NIELIT Free Textbook sem
CCPUR: Zani 10:00AM khan CCPur Govt. H/S campus­ah National Institute of Electronics & Information Technology (NIELIT), CCPur Extension Centre­ah Distribution of Textbook to NIELIT “O” level IT Students” nei a nih. Hi huna hin Lunminthang Haokip, IAS, DC, CCPur khuolliena thangin textbook hai semna a nei. Thu a hrilnaah, khawvel hmasawn pei le inzawmin Computer hmang thiemlo hai ta dingin sin zawngna kawnga harsatna an tuok thu, technology insang pei leiin khawvel a chin pei khawm computer lei a nih tia hrilin NIELIT student hai chu training sung a tam thei ang tak inchuksuok a, Laptop nei seng bawk dingin an fui. PM in Digital India innitir a tum leiin computer le internet hi a la pawimaw zuol pei ding a nih tiin a hril.
   

T. Gunendra, Director i/c NIELIT Imphal chun, NIELIT extension CCPur hi kum 1/ 2 hnunga Centre govt. a inthawk office sin thawnaa hmang a ni ding thu hrilin DC chu a tul anga thangpui dingin a ngen.
   
NIELIT CCPur Extension Centre hin student 50 a sponsored­a thla khatah Rs. 500/­ pei an dawng thu Ginkhanlian, Sub­Regional i/c Coaching­cum­Guidance Centre for SC/ST chun a hril.

JAC kuomah an ngen
CCPUR: MTF/MTU (Manipur Tribal Forum/ Union) Chennai, Bangalore, Pune, Kolkata and Vishakhapatnam chun November 30, 2015 nia Martyrs hai ruong vui dinga thutlukna siema um chu ennawn dingin Chief Convenor, JAC Against Anti­Tribal Bills kuoma ngenna an siem.

Martyrs hai ralna
CCPUR: Zanikhan JAC hnuoia Finance Sub­Committee kutah Zomi Inkuan, UK han Tribal Martyrs hai ralna dingin Rs. 5050/­ an pek bakah Lamka Block hnuoia Thingkangphai V/A in Rs. 35,950/­ le Henglep Block­a Hengkom V/A han Rs.1,000/­ an pek. A renga JAC hnuoia Finance Sub­Committee kuta zanita lut chu Rs. 42,000/­ a nih.

Youth Voters’ Festival Dec. 19­ah
CCPUR:  Zani zantieng 1:00PM khan Election Dept. le Campus Ambassador han Ngamthang Haokip, District Election Office chamber­ah meeting an nei a, Youth Voters’ Festival December 19, 2015 a nei dingin an rel. Chun, hi festival huna School level le College level a football friendly match nei dingin an rel bawk a, a hmun ding ruok chu an la sukfel nawh


Thla 3 sunga indin dingin
CCPUR: Transport Department, Govt. of Manipur chun thusuok siemin College le School­a student hai him lemna dingin thla 3 sung ngei School/Colleges haia Authority han Principal inrawinaa School Transport Committee an din ding, Member­ah Parents/Guardian Forum/Assn., School transport  Service Proivder Assn. le Local body indin dingin an hriettir a, thu chieng lem www.manipureducation.gov.in­ah hmu thei ning a tih.

Training an nei
CCPUR: Zani 11AM khan District Training Centre, Tuibuong­ah Charge Officer le Enumerators han National Population Register and Seeding of Aadhar Number Updation thuah training an nei a, Directorate of Census Operations, Manipur a inthawk Dr Sanajaoba, Compiller; Dr Sumati, Sr Consultant hai resource person in an thang. Training­a hin Thanlon block, Singngat block, Tipaimukh block le Henglep block a Charge Officer hai le  Enumerator hai an thang.

Tamchon Football khel ding Hmar FC Player 6 in CCPur an suoksan
CCPUR:Nov. 23, 2015,11:50 AM khan 9th NE Tamchon Football Tournament (NETFT) Dec. 1­12, 2015 a inkhel ding Defending Champion Hmar FC Team a mi 6 hai chun CCPur suoksanin Vuongnain Imphal­Guwahati­Delhi an pan. Players hai hi HSA Campus Rengkai ­ah inthlana hun hmangpui a ni a, Pu Lalhrillien MDC, Saikot chun, inkhelna hun chu Kristien ei nina suklangna hun remchang tak a ni thu hai hrilin Player hai chu hlawtling taka hung inlawi dinga ditsakna inhlanin Rs. 5,000/­ Hmar FC an hlan a, a thei anga nga hmatienga a la thangpui pei ding thu a hril. Upa Laldawnlien Varte President, HYA, GHQ chun Hmar FC Player hai ta dinga tawngtaipekna a nei a. Pu Lalvullien Vice­President, All Manipur Football Assn. (AMFA) le President, CCPur Dist. Sports Assn. (CDSA) in Hmar FC player hai hi a vailiem. Players hai hi LRS Puruolte in Airport chen a van thla.
    
Hmar hi NETFT a hi Final vawi 5 an lut ta a Vawi 2 an hrat zawm ta a, tukum hin an hrat nawk chun Trophy hi an nei sawng ta ding a nih. Hi Tournament Opening Match Dec. 1 ah um ding a khin Hmar FC leWung United inkhel an ta, DDK ah Live a insuo a ni ngei theina dinga buoipui mek a nih.
    
CCPur­Imphal Motor Transportation Sponsortu M/s Kim­Joe Gas Service le Pu Rochunghnung Vice President, HSA GHQ; Flex Banner Sponsortu Smarttech Offset, Media tum tumhai, Player 6 hai sumfaia thilpek inhlantu­MDC, Saikot, Pu H. Samson, Pu Joseph @Sepa, Pi Thangzuolhai hai chunga Hmar FC chun lawmthu a  hril.
             
Hmar FC Player zanita CCPur suoksan hai chu Joseph Joute, Ramhmasuon Songate, Lalneidik Hmar, Daniel Hmar, Henry Gangte, Ramngailien hai an ni a, Guwahati a inthawkin Immanuel Intoate le Haoliengou haiin anni hi lo zawm nawkin zani zan khan New Delhi an vuong tlung.

JAC kuoma Memorandum an pek
CCPUR: The People of Pearsonmun chun zani zantieng khan JAC Against Anti­Tribal Bills Chief Convenor H. Mangchinkhup kuomah memorandum an pek a, JAC, JPO, Inpui hai le Tribe Leaders han November 30, 2015 nia Tribal Martyrs 9 hai ruong vui dinga thutlukna an siem chu an la remtinaw thu an zieklang.
     
JAC Chief Convenor kuoma Memorandum an peka point 3 an zieklang hai chu­ 1.Manipur Tribal interest a bill 3 hai withdraw a ninaw khawmin siemthat a ni hma chu martyrs 9 hai ruong vui lo ding; 2. A chunga ngenna ngaisak lova Tribal Martyrs 9 hai vui tal tum a ni chun Khamsuanmuan @ Khampu of Pearsonmun chu Pearsonmun khuoa ropui tak le inzana insang tak pein khaw mipuiin kan vui ding a nih ti le 3. Point no. 1 a mi anga remti a ni chun tribal martyrs hai ruong hi fe le hung han an hmu zing theina dingin khawpui laili lai vui ni raw seh ti hai a nih. A chunga an ngenna 3 hai  dawnna November 30, 2015 hma ngeia pe dingin an ngen.

India le Malaysia han zanikhan pacts 3 an ziek:
Mihriem hlutna humhalna dingin Terrorism le sakhuona thenhrang a ngai:PM
KUALA LUMPUR/SINGAPORE: India PM Narendra Modi le Malaysia PM Mohd. Najib Tun Andul Razak han inbiekna an nei hnungin pacts pathum ­ Cultural Exchange Programme agreement for 2015­2020, Cooperation in Project Delivery and Monitoring le Cooperation on Cyber Security haia thawtlangna ding an ziek. Hieng rambung pahni hai chun tulaia khawvela terorist hai chetna hung hluor pei chu an ngaimaw thu an hril.
      
Mr Narendra Modi le Najib Razak han zanikhan ‘Torana Gate’ India in a bawl a ruolin an hawng. Hi hma hin Mr Najib chun Kuala Lumpur hmuna Little India enclave a hawng bawk.  Mr Narendra Modi chun Razak hnuoia Malaysia le India ram han inlaichinna tha lem, inthuk lem le hrat lem an hung nei ngei a beisei thu a hril.
    
PM Narendra Modi chun ni 2 sung cham dingin zanikhan Singapore a pan a, zani zantieng khan Singapore a tlung. Pu Narendra Modi hin zanita Hotel Shangri­La, Singapore hmuna Institute of Southeast Asian Studies (ISAS) in an buoitsai 37th Singapore Lecture­a thu a hrilnaah, sakhaw tinin an chuktir mihriem hlutna humhalna dingin terrorism hi sakhuona a inthawk thenhrang a ngai tiin a hril a, terrorism dona kawnga khawvel pumkhata um a tul thu hrilin terrorism hin hringna chau a lak naw a, economics khawm a suksiet thei a nih tia hrilin terrorism chu khawvel rambung hai ta dinga chona a ni thu a hril.
           
PM Narendra Modi chun vawisun hin Singapore PM Lee Hsein Loon inhmupui a ta, an ram pahni hai defence, economic and cultural cooperation, skills development le capacity building tienga  thawtlangna ding agreements ziek an ta, India le Singapore inzawmna kum 50 tling le inzawmin joint stamp tlangzar bawk an tih. Pu Modi hin Singapore a cham sungin Pu Modi hin CEOs le Heads of business organisations 14 hai an hmupui ding bakah India­Singapore Economic Convention a khawm thangin thuhrilna hun hmang bawk a tih.

Re-­Poll nei; votes 80% a tla
IMPHAL: Zanikhan Thongju A/C biela 5/25 Singjamei Kshetrileikai Primary School polling station­ah repoll nei a ni a, votes 80% chuong a tla. Hi PS a hin voter 967 an um a nih. November 21, 2015 nia byelection huna khan EVM a buoi leia hi PS a hin repoll nei a nih.

Chetia ni 14 Judicial Custody­a um dingin
GUWAHATI:  ULFA leader Anup Chetia (48) chu CBI custody­a ni 5 sung a um hnungin zanikhan Special CBI Magistrate chun ni 14 sung Judicial Custody (Jail) a um phawt dingin a rel. Chetia hi Guwahati Central Jail­a sie ning a ta, December 5, 2015 khin Court hmaah inlangtir nawk ning a tih.

Nitish hlawtling lawmnain a kutpar a tan
PATNA: Bihar­a Jehanabad khaw mi pasal kum 53 mi Anil Sharma chun  Nitish Kumar Bihar Chief Minister a hung ni zatin danglam takin a kutpar tanbawngin a hlimna le lawmna a suklang hlak. November 20, 2015 nia Mr Nitish Kumar in Bihar CM dinga intiemkamna a nei ni khan Mr Anil Sharma hin kawite hmangin a kutpar pakhat a tan nawk. Tuchena hin Mr Sharma hin a kutpar pathum a tanbawng ta a nih. Kum 2005 le 2010 hai khan a kutpar tanbawngin a pathien kuoma an hlan a nih.

Agreement hran ziekpui a tum nawh:Ravi
GUWAHATI: India sawrkar chun Nagaland­a helpawl dang hai leh Agreement hran ziekpui a tum nawh, sienkhawm peace process fe mek zawm nuom hai chu lawmlut zing an nih tiin  Centre’s interlocutor for Naga talks RN Ravi chun a hril. Sawrkar thlungpui chun peace process fe mek zawm ding hin Khaplang faction thangin helpawl dang hai a lawmlut zing a, sienkhawm sawrkar thlungpui chun hun sawt tak nghak thei naw nih tiin Mr Ravi chun a hril bawk.

Delhi a lampui intar sukthawlna dingin Rs. 3,250 crores
NEW DELHI: Urban development minister Venkaiah Naidu chun Delhi khawpui sunga lampui intar sukthawlna dingin Rs. 3,250 crores pek dingin a puong. Hi sum hi flyover siemna, underpasses le rail overbridges siemna haia hmang ning a tih. Hi thu hi Swachh Delhi Abhiyan  hawngna huna Mr Naidu in a hril a nih.
            
Delhi sawrkar kutah Rs. 1,500 crores, DDA kuomah Rs. 1,665 crores le North Municipal Corporation of Delhi kuomah sinthawna dingin Rs. 85 crores pekdawk ning an tih.

VAWISUN THUPUI
Insawp unla, insukfai ro, ka mithmu phak nawah in thilthawhai hi a suolna chu sie hmang ro; suol thaw thaw el hi ma ta unla, thil tha thaw inchuk ta ro:  ­Isai 1:16

Editorial: Mipui zai ngai thiem hlak inla
Manipur Assembly in August 31, 2015 nia Anti­Tribal Bills a passed hai dodalna leia mi 9 zetin hringna an chan phana le inzawma Tribal movement fe mek chu vawisun hi ni 95 a tlingna a nita a. Hi hun sung hin ro tam tak ei rel a, thenkhat ei fethlengpui a, ditdan le ngaidan inangnaw leiin thusuok tam tak ei lo sut ta bawk. Thutlukna thenkhat leiin Hotu thenkhat an inban ta a, Rorel dan chungthuah thuoitu hai chunga lungawilo mipui tam tak ei um bawk. Thuoitu le hotu hai ta ding khawma luhai um tak ni ngei a tih. Thenkhatin Separate Administration, thenkhatin State hran. Unity ei ti laizingin thenkhatin Disunity chi an tu zing bawk.   
    
Joint Action Committee (JAC) Against Anti­Tribal Bills inrawina hnuoia JPO, Inpuis, Kohran thuoituhai le Organisation tum tuma thuoitu hai chun November 30, 2015 nia Tribal Martyrs hai ruong vui dingin thutlukna an siem a, programme khawm induong zo a ni der ta a. Chuong laizing chun Delhi phaizawla hmalatu Manipur Tribal Forum Delhi (MTFD) chun protest fepui zingin November 30, 2015 nia ruong vui dinga rel chu tha ti lovin la ennawn dingin hi tienga thuoitu hai an hung ngen zing bawk. Chu khelah MTF/MTU(Manipur Tribal Forum/ Union) Chennai, Bangalore, Pune, Kolkata and Vishakhapatnam chun  Nov. 30, 2015 nia Martyrs hai ruong vui dinga rawtna um chu ngaituo thar dingin JAC kuomah ngenna an siem bakah The People of Pearsonmun chun zani zantieng khan JAC kuomah memorandum pein, an ngenna an remtinaw chun Pearsonmun mi Tribal martyrs laia mi Khamsuanmuan chu anni vui dinga  pe dawk dingin an ngen bawk a nih. Hieng laizing hin mipui thenkhat chun vuiliem  awm an ti ta thung.
    
Hieng hi ei ngirhmun a ni leiin programme induong angin vuina programme hi lo hmang ta inla iengtin am ei um ding, eini sungah buoina a suk suok thar el lem dim ti khawm ngaituo um tak a nih. Mipui chier le hotu hai chunga lungawinawna neu neu hai hi a bul ei tana inthawka um ta a ni leiin hotu le thuoitu tiengpang hin mipui zai ei ngai thiem ngai naw deu mani aw ti dingin a um hlak. Sungkuo pakhata hman ngaidan an phir chun, mi hran hran fekhawm hai lai chun ngaidan le ditdan chu nasa takin an phir ngei ding a nih ti chu a chieng sa a nih. Hi lei tak hin hotu le thuoitu hai ta ding khawmin rorel an tak dingzie chu hrietsa a ni a. Martyrs hai ruong vui hun ding chungthua khawm hin Tribal Movement le inzawma Delhi phaizawla sawrkar thlungpui dawrna kawnga sawr tangkai em em le protest fepui mektu Manipur Tribal Forum Delhi (MTFD) hai rawn derna a neinaw niin an lang a, hi hi thil pawi tak a nih.
     
Mipui ei ko khawm a, hma ei lakpui sau sau hnunga thil a fesuol lei ela mipui intum chu thuoitu le hotu hai thaw dan ding a ni naw a, iengang buoina le harsatna khawm nisien, thuoitu chun mawphurna ei lak ngam ding a nih. Thil ei thaw le thutlukna ei siem hrim hrimin iem kakhawk a nei ding; chuongang thil a hung tlung chun iengtia thaw dim; mipuiin an kal chun iengti anga convince dim ti hai chen ngaituo a tul. Hotu ni lei ringawta mipui convince dan ding ngaituo lova thil thaw phut phut hi thuoitu le hotu tha hai umdan a ni ngai nawh. Inphahnuoi a tul huna inphahnuoi thiem hi hotu le thuoitu tha nina (quality) pawimaw tak pakhat a ni ve a. Tuta Matryrs hai ruong vui dinga ei hmalakna khawm hi thutlukna tha le indik tak a ni thei a, a ninaw thei bawk. Chun, mipui ei convince hnenaw leia ei thutlukna  annnawleh ei thangna kha an diknaw tina a ni chuong naw a, sienkhawm a hun le hmun izira  Thuoitu le hotu han mipui zai ngai thiem hi a pawimaw rawp hlak. Chun, Thuoitu le hotu ei ni lai zingin midang hai credit pek thiem hi thil tha le pawl sukhrattu a ni rawp hlak.
         
Chun, mipui tieng khawm thuoitu hai thilthaw le thurel hai kal zing zing el hi a tha chie am! ei insunga inthuruolna suksie zuoltu a ni lem el am ti hai dam khawm ei ngaituo nuom a um. Khawvel a ni leiin mani dit dan le ngaidan chauva fe thei ei ninaw a, midang ngaidan ei zui ve a tul hun khawm a um ti hi ei hriet tlat a tul.

Post a Comment

Powered by Blogger.