CCpur, Sepember 30:2015: Manipur Tribals Forum Delhi (MTFD) hai chun vawisun khan JAC,CCPur hai inhmupuina le hohlimna hun hmang puiin hmatieng peia hmalakdan ding hai hriltlangna an nei. Hi huna hin MTFD Convenor Pu Romeo Hmar in  thuhrilna neiin, Manipur Assembly in liemtah August 31, 2015 ni a Anti-Tribal Bill 3 a pass ni a inthawk khan Manipur Tribals Forum, Delhi haiin theitawp suoin thang an lo lak nghal thu le hi Bill hin tlangram mihai a tawkpawi ding thu President le Central a mi pawimaw dang dang hai inhmupuiin hmaisana ngeia hrilhriet an ni ta thu hai a hril bakah New Delhi khawpuiah Tribal Martyrs 9 hai ruong zalna ding siema Coffin March nei dinga riruong a ni thu a hrilsa bawk a nih. Coffin siema um hai chu Jantar Mantar hmuna sie ning ata nitin student organization tum tum haiin Dharna an nei hlak ding thu a hril. Sawrkara inthawka dawnna thatak a um hma po chu Martyrs hai Coffin (kuong) hi Jantar Mantar ah thungpui ning a tih tiin hi huna hin a hril. Hi Coffin March hi 3rd and 5th of October 2015 a nei dinga riruong a nia amiruokchu remchangnaw dang a um leiin la thul hri phawt niin, nei hun ding chu MTFD in mipui inhriettirna a hung siem ding a nih.



Pu Romeo Hmar chun Delh Joint Commissioner of Police Pu Robin Hibu, IPS khawm tuta buoina le inzawmin CCpur hung a tum thu a hril.

MTFD hai hi Pu Romeo Hmar, Convenor hung inrawina hnuoia hung an nia, ama bak a hin Khup Baite, Ricky Haokip, Dr. L. Lamkhanpiang, Dr. Chinkhanlun Guite le Lakpachui Siro haiin an hung zui a nih.

Post a Comment

Powered by Blogger.