GBC in Commencement Service an hmang
CCPUR: Zani 11:00AM khan Gospel Centenary Hall, Dorcas Hall Campus, New Lamka­ah 33rd GBC Commencement Service hmang a ni a, Rev. Dr Paul Cornelius, Regional Secretary, ATA(India) chun commencement message hrilin Rev. S.Vung Minthang, General Secretary, EBC in Grace Bible College hnuoia graduates hai intiemkamna an neitir.       



Upa Dou Lamthang Ngaihte, Academic Dean le Rev. Dr. V. Ginsianthang, Principal, GBC han hi huna hin Master of Divinity zo graduate mi 24, Ministerial Training Course (MTC) hnuoia mi  44, Master of Theological Studies zo 2, Bachelor of Theology (B. Th) zo mi 10 le Diploma in Theology (Dip Th) zo mi 5 hai degrees inhlanna an nei.

Tribal Martyrs ralna
CCPUR:  Zanikhan Organisation pahni han Tribal Martyrs hai ralna le hiem hai thangpuina dingin  District Hospital­a JPO kutah Rs. 6,500 le Puon 9 an inhlan. A petu hai chu UPC Colony, Namganjang, Bishnupur Ward no. 7 in Rs. 3,000/­ le Gangte Welfare Association, New Delhi in Rs. 3,500/= le Puon 9 a nih. Dec. 3, 2015 a District Hosital a thingpui inlumtu ding HYA ning an ta,  District Hospital morgue­a lengkhawm ding Zenhang Lamka, B. Aizalon, Sielmat le Hill Town ning an tih.

            

Chun, zanikhan Manipur Tribal Students’ Forum, Shillong in JAC hnuoia Finance Sub-­Committee kutah Tribal martyrs hai ralna dingin Rs. 54,500/­ an inhlan.

Slide Collection le report an pek
CCPUR:  Zani 11:00AM khan CMO Conference hall, CMO Campus­ah Dr Liankhojam Guite, District Malaria Officer, CCPur inrawinain District Malaria Staff le workers han meeting an nei a, hi huna hin staff le workers han monthly slide collection an thaw hai  le report an pek. CMO chun staffs le workers hai thil thaw dan ding hai hrilin slide collection thaw zat dinga bituk siema um hai thawzo ngei dingin an hriettir. Meeting­a hin Block 5­a PHC 11, CHC 1 le PHSC 71 haia malaria staff hai an thang.

Seminar­ cum ­Workshop on Zou Custom nei
CCPUR: Zani 11:00AM khan Zogal Memorial Hall Complex, Zoveng­ah  Zou Zumpi (Zou Tribe Court) UZO/GHQ huoihawtnain One Day Seminar­cum­Workshop on Zou Custom (Proposed Revision 2015) Seminar nei a nih. Hi huna hin UZO GHQ President Chinlunthang chun hun le ni liem pei dungzuia Custom ennawn a tul thu a hrilin custom sukdanglam ding tina a ni nawh tiin a hril. Mi hausa le pasie han inrem taka ei zui thei ding Zou Custom  zui awlsam thei ding ang taka siem ding le Zou le English edition a siem tum a ni thu hrilin hi huna thang lal le upa hai chu an thei ang ang thawlawm dingin a ngen tawl.
            
Upa Suankhanmang, Chairman, Zou Zumpi/UZO le S. Chinsuanlian, Secretary, Zou Zumpi/UZO hai inrawinain Hausa­Upa han Custom siemthat ding hai hriltlangna an nei. Zanita ngaidan hriltlang hai chu Zou Zumpi ah lut ta lovin UZO Assembly in thutlukna an lak ta ding a nih.

Mobile Medical Camp a um ding
CCPUR: District Health Society/CCPur, Link Workers Scheme, ICTC, SHALOM hai thangruolin December 4, 2015, 8:30AM a inthawk hin Matejang village­ah One Day Mobile Medical Camp um a tih. Hi huna hin Dr Robinson Lalnunpuia, Dr Donna Vunghoihching, MO han medical checkup thawng an ta, T.Chungzaniang, GNM, Th.Bishwabhanu, Ultrasonology, Biaklun, Pharmacist, Chingaihhau, Lab Technician le Vungthiansiam, X­Ray Technician  han thangpui an tih. Medical camp huna hin damdawi mamaw hai kuoma a thlawna damdawi pek ning an tih.

Tamil Nadu­ah tuilien in nundan pangngai nasa takin a sukbuoi
CHENNAI: Tamil Nadu­a chun zani hamsa zana chat der lova ruo nasa taka a sur leia tuilien leiin nundan  pang­ngai nasa takin a sukbuoi pha. Chennai khawpui sunga chun hmun tam takah tui awm  chen chena pal a ni a, motor le vuongnaa infepawna hai sukchawl vawng a ni a, Chennai Airport khawm runway haia tui a lut nasa taka an tling leiin Dec. 3, 2015, 6AM chena dingin khar khar phawt a ni a, vuongna tum le vuongsuok an um naw a, tuiin Rel lampui hmun tam tak a chim leiin Rel tlan ding 50 vel kansel a ni bawk. Chennai Airport­a chun mi 700 vel an intang a, fak le dawn ding pek an nih.
            
Civil Aviation minister Pusapati Ashok Gajapathi Raju chun, hienganga ruo a sur zing chun Airport hawng ding hun hril thei a ni nawh tiin a hril a, India Meteological Department (IMD) chun Tamil Nadu­ah ni 7 sung ruo a la sur zawm pei ding thu le tuta inthawk darkar 48 sung chu a zuolkai ding niin an hrillawk.
            
Adyar vadung tui a luongliem leiin khawpui sunga tui intling hai luongdawk na ding a um sinaw leiin tui intling hi a tam pei niin Chennai Airport a Dictor Deepak Shastri chun a hril. Chennai le a se vela airport dang dang haia khawm tui a let nasa hle a hril a ni bawk.
            
Army le Air Forces hai chun sansuokna le sawmdawlna sin thawin Tambaram le Oorakpakkam  haiah fak ding an thlak a, Navy le Coast Guard hai chu a tul hun huna suok thei dinga inringsa diemin an um bawk a, tuiin a chim ina cheng hai  sansuokna sin Army,Navy le National Disaster Response Force (NDRF) han an thaw zing. Tuilien lei hin Airport­a chau ni lovin Chennai a chun Bus stands le Rel Station haia khawm passengers tam tak an intang . Chennai­a Adyar le Cooum vadung hai an luongliem leia tuilien hi tlung  nia hril a nih. Tuilien lei hin  fimkhur thila dingin electric meivar that vawng a ni bawk.
           
Sawrkar thlungpui chun a pawimaw le tul anga Tamil Nadu sawrkar kuoma thangpuina a pek ding thu  Home Minister Rajnath Singh in zanikhan Parliament­ah a hril a, hi thua hin state sawrkar khawmin sawrkar thlungpui kuoma thangpuina pe dinga ngenna a hun siem ta thu le a hmuna enfel dingin Central team chennai­ah an um mek ta thu a hril bawk.
            
PM  khawma zanikhan a cabinet hai meeting neipuiin Tamil Nadu tuilien chungthua hmalak dan ding hai an hriltlang a, a tul anga thangpuina pek a ni ding thu PM chun a hril.

JCILPS in  Dec. 15 chena sukpuitling dingin deadline an pek
IMPHAL: Joint Committee on Inner Line Permit System (JCILPS) a Convenor­in­ Charge Kh. Ratan chun August 25, 2015 nia Manipur sawrkar le JCILPS han agreements an lo ziek tuchena suktpuitling a la ninaw demin, state sawrkarin agreements siema um December 15, 2015 chena a sukpuitling naw chun December 16, 2015 a inthawk nuorna an nei tan nawk ding niin zanita Keishampat­a JCILPS Office­a Chanchinbumihai an hmupui huna a hril.
            
Ni 100 a liem hnung khawma agreement sawrkarin a sukpuitling naw bakah ILPS le inzawma State  Assembly in Bills 3 an passed hai chungthua sawrkar hmalak dana khawm an lawmnaw thu Ratan chun a hril bawk. JCILPS le Manipur sawrkarin agreements an siem hai lai Manipur State Population Commission indin ding, population influx thuah state sawrkarin White paper an suo ding ti le  Manipur State Land Reforms Commission indin ding ti hai a thang a nih.

Works minister in Intl. Conference a hawng
IMPHAL: Zanikhan Langol, Imphal­a  National Institute of Techonoly (NIT) hmuna International Conference on Emerging Trends in Science and Engineering Research nei a ni a, khuollien­a thang dinga fiel CM O.Ibobi a thang theinaw leiin Works Minister Kh. Ratankumar khuolliena thangin Conference hi a hawng. Hi huna hin Education Minister M. Okendro le Dr. Sarungbam Birendra Singh, Director NIT le Prof. V. Sree Hari  Rao, University of Florida hai khawmin an uop ve. India ram sunga universities tum tuma professors le scientist hai conference­a hin an thang. Kh. Ratan chun, technology hmasawn peiin khawvel pumpui hi mihriem hai ta dinga hmun inhawi takin a la hung siem ding thu hrilin, chuong hun hmu phak ve dingin pathienin rem a ti chun kum 2100 chen dam a nuom thu a hril. 
           
India rama chun tuhin NIT 30 a um mek a, NIT Manipur hi second phase­a India rama NIT 10 indina um hai laia thang ve a nih.

Local body election­ah JD(U) in Congress
IMPHAL: Manipur JD(U) President N. Tombi chun  Manipur­a local body election hung um dingah  Congress le an thangruol ding thu a hril. Manipur­a Hill le valley a assembly election le election hrim hrim a thienghlim le indik taka thaw a ni naw thu hrilin Election Commission chu election nei dan tha taka enfel dingin a ngen.

Manipur mi pakhat an hmang
IMPHAL: Manipur mi L. Poumai (23) chu Dibrugarh­Bangalore Express train no. 15902 a chuong  chu November 29, 2015 a inthawk khan a umna chin hriet lovin an hmang. November 9, 2015, 4:55PM vel khan Vishakhapatnam a inthawk a sung hai phone in a hung biek a, hi hnung hin a chanchin hriet ta lova um a nih. A chuongna rel hi Andhra Pradesh le Bangalore inkara tlan a nih.

Kum 12 mi khaw hre lova hmu; suollui a ni ring
IMPHAL: Zani hmasa zan sawt hnung khan  nuhmei kum 12 mi chu Moirang Police station huop sung Kwakta area­a leilet lai khaw hre lova uma hmu a ni a, tu ti hrietlo han an suollui hnunga an maksan ni dinga ring a nih. Nuhmei naupang hi zani hmasa 8PM a inthawk a chanchin hriet lova inhmang, a sung hai le khawsung mi han nasa taka an zawng hnunga zan dar 11 vela an In bula inthawk hnaitea leilet lai khaw hre lova an va hmu a nih.
             
Hi thil tlung le inzawm hin Moirang Police chun zani zingkar khan ringhla pasal pakhat Md. Ibungo (20) s/o Ibocha of Tronglaobi Nagar Panchayat Ward No. 1 chu an man.

Congress in LS-ah Union Minister VK Singh ngaidam inhni dingin an phut
NEW DELHI:  Zanikhan opposition Congress member han Union minister V.K. Sing chu Faridabad hmuna Dalit naupang raw hlum an ni chungthua tekhinaa ‘Ui’ (dog) a hmangna thua ngaidam inhni dingin an phut bakah PM Narendra Modi chu a minister chunga ienganga action lak am a tum tia indawnna siemin inpuiah rihau nasa tak an siem a. Lok Sabha Speaker Speaker Sumitra Mahajan chun Intolerance chungthu zani hmasa haia khawm chai a ni tah tia hrilin Congress member hai hi khapdei a tum a, sienkhawm Congress chun hi chungthu hi nasa taka an khekpui leiin inpuiah rorel mumal thei lovin an um pha a. Hienganga Congress in risie an siem lai hin PM Narendra Modi chu lungawi lo hmel takin Lok Sabha a suoksan. Speaker in hi chungthu hril a phal naw leiin Congress bakah Trinamool Congress le Left party hai chu Lok Sabhaa inthawk an suoktau ve bawk. V.K. Singh in tuta hma meta Uttar Pradesh­a Faridabad hmuna  Dalit naupang pahni In raw naa raw hlumsa an nina thuah, sawrkar thlungpui  maw inphurtir ding a ninaw thu hrila ‘mi tuin amani Ui lungin deng ta sien, chu chu sawrkar thawsuol/mawphurna a ni nawh” state sawrkar mawphurna a nih tia a hril chu Congress chun an lakrun em em a nih. Lok Sabha a chun zanikhan Tamil Nadu­a tuilien chungthu khawm hriltlang a ni a, TDP hotu Narasimhan Thota chun an rang thei anga Rs. 1000 crores pe dingin sawrkar thlungpui a ngen.   
            
Rajya Sabha a chun Congress leader Kumari Selja in Dwarka Temple a va sir chungthuah Congress member thenkhatin risie nasa takin an siem a, inpui inthung vawi iemanzat zet sukchawl a ni hnungin zani zantieng 3:30PM a inthawk khan tha taka rorelna tan theia hung umin Tamil Nadu le Andhra Pradesh­a tuilien chungthu an hriltlang hnungin zanita dingin Rajya Sabha inthung chu suktawp a nih.

AFSPA lakdawk tumna a um nawh: Rijiju
NEW DELHI:  Minister of State for Home Kiren Rijiju chun, Jeevan Reddy Committee Report  recommendation dungzuia Armed Forces (Special Powers) Acts (AFSPA) sukpuitling tumna ananwleh hlip tumna a um am tia indawnna dawnin sawrkar thlungpuiin lakdawk tumna a la nei nawh tiin zanikhan Rajya Sabha­ah a hril. AFSPA hlip ding hin Manipur­a inthawk mi tum tum haia inthawk ngenna a dawng thu hrilin Jammu & Kashmir a inthawk khawmin ngenna dawng a ni thu   Union Minister Kiren Rijiju chun a hril bawk.

Bihar Assembly Speaker in Vijay Kumar
PATNA: Senior JD­U leader Vijay Kumar Chaudhary chu zanikhan  Bihar Legislative Assembly Speaker dinga thlang a nih. Opposition BJP thangin party tinin  Mr Chaudhary hi an thlawp. Chaudhary hi Samastipur district­a Sarai Ranjan A/C a tum 5 zet MLA dinga thlangtlinga lo um ta a nih.

Suu Kyi in Myanmar President an hmupui
NAYPYIDAW: Myanmar Democracy leader le National League for Democracy (NLD) hotu Aung San Suu Kyi chun zanikhan Myanmar President Thein Sein chu Naypyidaw hmuna an hmupui a, tha taka lo lawmlut a ni a, zani zantieng khan Suu Kyi hin Myanmar Army Chief Min Aung Hlaing an hmupui nawk.
            
Thein Sein le Min Lhaing hai hin  NLD in hratna an chang hi an lawmpui thu hrilin sawrkarna/ thuneina tha taka inhlan dingin an lo inhril ve ve ta a nih. Amiruokchu, Myanmar sipai sawrkar khan Suu Kyi hi President ni thei lo dinga Constitution an lo siem a ni bakah NLD thlawptu hai chun NLD kuta thuneina pumhlum inhlan an ni chie dim ti hi ringhla le titthawngna an la nei zing a nih.
            
Suu Kyi le Thein Sein hai hi darkar khat deuthaw inbiekna an nei a,  NLD in Myanmar general election­a hratna an chang le inzawma  sawrkarna/thuneina tha taka inhlansawng dan ding chungthu an hriltlang a, Constitution article siemthat chungthu chu Parliament/sawrkar thar thaw ding a ni a, hi huna hin an hriltlang nawh tiin Myanmar Information Minister Ye Htut chun reporter hai kuoma a hril. Kum1948­a Myanmar in Independence a hmua inthawk buoina um der lova thuneina inhlansawngna a la um naw a, tuta tum hin a taka thuneina tha taka inhlansawng tum a nih tiin Ye Htut chun a hril.
            
Myanmar sipai sawrkarin Suu Kyi hi President ni thei lo dinga a lo siem nisien khawm Suu Kyi hin  President chunga (aia mi a ruot chungah) um ngei a tum tlat  a nih.

A pasal thata intumin man
AIZAWL: Mr Lakfakawma of Serchhip Dinthar Vengsang chu November 27, 2015 khan a thi a, lungphu chawla thi a ni ring a ni laiin a nuhmei Vanlalruati (30) in a vuok hlum nia ringhla le intum a ni leiin Police chun Vanlalruati hi an man. Thu indawnna nei hunah Ms Vanlalruati chun a pasal Lalfakawma hi a ri a sie leiin a hruia phuor betin a bau a hup pek a, chu taka inthuok thei lova thi niin Police kuomah an puong. Mr Lalfakawma hi a hma chun lungphu chawla thia ngai a ni a, sienkhawm a pang hai a duk leiin a unau han Serchhip Police Station­ah ringhla leiin  FIR an zieklut a, chu le inzawma hieng thil hi hrietsuoka hung um a nih.

BJP zawm MLA hai disqualify dingin
GUWAHATI: Assam­a Congress Legislature Party(CLP) Chief Whip Nilamani Sen Deka chun    Assam Assembly­a Congress MLA 9, tulai hnaia BJP zawm Abu Taher Bepari, Jayanta Malla Barua, Binanda Saikia, Rajen Barthakur, Pallab Lochan Das, Pradan Barua, Piyus Hazarika, Bolin Chetia le  Kripanath Mallah hai chu 10th Schedule of the Indian Constitution hnuoia disqualify dingin Assam Assembly Speaker Pranab Gogoi kuoma petition a peklut. Congress chun hieng MLA 9 hai hi November 11, 2015 khan BJP an zawm leiin party a inthawk a lo hnawtdawk ta a nih.

Jharkhand state pumpui khuo thal in a sukbuoi
RANCHI: Zani hmasa zana Jharkhand Cabinet meeting chun tukum sunga khuo inthal leia loneitu hai harsatna chungthu an hriltlang a, cabinet chun state pumpui chu khaw inthal in a sukbuoi in an puong bakah sawrkar thlungpui kuomah report peklut ding le thil umdan a hmuna enfel dinga sawrkar thlungpui ngen dingin an rel.

German Cabinet in ISIS beina ding a pawmpui tah
BERLIN: Zanita German Cabinet meeting chun Syria rama Islamic State (ISIS) helpawl hai beina dinga kut rawl ve dinga rawtna a pawmpui (approved) ta a, amiruok chu Parliament in an la pawmpui a tul ding a ni a, an pawmpui ngei ring a nih.
            
Syria rama ISIS hai beina dinga hin Germany chun thangruol sawrkar (international coalition) hai thangpuitu dingin sipai 1,200 le Tornado reconnaissance jet 6 neka tlawm lo a thawnlut dinga hril a nih. Thla hmasa laia ISIS terrorist han Paris khawpui an bei lei khan France chun ISIS hai beina kawnga thangruol sawrkar hai thlawp dingin  Russia hi a lo ngen ta a nih.
----------------------------------------------------------------------------------------------
VAWISUN THUPUI
“Hringna hmangai nuom le, Ni thahai hmu nuom chun, Suola inthawkin a lei veng tha sienla, A hmur khawm zawrna thu hril naw dingin veng tha raw se.  ­1 Peter 3:10


Editorial
Mani hnam thil ngaihlut

Tlangmi hai hi ze nghet tak nei ei ninaw lei khawm ni ngei a ta, Sap Missionary han ei rama Chanchintha an hung lutpui le inruolin chappui kang nuom tak angin thawk le khatin Chanchintha hre hmasa phawtin pawmin Kristienah ei hung inpek zung zung a, tuhin chu Zohnathlak/tlangmi hai chu Kristien sakhuo zuitu vawng ei hung nita a nih, lawm a um. Chanchintha awlsam taka ei lo pawm ang bawkin Chanchintha hung phurluttu hai zie le nungchang entawn hrat em em ei hung ni sa nghal bawk a. Kristiennain a hung phursa  Education leiin hmun tin ram tina ei indarzau mek a, ei sil le bil inbel nuom zawng hai khawm nasa takin a danglam hrat a, thil lawmum tak a ni ruol ruolin a tam lem, a bikin thalai hai lai  mani hnam thil ngaihlut nachang hre lova ei hmusit pei ruok hi chu ei vangduoina, hnam anga ei boralna ding hmathuoitu a nih.
            
India hnam pa Pu Mohandas Karamchan Gandhi (M.K. Gandhi) chun,‘ Mani hnam thaw dan neka hnam dang thaw dan ngaisang hnam chu hnam boral a nih’ tia a lo hril hi an dik vieu awm ie. Asan chu khawvela hnam ropui le changkang hai nun le khawsak dan ei thlir chun mani hnam thil inza le ngaihlu thiem tak an ni vawng. Khawvela hin hnam tin, chitin ei cheng a, hnam hran hran ei ni ang   bawkin tawng hran hran ei nei seng a, ei piengzie le vun rawng hai khawm inang naw tak tak ei ni el khelah sakhuo dang dang zuia bie ei ni tawl. Hnam hran hran ei ni ang bawkin khawsak dan zierang (culture) hran ei nei seng a, mani culture le hnam thil ngaihlut nachang hre lova hnawl peitu hai chu hnam boral an hung ni pei a nih. Ei hnam thil, puon le thuom dang dang hai hi ei ni’n ei chawilar a, ei ngaihlu naw chun tukhawmin an mi hung chawilar pek naw ding a nih ti hi ei hriet tlat nuom a um. Khawvel in a ngaisang le an za hnam hai chu mani hnam thil ngaihlu le chawilar thiem thiem hai an ni rawp hlak. Chu le inzawma eini laia hmu thei hnai tak chu ei unau Naga hai an nih.
             
Eini Zohnathlak hai lem hi chu population khawm tlawmte chau ei ni  a, ei piengzie  renga Mongolian thla Chinese, Korean etc hai le inhnai em em ei ni leiin India ram rila ei fe chang lem chun Vai hai hin  ramdangmi (foreigners) an mi sawn hlak. Hiengang hi ei ngirhmun a ni leiin  khawvelin a mi hriet theina ding le  hnam pakhat ei ni ve ti a mi hriet theina dinga pawimaw tak chu mani hnam thil chawilar le ngaihluta, chawisang hi a nih. Thlai le thing le ruo hai hung hring dupa ra an insuo theina chu an ‘zung’ a ni a. Hiengang bawk hin hnam ‘zung’ chu culture (nunzie/zierang), sakhuo, incheina, piengzie le tawng hai hi an nih. Thing a zung ei sat tan chun a hung tawl­a a thi el hlak ang hin hnam anga ei dam khawsuok ve theina dinga pawimaw em em chu a chunga ei zieklang a ‘zung’ hai humhal a nih ti thalai han a thar taka ei hriet nuom a um.
            
Mani hnam thil ngaihlut ding ti lei ela midang le hnam dang hai thil ngaihnuoi a, hmusita, deusaw ding tina a  ni nawh. Tawng, hnam le culture hai neia min duongtu chu siemtu Pathien a ni a. Ama dit dan ang taka a min duong ei ni leiin mani hnam thil chawisang le suklar tumna leia mi dang dai va ner chu Pathien ditdan a ni nawh. Chu nekin ei danglamna hai inhriethiem tuo a, inzatuo chu ei thaw ding makmaw a nih. Chuongang bawkin ‘Tawng’ hi hnam pakhat ve ei nina sukchiengtu a ni leiin hnam anga ei damkhawsuok theina dinga pawimaw chu ‘tawng’ chawisang le sukhmasawna, hnam incheina le thuom le par, thu le hla hai ngaihlut le chawilar chu ei thaw ding makmaw a nih.

            
Hnam thil chawilar le suk hmasawnna kawnga hin mitinin mawphurna ei nei lai zingin hnam puon le thuom hai chawilarna  kawngah nuhmei han mawphurna an nei lien zuol. Asan chu, Hnam in puon mawi tam tak ei nei hai hi pasal van bel ngawt ngaina a um nawh. Hi lei hin nuhmei hai hin ei puon hai chawilar le sukhmasawnna kawnga hma nasa nawk zuola an lak nuom a um a, nuhmei­pasal innei nikhuo haiah ei nunghak hai hin khawthlang ram hai thaw dan ‘Wedding Gown’ ngei ti nekin, ‘ka hnam thuom ngei’ ti thei seng ta inla chu ei hnam thuom ei chawilarna le chawisangna pakhat ni ngei a tih. Pasal hai chun hnam thuom ngei inbela Pastor hmaa kut insui hi an hniel tanaw tlangpui a, sienkhawm nuhmei tiengin ei la pawm thei tlat naw hi thil pawi tak a nih. Khawvela lal ropui tak tak hai innei dam ei hmuin ei hriet a, Wedding gown ropui, mawi le manto tak tak inchaw thei ding  hai khawmin mani hnam thuom ngainat le ngaihlut nachang hre a, an ni hnam thuom ngei inbela ringumna thutiem an nei hai dam hi entawn  nachang hre ta inla nuom a um hle.

Post a Comment

Powered by Blogger.