Saipum, October 5,2015 (Virthli News) : H.S.A. Rising Day a vawi 76-na chu Hmar Students’ Association, Saipum Unit chun insukhlimna Football Tournament buotsaiin, ursun takin October ni 3 zan khan a lo hmang liem tah. Rising Day lawmna programme tum tuma hin Chief Guest, Guest of Honour le khuoltha iemani zatin an hmangpui a nih.


Rising Day inserna ni fawmin Football Tournament buotsai a ni a. A nipuini hin zing programme hmang a ni zovin inkhelna hun nei a nih. Venglai FC le VMS FC chun Rising Day Tournament final an khel a, Venglai FC chun hratna an chang. Zan hunah programme phuisui tak hmang  niin, Hmar hlasakthiem chul theilo Pu Laltuoklien (Sinlung Disco) chun mipui a sukhlim hne hle a nih. Zan huna khuoltha Vanlallien Pulamte, Asst. Prof. Chun inchukna (Education) pawimawzie uor takin a hril a. Sinlung Hills/Demand Area ngirsuokna ding chu “Inchukna” chau a ni thu a hril. Lawmman semnahai nei a ni zovin zan dar 11 velin Rising Day lawmna hun khar a nih.

H.S.A. Saipum Unit Chungchang:
All India-a dingin H.S.A. Saipum Unit thuoituhai, abiktakin Unit President Upa Lalrochung Varte  hi a upatak ring a um. Kohran Upa ngatin H.S.A. an hang keihruoi hi entawntlak an niin, a pawimawzie le tulzie ei man thiem ngei ring a um. Pu L.B. Pulamte chun, “Keini Saipum H.S.A. thuoituhai hi lekha inchuk sang khawm kan um naw a. Amiruokchu, hienglai rama hin ei hnamin a mamaw ngang el si. Hmar hnam ta dinga a umsun ding tiin ‘tho ro! H.S.A. hi sukhrat ei tiu ie’ kan ti a. Chuongchun, hma kan lak el a nih,” tiin a hril.  Hienglai ei ram delna Demand Area sunga khuo-tinhai hin Saipum khuo hi hang entawn thei inla nuom a um hle. Khawlaidungah Hmartawng an leng a. Hmar Kohran-tinin Hmartawng an hmang a. Hmar hnam tawng le zierang an la vawng hring hle a nih (Sakawrdai khawpuia ‘Hmar Ka nih’ inti ve si, Luseitawng ngaina tlathai hin ei tluk naw hle).
Saipum H.S.A. Unit thuoituhai angin a tulna le pawimawna hrie a, Hmar hnam sunga pawl tum tumhai hi thuoi hang tum thar ei tiu ie...!

Report Writer: Gospel Songate, for Virthli News service




Post a Comment

Powered by Blogger.