CCPUR|Dec. 30, 2015 (Virthli): Tulai khawvela inlar ve tak el, Hmar Facebook Group (FHG) chun Dec. 30, 2015 khan Eric Fimate @Eric Fimate Fhg hai In, Sielmat, CCPur (Manipur) hmun ah "FHG Get Together 2015" programme hun hlimum tak el an hmang. FHG hi Facebook group, chanchin thedartu le online a inpawltlangna el chauh khawm nilovin thangpui ngaihai thangpui rawp hlaktu, damnaw, accident, thisen pek tul hai thangpui hlaktu le sum-le-paia a tul ang anga tlawmngaia mihai sawmdawl hlaktu an nih.


Hi huna hin fiel anni angin Joshua L. Amo @Jr Amo (Fox Journal neitu) le LRS Puruolte, Chief Admins, Virthli (Online News Portal) haiin uopin thuhrilna hun an nei. Chief Admins, Virthli chun hiengang huna Virthli fiel a nina chu lawmum a ti thu le Virthli aiawin lawmthu a hril a. FHG chu humanitarian aid agency ang tho a ni thu, ngaisangum, suongum a ti thu le Bible a Samari mithapa hnungzuitu le ama ang tho kha an ni thu hai a hril. Hi huna hun hmangtu dang dang hai khawmin FHG hmalakna chu lawmum le ropui an ti thu hai an inzawt tawl a, a tak ngeia inhmu a, inpawltlangna hun hiengang buotsai theia a um chu Pathien le hmalatuhai chungah lawmthu an hril tawl.

FHG Founder, Admins, Sr. Members, Members dang dang, Pu Lalchungsiem Thlawngate, Pu Vula Lalvulthang Khawbung,  Pu Ngama Khobung Khawbung, Pu Enok Ngamhaulien Songate, Tv. Alan Famhoite le mi dang dang khawmin thuhrilna hun an hmang a. Hi huna hin hmalak pei dan dinga tha an tihai member fekhawm haiin an hril bawk. Hi hun hi hnesawtakin Pu Elar Es Neitham Zote @FHG Father in a keithuoi a, hi huna fekhawmhaiin self-introduction neiin thuhril tawi a nuom nuomin an nei malam nghal bawk. Hun khar Tawngtaina le Pathien kuoma fak-le-dawn inhlanna Eric Fimate Fhg in a nei zovin FHG Get Together 2015 Dinner tuihnai tak el chu awttlang a nih. Hi huna hin Delhi, Kohima, Imphal, CCPur le hmun dang danga mi an fekhawm a nih. Hiengang hun Facebook group FHG in a huoihawt thei hi mi tam tak ngaisang le inpak a hlaw hle. Tuhin FHG hin members 14,400 lai a nei a nih.






Post a Comment

Powered by Blogger.