Responsive Ad Slot

Hmasawnna Thar | 18 November, 2015

Wednesday, November 18, 2015

/ Published by VIRTHLI
Tuolsung
JPO inrawinain an hriltlang
CCPUR: District Hospital­a JPO information Centre­a chun zani zantieng 1:00PM khan JPO inrawinain November 30, 2015 nia ADC Complex, Bungmual­a Tribal Martyrs hai ruong vuina ding le inzawma  thil thaw dan ding hai hriltlangna an nei. JPO hi physical arrangement le hall arrangement bakah sound system mawphurna pek an nih.


Gospel Music Video tlangzar ding
CCPUR:  Nunghak  Gladys Lalparzo Sanate in “Kristaah Hringna Thar Ka Nei” ti thupui hmanga Hmar Gospel Music Video Album a siem Vol.VI chu  Hmar Veng Community Hall­ah November 21, 2015, 11:30AM in tlangzar ning a tih. Khuollienin Pi J.L. Sawmi, Chairperson, CJWO thang a ta, Pi Hesi, President, KWU le Pi Joicy, President, ZMA hai guest of honour in thang an ta, Pu P.S. Haokip, President, KNO le Pu Seimtinthang, President, UPF hai functional president in thang an tih.
         
Album preview Pu James Songrolal in nei a ta, Album tlangzarna khuollienin nei a tih.

Tribal Martyrs ralna
CCPUR: Zanikhan JPO kutah Tribal martyrs hai ralna le thangpuina Rs. 24,100 le Puon 9 a lut. JPO kuta ralna le thangpuina petu hai chu Kuki Innpi, Meghalaya Rs. 24,000; Eimi Numei Ho, 1st MR, Imphal han Puon 9 le Upa Liankhanthang of Vengnuam New Lamka in Rs. 100 a nih. Vawisuna District Hospital­a thingpui inlumtu ding chu HYA ning an tih.

Malaria Positive 12
CCPUR: District Malaria Department Office, CCPur chun  November 1­15, 2015 inkar sung khan damnaw mi 370 hai thisen lain an enfel a, hi laia mi 12 hai chu Malaria Positive an ni a, chu laia 8 Malaria PF le 4 Malaria PV an nih. Malaria leia thi official record­ah an um nawh.

NE Tamchon:Hmar FC thangpuina kawt hawng
CCPUR/NEW DELHI: 9th NE Tamchon Football Tournament (NETFT) 2015 chu Dec. 1­12, 2015 hin Delhi hmuna inkhel ni nawk a tih. NETFT a hin Hmar FC chun final vawi 5 lai zet lo kai tah in 2013 le 2014 khan Champion a lo ni ta a nih. Tukum leh hin Champion a zawnin vawi 3 a ni thei chun Trophy hi nei sawng ani ta ding bakah chanchin thar siemin khawvela hnam inruolsiekna chi hran hran um mek laiin Hmar FC hi ei hnam hming ei serna pakhat a ni ve lei le ei hnam mawina chu nang le keia innghat a ni leiin thangruol ei tiu tiin Hmar FC Board chun an hril. NETFT a sengso hi a tama, budget chenve khawm an la hmu phak naw thu hrilin, hmuntin a um Hmar nauhai chu tlawmngai insuo a, a tam am a tlawm hril lovin thangpuina pe dingin mipui kuomah ngenna an siem baka Pathien kuoma tawngtainaa lo san dingin an ngen bawk.
   
Bank A/c fethlenga thangpuina pe nuom hai ta dingin Beneficiary: Hmar Football Club; Bank: State Bank of India; Address: R­93, Masoodpur, Vasant Kunj, New Delhi 110070; Account No. 35149389076 (Current a/c); IFSC Code: SBIN0008524; MICR Code: 110002191; Branch Code: 008524 a pek thei le hieng a tlawmngai a Hmar FC le hnam thangpuina thawn hai hi receipt an thawn theina dingin hming le address sms/whatsapp number haia hin thawn dingin an ngen: +91 9560333062 (Chairman) le +91 9013852118 (Treasurer) Hmar FC Board le Tuithaphai (CCPur)/Manipur laia Contact No. 09856261702/Tv. LRS Puruolte, Rengkai or Tv. Lalthanzau @Zaua kut a khawm pek thei zing a ni ding thu an hril. (LRS)

Activa le Car hnung a baw
CCPUR: November 16, 2015 zan dar 5:00PM vel khan Sielmat  khawsung lamtung, lam sira innghat Activa MN02B­2339 le Santro Xing Car MN01W­0254 hai chu tu ti hrietlo han bawin an tlansan. Car hi Lalditsang, MDC Senvon ta le Activa hi Lalruotlien h/o Laltanpui of  Sielmat ta a nih. Hi thil tlung le inzawm hin Senvon MDC Pu Lalditsang chun Police­ah complaint a peklut. Car le Activa baw na hai a se em nawa chu an khur dup thei a nih.

Sawrkar thlungpuiin States le UT hai inralring zing dingin an hriettir
France, US-led coalition forces le Rusia han ISIS hai hmunhai an run zing
NEW DELHI: Paris khawpui tulai hnai ela Terorist han bars, restaurants, a concert hall le stadium  hai an beinaa mi 129 lai zetin thina an tuok le inzawm khan Union Home Minister Rajnath Singh chun, India rama states le Union Territories tin hai chu fimkhur thua inralring zinga  um dingin  zanikhan an hriettir tawl. Islamic State (ISIS) hai chu rambung pakhat chau ta dinga tium ni lovin khawvel pumpui huopa tium an ni leiin khawvel rambung tum tum hai chu ISIS hai dona kawnga an thangruol a tul thu a hril a; India chu  ISIS  hai lo dolet dinga  inringsa zinga um a nih tiin a hril. Hi chungthua hin Sawrkar thlungpui chun State tina Chief Ministers hai  meeting neipuiin internal security chungthu hrilpui a tih tiin zanikhan New Delhi hmuna reporters hai kuoma a hril. Paris khawpuia ISIS hai chetna lei hin New Delhi hmuna Frane, USA, UK, Germany, Australia, Russia, Turkey le Israel Embassies hai venghimna a hma neka sukkhau an nih. India rama  hin ISIS hai an um hriet ninaw sienkhawm anni fe thlenga chetna hung tlung ding lakah sawrkar thlungpui chun inralring dinga states le UTs tin sawrkar hai an hriettir a nih.
   
Hieng laizing hin France chun ISIS hai inkulna hmun nia ringhlana hmun hai chu indo vuongna hai hmangin a bei zing a. Zani hmasa zan khan US led coalition forces  Fighter vuongna chun Syria rama  ISIS hai inkulna hmun a zu bomb a, Jehadis hai thautui phurtu motor lien 16 zet a suksiet nia hril a nih.  US inrawi thangruol sawrkar thangruol hai chun  tuchena hin Syria hmar tieng hmun hran hran ISIS hai hmun ni dinga an ring haiah vawi 13 lai zet bomb hmangin an bei ta bawk a nih.
   
Russi sawrkar chun tulai hnaia Egypt ram Sinai thlalera passenger phurtu Russia vuongna tla thla chu ISIS han an sukthlak nia an hril bawk leh ISIS hai bei ding hin a tha an thak zek zek a, Russia President Vladimir Putin chun Syria rama Raqqa khawpui chu cruise missile chen hmangin an kap tir bawk a nih.          
   
Chungtienga inthawk bei a ni lai zing hin French Police hai chun Paris khawpuia chetnaa thanga intum kum 26 a upa Salah Abdeslam man tumin dappui nasa takin an thaw zing a, Belgium ram sunga a lut ta ring a ni leiin Beigian Police chun a thlalak nasa takin an thedar zing bawk.
         
France President Francois Hollande chun Islamic State of Iraq nuoichimit na dingin khawvel sawrkar hai thangruol dingin a fiel. France indo vuongna chun zanikhan Raqqa hmuna IS command centre le recruitment centre hai bomb hmangin a bei nawk.

Nitish sesamna CM in a zu uop ding
IMPHAL: Mr Nitish Kumar in November 20, 2015 nia Bihar Chief Minister dinga sesamna a nei huna thang ve dinga a hung fielna angin Manipur Chief Minister O.Ibobi Singh chu a zu thang ve ding niin ei thu dawngna chun a hril. Bihar Assembly Election nei zo hlima khan Congress hi Grand Alliance­a thang ve an nih.

CS in NEFIT a vailiem
IMPHAL: Manipur Chief Secretary O. Nabakishore chun zanikhan North East Federaton on International Trade (NEFIT) team motor hmanga Myanmar fethlenga China rama inzin ding hai Secretariat, Imphal­a inthawk a vai liem. Member team hi mi 13 an ni a, Bus in Mandalay, Myanmar lut an ta, Muse­Ruili  Border point fethlengin China ram an lut an ta, Yunan province­a Baoshan khawpui chen  an lut ding a nih.

Sangai Festival insingsatna zo fel
IMPHAL: Manipur Chief Secretary O. Nabakishore chun, November 21, 2015 nia inthawk Manipur Sangai Festival­2015 hung um dinga insingsatna zo fel a ni tah tiin zani zantienga a office chamber­a chanchinbumihai an hmupui huna a hril. Thongju le Thangmeiban A/C haia Assembly byelection ding leia code of conduct um sienkhawm Sanjenthong leilak chu zinga hawng dinga ngenna Election Commission of India kuoma pek a nih tiin a hril. Sanjenthong leilak hawng a ni zoa chun mipui harsatna hai a hung hlipkieng ding a nih tiin a hril.
   
Hieng laizing hin Director General of Civil Aviation chun Golden Myanmar charter flight november 21­26 inkar hung vuonglut theina ding approval a pek ta bawk.

Norway Ambassador a hung inzin ding
IMPHAL:  Norway Ambassador to India Nils Rangnar Kamsag chu November 20, 2015 khin   Dimapur­Imphal road fethlengin Manipur­ah a hung inzin ding nia hril a nih. Senapati district­ah tribal thuoitu hai an hmupui malam pei ding nia hril a ni bakah Nov. 21, 2015 a Sangai Festival hawngna khawm a uop el theia hril a nih.

India Indo vuongna Imphal Airport­ah
IMPHAL: Indian Fighter vuongna Sukhoi Su 30 pahni hai chu zani zingkar 10:00AM khan Imphal Airport­ah an hung tum. Imphal Airport­a an hung tum nasan tak hriet ninaw sien khawm trial landing experiment a hung tum an ni el thei.  India sawrkarin Myanmar ram sunga helpawl inkul hai hnawtdawkna dinga rawtna a siem chu Myanmar sawrkar hmasa khan vawi tam tak a lo hnawl ta a, tuhin Myanmar rama sawrkarna cheltu hung inthlakthleng ding anga a um lei hin India chun Myanmar­a NE helpawl inkul hai tukdawlna kawnga kawt a hung inhawng ngei a beisei a nih.

Chitoor Mayor Katari Anuradha le a pasal that an nih
CHITTOOR:  Zanikhan misuol thenkhat Chittoor Municipal Corporation office ­ah va fein Chitoor Mayor  Katari Anuradha chu a office chamber­ah an va that bakah senior TDP leader le a pasal ni bawk Katari Mohan khawm an that. Anuradha le Mohan hai hi Pistol le chem hmanga an that nia hril a nih.
   
Hi thil tlung huna hin Mayor Anuradha hi a office chamber­a um a ni a pasal chu room dang pakhata um a ni a. A thawtu hai office an va fe huna Municipal staff hai chun ringhlana an nei leiin lo la nghak met dingin an ti a, sienkhawm nghak lovin thawk lekhata lutchila an bei el nia hril a nih. A va beitu hai hi mi 5 an ni a, thenkhatin tuolah an lo nghak a nih.
   
Ms Anuradha hi a lu­ah silaimu lutna le chema sunna be hmu theiin a um. Katana Mohan hi kum 10 vel liemtaa Chittor MLA hlui CK Jayachandra Reddy @ CK Babu that tumnaa mawphurtu taka intum a nih.
   
Andhra Pradeh CM Chandrababu Naidu chun hi thil tlung hi nasa takin a dem a, tuolthattu hai man le hremna pek an ni ngei ding thu a hril. Hieng laizing hi a va beitu mi 5 hai laia 2 hai chu zanikhan Police kuta an inpe a, pakhat dang Court hmaah an pe niin ei thu dawngna chun a hril.

AP­ah ruosur leia siet tlungah mi 8 an thi
HYDERABAD: Andhra Pradesh­a south coastal Andhra le Rayalaseema haia chun darkar 48 liemta sunga ruo nasa taka a sur leia tuilien leiin mi 8 an thi. Chief Minister N. Chandrababu Naidu chun official hai a tul le pawimaw anga sansuokna le sawmdawlna sin thaw dingin an hriettir. National Disaster Relief team khawm tirlut an ni a, tuilien leia harsatna tuor hai Helicopter hmanga fak le dawn ding thlak pek an nih. Andhra Pradesh CM N. Chandrababu Naidu chun thina tuok sungkhuo hai  zangnadawmna Rs. 5 lakh seng pek dingin a puong.

7th Pay Commission final report
NEW DELHI: 7th Central Pay Commission final report chu November 19, 2015 khin Finance minister Arun Jaitley kuomah an peklut ding niin hi Committee a Chairman Justice AK Mathur chun a hril. 7th Central Pay hi January 1, 2016 a inthawka hmang tan dinga ti a nih. 7th Central Pay hi hmang a ni huna Central government hnuoia thawktu nuoi 48 chuong le pensioners nuoi 54 vel han an thathnempui ding a nih. 7th CPC chun  a tlangpuiin 15% a sukpung dinga an recommend ring a nih tiin ei thu dawngna chun a hril. Hi Committee a member hai chu Vivek Rae, IAS (retd) 1978 batch; Rathin Roy, economis le Meena Agarwal hai an nih. Meena hi committee a secretary a nih.

Chetia Guwahati tieng an hung transfer
GUWAHATI:  Central Bureau of Investigation (CBI) chun an custody­a inthawk zanikhan ULFA General Secretary Anup Chetia chu Guwahati tieng an hung transfer. Chetia hi November 12, 2015 a kha Bangladesh in India kuta a hung inhlan a nih. Chetia hi Guwhati hmuna judicial magistrate court hmaah inlangtir ning a tih tiin Chetia counsel Bijon Mahajan chun a hril. Assam sawrkar chun Chetia hi Assa state sunga case tum tum nei a ni leia Assam sawrkar kuta hung pe dawk dingin sawrkar thlungpui kuoma ngenna a lo siem ta a nih. Chetia hi ULFA le sawrkar thlungpui inbieknaa khawm a thang beisei a ni a, sienkhawm November 24, 2015 nia inbiekna hung um dinga ruok hin chu board­ah a thang ding le dingnaw hriet a la ni nawh. Chetia (48) hi kum 1997 a kha Bangladesh in a man le foreign pawisa le satellite phone a kawl leia kum 7 sung Bangladesh jail­a lo intang ta a nih.

Charlie Sheen in HIV+ a ni thu a puong
LOS ANGELES: Television star Charlie Sheen (50) chun US breakfast news show­ah zanikhan HIV positive a ni thu a puong. Charlie Shend hi movie star Martin Sheen naupa a ni a, Spin City, Two and a Half Men le a project thar tak Anger Management hai leia hung inlar em em, kum 2010­-2011 sung han  television actor hai laia Forbes in sum hlawsuok rawn taka a lo record a nih. Sheen hin kum 2006­a Denise Richards le an inthe hnuna HIV hi a kai nia hril a nih.

Charlie Sheen hi nuhmei dang dang pathum model Donna Peele; Actresses Denise Richards le Brooke Mueller hai le lo innei tah le nau 5 nei ta a nih a, Nawchizawr inchawknaain dollar 53,000 hmang thu khawm tuta hma khan a lo puong tah. Nikum han adult film star Scottine Ross leh iemanichen an inzui a, sienkhawm thla 8 hnunga an lo inthe nawk ta a nih.

VAWISUN THUPUI
Kea lawn mihai leh in tlan a, an suksawl hle che chun, sakawrhai le chun iengtin am inel thei i ta? Muongna rama hman i tlu chun, Jordan ramngawa chun iengtin am thawng i ta.  Jeremia 12:5

Editorial
Fimkhur tak le inthuruol takin
August 31, 2015 nia Manipur Assembly in Anti­Tribal Bills pathum a passed hai dodalnaa security hai chetna leia thi Tribal Martyrs hai ruong chu November 30, 2015 a  ropui taka vuiliem ta dingin JAC le hnam thuoitu tum tum fekhawm  han an sukthluk ta a. Mipui thenkhat chun Bills 3 hai chungthua inbiekna le inbiekfelna la  um si lova Martyrs hai ruong vuiliem el dinga thuoitu han an hung rel chu an hrietthiem naw a, an hrietthiem nawna san khawm Martyrs hai ruong ei vuiliem chun ei movement a sukchau pha an ring lei a nih. Kawngkhat ngaituo chun thil awm tak a nih. A san chu ruong vui loa um zing chu ei movement mei sukhring zingtu pakhat a ni ve lei a nih.
   
Hieng laizing hin Tribal movement fe meka ei thil dit le ngiet a hlawtling theina dinga pawimaw chu tak chu Tribal martyrs hai ruong vui lova ei sie hi ni lo lovin, tlangmi hnam tum tum hai inthuruol tak le lungril inhmu taka ei thawtlangna a ni lem. Tribal Martyrs hai ruong hi a kum tel khawm sie inla ei lungril an hmu naw a, ei inthuruol chuong sinaw chun ei inrimna chu a thlawn el ning a tih. Hi lei hin thuoitu han ruong vui dinga an ti hi thiltha lem dinga ngai le pawm el chu ei hadam lemna ding ning a tih. Tuhin Martyrs hai ruong Morgue­ah an la um leiin sum le pai, tha le hun tam tak ei seng a, vuiliem an ni hnunga chun an ruong enkawlnaa sum seng hai popo kha a Martyrs sunghai sawmdawlna le ei movement le inzawma a tulna haia hmang thei ei ta, ruong  tawiawm le enkawlnaa tha le zung ei seng popo kha tul ta lovin hrat taka hma ei dawm thei lem ring a um.
   
Remruotna anga tluong taka a fe thei chun Tribal Martyrs hai ruong chu November 30, 2015 khin vui a nita ding a ni a. Ministry of Home Affairs in  state sawrkar, phaimi, tlangmi le an zawmpi party/organizations hai  thurawn lak hmasa phawt a ninaw chun Bills 3 hai chungthuah thutlukna siem ninaw nih tia ziek ngeia assuarance a hung pek leia JAC le hnam thuoitu han Martyrs hai ruong vui dinga an hung rel a ni a. Ruong ei vuiliem leia ei movement ei tawpsan ta tina a ninaw ang bawkin MHA in assurance a mi pek leia ei demand a hlawtling tina a ni naw a, thaw ding tam tak a la um a, chu laizing chun state sawrkar hin var takin eini tlangmi hai lai ‘devide and rule policy’ hmang tumin thil a thaw zing a nih ti hi ei hriet tlat a tul. Ei demand suk sukukna ding le ei unity suksietna dingin pawl thenkhat thuoikawi khawm a tum ngei ding a nih. Hi kawnga hin ei fimkhur hle a tul ding a nih.
   
Ni khat chu Ainuvet chun tui an hlieu thiemnaw leiin Satel chu vadung inhlieukai pui dingin a fiel a, Satel chun, invet a ni, ka tui inhlieu laiin mi se’ng I tih’ tiin a hniel a, sienkhawm Ainuvet chun, ‘ka se che chun ei pahniin tui sungah ei pel el ding an nawm, se nawng ka che tiin a dawn a, chu phing leh Satel chun indik nia hriein ringzo takin Ainuvet chu a chunga inkawptirin tui an hlieu pui ta a, sienkhawm vadung lailung an tlung lai tak chun Ainuvet chun dittawkin Satel chu a zuk se a, an pahni chun tuipui mawngah an pil tla vung vung el a nih. Satel chun ieng dinga I mi se? tia an dawn chun, Ainuvet chun, ka mizie reng a nih a ti san et el ang deuin ei inthlawppui le ei thawpui hai lakah ei fimkhur hle a tul.
   
Pawl thenkhat hi sawrkar chun iemanichena dingin mi lo thlem lungawi khawm a tum ngei ding a ni a, chu kawnga chun a chunga Ainuvet le Satel ngirhmun ei chang nawna dingin ei thawpui le inthlawppui hai laka ei fimkhur hle a pawimaw ding a nih. Tuhin ruong buoipui le enkai pawl leh, ei movement fe meka hmadawm dan ding buoipuitu pawl leh ei um nuk a, ruong vui lova la um hi ei movement sukhring zingtu niin inlang sienkhawm a buoipuitu le a thungpuitu nupui hai khawm an sawl ta hle a, kristien hai hun pui tak Krismas a hung hnai ta bawk leiin vuiliem chu a awmnaw hran chuong nawh. Thil tha ei dit a, ei dikna le chanvo humhim ei nuom tak tak a ni chun ruong vui le vuinaw in a mi sukbuoi ding a ni nawh. A pawimaw tak chu inhmangai diel diel a, tukhawm inensan lova inthuruol taka ei thil dit a puitling hma khata ei nawr hi a nih.
   
Tuchena sawrkarin ei thil ngen duthusama a mi ngaisak nuom nawna san khawm hi ienglei dang ni lovin ei inthuruolna a that tawk naw lei, ei ni sunga ei insekhek a la nghak lei a ni thei. Hi lei hin inthuruol taka kal ei pen tlang zing theina dingin unau hnam tin hai hin lampui ei dap zing le, sawrkarin a fala min tuorempui a tum a ni khawma fimkhur taka tribal mipui popo thatna le himna ding a ninaw chun ‘NO’ ei ti ngam a tul. NO ei ti ngam naw chun nikhat chu ei la hung buoi nawk tho tho ding a nih ti hriein ei ram le hnam sanhimna dinga det taka pumkhata ei ngir zing a pawimaw a nih.

Don't Miss
© all rights reserved
made with by Simon L Infimate