Ankhasuo, December 29, 2015(Virth): Vawisun khan Manipur State Power Company Ltd. in a bawl 33/11 KV Power Sub-Station chu Ankhasuo/Sibapurikhal hmunah Chief Minister Okram Ibobi Singh in hawngna a nei. Hi huna hin CM bakah Pu T. Phungzathang Cabinet Minister (Minister of Health & Family Welfare), Pu Ngamthang Haokip Cabinet Minister (IFCD, Printing & Stationary), Pu GS Haupu MLA, Pu Chaltonlien Amo MLA & Chairman HAC; DC, CCpur, Pu Lalhossan Vice Chairman, CCPUR ADC, Pu Hrila Hmar MDC, Pu Lalditsang Hmar MDC hai le sawrkar mi pawimaw tamtak in an uop.


Chief Minister Okram Ibobi Singh chun Power Sub-Station hawngna a nei huna hin thuhrilna neiin Tipaimukh biel popo supply-tu ding power station lien lem, tuta let thum a hrat 132/33 power station chu Sipuikawn hmuna site selection hai nei zo niin bawlna sin tan mek a ni thu a hril a, hi power station hi kum thar sunga hmang hman ngei dingin a hril. Chun Patpuihmun le Ankhasuo Primary Health Centre haiah Doctor tha tawk tak pe ding le term hmasaka sanction a lo um tah building bawl zo lova la um hai chu pucca building ngeia an hma tienga bawl zo a ni theina dingin Health Minister chu hma la dingin a ti bawk.

Vangaitlang le Tipaimukh infepawna dinga Patpuihmun le Taithu inkara Tuiruong leilak dawa um mek chu kumthar March thla sung ngeia zofel le hmang hman a ni ding thu, a lampui khawm Taithu tieng le Patpuihmun tieng hai blacktopping thaw mek a ni thu le Vangaitlang dung lampui hai khawm a dawt dawt a thaw a ni pei ding thu, bieltu MLA Dr. Chaltonlien Amo chun Virthli indawnna dawnin Virthli palai kuomah a hril.

Hi power station hawnga um hi electric meivar infetir nghal a ni a, mimal in a hai electric hrui keilut a ni tawl chara hmang thei nghal a ni ta ding a nih. Hi Power Sub- Station hin Vangai biel po supply hne dinga riruong a ni a, Patpuihmun chen electric hrui keilut le transformer inthut a ni tah a, Sartuinek tieng khawm transformer inbukna sin thaw mek a nih.

Ankhasuo/Sibapurikhal 33/11kV Sub-Station hawng hun a hin mipui sangtel an pungkhawma, a lawmna in refreshment inhnik tawk tak el sem a ni bawk. Kum tam tak el electric meivar hmu phak lova lo inhnar ngawi ngawi a um Vangaitlang mipui hai chu an biel sunga electric meivar a hang lut el ta chu an lawm hle thu an hril tawl.

Ankhasuo/Sibapurikhal 33/11kV Sub-Station hawng zo a ni hin hiengang Power Sub-Station ang bawk hi Sinzawl ah hawngna CM hin a nei a nih.







Post a Comment

Powered by Blogger.