai chu serthlum chingtu hai thangpui le thurawn pe dingin a ngen.
Manipur CM le Dy. CM hai lim an raw
IMPHAL: Zeliangrong pawl tum tum hai chun zanikhan Manipur Chief Minister O.Ibobi Singh le Dy. CM Gaikhangam hai chu AntiNaga le AntiTribal an nih tia intumin an lim (effigy) an raw.
ZYF President, Titus Kamei; Chairman Raithailung Gangmei; Thomas Kamei, President ZB (Manipur), Agipou Pamei, Chairman, ZB Tamenglong Zone le Ahinguu Riamei, President,Zeliangrong Baudi han zanita joint statement an insuo a chun, O.Ibobi inrawinaa Manipur sawrkar chu thlierbik nei (communal) sawrkar a nih tiin an intum a, Mao gatea student 2, Ukhrula student 2 le ILPS Bills pathum hai dodalna le inzawma CCPur districta mi 9 zetin thina an tuok chungthu hai zieklangin, kum 12 lai zet Orange Festival huoihawt lo nita sienkhawm Tamenglong districta Serthlum chingtu hai ta dinga hlawkna le thathnempuina iengkhawm a la um nawh; sawrkar thlungpuiin cheng vaibelsie tel a hung pek hai khawm Manipur sawrkarin indiklo takin a hmang a nih tiin joint statement an insuoa chun an zieklang.
Meghalaya Police hmaah AMEF 3 an inpe
SHILLONG: Meghalayaa Garo Hills a chun zanikhan AMEF cadre 3 Meghalaya Police kutah ralthuom tam tak leh an inpe. AMEF inpe hai laia pakhat chu selfstyled Chairman le Commander in Chief a nih. An cadre tamlem kaphlum le man an ni bakah thenkhatin party dang an zawm pei leia inpe an ni thu an hril.
Doda hmuna ralthuom tam tak dapdawk
SRINAGAR: Zanikhan Jammu and Kashmira Doda hmuna security forces han ralthuom tam tak an dapdawk. Ralthuom an dapdawk hai lai AK56 Rifle 1, China siem Pistol 1, 303 Rifle 1, UBGL 1, Hand Grenades 2, AK magazine 1, pistol magazine 1, radio set 1, UBGL mu le silaimu 1130 a thng.
Nuhmei suolluitu kum 10 jail intang dingin
AIZAWL: May 21, 2014 zingkar khaw var hmaa nuhmei pakhat suolluitu Lalbiaksanga (25) of Rengdil khuo chu zani hmasa khan Additional District & Session Judge Vanlalenmawia chun kum 10 sung jail intang ding le fine Rs. 1,000 chawi dingin a chungthu a rel. A sum chawi ding hi a pek naw chun an tang hun ni 10 a suksei ning a tih.
CBI in Delhi Principal Secy. an man
NEW DELHI: Central Bureau of Investigation (CBI) chun Delhi sawrkara Principal Secretary Sanjay Pratap Singh chu thamna Rs. 2.2 lakh laa intumna le inzawmin zanikhan an man. Mr Pratap Singh hi Department of SC, ST and Minorities a Principal Secretary chel niin 1984 batch IAS Officer a nih. Ama baka hin a personal assistant khawm CBI in an mansa.
Parliament inthung la sukbuoi nawk
NEW DELHI: Delhi Trial Court in National Herald chanchinbu chungthua Congress President Sonia Gandhi le Rahul Gandhi hai inlang dinga a kona chungthu leiin zanikhan Parliament inthung sukbuoi nawk a nih. Rajya Sabhaa chun hi chungthua hin inthung vawi 6 lai zet sukchawl lailawk a ni a, rorel thei lova an um leiin Deputy Chairman Prof. PJ Kurien chun zanita dingin Rajya Sabha inthung a sukchawl.
Lok Sabha a chun India ram hmun tum tuma tuilien chungthu hriltlangna tan naw a ni a, Opposition Congress han iemanichen risie an siem leiin minutes 10 sung sukchawl lailawk a ni a, zanikhan Lok Sabha chun Indian Trust Amendment Bill 2015 an passed.
Sushma in Pakistan PM an hmupui
ISLAMABAD: Heart of Asia Conference thang dinga Pakistan cham mek External Affairs Minister Sushma Swaraj chun zani zantieng khan Pakistan Prime Minister Nawaz Sharif an an hmupui a, hi huna hin Foreign Secretary S. Jaishankar le Sharif Adviser on Foreign Affairs Sartaj Aziz hai khawm an thang. Sushma Swaraj hin zanikhan Afghanistan President Ashraf Ghani bakah Kyrgystan Foreign Minister Erlan Abdyldav le Iran foreign minister Javed Zarif hai khawm an hmupui.
Prime Minister Narendra Modi chu kum thar September, 2016 a SAARC Summita thang dingin Pakistan an zin ding thu External Affairs Minister Sushma Swaraj chun zani Nawaz Sharif an hmupui huna a hril. PM Modi hi kum thara Pakistan an zin chun kum 12 liemta sunga India PM Pakistana inzin hmasa tak a ni ding a nih. India PM hai laia Pakistan inzin nuhnung tak chu Atal Bihari Vajpayee kha niin January 2004 khan SAARC summita thang dingin Pakistan a lo inzin a nih.
VAWISUN THUPUI
Chuongchun, Pathien that zie le a tium zie chu ngaituo rawh; a tluhai ta ding chun ti a um a nih; nanga ta ding ruok chun a tha a nih, a thatnaa i um zing chun; chuong a ni naw chun nang khawm satthlakin um veng i tih. Rom 11:22
Editorial
Inpumkhatna bawk
Jarod Kintz in a lekhabu ‘Invisible’ a ‘Sometimes the thing that brings us together also pulls us apart. Sort of like a zipper” tia a lo ziek ang deuin Manipur Assembly in August 31, 2015 nia AntiTribal Bills pathum a passed hai dodalnain inpumkhat thei ngailo Manipur tlangmi hnam tum tum hai pumkhata a mi siem hnungin damte tein a mi keichek tan nawk mek niin an lang a, a pawi takzet. Inthuruolna le inpumkhatna hlutzie le thil a thawtheizie hrie zing sia inthuruol thei der lova ei um el hi chu tlangmi hai ei vangduoina nasa tak a nih. Ei hriet seng angin tlangmi hai hi tawng dang dang hmang khawm ni inla, unau inhnai takel, mani tawng chit hmanga inbie thei hai, nuhmeipasala inneipawl, tukhawm inhnawl thei ding um lo ei ni a. Ei population a tam tawknaw bawk lei le ei ram delin a zirnaw leiin inthuruol taka ei thangtlang theinaw a ni chun tukhawm a damkhawsuok bik ei umnaw ding a nih ti hi a thar taka ei hriet nawn nuom a um ngei el.
Tlangmi hnam tum tum hai inthuruol thei mumal lova ei um nasan tak hi iengdang lei a ninaw a, mani hma ei siel lei, mani inngaisangna ‘ego’ ei sie hmang thei tlatnaw lei a nih ti inla ei hril suol taluo ring a um nawh. Hi ‘Ego’ hi ei siethlak thei hmakhat chu eini sungah inthuruolna le inpumkhatna indik tak hi ei nei thei ngainaw ding a nih. Chun, thiltha le ngaidan tha tak khawm nisien, inlungruolna (consensus) a umnaw chun thaw lo el hi a tha, ei inthuruolna sukderthawng theitu ding a ni chun. Hi kawnga hin mi tam takin hrietthiemna nei lova inlungruolna (consensus) um si lova ei ngaidan le ditdan fepui lui ei tum tlat hlak leia insel inhalna hi hung tlung hlak a nih.
United Kingdom (Britain) Prime Minister lo ni tah Winston Churchill chun, ‘When there is no enemy within, the enemies outside cannot hurt you” tiin a lo hril a. Pumkhata uma, inthuruol taka ei thawtlang a ni phawt chun a mi dotu hai suksietin um ngainaw manih ti hi ei hriet tlat a tul. Mipui inthuruol taka ei um a ni phawt chun khawvela ieng system khawm sukthluk thei a nih. Tuta AntiTribal Bills pathum hai khawm hi inthuruol taka ei dodal a ni phawt chun ei hlawtling ngei ding a nih ti hi a chiengsa, Bill pathum hai chau ni lovin Separate Administration ei ngen khawm hi hmu ngei ei tih. Ei inthuruolnaw a ni ruok chun Separate Administration khawm hmu naw mani a, State hran lem chu hmu naw nawk zuol ei tih.
Bill pathum hai lakdawk annawleh siemthat hi Tlangmi hai him sawngna ding a ni naw a, Bill dang dang an mi la hung pass khumnawk thei. Hi lei hin ei dikna le chanvo sukderthawnga a um nawna dinga ei pawimaw chu Bill pathum hai sut el hi a ninaw a, roinrelna hran a nih. Chu thil ei hmu theina ding chun inthuruolna nasa takin ei mamaw a nih. Tribal Movement ei fepui mek le inzawma JAC le Pawl tum tuma thuoitu han New Delhia Central thuoitu hai an zun hmupui huna Unity (inpumkhatna/inthuruolna) nei tlat dingin hotu hai an hung incha mawl mawl a, sienkhawm inthuruol thei lova ei um tlat hi chu thil pawi tawpkhawk a nih. Ei unau phairam mi han a hrana roinrelna ei nei ding hman an mi thik a, District Council hai khawm thahrui boa an mi sie pek lai State lem chu hmu naw hleng ei tih. Inthuruol taka ei thawtlang thei a ni ruok chun Separate Administration chu hmu thei ngei ei tih.
Hieng a ni lei hin eini sunga inpumkhatna a um theina dingin thuoitu, hotu le mipui tieng khawmin a thei chinah ‘ego’ sie hmangin inlungruolna (consensus) zawng tlat inla nuom a um takzet. Inthuruolna le inpumkhatna nghet tak nei dingin mani inngaisangna ei la nei lien taluo deu a nih. Thiltha taka inlang khawm consensus a umnaw chun thiltha lo an tlun thei zie hi hriein ei inthuruolna tluse mek sukhringnawk a hung ni theina dingin thuoitu hai khawmin theitawp suoin lampui hung dap hai sien nuom a um hle. Tu hi hnam bing hmasiel hun a ninaw a, hnam tum tum hai thangruol hun a nih ti hrie in, keini kan lien tak, kan thaw thei tak tina lungril ei siethlak phawt naw chun inpumkhatna indik tak a um thei ngainaw ding zie tulai hnaia thil tlung haia inthawk chieng taka hriet thei a nih. Ei la chapo a, thawthei ei lan ti tawl em el; hieng hin chu inpumkhatna indik tak nei thei ngainaw manih.
MP 3 han Manipur Tribal issue Parliementah an khekpui nawk
CCPUR/NEW DELHI/UKHRUL: AntiTribal Bills 3 hai le inzawma Tribal Movement fe mek ni 100 tlingna le inzawmin zanikhan Churachandpur; Ukhrul le New Delhi haiah Coffin rally nei a nih. Churachandpura chun District Hospital a inthawk All Tribal Womens Union/CCPur inrawinain silent rally nei a nih. Rally hi zani 11:30AM a inthawk khan tan a ni a, Police Station tuola Tribal Martyrs hai inzana le sunna in silent prayer minutes khat hun hmang a ni a, DC Office, Tuibuong chen rally nei dinga ti nisienkhawm remchangnawna um leiin Rengkai Road zuiin Tiddim Road Dorcas Road Bungmual District Hospital chena lampui hraw a nih. Rallya thang hai hin ‘our land! our rights!our identity’ ti inziekna placard an chawi tawl.
Ukhrul districta chun Committee Against Anti Tribal Bills (CAATB) inrawinain Public Rally nei a ni a, rally a hin Chief Justice of Chhattisgarh hlui WA Shishak khawm thangin thuhrilna hun a hmang.
New Delhia chun Jantar Mantar a inthawk Manipur Tribal Forum Delhi (MTFD) inrawinain Parliament panin zani zantieng 4:00PM khan rally nei tan a ni a, 4:30PM khan Police han rally hi an lo dang a, iemanichen an innawrtuo a, protest a thang hai police in an man tawl a, sienkhawm a hnungin insuo nawk vawng an nih.
Hieng laizing hin zanikhan Parliamenta MP thenkhat chun Tribal issue an khekpui. Lok Sabhaah Nagland MP Neiphi Rio; Tripura MP Jitendra Choudhury bakah Rajya Sabhaah Assam/Bodo MP Biswajit Daimary in a khekpui bawk. Biswajit Daimary chun, Bills 3 hai leia martyr 9 hai ruong vui lova an la um thu, Manipur tlangmi han 6th Schedule an mamaw thu le Cenral delegation tir tha a ti thu hai a hril a. Neiphiu Rio chun Manipur tribal hai humhimna dinga 6th Schedule a tul thu, MLA representation a feltawknaw thu, Meitei han ram 10% chau an del laiin MLA 40 neiin ram 90% deltu tlangmi han MLA 20 chau an nei thu a hril a. Jitendra Chaudhary chun, Bills 3 hai le inzawma mi 9 zet thina thuah sawrkar thlungpuiin kut a rawl ngei a pawimaw thu a hril.
Tribal Martyrs ralna Rs. 1300/ a lut
CCPUR: Zanikhan District Hospitala JPO kutah Tribal Martyrs ralna dingin Rs. 1300/ a lut. Ralna petu hai chu Khamkhosiam of Bukpi Rs.100/; Upa Khamkhansuan of Central Delhi Rs.500/; B.Thangzachin of Vengnuam South, New LamkaRs.200/ le G.Chinkhanlian of AIR Colony, Lamphel Rs.500/ hai an nih.
Dec 10, 2015 nia Morguea thingpui inlumtu ding TLYA ning an ta, hlasaka lengkhawm ding chu College Veng, L.Semuol; Salem Veng le Sim Veng nupui hai ning an tih.
Cold Storage vawisun a hungtlung beisei
CCPUR: District Hospital/CCPura Tribal Martyrs hai ruong siethatna dinga JPO in an ngen dawk Cold Storage Unit 2 M/s RS Cooling Appliance Company siem chu Guwahati (Assam) a inthawk zanikhan Imphal hung pan pui niin ei thu dawngna chun a hril. Passenger motor hai anga hrat taka hung pui thei a ninaw leiin Dec. 10, 2015 (vawisun) zantieng hin District Hosital, CCPur hung phurtlung hman beisei a ni thu Deputy Director of Health Services, Govt. of Manipur chun zani zantieng 1:00PM khan telephone hmangin JPO a hung inhriettir. Cabinet pakhatah ruong 6 pei sie thei a ni ding a nih. District Hospital a hung tlung le inruolin Dy. Director inrawinain installation thaw nghal dinga hril a nih.
JAC inrawinain Mass Prayer nei a nih
CCPUR: JAC Against AntiTribal Bills inrawinain zani sun dar 12:00 a inthawk khan Public Ground, CCPurah Manipur Assembly in August 31, 2015 nia Bills 3 a passed hai dodalnaa tribal movement fe mek le Tribal martyrs 9 hai ruong vui loa ni 100 a tlingnain Mass Prayer nei a nih.
H.Mangchinkhup, Chief Convenor, JAC chun, National le International levela Mass prayer nei a ni thu, MTFUK inrawinain London khawpuia khawm zantieng huna candle sitvar a ni ding thu a hril a. Pathien thuoina zarin ei nuorna ni 100 a tling ta a, Pathien ti lo tukhawm innghatna ding a um nawh tia hrilin mipui hai Pathien hmaa intuklut seng dingin a ngen. Mithi hai leia Bill 3 hung pieng ni loin Bill 3 hai leia mi thi an ni a, ei movement a hlawtling theina dingin ‘Unity’ maintain a pawimaw thu hrilin hnam le chi le kuonga ei inthe chun hlawtlingna hmu naw manih tiin a hril.
Rukru han thing an inruk
CCPUR: Tribal Martyrs 9 hai ruong nghakna lengkhawm hai dawn ding thingpui inlumna dinga mi thahnemngai tum tum han JPO fethlenga thing an pek sie khawma um hai laia iemanizat chu zani hmasa zan khan tuti hrietlo rukru han an inrukhmang. Thing inruknaa hmang Auto Number JPO in an hrietsuok a, hi le inzawmin Auto neitu chu Dec. 13, 2015 chena JPO kuta inpe dingin an inhriettir a, hun tiem sunga an penaw chun a chunga thil iengkhawm tlung sien amain mawphur a tih tiin JPO thusuok chun a hril.
Thenmuol Local Church Silver Jubilee an hmang ding
CCPUR: Thenmuol Local Church chun December 1415, 2015 sung khin Thenmuol Local Church compound sungah ‘Inpumkhatna’ (John 17:20) thupui hmangin Silver Jubilee ropui taka lawmna nei an tum. Dec. 14, 2015, 11AM in Pastor Thangzalun in tawngtaia hun hawngna hmang a ta, Upa Saikhamlien, Chairman, Executive Committee, Thenmuol Local Church in lawmlutna thucha hril a ta, Jubilee dar vuokna um a ta, Jubilee lungdaw hawngna le inhlanna Pastor Zosangkhum in nei a ta, hi huna hin Souvenir tlangzarna Upa Lalthakhum, Secy. Executive Commitee, Thenmuol Local Church in nei bawk a tih. Zan dar 5 inkhawm ah Rev. Zoramtawn, Tripura Mission Field in Pathien thucha hril a tih.
Dec. 15, 2015, 11AM zing inkhawm huna Pathien thucha hriltu ding chu Rev. Robinson S. Zote, Cambodia ning a tih. Silver Jubilee hmang sung hin Jubilee Choir le hlasakthiem dang dang han hlaa rawngbawlna an nei ding bakah zantieng ruoithe ning a tih. Dec. 15, 2015 zan inkhawm huna Silver Jubilee Star result puongna um ata, Silver Jubilee kharna Pastor Zosangkhum in nei a tih.
Thenmuol Local Church Executive Committee chun Silver Jubilee hmangna uop dingin Chanchinbu tiemtu hai po po an fiel.
Admit Card la lalo hai la dingin
CCPUR: Delhi Police hnuoia temporary constable (Executive) Male/Female lakna ding le inzawma SP/CCPur Officea Admit Card la lalo hai chun an hma tienga la dingin SP/CCPur chun an hriettir. Delhi Police hnuoia temporary constable lakna dinga hin CCPur districta inthawk candidates pasal 91 le nuhmei 38 an um a, Dec. 11, 2015 a inthawk khin Manipur Police Training College, Pangei hmuna Physical Examination le Measurement test (PE&MT) nei tan ning a tih.
ZSF GHQ in an dem
CCPUR: North East Helpline Centrea Media inCharge le Zomi Students Federation Delhi President Bruce K. Thangkhanlal zani hmasa 8:30PM vela Gurgoan hmuna sawisak a nina thuah Zomi Students’ Federation (ZSF) GHQ chun a sawisaktu hai an dem thu an puong a, a thawtu hai dan anga hremna pe dingin an ngen a; inremna le muongna a um theina dingin mitin inzatuo dingin an ngen bawk.
Manipur CM in ImphalMandalay Bus Service a vailiem
IMPHAL: Manipur Chief Minister O.Ibobi Singh chun zanikhan North A.O.Ca Hotel Imphal complexah Manipur le Central government officials mi 27 hai chuongna ImphalMandalay trial run Bus Service a vailiem (flagged off). Hi huna hin Dy. CM Gaikhangam, IFCD Minister Ngamthang Haokip, Works and Transport Minister Dr. Kh.Ratankumar Singh le Secretary (Transport) M Lakshmikumar Singh hai khawm an thang.
Official team hi Director Transport Roshita le Manipur IGP (Police) Clay Khongsai han an inrawi a, Transport, PWD, Police, Commerce & Industries; Planning and Medical le India Government hnuoia Officer on Special Duty Ksh Shanta inrawinain Ministries of MoRTH, MHA, MEA le Dept. of Revenue haia officials 6 hai bakah Seven Sisters Holidays private Tour Operator palaihai khawm an thangsa.
Indian official hai hin Moreh a inthawk Tamu pan an ta, Tamu a inthawk Kalewa lutin Kalayah zankhat riek an ta, December 10, 2015 in Kalaey a inthawk Kalewa kir nawk in Mandalay pan an ta, Dec. 11, 2015 in Naypyidaw tlung an ta, hi hmuna hin ImphalMandalay Bus service thuah joint meeting um a ta, Naypyidaw hmuna zankhat riekin December 12, 2015 in Mandalayah hung kir nawk an ta, December 14, 2015 khin India team hai chu Imphal hung kir nawk an tih. Imphal le Mandalay inkar hi km. 579 a hla a nih.
Transport Secretary M. Lakhsmikumar Singh chun, tuta mi hi final trial run a ni a, chuongman le thil tul dang dang hai sukfel a ni ding thu trial run flagged off huna a hril a, IndiaMyanmarThailand (IMT) road agreement ziek vat a ni ta ding thu, agreement ziek a ni pha hieng ram pathum hai inkara Bus service nasa taka suk hmasawnin Manipur mi Myanmar a cheng hai ta dingin inlaichinna tha lem an tlun ding thu a hril.
Imphal Mandalay Bus service infetir ding a rawtna hi Agust 1, 2003 a kha Manipur Assembly in a lo passed ta a ni a.Thil tul hai sukfel zo vawng a ni pha India le Mandalay inkara hin passenger phurtu Bus a service ta ding a nih.
Orange Festival CM in a hawng
TAMENGLONG: Manipur Chief Minister O.Ibobi Singh chun zanikhan Tamenglongah 12th Orange Festival khuolliena thangin a hawng. Hi huna hin Dy. CM Gaikhangam chu Chief Host in a thang.
CM O.Ibobi Singh in thu a hrilnaah, Manipur state sunga Serthlum tharsuoka um po po laia 70% chu Tamenglonga inthawk a ni thu hrilin Serthlum chingna hi Horticulture Department le DRDA Officials han an thangpui thu a hril. Serthlum tamlem tharsuok a ni theina dinga Central Agriculture University le ICAR experts hai chu serthlum chingtu hai thangpui le thurawn pe dingin a ngen.
Manipur CM le Dy. CM hai lim an raw
IMPHAL: Zeliangrong pawl tum tum hai chun zanikhan Manipur Chief Minister O.Ibobi Singh le Dy. CM Gaikhangam hai chu AntiNaga le AntiTribal an nih tia intumin an lim (effigy) an raw.
ZYF President, Titus Kamei; Chairman Raithailung Gangmei; Thomas Kamei, President ZB (Manipur), Agipou Pamei, Chairman, ZB Tamenglong Zone le Ahinguu Riamei, President,Zeliangrong Baudi han zanita joint statement an insuo a chun, O.Ibobi inrawinaa Manipur sawrkar chu thlierbik nei (communal) sawrkar a nih tiin an intum a, Mao gatea student 2, Ukhrula student 2 le ILPS Bills pathum hai dodalna le inzawma CCPur districta mi 9 zetin thina an tuok chungthu hai zieklangin, kum 12 lai zet Orange Festival huoihawt lo nita sienkhawm Tamenglong districta Serthlum chingtu hai ta dinga hlawkna le thathnempuina iengkhawm a la um nawh; sawrkar thlungpuiin cheng vaibelsie tel a hung pek hai khawm Manipur sawrkarin indiklo takin a hmang a nih tiin joint statement an insuoa chun an zieklang.
Meghalaya Police hmaah AMEF 3 an inpe
SHILLONG: Meghalayaa Garo Hills a chun zanikhan AMEF cadre 3 Meghalaya Police kutah ralthuom tam tak leh an inpe. AMEF inpe hai laia pakhat chu selfstyled Chairman le Commander in Chief a nih. An cadre tamlem kaphlum le man an ni bakah thenkhatin party dang an zawm pei leia inpe an ni thu an hril.
Doda hmuna ralthuom tam tak dapdawk
SRINAGAR: Zanikhan Jammu and Kashmira Doda hmuna security forces han ralthuom tam tak an dapdawk. Ralthuom an dapdawk hai lai AK56 Rifle 1, China siem Pistol 1, 303 Rifle 1, UBGL 1, Hand Grenades 2, AK magazine 1, pistol magazine 1, radio set 1, UBGL mu le silaimu 1130 a thng.
Nuhmei suolluitu kum 10 jail intang dingin
AIZAWL: May 21, 2014 zingkar khaw var hmaa nuhmei pakhat suolluitu Lalbiaksanga (25) of Rengdil khuo chu zani hmasa khan Additional District & Session Judge Vanlalenmawia chun kum 10 sung jail intang ding le fine Rs. 1,000 chawi dingin a chungthu a rel. A sum chawi ding hi a pek naw chun an tang hun ni 10 a suksei ning a tih.
CBI in Delhi Principal Secy. an man
NEW DELHI: Central Bureau of Investigation (CBI) chun Delhi sawrkara Principal Secretary Sanjay Pratap Singh chu thamna Rs. 2.2 lakh laa intumna le inzawmin zanikhan an man. Mr Pratap Singh hi Department of SC, ST and Minorities a Principal Secretary chel niin 1984 batch IAS Officer a nih. Ama baka hin a personal assistant khawm CBI in an mansa.
Parliament inthung la sukbuoi nawk
NEW DELHI: Delhi Trial Court in National Herald chanchinbu chungthua Congress President Sonia Gandhi le Rahul Gandhi hai inlang dinga a kona chungthu leiin zanikhan Parliament inthung sukbuoi nawk a nih. Rajya Sabhaa chun hi chungthua hin inthung vawi 6 lai zet sukchawl lailawk a ni a, rorel thei lova an um leiin Deputy Chairman Prof. PJ Kurien chun zanita dingin Rajya Sabha inthung a sukchawl.
Lok Sabha a chun India ram hmun tum tuma tuilien chungthu hriltlangna tan naw a ni a, Opposition Congress han iemanichen risie an siem leiin minutes 10 sung sukchawl lailawk a ni a, zanikhan Lok Sabha chun Indian Trust Amendment Bill 2015 an passed.
Sushma in Pakistan PM an hmupui
ISLAMABAD: Heart of Asia Conference thang dinga Pakistan cham mek External Affairs Minister Sushma Swaraj chun zani zantieng khan Pakistan Prime Minister Nawaz Sharif an an hmupui a, hi huna hin Foreign Secretary S. Jaishankar le Sharif Adviser on Foreign Affairs Sartaj Aziz hai khawm an thang. Sushma Swaraj hin zanikhan Afghanistan President Ashraf Ghani bakah Kyrgystan Foreign Minister Erlan Abdyldav le Iran foreign minister Javed Zarif hai khawm an hmupui.
Prime Minister Narendra Modi chu kum thar September, 2016 a SAARC Summita thang dingin Pakistan an zin ding thu External Affairs Minister Sushma Swaraj chun zani Nawaz Sharif an hmupui huna a hril. PM Modi hi kum thara Pakistan an zin chun kum 12 liemta sunga India PM Pakistana inzin hmasa tak a ni ding a nih. India PM hai laia Pakistan inzin nuhnung tak chu Atal Bihari Vajpayee kha niin January 2004 khan SAARC summita thang dingin Pakistan a lo inzin a nih.
VAWISUN THUPUI
Chuongchun, Pathien that zie le a tium zie chu ngaituo rawh; a tluhai ta ding chun ti a um a nih; nanga ta ding ruok chun a tha a nih, a thatnaa i um zing chun; chuong a ni naw chun nang khawm satthlakin um veng i tih. Rom 11:22
Editorial
Inpumkhatna bawk
Jarod Kintz in a lekhabu ‘Invisible’ a ‘Sometimes the thing that brings us together also pulls us apart. Sort of like a zipper” tia a lo ziek ang deuin Manipur Assembly in August 31, 2015 nia AntiTribal Bills pathum a passed hai dodalnain inpumkhat thei ngailo Manipur tlangmi hnam tum tum hai pumkhata a mi siem hnungin damte tein a mi keichek tan nawk mek niin an lang a, a pawi takzet. Inthuruolna le inpumkhatna hlutzie le thil a thawtheizie hrie zing sia inthuruol thei der lova ei um el hi chu tlangmi hai ei vangduoina nasa tak a nih. Ei hriet seng angin tlangmi hai hi tawng dang dang hmang khawm ni inla, unau inhnai takel, mani tawng chit hmanga inbie thei hai, nuhmeipasala inneipawl, tukhawm inhnawl thei ding um lo ei ni a. Ei population a tam tawknaw bawk lei le ei ram delin a zirnaw leiin inthuruol taka ei thangtlang theinaw a ni chun tukhawm a damkhawsuok bik ei umnaw ding a nih ti hi a thar taka ei hriet nawn nuom a um ngei el.
Tlangmi hnam tum tum hai inthuruol thei mumal lova ei um nasan tak hi iengdang lei a ninaw a, mani hma ei siel lei, mani inngaisangna ‘ego’ ei sie hmang thei tlatnaw lei a nih ti inla ei hril suol taluo ring a um nawh. Hi ‘Ego’ hi ei siethlak thei hmakhat chu eini sungah inthuruolna le inpumkhatna indik tak hi ei nei thei ngainaw ding a nih. Chun, thiltha le ngaidan tha tak khawm nisien, inlungruolna (consensus) a umnaw chun thaw lo el hi a tha, ei inthuruolna sukderthawng theitu ding a ni chun. Hi kawnga hin mi tam takin hrietthiemna nei lova inlungruolna (consensus) um si lova ei ngaidan le ditdan fepui lui ei tum tlat hlak leia insel inhalna hi hung tlung hlak a nih.
United Kingdom (Britain) Prime Minister lo ni tah Winston Churchill chun, ‘When there is no enemy within, the enemies outside cannot hurt you” tiin a lo hril a. Pumkhata uma, inthuruol taka ei thawtlang a ni phawt chun a mi dotu hai suksietin um ngainaw manih ti hi ei hriet tlat a tul. Mipui inthuruol taka ei um a ni phawt chun khawvela ieng system khawm sukthluk thei a nih. Tuta AntiTribal Bills pathum hai khawm hi inthuruol taka ei dodal a ni phawt chun ei hlawtling ngei ding a nih ti hi a chiengsa, Bill pathum hai chau ni lovin Separate Administration ei ngen khawm hi hmu ngei ei tih. Ei inthuruolnaw a ni ruok chun Separate Administration khawm hmu naw mani a, State hran lem chu hmu naw nawk zuol ei tih.
Bill pathum hai lakdawk annawleh siemthat hi Tlangmi hai him sawngna ding a ni naw a, Bill dang dang an mi la hung pass khumnawk thei. Hi lei hin ei dikna le chanvo sukderthawnga a um nawna dinga ei pawimaw chu Bill pathum hai sut el hi a ninaw a, roinrelna hran a nih. Chu thil ei hmu theina ding chun inthuruolna nasa takin ei mamaw a nih. Tribal Movement ei fepui mek le inzawma JAC le Pawl tum tuma thuoitu han New Delhia Central thuoitu hai an zun hmupui huna Unity (inpumkhatna/inthuruolna) nei tlat dingin hotu hai an hung incha mawl mawl a, sienkhawm inthuruol thei lova ei um tlat hi chu thil pawi tawpkhawk a nih. Ei unau phairam mi han a hrana roinrelna ei nei ding hman an mi thik a, District Council hai khawm thahrui boa an mi sie pek lai State lem chu hmu naw hleng ei tih. Inthuruol taka ei thawtlang thei a ni ruok chun Separate Administration chu hmu thei ngei ei tih.
Hieng a ni lei hin eini sunga inpumkhatna a um theina dingin thuoitu, hotu le mipui tieng khawmin a thei chinah ‘ego’ sie hmangin inlungruolna (consensus) zawng tlat inla nuom a um takzet. Inthuruolna le inpumkhatna nghet tak nei dingin mani inngaisangna ei la nei lien taluo deu a nih. Thiltha taka inlang khawm consensus a umnaw chun thiltha lo an tlun thei zie hi hriein ei inthuruolna tluse mek sukhringnawk a hung ni theina dingin thuoitu hai khawmin theitawp suoin lampui hung dap hai sien nuom a um hle. Tu hi hnam bing hmasiel hun a ninaw a, hnam tum tum hai thangruol hun a nih ti hrie in, keini kan lien tak, kan thaw thei tak tina lungril ei siethlak phawt naw chun inpumkhatna indik tak a um thei ngainaw ding zie tulai hnaia thil tlung haia inthawk chieng taka hriet thei a nih. Ei la chapo a, thawthei ei lan ti tawl em el; hieng hin chu inpumkhatna indik tak nei thei ngainaw manih.
