Nk. Lalparzo Gospel Video Album tlangzar
CCPUR:  Nk. Gladys Lalparzo Sanate in “Krista­ah Hringna Thar Ka Nei” ti hming chawia Gospel Music Video Album a siem thar Vol.-VI chu zani 11:30AM khan Hmarveng Community Hall­ah tlangzar a nih. Pi J.L. Sawmi, President, CCPur Joint Women Organisation (CJWO) le President, HWA GHQ chu khuolliena thangin Album hi a hawng a, Dr Lalrimawi Pudaite in Pathien kuoma tawngtaia inhlanna a nei. Hi huna hin Hesi, President, KWU le Joicy, President, ZMA hai guest of honour in an thang a, Functional President­a thang dinga ti PS Haokip, President, KNO le Siemtinthang, President, UPF hai ruok chu remchangnawna  leiin an thang thei nawh.
           

Album siemtu Nk. Lalparzo chun, a ministry hin hmangaina, inremna, inpumkhatna a ni leiin community pakhat chau ni lo tawng tum tum a album siem a ni thu a hril a, Paite tawngin Album 3, Thadou tawngin album 1 le Hmar­Mizo album 1 a siem ta  thu hrilin vawisuna Album a tlangzar chu  Hmar Album a ni thu a hril. Pathienin mihriem hai hi talent hran hran a mi pek a, ama talent Pathien hla saka hnam tum tum hai kara inhmangaina, inremna le inpumkhatna a um theina dinga a hmang thu hrilin Album siemnaa thangpuitu hai chunga lawmthu a hril. Hi huna hin Pu James Songrolal chun Album Preview a thaw bawk.

Tribal Martyrs ralna le thangpuina
CCPUR: Zanikhan Organisation 4 han District Hospital­a JPO kutah Tribal Martyrs hai ralna le hliemhai thangpuina dingin Rs. 5,37,700/­ an inhlan. Zanita JPO kuta ralna le thangpuina petuhai chu­ SLZogam Area Women, Chandel in Rs. 4,000/­; Lontang Village Development Committee, Tuibuong Block in Rs. 1,000/­; Zomi Innkuan, USA in Dr R. Sanga fethelngin Rs. 5,32,600 le JPO han a tulnaa an hmang ding Rs. 50,000/­ a nih. Nov. 23, 2015 a District Hospital­a thingpui inlumtu ding YVA ning an tih.
           

Chun, zanikhan Tuibuong Block a Kangvai khuo in Tribal Martyrs hai ralna dinga In tina Rs. 100/­ an dawl khawm a rengin Rs. 1,300/­ JAC hnuoia Finance Sub­Committee kutah an inhlan bawk.

CDCTA President dingin H. Tualkhanlal
CCPUR: Zani 10:00AM khan CCPur District Council Teachers’ Association (CDCTA) chunk um 2015­2018 sunga thuoitu ding thlangna an nei a. President dingin H. Tualkhanlal thlangtling a ni a, Vice President dingin Ingudan Brajamani; Secretary in Thenjalal Touthang; Finance Secretary in Thongkholun Haokip; Treasurer in C. Siami; Jt. Secretary in Doukhomang; Inf. & Publicity Secy. in Thangzamang Guite hai thlangtling an nih. Thuoitu thar dinga thlangtling hai hi H. Thangkhankham, Returning Officer in intiemkamna an neitir. Election huna hin invalid vote (vote thi) 7 a um a, thlang thar hai le a hlui han Dec. 5, 2015 khin charge inhlanna nei an tih.


CMO le DPM, DHS an va thang ding
CCPUR: November 23, 2015, 9:30AM khin Manipur Health Society huoihawtnain Hotel Nirmala, MG Avenue hmuna “One Day State Level Sensitization Workshop on Social Behaviour Change Communication” um a tih. Hi huna hin CCPur District a inthawk Dr Thangchinkhup Guite, CMO le Seiboi Mate, Dist. Prog. Manager (DPM), DHS/CCPur hai va thang an tih.

Railway Minister in NE Lifeline Silchar-Lumding broad gauge Rel lampui a hawng
SILCHAR: Railway Minister Suresh Prabhu chun zanikhan Assam­a Silchar­Lumding broad gauge Rel lampui hawngin New Delhi­a inthawk video­conferencing fethlengin passenger train a flagged off bawk. Hi Rel lampui hawng a ni le inruol hin Barak Valley chu broad gauge map­ah a chuong ta a nih. India hmarsak biel, a bik takin Barak Valley le Tripura bakah Manipur le Mizoram state hai ta ding  lampui pawimaw takel, bufai, hnuoithatna, thautui le a dang dang hai phurlutna lampui ‘lifeline’ a ni a, hi Rel lampui hawng theia a um chu vangnei an ti hle thu a hril. Nov.23, 2015 a inthawk khin hi lampuia hin regular takin Rel a tlan tan ta ding a nih. Lumding­Silchar Rel service hin sleeper coaches thangin AC III tier le Chair Car chaches hai thangin bogies 11 a nei a, Silchar­Guwahati chuongman Rs. 70 chau a ni a, Bus chun Rs. 600/­ a nih.
           
Union Minister of State for Railways Manoj Sinha le Minister for Sports and Youth Affairs Sarbananda Sonowal Silchar Railway station­a flag­off ceremony neina hmuna an taksa ngeiin an zu thang. Mr Manoj Sinha chun, Lumding­Silchar line broad gauge a siemnaa hin Rs. 3,500 crores vel seng a ni thu hrilin India hmarsakbiel in infepawna tiengpanga hmasawnna kalbi thar a chuongkaina le Indian Railways a Rel lampui  broad gauge conversion project lien tak a la ni thu a hril.
           
Lumding - Silchar Gauge Conversion Project hi Northeast Frontier Railway 1996­97 a sanction, kum 2004­a National Project a puong a nih. Kum 2006­2009 sung khan helpawl hai hrang leiin hi project hi nasa takin a sukbuoi leiin Territorial Army chen tirlut an nih. Hi Rel lampui hin hnuoiver (tunnels) 21, major bridges 75 le minor bridges 340 a um a nih.
           
Lumding­Silchar hi Phase­I a mi a ni a, Phase­II a chun  Kms 224 a sei Badarpur­Kumarghat, Baraigram­-Dullabcherra le Silchar­Jiribam  hai niin  Rs. 1600 crore senga siem ding,  March 31, 2016  chena zo dinga ti a ni bawk.

Manipur Sangai Festival tan:Gov. khuollienin a thang
IMPHAL: Ni 10 sung aw ding Manipur Sangai Festival 2015 or Manipur Tourism Festival chu zani zantieng khan Bhagyachandra Open air theatre, Hafta Kangjeibung ­ah tan a nih. Sangai Festival hi November 30, 2015 chen aw ding a nih. Sangai Festival hawngna huna hin Manipur Governor V. Shanmuganathan chu khuollienin a thang a, Manipur CM O.Ibobi Singh chu functional President in a thang.
           
Governor chun, Tourism fethlenga Manipur economy dawmsang thei a ni ding thu hrilin tourism tiengpangah Manpurin hma a sawn pei thu a hril.
           
CM chun, a sawrkar chun foreign le domestic tourist tamlem hip theina dingin tourism tiengpang nasa taka sukhmasawn a tum tiin a hril. Tulai hnai khan Swadesh Darshan hnuoiah ‘Development of Tourist Circuit in Manipur: Imphal­-Moirang­-Khongjom­-Moreh’sanctioned a ni thu; Tourism tiengpang sukhmasawnna dinga ei hmalakna a hlawtling chun Manipur mipui hai economic ngirhmun nasa takin a dawmsang ding bakah thalai tam takin sin an hmu pha ding thu a hril.
           
Sangai Festival sim ve ding hin zanikhan Myanmar official hai chuongna Golden Myanmar Airlines vuongna chu Imphal Aiport ­ah a hung tum. Golden Myanmar Airlines CEO Khin Maung Myint chun, passenger an um chun Mandalay le Imphal inkarah regular taka Golden Myanmar flight infetir a hnielnaw thu a hril. Kum 2011­a Myanmar economy an hawng bakah Lady Aung San Suu Kyi leiin Myanmar mipui chun hmatieng beiseina insang tak an nei thu hrilin hun tam takah Manipur hung inzin a tum hnunga tuta tum hi Manipur a hung vawikhatna a ni thu a hril.

Votes 87 percent a tla: Thongju-a 5/25PS ah repoll 
IMPHAL: Zanikhan Imphal West District sunga Thongju le Thangmeiband Assembly Constituency haiah byelection nei a ni a, zing dar 7 a inthawk zantieng dar 4 chen khan vote thlak a ni a. Votes 87 percent chuong a tla. Thongju a chun votes 89.59% a tla a, Thangmeiband A/C a chun votes 85.29% a tla niin official thusuok chun a hril. Thongju a hin Polling stations 41 le Thangmeiband A/C ah Polling stations 45 hawng a nih. Thongju A/C a 55/25 Polling station­a chun Electronic Voting Machine (EVM) tiengpang khawl buoi leiin vote thlakna sukchawl a ni a, Election Commission chun hi polling station­a vote thlak thatna re­poll nei dingin a puong.

PLA/RPF cadre pakhat an man
IMPHAL: November 20, 2015 khan 16­Assam Rifles le Imphal East Police Commando thangruol han  Nungshum hmuna dappui an thawnaah  RPF/RPF cadre W. Tombi Meitei (23) s/o W. Sanatomba of Keibi Heikak Mapal, Imphal East district an man a, Sagolmang Police kuta an peklut niin zanita PRO Assam Rifles thusuok chun a hril. Mana um pa chun kum 2006 a Mr Kanta of Taretkhul village fethelnga PLA/RPF zawm a ni thu, hi kum veka Myanmar­a Tanan training Centre­a training la niin an puong.

Pawisa lem Rs. 6,83,000 leh man
AIZAWL: Mizoram Police chun zani hmasa khan Treasury Square­a Apex Bank tuolah Ms Lalchawimawii d/o Lalfakzuala, Durtlang North nia inhril chu India pawisa lem Rs. 6,83,000 anghu leh an man. Pawisa lem hai hi Rs. 1,000 note lem 565 le Rs. 500 note lem 236 a nih.

NEHU Shillong­ah Asian Study Centre
KUALA LUMPUR: Zanita PM Narendra Modi in Malaysia khawpui Kuala Lumpur hmuna ASEAN ­India summit huna thu a hrilnaah, India chun Asian Culture inchuk theina dingin North Eastern Hill University (NEHU) Shillong­ah Asian Study Centre indin a ni ding thu a hril.

Parliament Session ding le inzawmin NDA in Nov. 24­ah Strategy meet
NEW DELHI: Parliament Winter Session hung um ding le inzawmin Centre­a sawrkarna siemtu NDA leaders han strategy meeting nei an tih. Parliament Winter Session huna tluong taka rorelna a fe theina dingin Lok Sabha Speaker Sumitra Mahajan chun November 25, 2015 khin all­party meeting a ko. GST thanga bill pawimaw hai a fethleng theina dingin sawrkar thlungpui chun a hranin opposition parties tum tum hai inbiekpui a tum bawk. NDA meeting hi November 18, 2015 a kha nei dinga ti a ni a, sienkhawm VHP leader Ashok Singhal thi leia thul­a lo um ta a nih.
           
Parliament Winter session hi November 26­December 23, 2015 inkar sunga nei ding a nih. Parliament inthung nikhat le ni hnina hai chu India Constitution November 16, 1949 a pawm a ni hrietzingna le India constitution induongtu (L) Dr BR Ambedkar chawimawina ni haia hmang ning a tih.
           
Opposition chun hieng ni hmasa ni 2 haia hin buoina siem an tum ring a um naw a, sienkhawm ni dang haia chun ‘award wapsi’, Dadri lyinching, thil man kaisang le Centre­state relations chungthu haiah rihau nasa tak an nei ring a nih. Parliament Monsoon session kha Lalit modi chungthuah foreign minister Sushma Swaraj le Rajasthan CM Vasundhara Raje hai bakah Vyapam Scam thua Madhya Pradesh CM Shivraj Singh Chouhan inban dinga phutnaa risie an siem zing leiin bill pawimaw tam tak rel thei lovin a lo um ta a nih.
           
Tuhin Lok Sabha­ah pending bill 8 le le Rajya Sabha­ah 11 a um mek a, chu lai chun Goods and Services Tax (GST) le land bill hai a thang.

VAWISUN THUPUI
I vanglai nihaia chun nangma Siemtu che chu hre zing la, kumhai a hung hnai a, ni tha nawhai a hung tlung hma le;.­Thuhriltu 12:1

Editorial
Harsuok khawp chun ei tuor ta ie!

British awpbetna hnuoia inthawk India chun August 15, 1947 khan zalenna a lo hmu ta a. Zalenna ei hmu hnungah thuoitu tha le ropui tak tak hai hnuoia India chu mipui roinrelna ram ‘democracy’ hung niin mipui han ei aiawtu ding ei hung thlang a. Kum iemanichen  mipui han democracy indiktak hnuoia ram rorelna khawlpui  ei keivir hnungin damte te­a ei politics khel dan  hung dang hret hretin, tuhin chu ieng political party khawm Corruption bal in a tawklo le criminal case laka fihlim hril ding an um ta nawh. Tulai hnai ela Bihar Assembly Election­a MLA dinga thlangtling hai laia iemanizat zet khawm kha tuolthatna thanga criminal case nei lai an nih. Mi tam takin ei zalenna ei hmangsuol mek ta niin an lang a, hi lei hin ram zalen, mipui roinrelna ‘Democracy’ ram inti siin mipui nun hi a zalennaw nuom sawt hle.
           
Vai le Ringnawtu hai chau ni loin eini khawm a hliek ei ni bik ta nawh. Ram hmangai, mipui hmangai inti Politician hai laia a tamlem hi chu mani tlingna ding a ni phawt chun tuolthat khawm pawi tilo deu vawng ei ni tah ti inla ei hrilsuol taluo ring a um nawh. Chik taka ei hang ngaituo chang lem hin chu titam ei um tawl ta hle. Tulai ei ram politics ngirhmun thlirin Kristien inti hai nek hman hin India ram rila cheng ringnawtu ei ti hai khu an lan dikin, mipui khawmin zaalenna an la nei lien lem hman hman annaw manih ti dingin a um. An MLAs/MPs hai khawm mipui nawrna a um chun an inlalna an la hlip ngam. Vai rama Rel station­a Kuli um zat khawm tlinglo ding chau ei la ni hman hin tuorhla um tak ei ni a, ringnawtu Vai ei ti hai angin ei population hang tam lem sienla chu tawk inkhaw ngawt ei tih. Tulaia khawvelin a buoipui Muslim helpawl hai le khawm ei kar hla rak naw nih. 
           
Myanmar ram chu sipai nunrawng tak tak hai awpbetna hnuoia um a ni leiin mipuiin an nghawk silai fawng tieng changtu an ni bawk si leiin thaw ngaina an hriet sinaw leiin tam tak chun Myanmar tlansiet sanin khawvel rambung dang dang haiah an raltlan a, Churachandpur District a ngei khawm tam tak an hung tlanlut ti ei hriet. Myanmar rama Democracy suoltu Ms Aung San Suu Kyi chun theitawpa a bei hnungin kum1990 khan election­ah a party National League for Democracy chun votes 80 percent hmuin hratna an chang a, sienkhawm Myanmar sipai hai chun rorelna inhlan nuom lovin ama Suu Kyi ngei khawm kum tam tak house arrest in an sie bakah ama thlawptu tam tak manin an hrentang a, nasa takin an sawisak tawl bawk a ni kha.
           
Sienkhawm ramdang thangpuina a mamaw zing si leiin khawvel rambung hai ensan hrawn inlau leiin Myanmar­a sipai sawrkar chun constitution induong thara hung inphahnuoiin November 8, 2015 khan a vawikhatna dingin Democracy dan anga General Election neiin a hung um a. Sipai kawlhrawng tak tak han sawrkarna an chel laizing Suu Kyi party National League for Democracy (NLD) chun Myanmar Parliament house pahni haiah majority changin hratna an hung chang nawk thei a; sipai rorelna hnuoia sawrkar um lai zing hnawla mipuiin NLD an thlang el thei hi entawn tlak tak a nih.
           
Malcolm X chun ‘muongna le zalenna hi thenhrang thei a ni nawh a san chu muongna a umnaw chun zalenna a um thei nawh’ a lo ti a, an dik khawp el. Anleh eini Manipur­a um hai hih khawvela mipui roinrelna Democracy rambung lien tak sunga um nisiin ei rama muongna a um am, ei ram danin a mi pek ang taka zalenna ei nei chie am le! Muongna a um naw a, zalenna ei neinaw bawk. A bikin Election huna hin ei ramah muongna a umnaw zuol a, ei zalennaw zuol bawk ni lo am a nih! Manipur chun kum 2017 khin MLA election ei nei nawk ding a ni a. Ei ri chu nasa rek chem chem hleng a tih. MDC election ei neizo hlim boruok rik zie dam kha! Kristien inti hai laia tlung ding chun a rapthlak taluo deu. Mipuiin ei dit ei thlang thei tanaw chun Myanmar ram nek hmanin ei ramah muongna a um naw a, mipui han zalenna ei nei tanaw lem tina a ninaw dim a nih! Myanmar a ruok chun mipuiin sipai sawrkar an nghawk a; NLD in hnena an la chang zo tlat. Rorelna pumhlum NLD kuta inhlan a ni ding le ding naw ruok chu hriet a la ni nawh.
           

Tribal Movement le inzawmin mipuiin ei MLA hai inban dingin ei nawr a, ei nawr puitling nawh. Anti Tribal Bills 3 Assembly in an passed hai  lakir dingin ei nawr a, ei la hlawtlingnaw zing. Water Supply Scheme hlak Wastage supply scheme an chang. Chuongang bawkin Scheme dang dang hai hlak mipui sawr ding um lovin mi thenkhat tlawmte mansaah a lut zo; Mipui hlak Election huna an zawr to thei thei han intitheinain ei la hang hmang nawk. Ei lampui hai hlak fur huna vadung ruom ang; thal huna thlaler ang ela khu vung zung zing. Hienghai popo hi ei politics khel dan an diknaw lei, Development sinthawna indik taka a fenaw lei; mipui han zalen taka ei dit khawm ei thlang thei tanaw lei an ni a; ni dang haia ei la harnaw khawm chu hrietthiemna bawma thlak inla; tuta Anti­Tribal Bills le inzawma ei MLA hai ei thuhnenaw a inthawk bek hin chu harsuok ta inla nuom a um ngei; harsuok khawp chun ei tuor ta ie!

Post a Comment

Powered by Blogger.