Hmasawnna Thar | 10 November, 2015

JAC in Manipur sawrkar kuomah Charter of Demands an peklut

Bills 3 hai ni 5 sunga kokir le CM dawkan­a sie hman dingin an phut

CCPur/Imphal: Anti­Tribal Bills 3 le inzawma indin JAC le Student leaders, nuhmei pawl le JPO hai thanga Tribal hnam thuoitu 20 vel hai chun zanikhan Chief Minister’s Secretariat­ah Charter of Demands Manipur sawrkar kuomah an peklut. Hi huna hin Manipur Chief Minister O.Ibobi Singh thangin tlangmi tribal MLAs hai ti lo Manipur Assembly­a MLA hai chu kim takin an thang vawng. Tribal MLA hai ruok chu thang ve tum hai sienkhawm phalpek an ninaw leiin an thang nawh tiin ei thu dawngna chun a hril. 

    

JAC in Charter of Demands Manipur sawrkar kuoma an peklut a chun The Protection of Manipur People Bill, 2015; The Manipur Land Revenue and Land Reforms (7th Amendment) Bill 2015 le The Manipur Shops and Establishment Bill (2nd Amendment) Bill 2015 hai chungthuah Charter of Demands peklut ni­a inthawk tiemin ni 5 sung hieng Bills 3 hai a kokir le Chief Minister table­ah a sie ding; 

     
2. Inbieknaah Ministry of Home Affairs, Govt. of India a inthawk Joint Secretary rank officer neka inhnuoi ni lo thang a remti ngei ding, a remtina JAC le Ministry of Home Affairs ni 5 sung ziek ngeiin an hriettir ding;

     
3. Anti­Tribal Bills protest na le inzawm  state sawrkarin a thawsuol ti pawma thupha a hung chawi  JAC in an pawm le inzawmin Tribal customary laws le traditional practices angin Tribal Martyrs hai luongman le hliem hai enkawlna sengso Manipur sawrkarin an hmatieng a pek ding;

     
4. Manipur sawrkar le JAC inbiekna Ministry of Home Affairs palai a thang ve ngei ding ti le inbiekna chu Churachandpur District sung a ni ngei ding ti hai a nih.

     
Hieng a chunga hai hi Manipur sawrkarin a sukpuitling hunah Ministry of Home Affairs palai thangin Tribal thuoitu hai inrawinain Bills pathum hai chungthuah JAC chun Manipur sawrkar le inbiekna tan thei ning a tih tiin an ziek.

    

A chunga zieklang hai sawrkarin a sukpuitling zova sawrkar le inbiek huna chingfel dinga an putlut/zieklang hai lai­ The Protection of Manipur People Bill, 2015­ah ‘The Act shall not be extended within the jurisdiction of the Manipur (Hill Areas) Autonomuos District Councils as well as Hill Pocket Villages encroached by the Panchayan Raj Institution.” ti clause a inthangsatir ding; Clause 2(b) a (i) Cut off year 1951 chu 1981tia  a siemthat ding; clause 2(b) a definition of Manipur people chu ‘Manipur People means Persons of Manipur whose names are in the Census Report 1981 and their descendants.” tia siemthat ding.

    

The Manipur Land Revenue and Land Reforms (Seventh Amendment) Bill, 2015 ­a inthangtir sa lo­ “The Act shall not be extended within the jurisdiction of the Manipur (Hill Areas) Autonomous District Councils as well as Hill Pocket Villages encroached by the Panchayati Raj Institution.” ti chu clause a inthangsatir ding; Hill/tribal villages land records Valley district hieng Imphal East, Imphal West, Thoubal le Bishnupur district han an kawl hai a original district kuoma pekkir vawng ding; The Manipur Shops and Establishment (Second Amendment) Bill 2015­ah “The Act shall not be extended within the jurisdiction of the Manipur (Hill Areas) Autonomous District Council as well as Hill Pocket Villages encroached by the Panchayati Raj Institution” ti clause a inthangsatir ding; Manipur Legislative Assembly (Hill Areas Committee) Order, 1972 a Section 4(2) of the Manipur Legislative Assembly (Hill Areas Committee) Order No. 1972 chu “other than a Money Bill” ti thaibo a siemthat ding ti le a dang dang hai a thang.

    

Charter of Demands a hin H. Mangchinkhup, Chief Convenor le Lalkhohao Chongloi, Convenor­Secretary han hming an ziek a, copy hi Union Home Minister Rajnat Singh; Union Minister of State for Home Affairs, Kiren Rijiju; R.N. Ravi, Interlocutor, Indo­Naga Peace Talks; Ashok Prasad, Secretary, Internal Security, Ministry of Home Affairs le M.A. Ganapathy, Joint Secretary, In­charge of NE, Ministry of Home Affairs hai khawm pek an nih.

Nemngaihpar@ Pari Jail­ah

CCPur: Mr Thangliansiam (20) s/o (L) Thonsong of College Veng, New Lamka October 6, 2015 nia Thingkangphai le Pangzawl khaw inkara thingkunga inkhai a, a thisaa hmu a ni le inzawma ringhla leia Police han an man Nemngaihpar @ Party w/o Kapjohnson of New Lamka (G) chu zanikhan CJM,  Tuibuong ah inlangtir a ni a. CJM/CCPur in Judicial Custody (Jail) a ni 15 sung um dingin a chungthu a rel phawt. Hi dungzui hin zani ma khan Police han Imphal tieng phurin Jail­ah an va sielut.

Tribal Martyrs hai ralna

CCPur: Tribal Martyrs hai ralna le hliem hai thangpuina petu an la um pei a, zanikhan mimal pahni haia inthawk ralna Rs. 1000 le Maibal 4 District Hospital­a JPO kutah a lut. Zanita JPO kuta ralna le thangpuina petuhai chu ­Laconique K. Lalpu of Dorcas Veng,New Lamka in Rs.500/­ le Maibal pum 4 pia; Chiching Baite of Mualveng, Hiangtam Lamka Rs.500/­ hai an nih. Chun, November 8, 2015 khan mimal le organisation 5 han JPO kuoma ralna Rs.11,900/­ le Puon 9 a lut bawk. Nov. 8 nia petu hai chu Mizo National Front (MNF) Returnees Puon 9; All Manipur Tribal Lawer Assn. Rs.5,000 le JPO hmang dingin  Rs.1,900/­;  All Tribal Youth Council, Manipur in Rs.2,000/­; T.Chuangri Koireng, Gen Secy, All Tribal Disable Union Manipur in Rs.1,000/­ le Mizoram UPC, GHQ in 2,000/­; a nih. Nov. 10, 2015 nia District Hospital­a thingpui inlumtu ding chu TYO ning an tih.

State Competitive Scho. Exam

CCPur: November 14, 2015 khin Phungkhothang Govt. H/S­ah State Competitive Scholarship Examination, 2015 um a tih. Hi huna hin Class VI inchuklai mi 183, Class X inchuklai 382 thang an ta, morning shift 10:00­11:00 le evening shift 12:00­1:30 PM sung ning a tih.

Aadhar Card pelut dingin

CCPur: National Foundation for Communal Harmony (NFCH) hnuoia thangpuina dawngtu student hai chu an rang thei anga DC/CCPur Office­ah Aadhar Number pelut dingin Lalthanzam Fimate, MCS, BO HQ DC Office in inhriettirna a siem.

Pasal pakhat an khaihlum

CCPur: Mr Jamsianpau (35) s/o (L) Ginngaithang of Lanva chu zanikhan Pangjawl khaw sak, Bus terminal bul lai thingkungah inkhaihlum saa hmu a nih. Police le a sung h an zanikhan an lakthlak a, zani ma khan Lanva thlanmuolah vuiliem a nih. Jamsianpau hi lungrilsawlna nei a ni bakah a lungril kim rak ta lo nia hril a nih.

SSC Free Coaching le Lib­cum­Study Centre hawng

CCPur: Zani 1:00PM khan UZO GHQ Office, Zogal Hall­ah Mr Chinlunthang, President, UZO/GHQ chun Library –cum­ Study Cenre a hawng a, Ms Mannuamching, IAS, i/c, DC/CCPur chun ZSP SSC  Free Coaching a hawng. 

    

Mr Chinlunthang chun, ZSP Free Coaching hi August 31, 2015 nia hawng dinga ti nisienkhawm ram sung buoina leia hawng thei loa um a ni thu hrilin student hai chu nasa taka thang la dingin an fui. Student hai chu hun hmang thiem inchuk dingin a ngen.

    

Ms Mannuamching chun, Free Coaching hi Organiser han sum le pai le tha le zung tam tak senga an  buotsai a ni leiin a thlawn tawp a ni lei elin coaching­a thang student hai chu ngaitha lo dingin le hun  hmang thiem dingin an fui. Sum le pai seng lova Govt. service hmu theina dingin student han nuom chenna le hun awl hai hmang thiem a pawimaw thu hrilin mobile hmang dan khawm thiem dingin a ngen.

HCFD Choir han pakhatna an lak

New Delhi: Tangkhul Christian Charitable Trust (TCCT) huoihawtna hnuoia “Togetherness” ti thupui a hmanga Thyagaraj Stadium, New Delhi­a 4th North East India Choral Competition nei huna classical, folk, jazz le spiritual ti haiah inruolsiekna nei a ni a. Hmar Christian Fellowship, Delhi (HCFD) Choir  chun “The Great Atonement” ti hla sakin Choir category­ah a pakhatna an lak. Inruolsieknaa hin Delhi­a North East India suok kohran le fellowship hrang hrang hai choir hai an thang tawl a nih. First prize 3 lakh, second Rs. 2 lakh le third prize Rs. 1 lakh lawman latu hai kuoma inhlan an nih. Hi hun hi HI President khawmin a uop ve.(virthli)

Cataract Detection camp nei

Imphal: Zanikhan National Program for Control of Blindness (NPCB) Medical Directorate, Lamphel huoihatnain Chandel district­a Molnoi Area KBC Centre Church­ah one Day Free Cataract Detection and Eye Screening Camp nei a nih. Hi huna hin mi 260 hai mit enfelna nei a ni a, hienghai lai hin mitnauleng var (cataract) 44 hmu a nih. Damdawi a thlawna sem a ni bakah mi 34 hai kuomah mitvar pek an nih. 

Clean Manipur, Green Manipur’ cleanliness week

Imphal: Manipur Chief Secretary O. Nabakishor chun Manipur Sangai Festival 2015 hung um ding le inzawma Imphal khawpui sung sukfaina le sukthienghlimna ding cleanliness drive “Clean Manipur, Green Manipur” ti chu zani 7:30AM khan Keishampat Junction­ah a hawng. Cleanliness Drive hi Dept. of Tourism, Govt. of Manipur in Imphal Municipality Council hai le thangruola a buotsai a ni a, November 16, 2015 chen sunzawm ding a ni a, Keishampat junction­ Airport; Maharani bridge­ Tera Bazar; Wahengbam Leikai Traffic point­Keishampat junction; Ima Keithel le Khwairamband Market le Minuthong­Palace compound hai huom a tih.

    

Hi drive hawngnaa hin Dr RK Nimai (Retd IAS), Consultant to Manipur Government, Nidhi Triparthi, Secretary (Tourism), Government of Manipur, Shyamlal Poonia, Director (Tourism), Rachel N Guite, Dy Director, Robert Kshetrimayum, Secretary MAHUD, Ng Uttam Singh, Executive officer Imphal Municipal Council, Dr N Dhaballi, president Manipur Tourism Forum, Dr Kh Palin le Thamabaljao Phaomei, former IMC Chairperson hai khawm an thang.

NNC cadre pakhat man

Imphal: November 7, 2015 khan 12­Bihar Regiment le Imphal West Police Commando thangruol han  Konthoujam hmuna dappui an thawnaah Naga National Council (NNC) cadre SS Lt Poujianiung Kamei (25) S/o Merthangam Kamei, of Marangjing, Tamenglong district an man a, a kuta inthawk Mobile phone 1 le SIM card an man a, Patsoi Police station­ah an peklut.

PREPAK in Nov. 12 Martyrs Day in

Imphal: PREPAK helpawl chun  November 12, 2015 khi Martyrs Day (Athoubasingi Ningshing Numit) a hmang an tum a. Hi ni hin mipui hai chu insukhlimna thil hrim hrim thaw lo dingin Asst. Publicity & Propaganda Leibakngakpa Luwang in zanita thusuok a siema chun ngenin a zieklang. An pawl movement le inzawma November 12, 1978 a Leimarok, Kameng hmuna PREPAK le security forces hai inkaptuonaa an cadre 3 han thina an tuok le inzawma Nov. 12 hi kum tin martyrs day­a an hmang hlak a nih.

Sharmila Court hmaa inlangtir

Imphal: Manipur­a inthawk Armed Forces Special Power Act 1958 (AFSPA) lakdawk dinga ngennaa kum 15 zet bungheia nuorna nei dah Irom Chanu Sharmila chu zanikhan Court­ah inlangtir le hearing nei nawk a nih. Hearing hi 10:30AM a nei ding ti a ni laiin zantieng 2.00 pm a hearing nei tan chau a nih.  November 22, 2015 khin nearing nei nawk ning a tih.

HCFD Choir han pakhatna an lak

New Delhi: Tangkhul Christian Charitable Trust (TCCT) huoihawtna hnuoia “Togetherness” ti thupui a hmanga Thyagaraj Stadium, New Delhi­a 4th North East India Choral Competition nei huna classical, folk, jazz le spiritual ti haiah inruolsiekna nei a ni a. Hmar Christian Fellowship, Delhi (HCFD) Choir chun “The Great Atonement” ti hla sakin Choir category­ah a pakhatna an lak. Inruolsieknaa hin Delhi­a North East India suok kohran le fellowship hrang hrang hai choir hai an thang tawl a nih. First prize 3 lakh, second Rs. 2 lakh le third prize Rs. 1 lakh lawman latu hai kuoma inhlan an nih. Hi hun hi HI President khawmin a uop ve.(virthli)

NE Idol Competition

Dimapur:North East Promotional Team huoihawtnain January,2016 khin North East Idol Competition tan ning a tih. Hi Idol Competition­a hin kum 15­30 inkar mi hai thang thei a ta, first prize dawngtu kuomah Rs. 25 lakh le motor ke pali nei; first runners up in Rs. 10 lakh le two wheeler le secon runner up in Rs. 5 lakh le two wheeler dawng a tih tiin Team Convenor Ajit Gogoi chun a hril. Hi Competition­a hin India hmarsak states 7­a mi hai  thang thei an ta, inhnikna nei han thu chieng lem +917085986307/ +918575335533 haia indawn thei ning a tih tiin ei thu dawngna chun a hril.

J&K­ah ralthuom tam tak dapdawk

Jammu: Zanikhan Delta force hnuoia um Rashtriya Rifles le Police thangruol han Security forces han Jammu and Kashmir­a Ramban district sunga Nachlana ramhnuoiah helpawl hai camp an hlukhum a, ralthuom tam tak dapdawkin an man niin defence spokesman thusuok chun a hril. Ralthuom an dapdawk hai lai AK­47 Rifle 1 le magazine 4, Pistol 2 le AK­47 mu 250; PIKA mu 30; Hand Grenades 10, Under Barrel Grenade Launcher (UBGL) grenades 10, Radio sets 2, Binocular 2 le fuse wire 2 a thang.

NLD in hratna an chang ngei ring

Yangon: Myanmar General Election November 8, 2015 nia neia um vote tla hai tiemna nei mek a ni a, Myanmar opposition leader Aung San Suu Kyi party National League for Democracy (NLD) chu an thaw tha hle a, Yangon lower house of Parliament seats 45 um haia hi thu ei sut chena results 36 puonga um haiah NLD chun seat 35­ah hratna an chang tah. Chun, regional parliament seats a khawm 23 ah hratna an chang ta niin Election official thusuok chun a hril.

    

Hieng laizing hin Union Solidarity and Development Party (USDP) a Parliamentary Chairman Shwe Mann chun hneban an nih ti a pawm thu a puong der tah.

Bihar Assembly Election­ah Grand Alliance in hratna an chang; Oath taking nei vat a ni ta ding

Patna: Bihar Assembly Election phase 5­a neia um haia vote tla hai chu November 8, 2015 khan tiem a ni a, Janata Dal­ United (JD­U); Rashtriya Janata Dal (RJD) le Congress thangruol ‘Grand Alliance’ chun Bihar Assembly seats 243 umah seats 178 lain ( hmun thuma thea hmunkhat) hratna an chang. Grand Alliance­a RJD chun seat 80 an lak a, JD(U) in seat 71 le Congress in seats 27 zet an lak ve. NDA­ah BJP chun seats 157 an ngir naah seats 53 an lak phak tawk a, Ram Vilas Paswan inrawi LJP le RLSP han seat 2 ve ve le Bihar CM hlui Jitan Ram Manjhi  party HAM chu seats 20 an ngir naah seat khat chau an lak. Manjhi hi seat 2 ah a ngir a, pakhat lema chau a tling a nih.

    

Assembly election 2010 a khan JDU in seats 115 le BJP in seats 91 an lak a, RJD in seat 22 le Congress in seat 4 an lak a nih.

    

Bihar Chief Minister Nitish Kumar chun, thi tul hai sukfel zo a ni pha oath taking ceremony nei vat a ni ta ding thu zanikhan a hril. Grand Alliance­a MLA tling thar hai chun Patna hmuna an leader ding thlang an tih. RJD President Lalu Prasad le Chief Minister Nitish Kumar hai chun cabinet a laklut ding hai ngaituoin an buoipui mek a, Constitution in a phal pek dungzuiin Bihar Assembly a hin Chief Minister thangin minister 36 an nei thei. Bihar cabinet a hin RJD a inthawk 16, JD(U) a inthawk 15 le Congress a inthawk 5 an thang beisei a nih.

---------------------------------------------------------------------------------------

VAWISUN THUPUI

Vangduoi nia i chau el chun, I hratna chu a tlawm a nih. Thinaa thuoi hmanga umhai chu san suok la,  That dinga inzosa tepa umhai chu chelkir rawh.  Thuvarhai 24:10­-11

Editorial

NDA mit sukvartu nisien

Kum 2014 Lok Sabha Election­ah BJP inrawina hnuoia NDA chun ‘Modi Wave’ an ti el chun Lok Sabha seats tamlem lain Mr Narendra Modi PM nina hnuoiah NDA in sawrkarna an hung siem a. Lok Sabha Election­a an hrat lei khan state dang dang, a bikin RSS hai hratna biel deu hieng Maharashtra, Haryana le Jharkhand haia hratna changin an khatin sawrkarna an siem bakah PDP le thanguolin Jammu & Kashmir­ah sawrkarna an siem bawk a nih. Kum tam takel India ram rorelna khawlpui an chel tanaw hnunga hung inlal nawk an ni leiin an tha khawm a tho tha a, PM Narendra Modi ngei khawm a hrohrang a nain hma a lak nasa; a hmalakna chu India mipui chau ni lovin khawvel mipui thlir thup a tling a nih. Amiruokchu, Delhi Assembly Election­ah Aam Aadmi Party (AAP) hnezo lova a tlawm hnungin Bihar Assembly Election­ah NDA chu RJD­JDU­Congress thangruol ‘Grand Alliance’ hnebanin a hung um nawk pei hin Modi Wave hin re tieng a pan pei a ni el awm de aw ti chu mi tam tak lo thlir dan a nih.

      

Bihar Election­a BJP in Grand Alliance an hnenaw el hi thilmak ve tak a nih, a san chu BJP hi Centre­a sawrkarna siemtu, Bihar Lok Sabha seats 40 um­a MPs 22 nei an ni leiin. Kum 2010 Bihar Assembly Election­a khan BJP in seats 91 an lak a, tukum ruok chu seats 157 an ngirnaah seat 53 chau an lak phak a nih. Hi lei hin BJP chu nasa takin an tlahnuoi ti an lang. Tukum Bihar Asembly Election­a khan Grand Alliance­a Janata Dal (United), Rastriya Janata Dal le Cognress chun Bihar Assembly seats 243 umah seats 178 an lak a; RJD in seat 80, JD(U) in seat 71 le Congress in seat 27 an lak a, kum 2010 le tekhi chun JD(U) khawm a tla hnuoi a, kum 2010 khan seats 115 an lak a; RJD le Congress in hma an sawn thung. Kum 2010 khan RJD hin seats 22 le Congress in seat 4 chau an lak a nih.

    

PM Modi le National BJP President Amit Shah han vote campaign­naa hun le tha tam tak an sengna a tlawn an chang el hin san dang dang a nei ring a um a. Mipuiin an Chief Minister Nitish Kumar chunga ringzona an la nei lei; Nidanga inmil der lo Nitish Kumar le Lalu Prasad hai BJP hnebanna dinga an hung thangruolna leia vote inhlawm that lei le kum 2012 Gujarat Assembly polls le 2014 Lok Sabha election haia Narendra Modi master Strategist Prashant Kishor tutum BJP ta dinga silent­a Nitish Kumar tienga a thang lei ni dinga ring a ni bawk. Prashant Kishor hi Modi’s ‘Chai Pe Charcha’ rawtdawktu a ni a, tuta tuma Nitish campaign kawnga hiengang tiengpang le inzul ‘parcha pe charcha’ (discussion over pamphlets) le ‘Har Ghar Dastak’ (knock on every door) hai leia mipui tam lem an hne lei ni dinga ring a nih. Chun, BJP inthlawppui LJP, HAM hai seats 83 an ngirnaah seat 5 chaua hlawtlingna an changna chu nasa taka BJP vaw hnuoitu ni dinga ring a ni bawk. Chun, mipuiin Centre­a sawrkarna siemtu dingin BJP dit hai sienkhawm state­ah BJP an ditnaw lei (Lok Sabha election le state election thlierhran thiemna an nei lei); RSS han caste­based reservation thu an hrilrik lei; Union Minsiter V.K. Singh in Faridabad­a  Dalit naupang pahni raw hlum an nina thua inhmusitna tawngkam ‘Ui’ tekhinnaa a hmang Nitish le Lalu han  inrang taka an sawisel leia Dalit thlawpna an hmu that lei; Muslim hnam han BJP neka Grand  Alliance an thlawp lem lei bakah Bihar state­a BJP in leader tha an tlaksam lei bakah tulai hnaia India ram sunga sakhuo dang ngai theinawna, chi le kuonga inthlier hranna le intheidana hung pung pei (intolerance) chu NDA hlawsamna bulpui tak pakhata ngai a ni bawk a nih.

    

NDA Bihar Assembly Election­a hnebana an umna hi Centre­a BJP thuoina hnuoia NDA sawrkar ta dinga insiemthatna le mitvarna petu nisien nuom a um hle. UPA in sawrkarna an siem hun le tekhi chun economics tienga nasa taka inthlakdanglamna a hung um a, sienkhawm Centre­a NDA in sawrkarna thla 17 an siem sung khan RSS le Hindu sakhuona inruichil chetna inzing uta hriet dingin a hung uma, NDA sawrkar hin a thlawp annawleh an thunuoiah an um mani ti dingin sakhuona thila intheidana tlung rawp le hung pung hrat em em chungthua party leaders han tawngkam an nei hi hriet ding a vang hin a suklang. India ram hi sakhuo hran hran bietu, tawng hran hran le khawsak dan inangnaw tak le ngirhmun inangnaw tak tak tam tak hai cheng khawmna a ni leiin ei rama muongna le hmasawnna a hung um theina ding chun Secular country ei nina anga sakhuo zalenna humhal tlat hi sawrkar mawphurna a nih. Chun, Union Minsiters le party leaders hai khawm tawngkam tha hmang inchuk hai sien nuom a um. Hienganga NDA sawrkar a fe pei chun Lok Sabha Election nawkah mi tam tak chun BJP in hratna an changphak an ring ta nawh. Sakhuo thil le minority hai hnawchepna hin thiltha intlun naw ni a, chu nekin buoina hung rasuok a tih. Ram sunga muongna a umnaw chun tukhawm ei rama hung lutin hung sumdawng nuom naw ni hai a, chu chu ei economy tlakhnuoina le sietna hung ning a tih. Pu Modi in Economic reforms nasa taka a fepui hai khawm hlawsam vawng bawk a tih. Hi lei hin Bihar Election result hi NDA ta dinga mitvarna petu hung ni ngei sien nuom a um.