Tuolsung
Kum 2014­15 sung HIV/AIDS positive 180 hmusuok
CCPur: November 7, 2015, 11:00AM khan Manipur State AIDS Control Society (MACS) sponsored­nain Centre Road, Hiangtam Lamka­a Lamka ICI Biekin bula Helpline Centre­ah ‘Advocacy Programme on the Role of Media in Managing HIV & AIDS’ nei a nih. 
    

T. Benjamin, Dist. Supervisor, DAPCU chun, HIV/AIDS hi mi thalo le inruithei ching zawngsak hai chau invawi dingin mipui vantlangin ngaidan nei inla khawm mi tha le fel hai lai khawm HIV/AIDS hi an dar tho leiin HIV/AIDS dona kawnga thangruol a pawimaw thu a hril.
    
April 2003­Oct 2015 sung khan HIV/AIDS test 80,380 thaw a ni a, hi lai hin positive 3780 an um a, hi hun sung hin nuhmei naupai (ANC) test mi 39246 thaw an ni a, hi lai hin positive 300 hmusuok an nih.General Clint a thisen test po 41134 a ni a, hi lai hin positive 3480 an um a, October chen khan District Hospital­a ART centre­ah mi 3405 an in registered a, mi 1354 han ART damdawi an fak.
    
Kum 2013­2014 sung khan HIV/AIDS positive 241 hmusuok an ni a, chu hai lai heterosex ah positive 120, inruithei ching (IDU) 86, nu­le­pa a inthawka HIV/AIDS kaisawng 14, nina inang (pasal­pasal, numei­numei) a inthawk HIV/AIDS kai 20 an um.
    
Chun, kum 2014­2015 sungin HIV/AIDS invawi 180 hmusuok an ni a, chu laia 113 chu pasal an ni a, 67 hai chu nuhmei an nih. Kum 2014­2015 sung a HIV/AIDS positive hmusuoka um hai laia 124 heterosex; Inruithei ching (IDU) 44, Nu­le­pa haia inthawka HIV/AIDS kaisawng mi 10 le nina inang (nuhmei­nuhmei, pasal –pasal) 2 an nih.

DBT Scheme December­a hmang tan ding
CCPur: Zani 10:30AM khan District Health Society (DHS) meeting CMO Office chamber­ah nei a ni a, hi huna hin New JSY guideline, Mother and Child Tracking System le Direct Benefit Transfer Scheme chungthu hai hriltlang a nih. JSY scheme le inzawmin hi meeting­a hin Private Hospital tum tum­ Sielmat Christian Hospital, People Health Foundation, Lamka Nursing Home, Nazareth Nursing Home bakah Dist.Hospital ­JSSK Cell le MCTS Counter hai an thang tawl.
    

Direct Benefit Transfer Scheme hi December 1, 2015 a inthawk Private Hospital 4, District Hospital, PHC Sagang le PHC Saikawt haiah hmang tan ning a tih.

Tribal martyrs ralna
CCPur: Zanikhan District Hospital­a JPO kutah mimal le organisation pathum han Tribal martyrs hai ralna le hliem hai thangpuina dingin Rs. 10,000/­; Maibal 4, Puonsen 9 le frooti box 6 an inhlan. A petuhai chu­ ­EBCC Pethuel, Tualsung Mission Committee, New Lamka Rs.5000/­ le maibal 4; G.Vumkhanthang & family, Game village, Imphal Rs.5,000/­; Tuibuong Village Authority Lal puonsen 9 le frooti box 6 an pek. Chun, Chiinmawi Suantak in NE India Germany han Tribal martyrs hai fethlengin Tribal martyrs 9 sungkuo hai Belpui 1 seng pek an ni bawk.
    

Chun, JAC hnuoia Finance Sub­Committee kutah zanikhan Tuibuong Village Authority han Tribal Martyrs hai ralna dinga In tina Rs. 100/­ an dawl khawm a rengin Rs. 42,530 an inhlan bawk.
    
Nov 9, 2015 a Dist. Hospital­a thingpui inlumtu ding chu SYO ning an tih.

CMO rawiin review meeting nei
CCPur:  Dr Thangchinkhup Guite, CMO inrawinain zani 12:00 khan CMO Office chamber­ah District Health Society le Medical Officers han Mission Indradhanush Phase­II (Round­I) thuah District Task Force Immunization meeting an nei. Hi huna hin April­June & July­Sept., 2015 sunga Health Centre haia Routine Immunization thawa um hai ennawna, Mission Indradhanush Phase­I sinthaw ennawna, Routine Immunization hrat lema thaw dan ding le Mission Indradhanush Phase­II action plan  ding hai an hriltlang a, hmun tum tuma sin thaw dan ding hai an  induong nghal.


PM in Jammu &Kashmir kuomah Economic package Rs. 80,000 crore pek dingin a puong
Srinagar: Prime Minister Narendra Modi chu, Jammu & Kashmir­a Peoples Democratic Party (PDP) le BJP thangruol han sawrkarna an siem hnunga an zin vawikhatna dingin zanikhan Jammu & Kashmir­ah an zin a, Sher­i­Kashmir Cricket Stadium, Srinagar­a public meeting­ah mipui hmaah thuhrilna hun a hmang.
    
PM Narendra Modi chun, Jammu and Kashmir­a hmasawnna sin thawna dingin Rs. 80,000 crore pek dingin a puong. Hi economic package hin kum 2014 a tuilien leia harsatna tuok hai sawmdawlna bakah loneitu, sumdawngtu hai le Tourism suk hmasawnna ding, thalai hai sin pekna ding J&K a Infrastructure sukhmasawnnahai a huom ding thu PM chun hrilin, tuta mi hi a tawpna a ninaw a, an tanna chau a la nih tiin a hril.
    
Pu Modi chun, Kashmir hi khuolzinmi hai sir le inzin nuomna hmuna siem ka nuom a, tuta hma khan, mi’n pawisa a nei pha Kashmir­a inzin an nuom hlak a, khang ang Kashmir ropuina huna khan inumtir nawk ka nuom a nih tiin a hril.
    
Jammu­Srinagar Highway siemthatna dingin Rs. 34,000 crore hmang ning a ta, tuta Srinagar­Jammu inkar inzinnaa darkar 12 aw hlak chu tunnel (hnuoiver) leiin  darkar 3 le a chanve chau aw dingin ei siem ding a nih; hi thil hi kum 2 le a chanve sunga zo ding a nih tiin a hril. Kashmiriyat thang lovin India hi a famkim thei nawh tia hrilin state dang hai entawn tlak hmasawnna sin fepui ding le hmasawnna chu democracy le mihriemnaa inghat a ni thu a hril a. Thalai hai ta dinga an fak hmuna ding sin pek chu harsatna dang dang chingfel le sutkiengna tha tak a ni leiin thalai tamlem sin sin pek an ni ding thu a hril.
    
NDA in sawrkarna thla 17 an siem sungin India ramah corruption nasa takin a tlahnuoi a, India chu khawvel economy a inthang hrat taka hriet a nih.
    
Pu Modi hin Chenab vadung khuopna 450 MW Balihar Hydro Electric Power Project Stage­II khawm a hawng bakah Udhampur­Ramban le Ramban­Banihal inkar four lane­ a siemna ding foundation lung phumna a nei bawk.  Pu Modi chun, sawrkar thlungpui in kum 2022 chena khuo tin electric meivar intlungtir a tum a nih tiin a hril.

Manipur­in sum le paiah harsatna nasa tak a tuok mek
Imphal: Sawrkar thlungpuiin Special Category status sukboa Centre­state funding pattern schemes a hung hmang leiin Manipur sawrkar chun sum thuah harsatna nasa tak a tuok mek a,  Central Scheme thenkhat state share a pek theinaw bawk a hril a nih. Manipur Economy ngirhmun a thanaw hle a, tukum kumtawp tieng lem chu sum le pai thuah harsatna nasa tak a tuok el thei niin State Planning and Finance Department chun an hril. Centre chun tuta fiscal year fe meka thla 6 sunga ding CSCs haia Centre share a hung pek ta a, sienkhawm State sawrkarin  plan outlay 2015­16 dungzuia a tum ding (share) a la pek theinaw leiin Central sponsored schemes hai nasa takin a tawkbuoi a, project thenkhat delink a ni ta bawk.
    
Special Category status Centre in a hung sukbo lei hin Manipur chau ni lovin India hmarsak state thawsuok mumal neilo hai chun sum le pai thuah harsatna namen lo an tuok seng a; tuta hma khan NE Chief Minister hai chun NE state hai special category status sukthar nawk dingin sawrkar thlungpui an lo ngen ta a nih.

Nuhmei naupai thattua intum man
Imphal: Thla 6 mi naupai lai Yumlembam Ongbi Sorodhoni Devi thattu nia intumin a pasal Y. Sanjoy Singh of Tokpa Ching chu zanikhan Police han an man. Evidence thenkhat an hmu leia Sanjoy Singh hi an man niin Police thusuok chun a hril.  Sorodhoni Devi hi zani hmasaa kha Wangoo Nongyai Khong Maril vadung tui chunga hung inlang dawka hmu a ni a, a kut le ke hai hruia khit an nih. A case hi Women Police Station, Thoubal kuta pekdawk a ni a, suizuina nei mek a nih.

AMESTA in tuolthattu an dem
Imphal: All Manipur Teachers Association,AMESTA chun Keirao Primary Madrasa School a Headmaster Md Hasmad Ali @ Oja Babu of Keirao Makting Awang Leikai that a nina chu nasa takin an dem a, zanikhan Keirao Urup Thongkhong Bazar­ah sit­in­protest an nei. AMESTA General Secretary General Ch Santakumar Singh chun, tuolthattu hai an rang thei anga man le hremna pe dingin an phut a, tuolthattu hai sawrkarian a man naw chun helna le nuorna nasa lem an la nei ding thu an hril bawk.

KCP cadre pahni man an nih
Imphal: November 6, 2015 khan 9­Sector Assam Rifles hnuoia 12 Bihar Regiment han Bishnupur Police Commandos hai le thangruola Meitram crossing Utlou hmuna motor inlawn vel hai an dapnaah KCP (Poirei Meitei) cadre pahni an man. Mana um hai chu­ Laishram Inao Singh alias Loya (30) , S/o late L Binoy Singh of Phayeng Mamang Leikai le Konjengbam Amar Singh alias Nanao, (30) S/o K Joy Singh, of Jiribam Golathon Bazar, tuta Sogolband Mantri Lampak a cheng hai an ni a, an mi man hai hi Nambol Police Station­ah an peklut niin zanita PRO, Assam Rifles thusuok chun a hril.

Imphal­a members JPO Martyrs ralna peta hai
Imphal: JAC hnuoia Finance Sub­Committee in Tribal Martyrs 9 hai ralna dinga in tina Rs. 100/­ pei dawl dinga a ti angin Imphal khawpui sunga Philanthropic Organisation tum tum tuchena ralna sum peta hai le an peklut zat chu ­ HYA Imphal JHQ.Rs. 29,900/­; YMA Imphal Branch Rs. 13,850/­; CBA Imphal Rs. 1200/­; ZYO Imphal Block Rs. 7500/­; GYO Rs. 6900/­;  YVA Imphal Jt.HQ Rs. 55,450/­ le PTC/YPA Imphal Block Rs. 49,500/­ a nih tiin JPO, Imphal thusuok chun a hril.

Women Society hai an inpawlpui
Imphal: 24­Assam Rifles chun zani hmasa khan Shaibol Village­ah Women Society hai inpawlpuina an nei a, nuhmei hai hai hamthatna dinga sawrkarin scheme tum tum a siem hai hrilhrietna le nuhmei hai him theina ding chungthu hai an hrilpui.

Lienzam Hrangchal a thi
Aizawl: Mr Lienzam Hrangchal, HPC, Ex­Volunteer Chief Marshal lo ni hlak chu zani zantieng khan Kal natna le BP leiin Bethany Hospital, Aizawl, Mission Vengah­ah a thi. Pu Lienzam hi November 5, 2015 a inthawka kha ICU a sielut le enkawla lo um ta a nih.

Minister a laklut hnung khawma lo sin bansan chuong lo
Balha (Bahraich): Uttar Pradesh Chief Minister Akhilesh Yadav in kar hmasa laia a council of Minister­a a laklut Balha MLA Banshidhar Baudh chun minister a ni hnung khawmin a lo sinthaw a chawlsan chuong naw a, MLA a ni hma le MLA a ni hnunga (minister a laklut a ni hma) a umdan angin zingkar a loa sinthaw dinga suokin chirdiek kerai chen chena palin a lo­ah sin a thaw zawm zing a, loa a fena haia hin palien tak tak ralthuom chawi han vengin an zui pei hlak a nih. Bansidhar Baudh hi minister of state for social and SC­ST welfare portfolio pek a nih.  A nuhmei Rajawati Devi chun, a pasal hin a hma nekin sin thaw ding a hau deu ti naw chu minister a ni hnung le a ni hma danglamna rak a um nawh tiin a hril a, mipui ta dinga sin nasa lema a thaw theina dinga a pasal minister a hung ni chu lawmum a ti thu a hril.
    
Banisdhar hi a hma chun local government farm­a chowkidar (guard) sinthaw niin, a hringnuna harsaatna tam tak a lo tuok hai leiin mi pasie le rethei hai ngirhmun hrietthiemna an neitir pha thu a hril. Unau  pasal 5 le nuhmei 3 an ni a, an unaua a naupang tak dawttu a niin kum 2010 khan district panchayat election­ah a tling hnungin cycle an chawk a; tuhin chu VIP motor beacon light um ngei leh vengtu a nei ta a nih.

--------------------------------------------------------------------------------------------
VAWISUN THUPUI
Lalpa tina chun hringna an tlun a, Chu chu neitu chu tlaitakin um a ta, Thil tha naw hrimin ama chu sir ngai naw nih.                                    ­ Thuvarhai 19:25

Kristienna le Intodel

Ram hmasawn le inthanglienna dingin fak le dawn le thil iengkima intodelna a pawimaw ang bawkin mihriemin nun pangngai tak ei hmang theina ding le Kristien han rawngbawlna hrat lema ei fepui theina dingin intodelna hi nasa takin ei pawimaw. Intodel nawna hin nghawng thalo tak tak, mi tam tak beidawngna khura hnuklutin, awmnem deu hai lem chu sie le tha thlierhran thei lo khawpin suolna lampuiah a thuoi hlak. Kohran hai ei intodel naw leiin Chanchintha puongdarna le Pathien ram zaulienna dinga ei hmalakna haia duthusamin ram ei lak hrat thei ngai naw a nih. Hi lei hin ram le hnam, kohran, khawtlang hmasawnna ding chun mitin ei intodel a tul a, thil indiklo le kut tling lo a intodel ni lovin, mani sininrim ra ngei hmanga intodel ei ni theina dinga mitinin thang ei lak chu ei thaw makmaw a ni a, Pathien hring bietu Kristien hai ta ding lem chun intodel lo le tam ti zing zing nekin intodel hi nasa takin an hme lem bawk a nih. A san chu ei biek Pathien hi siemfawm ni lo, Pathien hring a ni leiin.
    
Ei intodel theina ding chun, a hmasa takin kutdaw lungril ei nei hi peihmang a, taimak ei insuo a tul. Ei pi le pu hai khan intodello ni an lo inlau thei em em a, chu leiin theitawp suoin kawla nisa suok zuiin inrim takin sin an lo thaw hlak a, midang le thenum hai buoipui le thangpui ngaia um kha thil inzakumah an ngai. Tulai thangthar, lekhathiem hai ruok hin chu mani sin inrim ra le mani thawsuok nekin kutdaw khawm ei thlang lem ta nisien a hawi a, ngaituo chet chet chun thil inzakum tak a nih. Ramchangkanga hai chun mihriem vawikhat puitling an hung ni charin nu le pa haia thaw dawksa ring lovin mani kutkawi ngeia intodel an tum hlak. An nunzie le khawsak dan ditum lo tak tak, tam tak um sienkhawm intodel an tum tlatna hi thalai han entawn inla nuom a um takzet.
    
Kristien hai hi taimain, intodel chit inla chu Pathien ram zauna dingah tuta nek hin a let tam takin sum thawlawm thei ei ta, midang ta ding le thangpui ngaihai thangpuina kawnga khawm nasa lemin sin thaw thei ngei ei tih. Ramdang pawisa laluta thangpuina le sawmdawlna sin dang dang ei thaw hai khawm hi a tha, lawm a um, sienkhawm mani thawsuok ngei hmangin rawngbawlna hi fepui thei ta inla chu tuta nek hin nasa takin ram ei lak hrat lem ring a um. Ringnawtu, Pathien hring bietu khawm ni si lo hai hi iengleia  Kristien hai neka intodel le hausa lem am ning an ta, an taimak lei le intodel tumna an nei tlat lei a nih. A nina taka chun Kristien hai hi hausa erur naw inla khawm mani tawka intodel khip khep vawng ni inla chu ringnawtu han Kristienna hi nasa takin an ngaiven ring a um. Hi lei hin Kristien hai ta dingin intodel tumna lungril neia thang ei lak chu ei thaw ding makmaw niin an lang.
    
Khawvel hmun tin, a bikin India ram sunga nitin vawihni fak chu hrillo, vawikhat fak ding khawm nei lo tam tak an um a, Isu Krista’n a thuoihruoi hai kuoma, “nangnin fakding pe ro” tia an thaw ding a lo hril ang khan, rawngbawlna neia fak ding nei lo hai kuoma fak ding pek chu ei thaw awm tak a ni lai zingin mani khawm intodel lo, fa ve tawk tawk, sawmdawlna le thangpuina thil ei sem sun hai khawm ramdang tienga inthawka ei laklut dam an nih. Hi lei hin Kristien hai hi fakkhawp chau nei ding ni lo, ei fak seng lo le mihai thangpui le sawmdawl thei ding khawpa intodel dingin Pathien in a mi dit a nih.
    
Mani thawsuoka intodel chu hril lo, inrim loa mi thawsuok sa ringawta innghat nuom tawk hlak ei pung pei, ei lungril puthmang hrim hrim khawm hi peihmang a hun ta hle. Naupang chawmna hai dam hi mi pasie le a mamaw tawn tawn hai ta ding chun a tha thlawt el, sienkhawm a chawmzo zo hai an chu hratin ei la hang thang nawk dam hi chu ei inenawn a tul hle in an lang. Lawm a um lai zingin ei hmangsuol leia a “PAAP” ei chunga tlung ding dam ngaituo hlak inla nuom a um. Nu le pa then tam tak hi chu ei school kai sung po po sap han missionary sina ngaia an mi lo chawmlien dam ei ni ta a, eini an mi chawmlien hnunga ei nau hai chen ei lan chawm sawng tir nawk dam hi kawngkhat ngaituo chun piengsuolna leia naute an damsung enkawl le chawm ngaia um hai le thuhmun ei nina chin a um tlat a nih. Chun, chawmna leiin nu le pa tam takin nau le te enkawl le inchuktirna kawnga ei thlada deu khawm nisien a hawi. Hi lei hin, kei an mi chawm puitling ta chun ka nau chu keiin ka chawm ve ta ding a nih tia intodel tumna lungril nei thei seng inla chu ra tha tak an suo ngei beisei a um. Ram danga inthawk ni lo, Kohran han mani kut kawi ngeia intodela, thangpui ngai hai kuoma sawmdawlna  pea rawng ei bawl thei hun ding hi nghakhla a um ngei! Chu huna chun Pathien hming khawm sukmawi zuol ngei a tih.






Post a Comment

Powered by Blogger.