~ Prof Lal Dena

September 30,2015: Kei hi dam naw lei le lo thei lo thil a ni ngawt naw chun zingkar dar 5 le dar 6 kar walking thaw hlak ka nih a. Hi tuk ruok hin chu mi ram le tuiah ram hnuoi nawk nghal, dar 6 le dar7inkar Mizoram Tourist Lodge le Lengpui inkarah walking-in ka fe a. Dar 6:46-in ka Nokia Lumia 630-in a mi hung inri dar dar a. Ka zuk on chu beisei phak lo le duthusam khawma ka sam phak lo, ka mobile hmaiah chun M.Moi a hung inziek that a. M.Moi hi tu dang ni loin Thangthar Tuopui hmeltha ei ti kha a nih.

Phur takin ka hang ‘hi’ nghal a, “Gud Morning. Glad to hear your sweet voice” ka hang tih hman rek chu! Ramhnuoia um, a mi hre ding um lo hai chu, hang romantic deuh ka tum a. Pu Zirsangkim-in  ‘Chhai sual di’a hril ang elin, beisei naw tieng daihah, sir khingtienga inthawk chun, “Ka Pa Ruot (Lalruotthang)-in a biek nuom che” a hung ti le inruolin phone chu a hei pek nghal ni’n ka hriet. Pu Lalruotthang chun “E! hi Pu Sawnglienthuom in, Saidanah ka va leng a…’Vawi tam biethu ei tiem “ ti hla kha, matric ka’n chuk lai kum 1964, Rengkai le Muolvaiphei khuo kara ka phuok a nih” a hung ti nghal a. Kei chun, “video-ah khawm khan Pu Sawnglienthuom phuokin an ziek ni’n ka hriet a” ka la hang ti hram a. Pu Ruot chun video siemtuhai khawma an ngaidam inhni thu a mi hung hril ta peih a. Ama le kan inbiek zo hin, Pu Sawnglienthuom khawma “Ka lo hril suol che a nih. Keia phuok an nawh, Pu Lalruotthang phuok a nih” a hung ti zui nghal a.

Pu Lalruotthang hai le Pu Sawnglienthuom hai hi inbie sie thei ding ziezang an ni nawh. Pu Sawnglienthuom naupa’n Pu Ruot hai nau nuhmei neisun a nei a. Kei le Pu Ruot khawm hi Zawlkhawpui suok ve ve, inpawl ngei em em kan nih. Chubaka ka makpa a la hei ni nawkbawk a. Iengkhawm nisien “Thiem thu hril thei kan ta nawh”tiin tawngbauin ka hang inpha nghal aq. Amiruokchu, hi thu hi zieka lo um a lo ni tah leiin, zieka tiemtuhai hriet ngeia ngaidam inhni malama sukfie chu thaw makmaw a hung ni tah. Pu Dailo (Rev.Kh.Thangdailo) khawma, Pune-a inthawkin thurawn a mi hung pek vang vang a, ka lo ngaithaa, a pawi khawp el.

Mi chun “historian” mi ti mei an tih. Kei chun “history inchuktu, student of history” ka’n ti hlak a. History inchuktu chun a thil ziek chu an dik tawk am tia sukfie dingin thudang (cross evidence) a zawng hlak a. Hi hi ka lo thaw der nawh a, ka suksuolna a nih, Pu Sawnglienthuom suksuol khawm a ni nawh. Famkim loin ka hriet a, famkim loin ka lo ziek el a nih. Suksuol hi van hnuoi dan a nih a, ngaidam ruok chu van thil a nih. Ngaidam inhnitu nekin, ngaidamtu ngirhmun an sang lem a, chu chu Pu Ruot (Judith-pa) ngirhmun a nih.

Ngaidam ka’n hni el khelah, Pu Lalruotthang-in a remti chun, ama la hung interview ka ta, Sai hla le Gospel song tha tak tak a phuok hai, ama chanchiin leh a remchangna hmasa tak a, la hung ziek ka tih. Salam, Pu Lalruotthang, lo dam vawng vawng rawh.


Post a Comment

Powered by Blogger.