Tuolsung
JAC inrawinain joint meeting nei
CCPur: Zani zantieng 2:00PM a inthawk khan JAC Against Anti­Tribal Bills inrawinain JAC Information Centre,  KKL Complex, IB Road­ah joint meeting nei a ni a, hi huna hin Tribe Leaders, Philanthropic Organisation leaders le Student leaders hai an thang. Meeting huna hin JAC in Manipur CM kuoma Charter of Demands an pek chungthu, Bill 3 hai le inzawma Ministry of Home Affairs, Govt. of India thusuok chungthu le hmatienga hmalak pei dan ding hai hril­tlang le rel a nih.
    
Zanita Joint meeting a hin thutlukna iengkhawm siem a ninaw a, November 14, 2015, 12:00 a inthawk khin joint meeting nei nawk ning a ta, chu huna chun hma tienga hmalak pei dan ding thuah thutlukna lak ning a tih.

Tribal Martyrs ralna
CCPur: District Hospital­a JPO kutah Tribal martyrs hai ralna le thangpuina zani le zani hmasa hai khan mi 3 le Organisation 3 han Rs. 7100 le Maibal pum 10 an inhlan. November 11, 1015 khan Imphal­a Imphal Tribal Colony Area Unit/Assn. in JPO hmang dingin Rs.1000/­; Haongam Guite of Molnom in Maibal pum 10; Lalchungthang of Saidan in Rs.100 an pek. November 12, 2015 (zanikhan) The Salvation Army, Eastern Division Manipur in Rs.5000/­; Upa H. Thiauzakhup of Bungmual, Lamlian Veng in Rs.1000/­ an pek bawk a nih. Nov 13, 2015­a District Hospital ruong sunna huna Thingpui inlumtu ding KKL ning an tih.

TWWA in Zu tam tak an man
CCPur: Tuibuong Women Welfare Association (TWWA) chun zani zantieng 2:00PM khan OK Hotel, Tuibuong Forest Gate le a se vel lai motor inlawn hai an dapnaah Maruti Car (MN 01S­2050) a inthawk tuolsung (local) Zu packet 195 (1 litre pack) le 20 litre pack 1 dapdawkin an man a, zani zantieng 3:00PM khan Zu an man hai hi press/media hai hmuin an suksiet vawng.
      
Zu an man hai hi OK Hotel, Tuibuong Forest Gate in zawr dinga hmun danga inthawka an hung phur a nih. TWWA chun OK Hotel hi zu zawr ta lo dinga warning an lo pek tasa a ni a, hi lei hin zanita inthawk khan Hotel hi hawng thei ta lo dingin Chabi in an kal pek.

Thianchinmang Jail­a thun
CCPur: Goverment official seal le document lem hmanga mi kuoma zawrtu mana um Thianching @ Davis Mang (66) s/o (L) Jamgin of Mission Compound chu Chief Judicial Magistrate (CJM)/CCPur in Judicial Custody (Jail) a sielut dinga a rel angin Police han Jail­ah an thun tah. Thianchinmang chunga hin Police chun FIR No.91 (10) 2015 CCP­PS U/S 468/34 IPC&472 IPC an registered a nih.

Scholarship Exam Nov. 15 a nei ding
CCPur: November 15, 2015 (Sunday) khin Phungkhothang Govt. H/S­ah State Level Competitive Scholarship Examination, 2015 um a tih. Hi huna hin CCPur District­a Class VI inchuklai 183 le Class IX inchuklai 382 thang an tih. Exam hi morning shift 10:00AM­11:00AM le evening shift 12:00­1:30PM ning a tih.

SHG han training
CCPur: IGSSS huoihawtnain zanita inthawk khan ni 2 sung aw ding Sielmat ICI Centenary Hall­ah “ 2­Days Capacity Building Training on Self Help Group Livestock Management” tan a nih. Hi huna hin Henglep Sub­Division­a SHG 14 a inthawk member 70 vel an thang. Resource person in Khaimang, Monitorning & Evaluation, NERCORMP/CCPur; Dr Ngaka, Dy Director, Vety & AH/CCPur le Thangboi Haokip, Co­ornidator, IGSSS hai an thang.

CDSA Election notice insuo
CCPur: Hungtlung ding November 21, 2015, 10:00AM khin B. Vengnuom Community Hall, CCPur­ah kum 2015­2018 sunga Churachandpur District Council Teachers’ Association (CDCTA) thuoitu thar ding thlangna Election um a tih. Nomination paper file nuom han November 16­18, 2015 chenin file thei ning a ta, Nomination paper file a um hai November 19, 2015 ah Scrutiny le inhnukdawk nuom hai inhnukdawk thei an tih tiin Returning Officer, CDTA, Election chun Notification an suo. Thlang ding hai chu­ President, Vice President, Secetary, Finance Secretary, Treasurer, Joint Secretary le Inf. & Publicity Secretary hai ning a tih.

DC /CCPur a hungtlung
CCPur: Thaw ding pawimaw a nei leia October 26, 2015 a CCPur suoksana Delhi pan le Delhi­a inthawk US –a inzin Mr Lunminthang Haokip, IAS, DC/CCPUr chu zanikhan CCPur a hung­tlung nawk tah. DC/CCPur hi a quarter­ah chawlhadam in November 16, 2015 khin office kaiin sin thaw tan nawk a tih.

Santro Car in mi 6 a rawt hlum, mi 6 na takin an hliem: mi rawt hlumtu Police han an man
Imphal: Thoubal District a chun zani zantieng 1:00PM khan Santro Car MN04A­4832 in Kiyam Babu Market laia dice game inkhel hai a baw a, nuhmei pahni thangin mi 6 an thi bakah midang 6 na takin an hliem. Mi 3 hai chu a hmuna thi an ni a, 3 dang hai ruok chu Hospital panpui an ni hnunga an hliemna tuorzo lova thi an nih tiin ei thu dawngna chun a hril. Chun, hliem hai laia pakhat Sinam Oken (45) chu a hliem inrik zuol leiin mithi hi tuta nek hin an la hung tamlem ring a nih. 
    
Santro Car khaltu hi army personnel, tuta Leimakhong­a posting mek army number 14679438H657 EMEBN Md. Riyas Khan (28) s/o Md. Habibur Khan of Sora Mayai leikai a ni a Car­a hin a ruoldang pahni hai khawm an chuong a ni a, mi rawt hlumtu Car a chuong hai pathum hi mipui lungsen han nasa takin an vuok a, sienkhawm Police hai an va fe hman leiin an vuok hlum hman tawl em nawh. Santro Car hin dice inkhel hai a hrut phei hnungin hi thiltlungna hmun laia innghat Maruti 800 a baw bawk a nih.
    
Hi thil tlunga thina tuok hai chu­ Khundongbam Babu Singh (61), a nuhmei Kh. Tombi Devi (49); Sinam Ongbi Akasini Devi, (47); Maimom Sunil (47), Mutum Manihar (53) le Aoijam Bablu Singh (19) hai an ni a, Thoubal Kiyam Siphai Babu Market a cheng vawng an nih.
    
Hliem 6 hai hi an rengin RIMS panpui an ni a, sienkhawm 3 hai chu Shija Hospital panpui nawk le pakhaat Advance Hospital panpui a nih. Hliem 6 hai laia 3 hai chu Mutum Roben, Sinam Oken le a naupa Mutum Apik hai an ni a, Sinam Oken hi a hliem inrik hle a, Raj Medicity Hospital­ah enkawl a nih.
    
Car a mi raw hlumtu Md. Riyas Khan hi Case siem khum a nih. Hi thiltlung lei hin boruok a sosang nasa hle a, law and order enkaitu dingin sawrkar chun Thoubal district­ah Police tamlem a tirlut.
           
Diwali festival hun lai le Ningol Chakkouba November 13, 2015 a hung um ding leia urlawknaa hiengang inkhelna hi an thaw hlak hrim a nih.

Fish Fair­cum­Fish Crop Competition nei
Imphal: Zanikhan Director of Fisheries and staff, Govt. of Manipur huoihawtnain ISBT Khuman Lampak, Imphal hmuna Fish Fair­cum­Fish Crop competition nei a nih. Hi huna khuolliena thang Commerce and Industries Minister Govindas Konthoujam in thu a hrilnaah, indigenous fish Pengba chu ministry of Agriculture hmalakna hnuoia Loktak Lake­ah hmu thei dinga a um ta thu a hril a, Nga hi sungkuo tin hme pawimaw tak a ni leiin sawrkar chun greater Imphal­ah Nga zawrna hmun hawng belsa a tum tiin a hril.
    
Minister of Agri and Fisheries Manipur, Abdul Nasir chun, Ningol Chakkouba huna ding hin Manipur chun Nga metric tonnes 40 a mamaw a, Manipur in Nga metric tonnes 30 a tharsuok a, a dang po chu state danga inthawk laklut hlak a nih tiin a hril. Manpur a chun fisheries thawna ram hectre 56461 a nei a, sienkhawm hi laia hector 19400 chau hmang a nih tiin a hril.

NLD in hma an sawn pei; result puong ta po 359-ah NLD in 291 an lak tah
Yangon: November 8, 2015 nia Myanmar General Election neia uma vote tla hai tiemna chu a fe mek a, Aung San Suu Kyi inrawi National League for Democracy (NLD) chun hma an sawn pei a, result puong tah seats 359 haiah NLD chun seats 291­ah hratna an chang ta niin Myanmar Election Commission chun a hril. 
    
NLD hin Myanmar Parliament Inpui pahni haia majority nia sawrkarna an siem theina dingin seats 333 an lak a tul a, majority an nina dingin seats 42 an la mamaw belsa a nih. Result tiem ta povah sawrkarna siem lai mek military sawrkar thangpui Union Solidarity and Development Party (USDP) chun seats 33 percent an lak tah.
    
Myanmar Military Chief Min Aung Hlaing le President Thein Sein hai chun hlawsamah lan ngai chie naw hai sienkhawm final result puong zoah national reconciliation thuah inbiekpui an remti bawk. Suu Kyi chun Myanmar parliaent members 664 umnaah NLD in seats 75 percent bekah hlawtlingna an chang a beisei thu BBC in interview an thawnaah a hril.
           
Hieng laizing h in Myanmar sipai sawrkarin constitution an ziem huna khan Suu Kyi in President a chel theinawna ding le sawrkar an thuhnuoia a um zing theina ding bakah ngirhmun pawimaw hieng Defence, Home Affairs le Border Affairs hai chu military hai chauin an chel thei dingin an lo siem a. Hi lei hin Suu Kyi hin harsatna a tuok  tho ring a ni thu New York­based Human Rights Watch, Asia division­a Deputy Director Phil Robertson chun a hril.

Prime Minister Narendra Modi Modi zanikhan UK a tlung
London: Prime Minister Narendra Modi chu United Kingdom (UK) a ni 3 sung cham dingin zanikhan New Delhi a suoksan a, zanikhan London khawpui a tlung. Pu Modi hi Minister of state for Foreign and Commonwealth Affairs Hugo Swire in a lo tuok. Tuta tum hi Pu Modi hin India Prime Minister a ni hnunga Britain an zin vawikhatna a nih.
    
Pu Modi hi Taj Hotel­ah ama ngaisangtu hai le India mi UK a um han an lo lawmlut a, India le British flag hai pharin ‘Bharat Mata Ki Jai’ tiin an lo khek a, Pu Modi chun ama lo tuoktu hai hi a chibai tawl.
    
Hieng laizing hin PM Modi UK­a an zin le inzawm hin Dawning street lai protest an lo nei a, protest a thang hai lai hin Sikh, Tamil, Kashmiri, Gujarati, Nepali hai an thang a, ‘Modi Go Home’ and ‘Back off Modi’ ti haiin an lo khek khum bakah ‘Hindutva is threat to Indian Unity’ ti le ‘Modi not welcome in UK’, ‘Stop religious persecution in India’ ti inziekna placard hai an chawi tawl. 
    
PM hin Guildhall, London­a British Parliament­ah thu a hril ding bakah Mahatma Gandhi lim (statue) va en a ta, London hmuna Dr BR Ambedkar lekha an chuk laia a lo umna hlak In va sir bawk a tih. Hi baka hin Pu Modi chun UK a cham sungin Wembley stadium­ah India mi UK a um hai hmaah thuhrilna nei bawk a tih. Modi thuhril ngai dinga inzieklut chu 60,000 chuong an ni tah. Chun, Pu Modi hin Queen Elizabeth­II khawm Buckingham Palace­ah inhmupui a ta, Company tum tuma CEO hai inhmupuiin India rama hung sumdawng dingin fiel tawl a tih. UK a inthawk hin G­20 Summit­a thang ding le Turkey­a ni 2 sung cham dingin Pu Modi chun Anatalya khawpui pan a tih.

Nitish sesamna party thuoitu le CM tam takin an uop ding
Patna: Bihar Assembly Election nei zo le inzawma Mr Nitish Kumar in November 20, 2015 vela Chief Minister dinga sesamna a nei huna chun Congress President Sonia Gandhi; Delhi Chief Minister Arvind Kejriwal le West Bengal Chief Minister Ms Mamata Banerjee hai thangin party thuoitu tam takin an uop ve ding a nih.
    
Party thuoitu hi sesamna hunser uop ding hai lai hin Congress Vice President Rahul Gandhi; Uttar Pradesh Chief Minister Akhilesh Yadav; Odisha Chief Minister Naveen Patnaik le Assam CM Tarun Gogoi hai khawm an thang. India PM hlui Deve Gowda; Jharkhand CM hlui Babulal Marandi le Hemant Soren bakah Indian National Lok Dal leader Abhay Chauthala hai khawm thangve dinga fiel an ni bawk. JDU spokesperson Ajay Lok chun, sesamna hunsera hin BJP kaltu political party leader hai chu fiel vawng an tum thu a hril. Hi sesamna hunsera main guest chu RJD Chief Lalu Prasad le JD­U President Sharad Yadav hai ning an tih.
    
Mr Nitish Kumar chun sawrkar fe lai meka cabinet meeting nei zoah November 14, 2015 khin Bihar Assembly thiek dinga a recommend ding thu le hi ni ma hin Grand Alliance in sawrkarna thar insiemtir dinga hnina a siem ding thu zani hmasa khan a hril. Mr Nitish Kumar in sesamna a nei huna hin Council of Ministers ding 36 hai khawmin sesamna an nei ve nghal ding a nih.
    
Bihar Assembly seats 243 uma inthlangnaa khan Grand Alliance a RJD in seats 80, JD­U in seats 71 le Congress in seat 27 an lak a nih. Lalu party RJD a inthawk ministers 16, JD­U a inthawk 15 le Congress a inthawk minister 5 an um ding a nih.

Shashi Tharoor thu indawnna nei nawk el thei
New Delhi: Congress MP Shashi Tharror chu a nuhmei Sunanda Pushkar ringhla um taka a thina le inzawmin thu indawnna nei nawk a ni el thei. Delhi Police chun Tharoor hi lie detector hmanga thu indawnna nei dingin Court­ah hnina an pek a, Court in a remti huna polygraph test thaw ni dinga hril a nih. Sunanda thina le inzawm hin Police chun ina an sawr Narayan Singh, an driver Bajrangi le Sanjay Dewan hai thangin mi 6 polygraph test an thaw tah. Sunanda kha January 17, 2014 a five star hotel sunga a thisaa hmu a nih.

AGP in party dang thawpui an tum nawh
Guwahati: Kum thara Assam Assembly Election hung um dinga khin Asom Gana Parishad (AGP) chun political party dang inthlawpui an tumnaw thu AGP General Secretary Ramendra Narayan Kalita in a hril. AGP chun foreigners­free Assam indin an tumna cheltlat an tum a, party dang an inthuruolpui chun an thiltum hi a sukbahla thei ding nia an hriet leia midang inthlawppui an tumnaw niin Mr Kalita chun a hril.

Mizoram Excise han Heroin an man
Aizawl:  Mizoram Excise & Narcotics department­a Anti­Narcotic Squad chun November 10, 2015 khan Hunthar Veng Company lamthe lai Heroin gram 5 le a neitu C Zonunsanga (30) s/o Vanlalnghenga (L), Rangvamual le Lalthanngura (28) s/o Laltlanthanga, Vangchhia, Champhai district hai an man bakah zani hmasa khan Seling Custom check gate­ah Heroin grams 56 le a neitu Chinkhentuang (22) s/o TS Manga, Zokhawthar an man. Chun, Seling hmuna bawk hin heroin grams 160 le a neitu Lalnunfela (29) s/o Lalngaiha, Pawlrang, Champhai District an man bawk.

Diwali in Boruok pawrche SO2 level a suksang
New Delhi: Zani hmasa zana Diwali Festival hmang huna rawpuok, rawtek, rawmawi le kapvar nasa taka thaw a ni lei khan Delhi khawpui sunga chun boruok nasa takin a sukbal a, mihriem ta dinga thalo ding boruok thanaw SO2 level nasa takin an sang niin ei thu dawngna chun a hril. Delhi khawpui hi khawvela boruok thienghlim lo (air pollution) leia mihriem thi tamna hmun tak a nih. Boruok tha lo Sulphur Dioxide (SO2) hiplut hin mihriem hriselna nasa takin a suksiet thei a, hiplut dan i zirin natna dang dang hieng­ bronchoconstriction (inflammation, constriction of air ways) le asthma natna hai invawi thei a nih. Delhi khawpui sung haia chun Diwali festival leia rawpuok raw nasat leiin SO2 level hi 253 micrograms per cubic metres a tlung phak a nih.

Indopui II­na laia inkhing hai an inchibai
Tokyo: Kum 1944­a Indopui pahnina hun laia India hmarsak biel Kohima laia Japan sipai le Britain sipai hai na sa taka an indo huna dam suok British sipai lo ni hlak Sergean Roy Welland (94) le Japan sipai Imperial Army­a Lieutenant hlui Taiji Urayama (93) hai chu zanikhan Tokyo­a British Embassy­a a vawikhatna dinga inhmuin an inchibai bakah thingpui an dawn tlang. Hi huna hin Thai­Burma railway a Engineer sinthaw Japanese veteran Mikio Kinoshita (95) khawmin a va zawm ve a, thilpek an inpek tuo bawk. Welland hi Tokyo khawpuia an ram pahni hai reconciliation program buotsaia um sim dinga fe a nih.
--------------------------------------------------------------------------------------------
VAWISUN THUPUI
Tangka ngainatu chu tangkaah lungawi naw nih a; hausakna ngainatu khawm hlawknaa chun lungawi bawk naw nih: hi khawm hi teplo el a nih. ­ Thuhriltu 5:10


Editorial
Rawpuok le rawtek
Kristien tam tak chengna, Kristien ram tia ei insal ngam ta lai ringnawtu hai Kut le Festival hai zawma an thaw ang ang lo thaw ve a, lo phur  puitu ei pung pei hin ei Kristiennain dal tieng a pan zie chieng takin an lang. Zani lai khan ringnawtu Vai ei ti el le Hindu sakhuo zuitu hai chun Diwali hmangin an in hai light chidang danga cheiin rawpuok, rawtek le rawmawi bakah kap var hai nasa taka rawin an kap var chuoi chuoi a, a hlimum zawnga ngaituo chun mi hrisel pangngai tak hai ta ding chun thil inhawi tak khawm ni ngei a tih. Mi tam takin ei hmu el dittawk lova mani sum le pai chen senga an thil thaw ang ang va thaw ve kha thil tul a ni kher nawh.
    
Hieng ringnawtu hai kut le festival hai hi ei dodal a ni hran naw a, sienkhawm ei Kristienna le hin an mil am ti hi mitinin ei insut rawp a tulin an lang. Zani lai ela Diwali hmang huna khan Vai le Hindu sakhuo zuitu hai chau ni lovin ei ni tlangmi Kristien inti hai khawm a raw le thawtu tam tak ei um a, thenkhat lem kha chu a phur phurin ei thang amani ti dingin a um. Ei Kristienna le an milnaw el chau khawm ni lovin hieng bomb le thil dang dang rawa kap var thaw hai hin boruok thalo nasa takin a sukpung hlak leiin mihriem hriselna kawnga nasa takin pawi a tawk hlak zie le, mihriem ta ding chau ni loin ei ran vai hai ta ding chena tuorhla um tak an chang hlak zie hi ei hriet nuom a um.
    
Rawpuok, rawmawi le kapvar hai hi Kristienna le inzawmna nei der lo, iengma lova sum le pai seng ralna a ni el khelah mihriem hai hi ei hriselna an chen naw a, mi hrisel pangngai hai ta ding chun a lo hlimum vieu khawm a ni thei. Sienkhawm mi thenkhat ta ding chun rawpuok inring tak tak rawpuok dup dup le boruok thu le rimse tak a siem hai chu an natna belsatu an nih ti ei hriet a tul.
    
Rawpuok le rawmawi han boruok nasa taka a sukhnawk hlak leiin  tulai hnai khan mi pathum hai chun tukum Diwali huna hin Delhi khawpui sunga thaw khap hmak dingin Supreme Court­ah ngenna an lo siem ta nghe nghe a nih. Sienkhawm hiengang rawmawi le rawpuok tiengpangah inkeihruoina dan annawleh khap theina dan a umnaw leiin Supreme Court chun  mitin ngaidan la hmasa lova khapna dinga thupek (Order) an suo el theinaw thu hrilin a lo hnawl a nih.
    
Mihriem hriselna ta dinga a thatnaw leia mi’n bansan a ni theina dinga hma an lak lai eini rawiin thaw thar, phur thar ei thaw hi ei ngaituona a sei tawknaw lei a ni a, ching zawm ta lo dinga sungkuo tin ei in control a tul a, mihriem chau ni lo, ei ran vai hai ta dinga thalo, ei vela boruok sukpawrchetu a nizie hai ei inhrilhriet nawn rawp thiltha ning a tih. Chun khawtlang thuoitu hai khawmin mani khawsunga hiengang thil hrim hrim thaw hi khap hlak inla, District Administration khawmin hi kawnga hin hma la sien nuom a um. Boruok sukbaltu le mihriem ta dinga hrisel lo a ni el khelah kangmei suksuok thei thil a ni leiin ei fimkhur naw chun rawpuok le rawtek leia kangmei nasa tak tuok thei ei ni zie ei hriet nuom a um bawk. New Delhi a khawm zani hmasa khan Diwali huna rawpuok rawna leiin hmun 200 chuong zetah kangmei a suok a, Jammu & Kashmir a chun Dawr 16 lai zet a kang bakah motorcycles 10 zet a kangsiet bawk a nih.
    
Ram changkang le hmasawn haia chun rawpuok le rawmawi hai hi boruok sukbalnaw thei ding ang taka buotsai a ni hlak a, United States a khawm Independence Day lawm huna chun nasa taka rawpuok le kapmawi hai thaw a ni hlak, sienkhawm mimalin an nuom a ninga an raw le thaw phal a ni ngainaw a, dan bawsetu hai chu hremna pek an ni hlak, mimal in an lo raw ve a ni khawmin ram sawrkarin a phal chin chau raw le sukpuok a ni hlak. Eini lai ruok chu ienganga siem am, ti khawm hrietlo le hriselna ta dinga iengang pawi am a tawk thei ding ti khawm hriet lo hai ei nuom ang anga rawin ei sukpuok el hlak a ni a, hi tak hi hriselna ta dinga tit a umna chu a nih.
    
Hieng a ni lei hin District Administration khawmin hieng hun haia hin khap bur a lo theinaw a ni khawmin enkai sienla, raw hunbi ding bituk sienla, chu hun pela thawtu hai chu manin hremna pe pei sienla thiltha ni ngei a tih.


Post a Comment

Powered by Blogger.