Tuolsung
Tribal Martyrs hai ruong November thla sunga vui dingin an rel
CCPur: Joint Action Committee (JAC) Against AntiTribal Bills inrawinain zani zantieng 1:00PM khan JAC Information Centre, KKL Complex, CCPurah Tribe Leaders (Inpui/Council); Philanthropic Organisations le Church leaders han joint meeting an nei. Hi huna hin JAC Chief Convenor chun Ministry of Home Affairs thusuok (Press Release) puonglangna le Manipur CM kuoma Charter of Demands peklut chungthu hai a hrillang. Zanita Joint meetinga an hriltlang tak hai chu Ministry of Home Affairs Press Release, JAC Charter of Demands bakah hmatieng peia hmalak dan ding le thu pawimaw dang dang an nih.
JAC inrawinaa joint meeting chun Distrit Hospital, CCPur Moguea la zal mek Tribal Martyrs 9 hai ruong chu November, 2015 thla sunga vui ding; vui ding ni le hun chu JAC, Inpuis le Tribe Council han an sukfel ding tiin an rel bakah Tribal Martyrs 9 hai ruong chu Autonomous District Council (ADC), CCPur in ram a pek, ADC Complex, Bungmual, CCPur hmuna vui ding le tribal martyrs hai ruong hi a ropui thei ang taka vui ding tiin an rel.
JAC, ATSUM le MTFD han Delhi hmuna Home Minister le Ministry of Home Affairs a official tum tum hai inhmupui a, Ministry of Home Affairs chu Bills pathum hai chungthua kut hung rawl dinga ngen a ni angin; November 9, 2015 khan Ministry of Home Affairs chun press release an insuo a, AntiTribal Bills pathum hai chungthuah Manipur sawrkar, phairam le tlangram mi hai le interested parties hai rawn hmasak an ni hma chu thutlukna siem a ninaw ding thu thusuok siema a hung hril le inzawma zanita JAC inrawinaa Inpuis/Tribe Councils han joint meeting an nei huna Tribal Martyrs hai ruong hi vui dinga an rel ta a nih.
JAC chun November 9, 2015 a kha Manipur CM kuoma Charter of demands an pek , Charter of Demands a ngenna an siem hai ni 5 sunga dawnna pe dinga deadline an pek, deadline hi zanikhan a tawp ta a. November 15, 2015 hin JAC, Inpui/Tribe Concil, Church leader le Philanthropic Organisations han Closed door meeting an la nei nawk ding niin ei thu dawngna chun a hril.
Pu Ngamrothang in Rs. 10,000 in martyrs hai a ral
CCPur: Zanikhan District Hospitala JPO kutah Tribal martyrs ralna le hliem hai thangpuina Rs. 21,000 le puon 9 a lut. Zanita ralna le thangpuina petu hai chu Letkholun Haokip of Jangmuol Rs. 1,000/; Evangelical Synod Church Rs. 10,000 le Pu Ngamrothang Hmar, ExChairman, NC Hills Autonomous Council le Muolhoi Youth Club (MYC) neitu chun Rs. 10,000 in a hung ral bakah puon 9 in a hung tuom bawk. P u Ngamrothang hin CCPur mi a Club player fethlenga ralna hi a hung thawn a ni a, Dr Rochunga Pudaite khawm Hmar Thangsuopuon in a hung tuom bawk.
MYC hin 11th CEM Cup 2015 final Nov. 8, 2015 nia NL Daulagupu Sports Complex, Haflong hmuna Final inkhelna hunah Barak FC, Nagaland chu 21 a hnein Champion an lalak a, Cup bakah sumfaiin Rs. 2 lakh lawmman an dawng a nih.
Chun, JAC Finance SubCommittee kutah Thanlon Blocka Suongsang village chun Tribal martyrs hai ralna dinga in tina Rs. 100/ an dawl khawm a rengin Rs. 6,500/ an inhlan bawk.
Interaction On Wise Use of Resource nei
CCPUR: Arcadia Career Development Socoiety (ACDS) le Mangaal Sustainable Solutions Pvt. Ltd. hai thangruolin zanikhan Arcadia School, Khawmawi, CCPurah “Interaction On Wise Use of Resource: Sustainable Options Through Renewable Energy Sources” ti thupui awareness an buotsai. Dr. Immanuel Zarzosang Varte in Keynote Address a hril a, David Buhril Chairman, SIPHRO chun hun a keihruoi a, Panelist 3 Devakishore Soraisam in “Energy access issues: An overview”; Debory Fimsangpui Joute in “Energy crisis in Churachandpur: Brief discourse” le Mary Beth “Livelihood activity options visavis energy problem” ti thupui hai hmangin thu an hril.
Session hnina chu Interactive Session hun a hmangin “ Available alternatives/solutions, what more needs be done to address the energy access issue” ti le inzawma indawna le dawnna hun hmang a ni bawk. Hi huna hin Mangaal Sustainable Solutions Pvt. Ltd. chun demonstarations neiin Solar based product thenkhat an suklang bawk. Tuhin Mangaal Sustainable Solutions Pvt. Ltd. chun Thailane, Rengkai, CCPur (Manipur) hmuna khawm Office an lo nei ta a nih.
NYKS Foundation Day hmang
CCPur: Zanikhan NYK Office, Tuibuongah H. Doungel, District Youth Coordinator, NYK/Churachandpur inrawinain Nehru Yuva Kendra Sangathan (NYKS) Foundation dai hmang a ni a, office staff le National Youth Volunteer hai bakah National Youth Corps member hai an thang.
NYK hi November 14, 1972 a indin niin tuchena hin India ram sungah NYKS Zonal office 26 a um ta a, hi hnuoia hin NYK Office 623 a um tiin H. Doungel chun a hril. NYK office 623 hai hnuoia hin National Youth Corps (NYC) member 12000 an um a, NYK office hnuoiah Youth Club 293 affiliated an um tiin a hril bawk. Hi huna hin NYK sin thaw dan le a sinthaw tlangpui hai a hrillang bawk.
Aadhar card le no. pelut dingin
CCPur: Kim Joe Gas Service hnuoia LPG Consumer/customer hai chu an hmatienga mani Aadhar Card le Consumer Number le Mobile No. pelut dingin Manager chun inhriettirna a siem. Hi hi IOCL a inthawka thusuok a nih.
J&J Fast food open air
CCPur: J&J Fast Food, tuta hmaa New Bazar, Synod Supermarket building hnunga um hlak chu Rengkai tieng an insawn tah. J&J Fast Food chun tulai hin a hmun siemfelna sin an thaw mek a, tuta inthawk sawtnawte hnunga dawr thei dinga hawng ning a tih. Dang dai taka fak ding inhnik tak tak fak puma khaw thlir theina dinga open air a hawng tum a nih. A hmun hi Rengkai Leilak bul lai a nih.
DC in Exel Foundation Academy a hawng
CCPur: Mr Lunminthang Haokip, IAS, DC/CCPur chun zani 11:00AM khan Belam Veng, Headquartera school thar ‘Excel Foundation Academy’ khuolliena thangin a hawng. Hi huna hin G. Thangkhosuanmung EM/ADCC aiawin Pauliankhup Guite, guest of honour le T. Goukhomang, ZEO/CCPur functional President in a thang.
DC/CCPur chun, ei rama Class X result enin private school hai khawmin competition an nei tul a ti thu hrilin Govt. School hai neka private school han quality education an fepui tha lem leia private school hai result a tha lem hlak a ni thu a hril.
India ram pumpuiah kum 2012 a inthawk khan New Education Policy hmang a ni a, hi policy thar hi private school hai khawmin an zui a pawimaw tiin a hril a, student hai lekha inchukna chau ni lo thildang khawm an thiem belsa theina dingin Teacher han orientation an nei zing a pawimaw thu, lekha inchuk ngawr ngawr ni lova activities dang dang student han an nei a pawimaw thu a hril. Teacher hai chu student hai pronunciation indik taka inchuktir hlak dingin a ngen.
T.Goukhomang chun, Central govt. in school code a pek nei lo han sawrkara inthawk hamthatna iengkhawm an hmu theinaw thu hrilin School pakhata Class I a inthawk kai char chara Class X tlung chara result thatnaw ding inlauna leia inchuklai intlinglo tir hi tawpsan tul a ti thu; student hai thiemna ding chu hotuhai mawphurna a nih tiin a hril. Private School hawng hrim hrim a hlawtlingnaw an um nawh. Sum ditnaw tukhawm ei um naw a, sienkhawm business taluo chu tha a tinaw thu hrilin private school hai chu zinga ei ram le hnam thuoitu ding siemtu an ni leia hmangaina leh student hai enkawl dingin a ngen.
School founder S. Ginmang chun, private schoolah a kai zonaw leia kum 1991 a inthawk English Medium School hawng tumna a lo nei tah, sienkhawm 2016 a session a inthawk tan thei dinga a hawng thei chau thu hrilin quality education a ngaipawimaw ding thu a hril.
MPCC in Nehru piengchampha an hmang
Imphal: Zanikhan Manipur Pradesh Congress Committee (MPCC) chun Congress Bhavan, BT Road, Imphal hmuna India Prime Minister hmasa tak Pandit Jawaharlal Nehru piengchampha a vawi 125na ( yearlong celebration) kharna hun an hmang. MPCC President le Dy. CM Gaikhangam chun, BJP chu Manipura cheng mipui hai inthuruolna sukse tuma thilthawtuin an tu a; Manipur hi a sunga cheng hnam tum tum hai ta a ni tia hrilin Manipur ram thedarna ding thil hrim hrim chu tosan ninaw nih tiin a hril.
November 21, 2015 nia Manipura Thungju le Thangmeiband A/C haia byelection hung um dingah mipui han a vawithumna dingin lesson an inchuktir ding a nih; BJP in Centrea sawrkarna an hung siem thla 6 hnungin Delhi chun lesson an chuktir ta a, tulai hnai el khan a vawihnina dingin Bihar mipui han BJP chu lesson an inchuktir nawk a, tuhin a vawithumna dingin Thongju le Thangmeiband A/C ah lesson an inchuktir nawk ding a nih tiin a hril.
UNLF nuhmei cadre 1 an man
Imphal: 24Assam Rifles chun November 10, 2015 khan Khudengthabi check postah nuhmei UNLF cadre Pvt. Miss Sunny @ Thadoi (22) d/o Mutum Singh of Oinam, Bishnupur District an man a, a kuta inthawk Mobile phone 1 le Voter Identity card hmu a nih. An mi man hi Moreh Police stationah an peklut niin zanita PRO, Assam Rifles thusuok chun a hril.
Solar lights an sem
Imphal: 45Assam Rifles chun Assam Rifles Civic Action Project hnuoia zanikhan Imphal East districta Swombung Subdivision sunga Takhel village khaw mihai hmang dingin Solar Lights an sem. Solar Lights hai hi 45AR a SecondinCommand in inhlanna a nei a, Assam Rifles chun a tul le pawimaw anga thangpuina an pek pei ding thu a hril.
National Library Week hmang
Imphal: Manipur Library Association (MALA) chun Ministry of Culture, Government of India le Raja Rammohun Roy Library Foundation, Kolkata hai leh thangruolin ni 2 sung aw ding zanikhan Manipur Press Club, Imphal hmunah “Modernization of Library in Digital Era” ti thupui hmangin National Seminar an tan. Seminar hawngnaa hin K Radhakumar Singh, IAS, Secretary (Art and Culture/Revenue), Th Prameshwor Singh, Director NIELIT, Imphal, Kangjam Chaoba Singh, President Manipur Library Association (MALA) and Prof Narendra Lahkar, HOD, Library and Information Science, Guwahati University hai guest in an thang.
Grand Alliance Lepgislature party leader dingin Nitish Kumar thlang: Nov. 20 in sesamna a nei ding
Patna: Bihar Assembly Election nei zo hlima hnena changtu Grand Alliancea RJD, JDU le Congress chun zanikhan joint Legislature Party meeting an nei a. Hi huna hin Bihar CM ni lai mek Mr Nitish Kumar (64) chu Legislature Party Leader (CM) dingin lungruol takin an thlang. Nitish Kumar hming hi RJD Parliamentary board chief Rabri Devi in a proposed a, Congress General Secretary CP Joshi han an thlawp a nih.
Joint legislature party meeting a hin fodder scam (ranbu inchawkna ding sum chawkchawrawia intumna) case leia electiona ngir ve thei lo RJD President Lalu Prasad; JD(U) President Sharad Yadav le Joshi le JD(U) General Secretary KC Tyagi hai khawm an thang. Mr Nitish Kumr hin senior party leaders hai leh Raj Bhawan a fein Bihar Governor Ram Nath Kovind kuoma sawrkar insiemtir dingin ngen an tih. Mr Nitish Kumar hin November 20, 2015, 2 PM khin Patnaa Gandhi Maidan hmuna Bihar Chief Minister dinga sesamna nei a ta, ama le inruol hin a minister ding hai khawmin sesamna nei nghal an tih. Bihar Assembly seats 243 um naa hin ministers 36 an um thei a; tukum Election a khan RJD in seats 101 an ngir naah seat 80 an lak a, JDU in seats 101 an ngir naah seat 71, Congess in seats 42 an ngirnaah seat 27 an lak a, BJP in seats 160 an ngir naah seat 53 le Others in seats 12 an lak a nih.
Paris khawpuiah terrorist chetna leiin mi 128 an thi
Paris: Zirtawpni zan khan France ram Paris khawpuiah hmun hran hran Concert enna Bataclan concert hall, restaurant; football an inkhelna Stade de France national stadium haia silai le bomb hmanga terrorist hai chetna leiin mi 128 an thi a, tam tak an hliem. Paris city hall official thusuok in a hril danin silai chawi 4 hai chun Bataclan concert halla rock concert entu mi 87 an kap hlum niin a hril.
French le German national team hai inkhelna France National stadium beitu mi 8 an thi a, hi laia 7 hai chu bomb puok leia thi le pakhat chu police han an kap hlum a nih. French President Francois Hollande chun hi thil tlung lei hin state of emergency a puong a, Schools, Museums, tourist sites hai chu khar vawng an ni bawk. Paris khawpui runtu hai hin AK47 silai an chawi a, “Allahu Akbar’ ti in an khek bawk nia hril a nih.
Paris a thil tlunga thi hai lai India mi chu thang an um thu hriet a ni nawh tiin External Affairs minister Sushma Swaraj chun a hril. Soccer stadium va beitu thi hai laia pakhat ruong bulah Syrian passport hmu nia hril a ni a, Islamic State chun hi thil hi an ni thaw a ni thu an puong. Khawvel rambung tum tum thuoitu han hi thil tlung hi an dem thu an puong a. French President chun Turkeya G20 Summit nei ding chu fe ta lo dingin a kansel.
Car a kam bomb hrat takel dapdawk
Nongpoh: Zani hmasa khan Meghalayaa Ri Bhoi district sunga Rangsakona villageah chun Car ML10B1044 hnuoia kam bomb hrat takel hmu a ni a, bomb squad han inrang taka la dawkin puok thei lo dingin an siem. Car neitu hi Contractor Gilbert Sangma a ni a, tuta hma khan GNLA helpawl han Rs. 6 lakh ngenna lekha an lo pek ta nia hril a nih.
Bomb hi a car neitu in a hmu a ni a, inrang takin Police kuoma an tlun a, chu hnunga bomb hi lakdawk le puok thei lo dinga siem a nih. Bomb Squad incharge B. Pukayastha chun, bomb hi remote control IED a ni thu hrilin ralkanga inthawk khawma mobile phone SIM hmanga sukpuok thei a ni thu a hril.
Nehru thlanah par inhlanna an nei
New Delhi: Zanikhan India Prime minister hmasa tak Pandit Jawaharlal Nehru piengchampha vawi 125na ni a, hi le inzawm hin zanikhan President Pranab Mukherjee, Vice President Hamid Ansari, PM hlui Dr Manmohan Singh; Congress President Sonia Gandhi, Congress Vice President Rahul Gandhi hai le milienmilal tam takin Shanti Van hmuna a memorialah fein inzanain par an van hlan tawl.
President in 35th IITF a hawng
New Delhi: President Pranab Mukherjee chun zanikhan Pragati Maidan, New Delhi hmunah 35th India International Trade Fair (IITF) a hawng. IITF a hin India le ramdanga intahwk firms 7000 vel an thang ding a nih. IITF hi segment pahnia the a ni a, November 1418, 2015 inkar sung chu business Days a hmang ning a ta, November 1927, 2015 inkar sung chu general public days ning a tih. Tukuma hi fair thupui chu ‘Make in India” ti a nih.
------------------------------------------------------------------------------
VAWISUN THUPUI
Insawp unla, insukfai ro, ka mithmu phak nawah in thilthawhai hi a suolna chu sie hmang ro; suol thaw thaw el hi ma ta unla, thiltha thaw inchuk ta ro; Isai 1:16
Editorial
Mi dawnril ei hnamin a mamaw
Tulai khawvel thiemna le varna hung insang peiin a ru inno no hnawdawk peina khawvela cheng ei ni ta leiin a ru dawng deu hai chu hnawchep le hnawdawk ei hung ni pei ding a nih. Mitin hnam tin han mani hmakhuo chit siela ei hun tawng mek le hun la hung um pei ding haia thil thaw dan ding le lo hmasawn dan ding ‘strategies’ felfai tak induonga var taka hma an lak lai, hmadawm dan ding mumal tak nei lova a tla chawp ringa ei fe pei chun ei ram le hnam hi ei humhim zonaw ding a nih. Ei ram le hnam san himna ding hin thil a hming mei meia thaw ni lo, ngaituona satlie mei mei hmanga thilthaw ni bawk lo, ngaituona tha, inril le inthuk tak, lungril sungril taka inthawk ngaituona senga, ram le hnam damkhawsuokna ding le thatna ding thil dangdai deu thaw dan ding ngaituomi; inchuksang le degree insang satlie ringawt ni lo, mivar, mi dawnril, sap han ‘Philosopher’ an ti ang chi hi ei hnamin a mamaw takzet a nih.
Tulai ei ngirhmun le thil tuoka khawm hin ei hang thlir a, strategy felfai le tha tak neisa lo ni inla chu tu ang ngirhmun chau hi ei tlung ring a um naw a, strategy mumal tak ei neinaw bakah ei khawvel hun tawng mekah ei hmalak dan ding chiengkuong tak ei neinaw leiin ei phekbuoi mup mup el a nih. Chuong lai chun a hnam bing zawnga thlir khawmin unau thenkhat hai chun an thilthaw dan ding fel taka induongsa neia an um laiin thenkhat ruok chun a tlachawp ei ring a nih ti inla ei hrilsuol taluo naw el thei. Hi lei hin movement fe pui seng seng lai khawm a chiengkuong naw deu hai chu ei dawng deu pei ding a nih ti chu an lang chieng hle a nih. Hi hi ienglei dang ni lovin mi dawnril ei hnamin a tlaksam lei a nih.
Khawvel rambung tum tum le hnam tum tum hai ei thlir chun, ram changkang, hmasawn; khawvela la um ngai lo thil thar chingdawktu le ngaituona var tha tak tak sepsuoktu hai chu mi dawnril, ngaituona inthuk tak seng mi hai tamna hmun an ni pei. Hi lei hin hnam ropui le hnam hmasawn ei ni theina ding chun, mi thaw dawksa ring el ni lo; mania thil iemani tak hmusuok le ngaituo suok tumna nei mi; dang dai deu ngaituo suok mi ei um a tul. Pathienin khawvela hin rohlu tam tak a phumruk a, chuong ro phumruk hai ngaituo dawk theina ding chun mihriem hai ngaituo theina thluok a mi pek seng a; chu hmang thiem thiem hai chu hnam var, changkang, ram hmasawn le hausa an hung ni pei a nih.
Eini rawiin mi la hmu lo le ngaituo suok lo hmu tumna nei lova mi thaw suok le hmusuok sa chena intivei taka ei um sung hin chu ei ropui naw hle a nih ti hi inhre inla nuom a um. Ram hmasawn le hnam hmasawn ni ding chun thalai han ngaituona sawrbing a, thil la um ngai lo le thil thar hmusuok tumna ‘creativity’ ei nei lien a, chuongang ngeia ei ngaituona sawrbinga a tha tienga ei lungril ngaituona ei seng a tul. Hiengang mi ei tlasam leiin ei ram le hnamin hma a sawn theinaw a nih.
British novelist Virginia Woolf in ‘“Odd how the creative power at once brings the whole universe to order” tia a lo hril hin ngaituona inthuk le inril in thil a sukdanglam thei zie chieng takin an lang a, chu sukchiengna chu Bihar Assembly Election zoa hung inlang Prashant Kishore kha a nih. Mr Prashant Kishore (35) hi public health specialist, statistic whiz, UN Mission hnuoia lo thawk; Mr Narendra Modi hnuoia December 2011 a inthawka sin lo thaw tah, kum 2014 India General Election-a Modi hlawtlingna dinga campaign strategy induongtu; a hnungah Bihar Assembly election-a Nitish Kumar inrawi Grand Alliance campaign strategy tha taka induong pektu a nih.
Mr Prashant Kishore hi health care professional a ni a, sienkhawm hienganga Politics tienga nasa taka a hung hlawtling lei hin India rama chun a bikin Political party tum tum hai lai an lar ta hle a, tuhin election hmasawn ding West Bengal, Tamil Nadu, Punjab le Uttar Pradesh hai chun campaign dan ding thua inthlawppui dingin a pawl indin Indian People’s Action Committee (IPAC) chu an dawr mek a nih. A ngaituona lungril nasa taka sawr binga, ram mipui lungril thlek dan inthuk taka thlira, mipui hne thei dan ding thil thar le ngaituona thar a ngaituo suokin Mr Narendra Modi tawngkam hai dawn let dan ding hai chen a dapsuok zung zung bakah an hma a lo khal zat zat el a nih.
Mr Prashant Kishore in a lungril ngaituona sawrbinga, thil thar a hung induong hai leia Modi inrawi BJP in Lok Sabha Electiona ring phak baka hrat filawrna an hung chang le Bihar-ah Grand Alliance in hnena an hung chang nawk hin ngaituona inthuk tak neiin thil a thaw thei zie chieng takin an lang a, tharum thang der lovin BJP an hneban der el a ni kha. Hi lei hin ei ram le hnam tluse mek tungding nawkna dingah thalai han ngaituona thar le thil thar ngaituo suoka, ei hun tawng mek le inzawma thil thar thaw dan ding ngaituo suok dinga mani lungril ngaituona ei sawrbing a tul. Nuoma a tlachawp ringawt ei ring a ni chun ei ram le hnam hi a la boral ngei ding a nih.
